Eskwelahan sang Gilead Nagapadala sang Iya Ika-100 nga Klase
ANG Watchtower Bible School of Gilead may importante nga papel sa pagwali sing Ginharian sang Dios sa bug-os nga globo sa modernong panahon. Halin sang magsugod ang Eskwelahan sang Gilead sa paghanas sing mga misyonero sang 1943, ang mga gradwado sini nakaalagad sa kapin sa 200 ka kadutaan. Sang Marso 2, 1996, ang ika-100 nga klase naggradwar.
Sa sulod sang tion nga nagaeskwela ang mga estudyante kapin sa 2 metros nga niebe ang nahulog sa palibot sang Watchtower Educational Center sa Patterson, New York. Sing indi makapakibot, may yelo nga nagakahulog sang adlaw sang ila gradwasyon. Walay sapayan, puno ang awditoryom, kag nagaawas nga mga tumalambong ang namati sa Patterson, sa Wallkill, kag sa Brooklyn—2,878 ka tawo tanan.
Si Theodore Jaracz, isa ka katapo sang Komite sa Pagpanudlo sang Nagadumala nga Hubon, amo ang nangin tsirman. Sa tapos sang mainit nga pag-abiabi sa mga dumuluaw nga nagtambong halin sa madamo nga kadutaan, gin-agda niya ang tanan sa pagtindog kag ambahon ang ambahanon numero 52. Nagguob sa awditoryom ang pagdayaw kay Jehova samtang ginaamba nila ang “Our Father’s Name,” gikan sa libro nga Sing Praises to Jehovah. Yadtong ambahanon, upod ang komento sang tsirman nahanungod sa paggamit sang edukasyon sa pagdayaw kay Jehova, amo ang nagpaluntad sang atmospera sang programa nga magasunod.
Makasulatanhon nga Laygay Gikan sa mga Gulang
Ang una nga bahin sang programa amo ang malip-ot nga mga pamulongpulong sa manuggradwar nga klase sang pila ka madugay na nga mga alagad ni Jehova. Si Richard Abrahamson, isa ka katapo sang talapuanan sa ulong-talatapan nga nagsugod sang iya bug-os tion nga pag-alagad sang 1940, nagpalig-on sa klase: “Padayon nga Magpasibu.” Ginpahanumdom niya sila nga subong mga Cristiano nakaagi na sila sing nanuhaytuhay nga mga tion sang pagpasibu sa ila kabuhi, lakip ang ila lima ka bulan nga pag-eskwela sa Gilead. Gani ngaa dapat sila magpadayon sa pagpasibu?
Ginpaathag sang humalambal nga ang ekspresyon nga gingamit ni apostol Pablo sa 2 Corinto 13:11 “nagapahangop sing isa ka progresibo nga paagi, isa ka padayon nga pagpasakop sa pagdihon ukon pagpadalisay ni Jehova sa isa, isa ka pagpasibu, agod nga matuman sang isa ang kapin kabudlay nga mga talaksan ni Jehova.” Sa ila asaynment sa iban nga mga pungsod, bag-o nga mga hangkat sa ila pagtuo ang atubangon sang manuggradwar nga klase. Dapat sila magtuon sing bag-o nga pinulungan, magpasibu sa tuhay nga kultura kag mga kahimtangan sa kabuhi, kag magpasibu sa nanuhaytuhay nga mga sahi sang teritoryo. Magapakig-angot man sila sa nanuhaytuhay nga mga personalidad sa ila puluy-an para sa misyonero kag sa ila bag-o nga mga kongregasyon. Kon iaplikar nila sing maayo ang mga prinsipio sang Biblia sa sini tanan nga kahimtangan, upod ang pagkahanda nga pasibuon, nian, subong sang ginsulat ni apostol Pablo, sila man ‘padayon nga magkalipay.’
