Eskwelahan sang Gilead—50 Anyos Na kag Nagabaskog Gihapon!

“MADAMO nga duog ang wala pa mapalapnagan sing panaksi tuhoy sa Ginharian,” siling ni N. H. Knorr sa una nga klase sang Gil­ead sang Pebrero 1, 1943, ang abre-klase sang eskwelahan. Nagdugang sia: “Pat-od nga ginatos kag linibo pa ang malab-ot kon may dugang nga mga manugpangabudlay sa latagon. Sa dibagay nga kaluoy sang Ginuo, may dugang pa nga maabot.”

Kag nag-abot ang dugang nga mga manugpangabudlay​—⁠minilyon pa! Ang mga manugbantala sang Ginharian nag-uswag halin sa 129,070 sa 54 ka kadutaan sang 1943 tubtob sa 4,472,787 sa 229 ka kadutaan sang 1992! Daku ang naamot sang Eskwelahan sang Gil­ead sa pagpanaksi nga nagresulta sa sina nga pag-uswag. Pagligad sang 50 ka tuig may importante gihapon ini nga papel sa paghanas sing mga misyonero agod mag-alagad sa bisan diin nga kinahanglanon sila sa latagon sang kalibutan.

Sang Marso 7, 1993, 4,798 ka imbitado nga mga bisita kag mga katapo sang pamilya Bethel sa Estados Unidos ang nagtipon sa Jersey City Assembly Hall, sa New Jersey, para sa gradwasyon sang ika-94 nga klase. Ining pinasahi gid nga okasyon naghatag man sing kahigayunan nga balikan ang 50 ka tuig sang Eskwelahan sang Gil­ead. Luyag mo bala makahibalo diutay nahanungod sa programa?

Pagkatapos sang nagabukas nga ambahanon, si ­George D. Gangas sang Nagadumala nga Hubon naghalad sing isa ka hugot nga pangamuyo. Nian, pagkatapos sang introduksion sang tsirman, nga si ­Carey W. Barber, ang mga gradwado​—⁠kag ang bug-os nga tumalambong​—⁠namati sing maayo sa isa ka serye sang malip-ot nga mga pamulongpulong.

Si Robert W. Wallen una nga naghambal, sa tema nga “Indi Gid Ikaw Nagaisahanon.” Sing mapagsik, sia nagsiling: ‘Sa palaabuton nga mga adlaw, magautwas ang mga okasyon sa imo kabuhi nga ikaw magabatyag nga nagaisahanon gid, malayo gid sa pamilya kag mga abyan.’ Paano, nian, masiling nga, “Indi gid ikaw nagaisahanon?” Sia nagpaathag: ‘Bangod ang tagsatagsa sa inyo sarang sa gilayon makakomunikar kay Jehova nga Dios.’ Ginlaygayan niya ang mga gradwado nga pakabahandion ang pribilehiyo sa pagpangamuyo kag gamiton ini sa adlaw-adlaw. Nian, kaangay ni Jesus, makasiling sila, “Indi ako isahanon.” (Juan 16:32) Daw ano ka makapalig-on yadtong mga pulong para sa mga gradwado!

Sa pagpasangkad sang tema nga “Magpanguyapot sing Hugot sa Inyo Paglaum” (pasad sa adlaw-adlaw nga teksto sang Marso 7), si ­Lyman A. Swingle sang Nagadumala nga Hubon masunod nga naghambal tuhoy sa duha ka kinaiya nga kinahanglanon​—⁠pagbatas kag paglaum. ‘Ang kahuy-anan, kaawayon, dumot, pagkabilanggo, kag ang kamatayon pa gani, amo ang mga rason kon ngaa kinahanglanon ang pagbatas sa bahin sang mga Cristiano,’ siling niya. ‘Wala sing latid ang labaw sa kinaandan nga kusog nga sarang mapangabay sang matutom nga mga Saksi ni Jehova sa panahon sang pagkinahanglan. Makapasalig gid ini, labi na para sa inyo nga mga gradwado.’ Ano ang masiling sa paglaum? ‘Ang paglaum indi gid mapaiway,’ paathag niya. ‘Subong nga ang pandong nagaamlig sa ulo sang nagasuksok sini, ang paglaum sa kaluwasan nagaamlig kag nagabantay man sa panghunahuna sang Cristiano, nagabulig sa iya nga mahuptan ang integridad.’​—⁠1 Tesalonica 5:⁠8.

