Gradwasyon sang Ika-83 nga Klase sang Gilead—Isa ka Makalilipay Gid nga Okasyon

“PASALAMATI ninyo si Jehova, O kamo nga katawhan, kay maayo sia: kay ang iya mahigugmaon nga kaluoy walay katubtuban.” (Salmo 136:1) Amo sina ang tinagipusuon nga ginbatyag sang 4,391 tanan nga nagtambong sa gradwasyon sang ika-83 nga klase sang Watchtower Bible School of Gilead sining tigragas. Malipayon nga nagpauli ang tanan bangod sang mga pamulongpulong, mga eksperiensia, kag drama sa Biblia nga ginpakita sa tion sang programa. Ang gradwasyon ginhiwat sang Septiembre 6, 1987, sa matahom nga Jersey City As­sem­bly Hall, nga sang una gintawag nga Stan­ley Thea­ter.

Sa tapos sang nagabukas nga ambahanon, kag pangamuyo ni John ­Booth sang Nagadumala nga Hubon, gin-abiabi sang tsirman nga si Albert ­Schroeder, isa pa ka katapo sang Nagadumala nga Hubon, ang tanan sa sining makalilipay nga okasyon. Ang 24 ka estudyante naghalin sa lima ka pungsod, kag ipadala sa walo ka kadutaan. Ginpadaku ni Broth­er ­Schroeder ang pagsalig sang katawhan ni Jehova bangod ang ila pagtuo napasad sa pat-od nga mga butang. Nahibaluan nila, halimbawa, nga si Jehova amo ang Soberano sa bug-os nga uniberso kag nga ang iya Pulong, ang Balaan nga Biblia, amo ang bug-os nga kamatuoran. Tuhay gid ini sa mga pilosopiya sang tawo nga napasad sa mga walay kapat-uran kag mga ispikulasyon.

Ang una nga humalambal amo si Martin Poet­zin­ger, isa man ka katapo sang Nagadumala nga Hubon, nga naghinguyang sing siam ka tuig sa kampo konsentrasyon sang Nazi. Ang iya tema amo “Sin-o ang Imo Ginasaligan?” nga ginpasad sa Hulubaton 3:5, 6. Ginpadaku niya sa mga estudyante nga dapat sila magsalig sing bug-os kay Jehova kag sa iya kitaon nga organisasyon, subong man dapat nila pamatud-an ang ila pagkamasaligan subong indibiduwal. Ang paghanas sang mga estudyante sa Gil­ead isa lamang ka sadsaran; dapat sila karon magpatindog sa sini paagi sa pagsunod sang laygay ni Pablo sa Efeso 5:15, 16. ‘Indi magdulog,’ laygay sang humalambal. ‘Sa inyo kaladtuan subong mga misyonero, makasumalang kamo sing mga problema sa hambal, klima, kalan-on, kag iban pa; apang paagi sa pagsalig kay Jehova, malubad ninyo ina tanan nga problema. Ang gugma sa mga tawo amo ang inyo yabi sa kadalag-an. Ang tanan nga pagpalig-on nagagikan sa Dios; ang tanan nga pagpaluya nagagikan kay Satanas.’

Ang masunod nga humalambal amo si Eldor Timm, isa ka katapo sang Komite sang Pabrika, nga nagpasad sang iya pamulongpulong sa 2 Corinto 13:5: “Padayon nga tilawi ang inyo kaugalingon kon yara kamo sa pagtuo.” Nakatapos ang mga estudyante sa nasulat nga mga pagtilaw, siling niya, apang magaatubang sila sing madamo pa nga pagtilaw sa ila kaladtuan subong mga misyonero. Ang ila pag-atubang sa sining mga pagtilaw amo ang magapat-od sang ila kadalag-an subong mga misyonero. Dapat sila magbantay batok sa sobra nga pagsalig paagi sa pagpamati sa laygay: “Sia nga nagahunahuna nagatindog sia mag-andam nga indi sia mapukan.” (1 Corinto 10:12) Padayon sila nga magauswag kon maghupot sila sing maayong panghunahuna.

