Dugang Pa nga mga Misyonero Para sa Bug-os Globo nga Ani
ANG Septiembre amo ang bulan sang ani para sa mga mangunguma, apang ang mas importante nga ani gindugukan sang isa ka dakung kadam-an sa Jersey City Assembly Hall of Jehovah’s Witnesses, sa tabok sang Hudson River gikan sa Siudad sang Nueva York, sang Septiembre 8, 1991. Ang ika-91 nga klase sang Watchtower Bible School of Gilead manuggradwar. Mga 4,263 ka katapo sang pamilya Bethel kag imbitado nga mga bisita ang nagtambong didto, kag 1,151 pa paagi sa gin-angot nga linya sang telepono sa ulong-talatapan sa Brooklyn kag sa mga farm sa Wallkill kag sa Patterson.
Ginbuksan sang presidente sang Gilead School, nga si Frederick W. Franz, nga halos 98 anyos na, ang programa paagi sa makatalandog kag matinahuron nga pangamuyo. Si Albert D. Schroeder, isa ka katapo sang Nagadumala nga Hubon kag rehistrador anay kag instruktor sang eskwelahan, amo ang tsirman sang programa sang gradwasyon. Ginpahanumdom niya sa tumalambong ang Salmo 21:1, 2 kag ang iban pa nga mga tagna nga nagatagna sining tion sang kagamo kag kagubot sa tunga sang mga pungsod. Ining magamo nga kahimtangan nagkahulugan sing pagbukas sang madamo nga bag-ong mga latagon para sa pag-ani nga hilikuton.
Ang una nga pamulongpulong sadto nga adlaw ginhatag ni George M. Couch, isa ka katapo sang Komite sang Bethel. Ang iya tema amo “Isipa ang Inyo mga Pagpakamaayo.” Ginpahanumdom niya ang mga estudyante sang Gilead nga indi pa ulihi nga sugdan ini nga buhat. Nagsiling sia nga ang mga estudyante ginpakamaayo gid apang ining pagpakamaayo natigayon lamang sa tapos sang lakas nga pagpangabudlay. Sing kaanggid, ang 97-anyos nga si Jacob nakigdumog sa bug-os nga gab-i batok sa isa ka anghel—agod lamang makabaton sing pagpakamaayo. (Genesis 32:24-32) Apang ginlaygayan ni Utod Couch ang mga estudyante nga indi paghunahunaon ang negatibo nga mga butang kundi mangin pagpakamaayo sa iban paagi sa pagpalambo sing malinong nga panghunahuna paagi sa pangamuyo kag determinasyon.
Si John E. Barr sang Nagadumala nga Hubon amo ang masunod nga naghambal sa tema nga “Maghigugmaanay Kamo.” Ang mga sumulunod ni Jesus anay nangin handa sa pagpanginmatay para sa isa kag isa. “Mabatyagan bala ninyo ini nga sahi sang gugma sa inyo tagipusuon?” pamangkot niya sa mga estudyante. ‘Kon wala sini nga gugma,’ siling niya, ‘wala kita sing pulos. Subong lamang sina ka simple.’ (1 Corinto 13:3) Ginsambit ni Utod Barr ang pila ka praktikal nga paagi sa pagpakita sing gugma. Ginpalig-on niya ang mga estudyante nga tahuron ang masigkamisyonero, kag pirme magtinguha sa paghambal sing mataktikanhon. ‘Kalimti ang diutay nga mga indi paghangpanay,’ laygay niya sa ila, nga ginabalikwat ang 1 Pedro 4:8. Nagsiling sia nga bisan gani ang mga adlaw sang pagluto sang mga misyonero mga okasyon nga sa diin makapakita sila sing gugma paagi sa pagtamod sa sini nga hilikuton nga indi isa ka katungdanan lamang. Ginpahanumdom niya ang mga estudyante: “Wala gid kita nagauntat sa pagpakita sa aton kauturan nga mga lalaki kag mga babayi sing gugma.”—Roma 13:8.
