Bag-o nga Puluy-an para sa Gilead nga Eskwelahan sang mga Misyonero

SANG Pebrero 1, 1943, ginhatag ni Nathan H. Knorr, presidente anay sang Watchtower Bible and Tract Society, ang nagabukas nga pamulongpulong sa nahauna nga klase sang bag-o nga eskwelahan. Ginpaathag sa isa ka gatos ka estudyante sadto nga “indi katuyuan sining [eskwelahan] nga sangkapan kamo agod mangin ordenado nga mga ministro. Mga ministro na kamo kag aktibo sa ministeryo sa sulod sang mga tinuig. . . . Ang kurso sang pagtuon . . . para sa pinasahi nga katuyuan nga ihanda kamo agod mangin kapin ka sangkol nga mga ministro.” Tubtob sa karon ang Watchtower Bible School of Gilead nagapadayon sa paghanas sing mga ministro para sa pagmisyonero nga hilikuton sa luwas.

Sadto sang 1943, ang Eskwelahan sang Gilead nahamtang sa rehiyon sang Finger Lakes sa Estado sang Nueva York. Ang Gilead nagpabilin didto sing 17 ka tuig. Nian, sang 1961, ginsaylo ini sa Brook­lyn. Sa anong katuyuan? Ang kurikulum sang Gilead ginadesinyo pirme sa pag-atubang sang mga kinahanglanon sang organisasyon. Ang pagkinahanglan sing nagauswag kag mas maayo sa pag-organisar nga mga sanga sa bug-os nga duta nagkinahanglan sing dugang pa nga pagtudlo sa mga estudyante sang mga katapo sang ulong-talatapan sang mga Saksi ni Jehova, nga nahamtang sa Brook­lyn. Gani sa sulod sang pila ka tuig, ang ginpadaku amo ang paghanas sing mga manugpangabudlay para sa mga sanga. Sa tapos sadto, ang igtalupangod ginsentro liwat sa pagmisyonero nga hilikuton.

Sang nagsunod nga 27 ka tuig, sang 1961 tubtob sang 1988, ang mga estudyante sang Gilead nga Eskwelahan nakatigayon sing pribilehiyo sa pagkabuhi kag sa pagtuon sa tunga sang mga katapo sang ulong-talatapan sa Brooklyn. Nakabenepisyo didto ang mga estudyante gikan sa suod nga pagpakig-upod sa mga katapo sang Nagadumala nga Hubon sang mga Saksi ni Jehova kag upod sa iban pa nga eksperiensiado nga mga ministro. Ano pa ang mas maayo nga paagi sa pagtuon kon paano nagapalakat ang isa ka sanga sang Watch Tower Society? Ang mga estudyante nakabenepisyo indi lamang gikan sa paghanas sa klase kundi gikan man sa pagpanilag sa mga katapo sang ulong-talatapan nga nagapangabudlay kada adlaw.

Ano ang epekto sang Gilead nga Eskwelahan sa internasyonal nga pagbantala nga hilikuton? Sa 93 ka coordinator sang komite sang sanga nga nagaalagad agod huptan ang hilikuton nga organisado sa bug-os nga kalibutan, 74 ang gradwado sa Gilead nga Eskwelahan. Nagapamatuod ini sa ekselente nga paghanas nga nabaton sining mga lalaki sa pag-uyat sing mabug-at nga salabton sa pagbantay sa katawhan sang Dios karon. Indi maisip sang nagalakbay nga mga manugtatap nga nagaalagad karon para sa mga kinahanglanon sang organisasyon ang mga gradwado man sa Gilead nga Eskwelahan. Huo, ang programa sa paghanas sang Gilead nga Eskwelahan nagdungan sa mga kinahanglanon sang organisasyon.

Ang Gilead Nagsaylo Gikan sa Brooklyn

Apang, sa liwat, ginhimo ang desisyon nga halinon ang Gilead nga Eskwelahan. Gani sang tigragas sang 1988, apat ka dekarga nga puno sing mga kasangkapan kag mga gamit para sa opisina ang nag-abot sa ikatlo nga puluy-an sang Gilead​—⁠ang Watchtower ­Farms, nga nahamtang sa Wall­kill, Nueva York. Sa sulod lamang sang duha ka bulan, natapos sang grupo sang main­te­nance ang matahom nga mga hulot-buluthuan, librarya, kag mga opisina para sa eskwelahan. Ang iban nagtrabaho sing adlaw kag gab-i sa paghanda sang mga pasilidad sang eskwelahan agod makaumpisa ang masunod nga klase sa ila paghanas.