Ang isa ka katapo sang Komite sang Departamento sa Serbisyo, nga si Joel ­Adams, amo ang nagsunod. Nagpamulongpulong sia sa tema nga: “Maghunahuna Kaangay ni Jesus, Magpakita sing Personal nga Interes sa Iban.” Daw ano kaayo nga halimbawa ang ginpakita ni Jesus sa sini! Ang iya halimbawa sang pagkadimakagod kag pagkamapainubuson ginpadaku para sa aton sa Filipos 2:3-5. Kon ang iban isa ka pagtilaw sa aton bangod sang ila mga kakulangan ukon kakulang sing taktika, himuon naton ang aton labing masarangan sa pagpakita sing kaayo sa ila. Sa tion sang kurso sa Eskwelahan sa Gil­ead, madamo ang nagpakita sing interes sa mga estudyante; karon sila naman ang maghimo sini sa iban. Ang labing madinalag-on nga mga misyonero amo sila ang nagapakita sing interes sa mga kinabatasan sang iban, sa ila hambal, mga kinahanglan, kag iban pa.

Masunod, ginpalig-on ang mga estudyante sang isa nga nangin misyonero sa sulod sang madamo nga tinuig, si ­Lloyd Bar­ry, isa man ka katapo sang Nagadumala nga Hubon. Nagpamulongpulong sia sa tema nga “Mag-amba kay Jehova,” pasad sa Salmo 96:1. Ang katawhan ni Jehova nalipay sa pag-amba. Ang pag-amba kaupod sang kalipay, kag gani ginpalig-on niya ang mga estudyante nga indi gid pagdulaon ang ila kalipay sa pagdala sing kamatuoran sa iban. ‘Kon kinahanglan kamo magtuon sing isa ka bag-o nga hambal,’ laygay niya, ‘ibutang ang inyo tagipusuon sa sini sa umpisa gid. Ang Yawa magatinguha sa pagpaluya sa inyo, pahidlawon kamo, kag magtuga sing indi paghiusa sa tunga ninyo. Indi gid sia pagtuguti bisan sing isa ka pulgada!’ Ginsambit ni Broth­er Bar­ry ang “deano sang mga misyonero,” si Edwin Skin­ner, nga nag-alagad sa India sing 60 ka tuig, kag karon sa edad nga 93 nagapangabudlay gihapon sa bug-os nga adlaw. Suno kay Broth­er Skin­ner, ang sekreto sa kadalag-an subong misyonero may apat ka tinaga: “Pagkamapainubuson amo ang sekreto!”

Pagkatapos sining mga pamulongpulong, ginbasa sang tsirman ang pila ka telegrama nga nagapanginbulahan sa mga estudyante kag nagaabiabi sa ila. May mga mensahe nga nabaton gikan sa Bolivia, Can­ada, Ecuador, Honduras, Espanya, Sweden, kag Trinidad.

Si Jack Red­ford, isa sang mga manunudlo sa Eskwelahan sang Gil­ead, nagpamulongpulong sa tema nga “Magpabilin nga Abyan ni Jehova.” Nagsugod sia paagi sa pagsiling nga madamo sing komersial nga institusyon nga nagatanyag sing paghanas agod mangin madinalag-on sa negosyo paagi sa pagpangita sing mga abyan kag pag-impluwensia sa mga tawo. Ang mga estudyante, subong palaabuton nga mga misyonero, gintudluan man kon paano makapangita sing mga abyan kag makaimpluwensia sa mga tawo, apang, indi bangod sa makagod nga daug, kundi agod ang mga tawo mangin mga abyan sang Dios. ‘Ang inyo kabuhi isa ka pagsakripisyo sang kaugalingon,’ siling sang humalambal. ‘Nakabaton kamo sa walay bayad, ihatag ninyo sa walay bayad. Wala sing kaayawan ukon kalipay nga daku pa sa kadalag-an nga mabuligan ang mga tawo nga mangin mga abyan sang Dios. Ang pagpakig-abyan sa Dios amo ang labing daku nga kadungganan nga matigayon sang bisan sin-o nga tinuga. Ang Santiago 2:23 nagasiling nga si Abraham nangin abyan ni Jehova bangod nagtuo sia sa Dios. Nagkadto sia sa isa ka dumuluong nga pungsod kag wala magbalikid; indi man kamo nga mga misyonero magbalikid, kundi, sa baylo, magtulok kamo sa unhan sa mga pagpakamaayo sang bag-ong kalibutan sang Dios.’