Si John Barr, isa sang lima ka katapo sang Nagadumala nga Hubon nga nagpakigbahin sa programa, nagkuha sang iya tema gikan sa 1 Corinto 4:9. Ginpahanumdom niya ang iya mga tagpalamati nga ang mga Cristiano isa ka talan-awon sa mga anghel kag mga tawo. “Ang pagkahibalo sini,” siling niya, “nagapadaku pa sang pagkaimportante sang dalanon sa kabuhi sang isa ka Cristiano, labi na kon mahisayod niya nga paagi sa iya ginasiling kag ginahimo, makahatag sia sing talalupangdon nga epekto sa mga nagatan-aw, makita man ukon indi. Sa banta ko isa ini ka butang nga dapat ninyo tanan dumdumon mahal nga mga utod nga lalaki kag babayi sang ika-100 nga klase sang Gilead sa inyo pagkadto sa malayo nga mga pamusod sang duta.”
Ginpalig-on ni Utod Barr ang 48 ka estudyante nga samtang ginabuligan nila ang tulad-karnero nga mga tawo sa pagtuon sing kamatuoran, dumdumon nila nga “nag-utwas ang kalipay sa tunga sang mga anghel sang Dios bangod sa isa ka makasasala nga nagahinulsol.” (Lucas 15:10) Nagapatuhoy sa 1 Corinto 11:10, ginpakita niya nga ang panimuot sang isa tuhoy sa teokratikong mga kahimusan nagaapektar indi lamang sa aton kauturan nga mga lalaki kag mga babayi nga makita naton kundi sa mga anghel man nga indi naton makita. Daw ano ka mapuslanon nga dumdumon ining mas masangkad nga pagtamod sa kahimtangan!
Ginpaathag sang isa pa ka katapo sang Nagadumala nga Hubon, si Gerrit Lösch, isa mismo ka gradwado sang Eskwelahan sang Gilead, ang mga kasulatan subong sang Salmo 125:1, 2; Zacarias 2:4, 5; kag Salmo 71:21 sa pagpakita nga si Jehova ‘nagalikop sa iya katawhan.’ Nagahatag sia sing pag-amlig para sa ila gikan sa tanan nga bahin. Magahatag bala ang Dios sina nga pag-amlig sa tion lamang sang dakung kapipit-an? “Indi,” sabat sang humalambal, “kay si Jehova isa na karon ka ‘pader sang kalayo,’ isa ka pag-amlig para sa iya katawhan. Sa tapos sang inaway sang 1919 ang nagkalabilin sang espirituwal nga Israel nasapwan nga nagakalangkag sa pagbantala sing maayong balita sang Ginharian sa bug-os nga duta subong panaksi sa tanan nga kapungsuran. Mga tiglawas sila sang malaragwayon nga Jerusalem sa kalangitan. Nagapasalig si Jehova sing balaan nga pag-amlig para sa sining mga tiglawas subong isa ka grupo sa tion sang katapusan. Sin-o nian ang makapadulog sa ila? Wala gid.” Daw ano yadto ka makapalig-on para sa ila kag sa tanan nga nagapakig-upod sa ila sing suod sa paghimo sang kabubut-on sang Dios!
Si Ulysses Glass, ang pinakadugay na nga katapo sang talapuanan sang eskwelahan, nagpalig-on sa klase nga ‘humanon na ang ila nitso sa bug-os kalibutan nga organisasyon ni Jehova.’ Ang nitso amo ang isa ka kahimtangan ukon hilikuton nga bagay gid sa mga ikasarang ukon pagkatawo sang isa ka tawo. “Kamo nga malapit na mangin mga misyonero, nasapwan ninyo ang inyo nitso sa bug-os kalibutan nga organisasyon sang mga Saksi ni Jehova,” siling niya. “Apang, bisan pa bilidhon ini sa karon, panugod lamang ini sang inyo kabuhi subong isa ka misyonero.” Dapat sila maghugod sa paggamit sang ila mga ikasarang kag sa pagpasibu sa pinasahi nga mga asaynment nga ginahatag sa ila ni Jehova kag sang iya organisasyon.