Sang Oktubre 17, 1988, ang ika-86 nga klase sang Gilead nagsugod. Sing wala sing lang-at, ginpadayon sang eskwelahan ang katuyuan sini nga ‘maghanas sing mga lalaki kag mga babayi nga mangin kapin ka sangkol nga mga ministro.’ Sa matahom kag bag-o nga mga palibot sini sa Watchtower ­Farms, ang pila ka danyag anay sang orihinal nga eskwelahan sa ­Finger ­Lakes ginpasag-uli.

Ang mga Gradwado sang Ika-86 nga Klase

Sang Marso 5, 1989, ang bug-os nga katapo sang ulong-talatapan sang Watchtower sa Brook­lyn kag sa Watchtower ­Farms nagtipon sa Jersey City As­sem­bly Hall agod mag-ambit sa gradwasyon sang ika-86 nga klase. Ginbuksan ni Daniel ­Sydlik, katapo sang Nagadumala nga Hubon, ang programa paagi sa pangamuyo. Ang tsirman amo si Karl ­Klein sang Nagadumala nga Hubon. Sa iya introduksion, ginpatalupangod niya ang kinatuhayan sang mga misyonero sang Cristiandad kag sang mga Saksi ni Jehova. Daw ano ka madinalag-on ang mga misyonero nga nahanas sa Gilead sa pagtudlo sing kamatuoran sang Pulong sang Dios sa mga pungsod subong sang Hapon, nga sa diin kapin sa 131,000 ka Saksi karon ang aktibo nga nagapakigbahin sa pag-alagad sa latagon!

Paagi sa tema nga “Himua ang Maayong mga Buhat nga Mangin Marka Ninyo,” ginlaragway ni Donald ­Krebs ang importante nga papel sang mga misyonero sang Gilead sa pag-uswag sa bug-os nga kalibutan sang organisasyon ni Jehova. “Ang inyo maayong mga buhat sa latagon sang pagmisyonero subong mga manunudlo sang Pulong sang Dios amo ang inyo . . . nagapatuhay nga kinaiya. Ginapalig-on namon kamo nga magpangabudlay sing lakas. Pakamaayuhon ni Jehova sing lakas ang inyo mga panikasog.”

Si George Gangas, katapo sang Nagadumala nga Hubon, naghatag sing mapagsik nga pamulongpulong sa tema nga “Ang Biblia Amo ang Labing Maayo nga Libro sa Idalom sang Adlaw.” Ginlaygayan niya ang mga gradwado: “Indi pagkalimti nga ton-an ang Biblia. Ang Biblia puno sing espirituwal nga mga hiyas . . . nga nagabadlak kag nagainggat. Ang isa nga nagaapresyar sa sini indi maayawan sa pagtulok sa sini kag malipay sa nagainggat nga mga kinaiya sini.

Ang tema ni Richard Eldred amo ang “Makahimo Kamo sing Kinatuhayan.” Samtang ginatandog sang bag-ong mga misyonero ang kabuhi sang iban nga katawhan, makahimo sila sing positibo nga kinatuhayan. Ang mga lalaki kag mga babayi sang dumaan nga mga tion subong nanday David, Nehemias, Debora, kag Abigail nakahimo sing positibo nga impluwensia sa iban paagi sa pag-atipan sa ila sing hanuot, paghupot sing maisugon nga pagtuo, kag pagpakita sing malum-ok, espirituwal nga panimuot.

“Isipa ang mga Pagpakamaayo sa Inyo” amo ang ginhambal ni Lyman ­Swingle, katapo sang Nagadumala nga Hubon, sa manuggradwar nga klase. Sa tapos masambit ang pila sang mga pagpakamaayo nga natigayon sang klase, subong sang lima ka bulan nga pagtuon sing Biblia nga may konsentrasyon, ginpalig-on niya sila: “Samtang nagahilapit ang katapusan, mahimo masapwan ninyo nga nagadasig ang lakat, ang dalan kapin nga batsehon, ang banas kapin kahawa. Apang pat-ura nga indi kamo lapyuon, nga indi gid kamo mag-untat, nga indi gid kamo magdulog.”

Ginpaathag ni Jack Redford, isa sang mga manunudlo, ang tema nga “Indi Pagtuguti ang Inyo Kusog nga Mangin Kaluyahon.” Pasad sa laygay ni Solomon, “Dili ka maglakas katarong,” nagpaandam sia tuhoy sa sobra nga pagsandig sa personal nga mga kinaiya sa baylo nga magsandig kay Jehova. (Manugwali 7:​16, 17) “Ang maayong mga kinaiya nga ginapasobrahan mahimo mangin tugalbong.” Halimbawa, ang isa nga ang iya kusog amo ang kasuguan kag kahim-ong mahimo nga magpasobra sini paagi sa pagkaestrikto. Sa amo, ginlaygayan ang klase sing subong sini: “Dapat kita tanan mangin alisto sa aton mga kaluyahon, apang dapat man kita mangin alisto sa aton mga kusog. Mangin matarong apang indi magpakamatarong sa kaugalingon. Magsandig kay Jehova. Himua si Jehova nga inyo kusog.”