“Daw Ano ka Masinaligon Kamo?” amo ang makawiwili nga tema nga ginpasangkad ni David A. Olson sang Komite sang Departamento sa Pag-alagad. Ginpadaku niya ang pagsalig sa duha ka bahin: kay Jehova kag sa iya organisasyon, nga sa amo may madamo kita nga rason (Hulubaton 14:6; Jeremias 17:8); kag sa kaugalingon. Ang mga misyonero may rason nga magpakita sing isa ka bahin sang pagsalig sa kaugalingon, subong sang ila eksperiensia subong mga ministro kag sang pagsalig sa ila ni Jehova kag sang iya organisasyon. Si apostol Pablo nagpakita sina nga pagsalig bangod sina man nga mga rason. (1 Corinto 16:13; Filipos 4:13) Apang, nagpaandam si Utod Olson, batok sa sobra nga pagsalig nga ginapalambo sang kalibutan, subong sang ginsiling sang isa ka kilala nga manunulat: “Pirme ko ginabalikwat ang akon kaugalingon. Nagadugang ini sing sabor sa akon pagpakighambal.” Apang, ang pagsalig nga ginatimbangan sang pagkamapainubuson nagapatubas man sa iban sing pagsalig. Matuod ini sa bahin ni Pablo.—Filipos 1:12-14.
Si Lyman A. Swingle sang Nagadumala nga Hubon masunod nga naglaygay sa mga estudyante: “Kadto Kamo sa mga Latagon nga Alanihon, Kamo nga mga Gradwado sang Gilead!” Nagsiling sia nga ini nga tion amo ang adlaw sang pag-ani para sa Eskwelahan sang Gilead kag para sa bug-os kalibutan nga paghiliutod, kay ang mga gradwado magalakat kag magabuylog sa linibo ka mga gradwado anay nga yara pa sa hilikuton sang pagmisyonero—ang iban gikan sa una, ikaduha kag ikatlo nga klase sang katuigan 1940! Nagsiling si Utod Swingle nga wala sing isa sadto nga nakahibalo nga ang hilikuton sang pagmisyonero magapadayon sing 50 ka tuig pa, ukon nga ang Nazismo, Pasismo, kag ang iban pa nga balagbag sang gobierno sa pagbantala nga hilikuton malusod. “Kon nagadayaw kita sa nahimo ni Jehova sang una,” pamangkot niya, “kamusta sa palaabuton?” Naghinakop sia paagi sa makapulukaw nga panawag sa mga estudyante: “Kadto kamo sa latagon!”
Nian ang duha ka panguna nga instruktor sang Eskwelahan sang Gilead nagpamulongpulong sa ika-91 nga klase sa katapusan nga tion. Si Jack D. Redford naghambal sa tema nga “Magkuha sing Kaalam.” Ang Eskwelahan sang Gilead, siling niya sa mga estudyante, nagatudlo sing ihibalo kag paghangop, apang dapat sila magkuha sing kaalam, ang ikasarang sa paggamit sang ila ihibalo sa husto nga paagi. Ginlaygayan niya ang mga estudyante nga sikwayon ang mito nga natun-an nila ang tanan sa Gilead. “Ang importante amo ang matun-an ninyo sa tapos sang eskwelahan.” Lakip sa mga butang nga dapat pa nila tun-an amo: ang pagpakig-angot sing mahidaiton sa mga tawo, ang pagsiling sing “Pasensiaha ako” sa tiayon, sa masigkamisyonero, kag sa lokal nga mga utod nga mga lalaki kag mga babayi; ang pagbantay batok sa paghinakop pasad sa una nga impresyon kag ang paghisayod nga ang tagsa ka problema masibod, nga nagakinahanglan sing madalom nga paghangop sa mga kahimtangan antes maghatag sing maalamon nga laygay; kag ang pagtahod sa lokal nga mga kauturan bangod sang ila ikasarang sa pagbatas sang mabudlay nga mga kahimtangan.—Hulubaton 15:28; 16:23; Santiago 1:19.
Si Ulysses V. Glass, ang rehistrador sang Eskwelahan sang Gilead, naghimo sang Filipos 3:16 nga tema sang iya pamulongpulong. Gindayaw niya ang klase sa ila pag-uswag kag ginlaygayan sila nga magpadayon nahisuno sa sina nga kasulatan. Samtang dapat sila magpadayon sa pagkuha sing sibu nga ihibalo, siling niya, indi gid nila mahibaluan ang tanan. Gin-ilustrar niya ang punto paagi sa digital nga relo. Mahimo nga mapaandar ini sang tag-iya sini nga wala sing ihibalo kon paano ini aktuwal nga nagapanghikot. Sing kaanggid, indi dapat pagpakanubuon sang mga misyonero ang iban nga, bisan pa indi tupong sa ila madalom nga paghangop, nakahibalo sang kon ano ang importante—kon paano magkahadlok kay Jehova. (Hulubaton 1:7) Ginpahanumdom niya sa klase ang pagkaimportante sang paghupot sing ‘simple nga mata.’ (Mateo 6:22) Ang espirituwal nga mata sarang man matabunan subong sang pisikal nga mata. Ang iban, halimbawa, may limitado nga panan-aw—nagatuon lamang sang ila panulok sa pila ka detalye sa baylo sang bug-os nga laragway—samtang ang iban naman, sa kabaliskaran, nagatan-aw lamang sang kadaygan kag wala nagahatag sing igtalupangod sa importante nga mga hulusayon nga dapat nila atubangon.