Ang hingapusan nga pamulongpulong sa sini nga bahin sang programa ginhatag ni Wallace Liverance, isa ka katapo sang talapuanan sang Gilead nga nag-alagad sing 17 ka tuig sa Bolivia. “Tilawan mo bala ang Dios?” pamangkot niya sa hubon sang mga estudyante. Paano nila dapat himuon ini? Gintilawan sang pungsod sang Israel ang Dios sa sayop nga paagi. (Deuteronomio 6:16) “Sing maathag, sayop nga tilawan ang Dios paagi sa pagreklamo ukon pagkumudkumod ukon ayhan sa pagpakita sing kakulang sing pagtuo sa iya mga paagi,” siling sang humalambal. “Kon mag-abot kamo sa inyo bag-o nga asaynment, pamatuki ina nga huyog,” palig-on niya. Ano, nian, ang husto nga paagi sa pagtilaw sa Dios? “Mahimo ini paagi sa pagpati sa iya ginasiling, paagi sa paghimo gid sang iya ginasiling, kag dayon itugyan sa iya mga kamot ang mangin resulta sini,” paathag ni Utod Liverance. Subong sang mabasa sa Malaquias 3:10, si Jehova nagaagda sa iya katawhan: “Tilawi ninyo ako, palihug.” Nanaad sia nga kon magmatutom lamang sila sa pagdala sang ila ikapulo sa tambubo sang templo, pakamaayuhon niya sila. “Ngaa indi tamdon ang inyo asaynment subong mga misyonero sa amo man nga paagi?” pamangkot sang humalambal. “Luyag ni Jehova nga magmadinalag-on kamo sa sini, gani tilawi sia. Mag-unong sa inyo asaynment. Himua ang mga pagpasibu nga ginapahimo niya sa inyo. Magbatas kamo. Tan-awa kon indi niya kamo pagpakamaayuhon.” Daw ano kaayo nga laygay para sa tanan nga nagaalagad kay Jehova!
Sa tapos sang isa ka ambahanon ang programa nagliton halin sa mga diskurso padulong sa makalilipay nga mga interbyu.
Praktikal nga mga Ekspresyon Gikan sa Latagon
Gin-agda ni Mark Noumair, isa ka bag-o nga katapo sang talapuanan sang Gilead, ang mga estudyante nga isaysay ang ila mga naeksperiensiahan sa pagministeryo sa latagon samtang nagaeskwela sila. Ginpakita sini ang pagkaimportante sang paggamit sing inisyatibo sa ministeryo kag naghatag sa tumalambong sing praktikal nga mga ideya nga magamit nila.
Sa tion sang ila pag-eskwela, pinasahi nga nakabenepisyo ang mga estudyante sa sining klase sang Gilead sa ila pagpakig-upod sa mga katapo sang Komite sang Sanga gikan sa 42 ka kadutaan, nga didto man sa Patterson Education Center para sa pinasahi nga paghanas. Madamo sa ila ang naggradwar sa Gilead sang nagliligad nga mga tinuig. Sa tion sang programa, gin-interbyu ang mga tiglawas gikan sa ika-3, ika-5, ika-51, kag ika-92 nga klase, subong man gikan sa Gilead Extension School sa Alemanya. Daw ano ka mapuslanon ang ila mga komento!
Gin-asoy nila kon daw ano ang ginbatyag sang mga misyonero sang makita nila nga ang kadamuon sang mga dumalayaw ni Jehova sa ila asaynment nagauswag halin sa pila lamang padulong sa linibo. Gin-asoy nila ang ila bahin sa pagdala sing maayong balita sa malaka nga mga puluy-an sa Kabukiran sang Andes kag sa mga minuro sa ulo sang Suba sang Amazon. Ginsugid nila ang ila pagpanaksi sa walay tinun-an nga mga tawo. Gin-asoy nila ang ila kabudlayan sa pagtuon sing bag-o nga mga hambal kag kon ano ang realistiko nga mapaabot sang mga gradwado sa kon daw ano kadali sila makapanaksi kag makahatag sing mga pamulongpulong sa isa ka hambal subong sang Inintsik. Nagpasundayag pa gani sila sing sampol nga mga presentasyon sa Espanyol kag sa Inintsik. Ginpadaku nila nga ang mga misyonero epektibo gid kon tun-an nila indi lamang ang hambal kundi ang panghunahuna man sang katawhan. Gin-asoy nila ang masami mabudlay nga mga kahimtangan sang pagkabuhi sa imol nga mga kadutaan kag nagsiling: “Dapat makilala sang mga misyonero nga ining kahimtangan masami nga resulta sang paghingalit sa mga tawo. Maayo gid ang himuon sang misyonero kon batyagon niya ang ginbatyag ni Jesus—ginkaluy-an niya ang katawhan, nga subong sang mga karnero nga wala sing manugbantay.”