Ginpaathag ni Ulysses Glass, nga manunudlo kag rehistrador sang eskwelahan, ang mga pulong ni Jesus, “Itakod ang akon gota sa inyo.” (Mateo 11:​29, 30) Ginaagda diri ni Jesus ang iya mga disipulo nga ‘magpaidalom sa iya gota’ upod sa iya. Indi niya luyag nga pabug-atan sila. Ang mga kinahanglanon sang iban nagapangibabaw sa iya hunahuna. Nagpakita sia sing pagkamapainubuson. Wala niya pagsiluti ang iya mga disipulo. Si Jesus nagsiling, “Magtuon kamo gikan sa akon.” Dapat tigayunon sang isa ka misyonero ang hunahuna ni Cristo. Gindayaw sining humalambal ang espiritu sa paghatag sang klase kag ginpalig-on sila nga ipadayon ang pagpakita sina gihapon nga espiritu sa ila kaladtuan.

Sang nagahingapos ang sesyon sa aga, ang katapo sang Nagadumala nga Hubon nga si Carey Barber naghatag sing mapagsik nga pamulongpulong sa tema nga “Ang Tig-alani Amo ang Katapusan sang Sistema sang mga Butang.” Ginpatalupangod niya ang modernong-adlaw nga katumanan sang ilustrasyon ni Jesus tuhoy sa trigo kag mga gamhon. (Mateo, kapitulo 13) Nahauna, ang mga hinaplas ni Cristo ginatipon. Dayon, labi na kutob sang tuig 1935, ang iban nga mga karnero nagbuylog sa ‘gin-ani.’ Ang Gilead nga Eskwelahan nakahimo sing makatilingala nga hilikuton sa pagbulig sa pag-ani sa mga disipulo ni Cristo.

Sa tapos mahatag ang mga diploma sa mga gradwado, ginbasa sang isa sa ila ang mapagsik nga sulat nga nagapabutyag sang ila mga balatyagon nahanungod sa paghanas kag igtalupangod nga nabaton nila gikan sa mga manunudlo kag sa pamilya Bethel. Sa bahin, ang sulat nagsiling: “Gindayaw namon ang interes nga ginpakita ninyo sa amon indi lamang subong klase sang Gilead kundi subong mga indibiduwal kag isa ka dalanon nga takus ilugon. Magahalin kami nga nasamo ang balatyagon​—⁠masubo sa paghalin bangod mingawon kami sa inyo apang malipayon kag malangkagon nahanungod sa amon bag-o nga asaynment.”

Para sa programa sang hapon, ang mga gradwado nagpakigbahin sa Pagtinuon sa Lalantawan nga gindumalahan ni ­Ralph ­Walls. Nian gindrama sang klase ang pila sang dalagku nga mga punto sang mga eksperiensia nga ila naagihan sa pag-alagad sa latagon sang tion sang pagtener nila sa Watchtower ­Farms. Ang Komite sa Pagtudlo sang Nagadumala nga Hubon nagpresentar sing malip-ot nga drama nga natig-uluhan “Ang Pagtahod sa Awtoridad Nagapalig-on sang Paghiusa” kag sing ­slides nga nagalaragway sang mga kalipay nga naagom sang mga misyonero sa madamong kadutaan. Ang programa natapos paagi sa tinagipusuon nga pangamuyo ni Fred­erick ­Franz, 95-anyos nga presidente sang Watchtower Bible School of Gilead.

Paagi sa ila mapagsik nga reaksion sa programa, ginpakita sang tumalambong ang ila pagsakdag sa palaabuton nga mga misyonero kag apresasyon sa programa. Wala sing duhaduha nga ang 24 ka gradwado sang ika-86 nga klase sang Gilead determinado sa paghimo kay Jehova nga ila kusog pagkadto nila sa ila isa ka pribilehiyo nga asaynment sa latagon sang pagmisyonero.

[Kahon sa pahina 21]

REKORD SANG MGA ESTUDYANTE

Kadamuon sang mag-asawa: 12

Kadamuon sang estudyante: 24

Kadamuon sang pungsod nga ginhalinan sang mga estudyante: 6

Kadamuon sang pungsod nga ginpadalhan: 12

Promedyo nga edad: 32.3

Promedyo nga tuig sa kamatuoran: 14.1

Promedyo nga tuig sa bug-os-tion nga ministeryo: 9.1

[Piktyur sa pahina 23]

Ika-86 nga Nagradwar nga Klase sang Watchtower Bible School of Gilead

Sa listahan sa ubos, ang mga raya nanumerohan halin sa atubang pa likod, kag ang mga ngalan nalista halin sa wala pa tuo sa tagsa ka raya.

(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.