Ang hingapusan nga pamulongpulong sang aga gintig-uluhan nga “Pagkilala kag Pagpanghikot Upod sa Organisasyon ni Jehova,” nga ginhatag ni Theodore Jaracz sang Nagadumala nga Hubon. Si Utod Jaracz nagsiling nga bisan pa linibo ang mga organisasyon kag mga katilingban sa kalibutan, isa lamang sini ang wala maghalin sa kalibutan. Paano makilala ang isa nga nagatiglawas kay Jehova? Ang Pulong sang Dios nagahatag sing nagapakilala nga mga tanda. Ginapakita sang Biblia nga ang iya langitnon nga mga tinuga organisado gid. (Salmo 103:20, 21; Isaias 40:26) Ang dutan-on nga organisasyon ni Jehova makilala man paagi sa kahim-ong sini subong man paagi sa pagkanapain sini gikan sa kalibutan, sa estrikto nga pagsunod sini sa mga prinsipio sang Biblia, sa mataas nga nibel sang katinlo sa moralidad sini, kag sa gugma sa tunga sang mga katapo sini. Ginlaygayan ni Utod Jaracz ang mga estudyante sang Gilead nga buligan ang pinakamadamo nga mahimo sa ila teritoryo nga makilala ang organisasyon ni Jehova sing Makasulatanhon. May kaangtanan sa sini, ginpahibalo niya ang isa ka makakulunyag nga impormasyon: ang Eskwelahan sang Gilead magadoble sa kadakuon sa indi madugay, tubtob sa mga 50 ka estudyante sa ika-93 nga klase! Subong man, ang mga klase sang Gilead Extension School sa Alemanya magasugod sa pareho nga tion. Malawig kag mabaskog ang pinalakpak!
Subong putukputukan nga bahin sang aga, ginbaton sang 24 tanan ka estudyante sang Gilead ang ila mga diploma. Sa indi madugay magakadto sila sa 12 ka nanuhaytuhay nga pungsod sa bug-os nga kalibutan. Nagpresentar ang klase sing tinagipusuon nga resolusyon, nga nagapasalamat sa Nagadumala nga Hubon kag sa pamilya Bethel. Pagkatapos sang panyaga, gindumalahan ni Utod Charles J. Rice sang Watchtower Farms Committee ang pinalip-ot nga Pagtinuon sa Lalantawan. Nian ang mga gradwado nagpaguwa sing isa ka masadya nga programa, nga nagadrama sang pila sang mga naeksperiensiahan nila sa pag-alagad sa latagon sa tion sang ila lima-ka-bulan nga kurso sa Wallkill, Nueva York. Sa tapos sadto, ang mga manugbantala nga nagtiglawas sa pila ka lokal nga mga kongregasyon nagpresentar sing isa ka drama nga natig-uluhan Mga Pamatan-on nga Nagadumdom sang Ila Manunuga Karon.
Sa pagtakop sang programa, si Utod George Gangas, 95-anyos nga katapo sang Nagadumala nga Hubon, naghalad sing buhi nga pangamuyo kay Jehova. Ang tumalambong nagpauli nga malipayon, nga ang tagsatagsa sa wala sing duhaduha napahulag nga pauswagon ang ila bahin sa bug-os globo nga pag-ani nga hilikuton.
[Kahon sa pahina 22]
Mga Estadistika sang Klase
Kadamuon sang pungsod nga gintiglawas: 6
Kadamuon sang pungsod nga ginpadalhan: 12
Kadamuon sang mga estudyante: 24
Kadamuon sang mag-asawa: 12
Promedyo nga edad: 33.4
Promedyo nga tinuig sa kamatuoran: 16.13
Promedyo nga tinuig sa bug-os tion nga ministeryo: 11.3
[Laragway sa pahina 23]
Ika-91 nga Manuggradwar nga Klase sang Watchtower Bible School of Gilead
Sa listahan sa ubos, ang mga idas nanumeruhan gikan sa una pa likod kag ang mga ngalan nalista gikan sa wala pa tuo sa tagsa ka idas.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.