Sa tapos sang isa ka ambahanon nagpadayon ang programa paagi sa isa ka diskurso ni A. D. Schroeder, isa ka katapo sang Nagadumala nga Hubon. Nakatigayon sia sing pribilehiyo nga mangin isa sang orihinal nga mga instruktor sa Eskwelahan sang Gilead sang magbukas ini sang 1943. Subong isa ka nagakaigo nga paghingapos sa programa, ginpaathag niya ang tema nga “Paghimaya kay Jehova Subong Soberanong Ginuo.” Ang makawiwili nga pagpaathag ni Utod Schroeder sang Salmo 24 nagtandog sa tanan nga tumalambong kon daw ano ka daku nga pribilehiyo ang pagdayaw kay Jehova subong Soberanong Ginuo.
Sa tapos sang pagpanghatag sing mga diploma, kag sang hingapusan nga ambahanon, si Karl Klien sang Nagadumala nga Hubon naghinakop paagi sa tinagipusuon nga pangamuyo. Daw ano yadto ka praktikal kag makapapagsik sa espirituwal nga programa!
Sang mga adlaw sa tapos sang gradwasyon, ang 48 ka katapo sang ika-100 nga klase nagsugod sa paglakbay padulong sa ila asaynment subong mga misyonero sa 17 ka kadutaan. Apang wala lamang sila nagasugod sang ila ministeryo. Nakahimo na sila sing mabakod nga rekord sang bug-os tion nga Cristianong ministeryo. Sang magpalista sila sa Gilead, sila, sa promedyo, nagaedad sing 33 anyos kag nakahugod sing kapin sa 12 ka tuig sa bug-os tion nga ministeryo. Ang iban sa ila nangin mga katapo anay sang bug-os globo nga pamilya Bethel sang Watch Tower Society. Ang iban nakaalagad subong nagalakbay nga mga manugtatap. Pila sang mga estudyante ang nakapakigbahin na sa pila ka porma sang pag-alagad sa luwas—sa Aprika, Europa, Bagatnan nga Amerika, sa mga kapuluan sang dagat, kag sa tunga sang pangayaw nga mga grupo sa ila natawhan nga mga pungsod. Apang nagabuylog sila karon sa madamong iban pa nga misyonero nga nalipay sa pagsiling, ‘Magaalagad kami bisan diin sa kalibutan diin kinahanglanon kami.’ Ang ila tinagipusuon nga handum amo nga gamiton ang ila kabuhi sa pagpakadaku kay Jehova.
[Kahon sa pahina 27]
Mga Estadistika sang Klase:
Kadamuon sang mga pungsod nga gintiglawas: 8
Kadamuon sang mga pungsod nga ginpadalhan: 17
Kadamuon sang mga estudyante: 48
Promedyo nga edad: 33.75
Promedyo nga katuigon sa kamatuoran: 17.31
Promedyo nga katuigon sa bug-os tion nga ministeryo: 12.06
[Retrato sa pahina 26]
Ika-100 Manuggradwar nga Klase sang Watchtower Bible School of Gilead
Sa listahan sa ubos, ang mga kubay nanumerohan halin sa atubang padulong sa likod, kag ang mga ngalan nalista halin sa wala padulong sa tuo sa tagsa ka kubay.
(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.