Si Ulysses Glass, manunudlo sa Gil­ead kag rehistrador sang eskwelahan, masunod nga nagpamulongpulong sa tema nga “Ang Katapusan nga Tolon-an.” Nagsiling sia nga naton-an sang mga estudyante kon daw ano kasangkad kag kaestrikto ang kasuguan ni Jehova. Subong halimbawa, gintudlo niya ang madamo nga detalye nga naangot sa mga halad nga ginahalad anay sang Adlaw sang Katumbasan kag ang madamo nga sapat nga nadalahig. (Levitico, kapitulo 16) Gindayaw niya ang mga estudyante sa ila pagpakita sing tinagipusuon nga apresasyon kag nagsiling nga ang Salmo 145:7 nagakaigo nga nagalaragway sang ila panghunahuna: “Ibungat nila ang kabugana sang imo pagkaayo, kag bangod sang imo pagkamatarong magaamba sila sing malipayon.” Sa iya konklusyon, ginbalikwat man niya ang Hulubaton 3:5-7, nga ginapadaku nga dapat sila ‘magsalig kay Jehova sa bug-os nila nga tagipusuon.’

Si Brother F. W. Franz, ang 94-anyos nga presidente sang Eskwelahan sang Gil­ead subong man presidente sang Watch Tower Bible and Tract Society, naghatag sang nagatakop nga pamulongpulong sang aga. Gin-asoy niya ang maragtas sang Sosiedad kutob sang tion sang unang presidente, si C. T. Rus­sell, tubtob sang ginpatok ang Eskwelahan sang Gil­ead. Gin-apresyar sing daku sang tanan ang iya mabaskog kag mapagsik nga pagpamulongpulong. Sa tapos sang iya pamulongpulong, ginbaton sang 24 ka estudyante ang ila diploma upod ang pila ka regalo, kag dayon ginbasa sang isa sa mga estudyante ang isa ka matahom nga sulat nga nagapabutyag sing apresasyon sang mga estudyante sa tanan nga bulig nga ila nabaton gikan sa Nagadumala nga Hubon kag gikan man sa pamilya Bethel.

Sa tapos sang intermisyon nga mga duha ka oras, gindumalahan ni Phil Wil­cox, isa ka katapo sang Komite sang Watchtower ­Farms, ang pinalip-ot nga pagtinuon sa bag-o nga Watchtower nga sa diin ang mga pamangkot sa pagtinuon ginsabat sang mga estudyante. Ginsundan yadto sang programa sang mga estudyante nga sa diin gindrama nila ang mga eksperiensia nga ila naagihan samtang nagapanaksi kon hapon sang Mierkoles sa Siudad sang Nueva York. Bahin ini sang ila paghanas sa Gil­ead. Ginpasundayag man nila sing maathag ang nanuhaytuhay nga mga problema nga ila ginapaabot nga masugata nila kon makalab-ot sila sa ila asaynment sa iban nga pungsod.

Subong nagakaigo nga konklusyon sa bug-os nga programa, ang mga estudyante nagpakita sing isa ka may pinasahi nga panapot nga drama sa Biblia sa duha ka bahin, nga nagapadaku sang pagkaserioso sang tion nga aton ginakabuhian. Ginhimo ini sang drama paagi sa pagpaanggid sang aton adlaw sa mga panahon sang paghukom sang una. Sang alas 4:15 s.h., paagi sa pag-amba sing ambahanon nga “Theo­cracy’s In­crease” kag pangamuyo sang katapo sang Nagadumala nga Hubon nga si Milton Hen­schel, ang labing makalilipay nga programa natapos.

[Laragway sa pahina 23]

Ika-83 nga Naggradwar nga Klase sang Watchtower Bible School of Gilead

Sa listahan sa ubos, ang mga kubay nanumerohan halin sa una pa likod kag ang mga ngalan nalista halin sa wala pa tuo sa tagsa ka kubay.

(1) Melin, D.; Goode, M.; Ramos, M.; Chow, N.; Hermanson, A.; Dagostini, D. (2) David, E.; DiPaolo, A.; Nei­man, D.; Shephard, J.; Foster, M.; Ramos, R. (3) Foster, W.; Melin, D.; Fristad, D.; Fristad, R.; White, L.; Dagostini, F. (4) Neiman, D.; Ness, S.; Shephard, D.; Goode, J.; White, K.; Hermanson, L.