Ang masunod nga humalambal, nga si ­Ralph E. Walls, nagpili sing isa ka makawiwili nga tema, “Paano Kita Makapalagyo Padulong sa Kalig-unan sang Isa ka ‘Masangkad nga Duog’?” Ano ining “masangkad nga duog”? (Salmo 18:19) “Amo ang isa ka naluwas nga kahimtangan nga nagahatag sing malinong nga panghunahuna kag may kalig-unan nga tagipusuon,” paathag sang humalambal. Gikan sa ano dapat kita maluwas? ‘Gikan sa imo mismo kaugalingon​—⁠sa imo mga kakulangan.’ Nagdugang sia: ‘Dapat man kita maluwas gikan sa mga kahimtangan sa guwa nga ginadabukan ni Satanas.’ (Salmo 118:⁠5) Paano kita makapalagyo padulong sa kalig-unan sang isa ka masangkad nga duog? ‘Paagi sa paghibalo sang kasuguan ni Jehova sa tanan nga ginahimo naton kag paagi sa pagpangamuyo kay Jehova nga may pagtuo tuhoy sa tanan naton nga problema.’

“Ano ang Nagahulat sa Inyo?” amo ang tema nga ginpili ni Don A. Adams. Kag ano gid ang nagahulat sa bag-o nga mga misyonero? Amo ang isa ka panahon sang pagpasibu, paathag niya. “Madamo nga pagpakamaayo ang nagahulat man sa inyo.” Subong isa ka halimbawa, nag-estorya sia tuhoy sa duha ka bag-ong misyonero nga sa tapos sila makapasibu sa ila teritoryo nagsulat: “Hunahunaa ang imo pinakamatahom nga adlaw sang pag-alagad, kag amo sina diri kada adlaw. Pirme kami ginakulang sing literatura, kag ang mga tawo nagapatudlo sa amon.” Ginpatuhoy sang humalambal ang pila ka komento sa pamilya kag sa mga abyan sang mga gradwado: ‘Indi kamo dapat mabalaka nahanungod sining mga gradwado. Mabuligan ninyo sila paagi sa pagsulat sa ila sing makapalig-on nga mga pulong.’​—⁠Hulubaton 25:⁠25.

Ang mga instruktor sang eskwelahan amo ang masunod nga naghambal. Ginpili ni Jack D. Redford ang tema nga “Dili Magpaabot sing Bisan Ano Gikan kay Bisan Sin-o.” Ang isa sang mga hangkat nga atubangon sang mga gradwado amo ang pagpakigbagay sa mga tawo, paathag niya. Ano ang makabulig? “Indi pagsapaka ang ila mga kasaypanan. Indi pagpasobrahi ang imo pagpaabot gikan sa iban nga mga tawo. Indi pirme pagpaabuta ang bug-os nga kadakuon sang ginakabig mo nga nagakadapat para sa imo. Pasayluha ang dikahimpitan sang iban nga mga tawo, kag ining kaluoy magabulig sa imo sa pagpakigbagay. Ang imo ikasarang sa pagpakigbagay sa iban nga mga tawo mangin amo ang talaksan sang imo pagkahamtong.” (Hulubaton 17:⁠9) Sa pagkamatuod, ang pag-aplikar sining maalamon nga laygay magabulig sa mga gradwado sa paghimo sing madinalag-on nga pagpasibu subong mga misyonero sa luwas!

“May yara kita sining bahandi sa mga suludlan nga duta,” siling sang 2 Corinto 4:⁠7. Si Ulys­ses V. Glass, ang rehistrador sang Eskwelahan sang Gil­ead, nagkomento sa sining teksto samtang ginapasangkad niya ang tema nga “Saligi ang Inyo Napamatud-an, Matutom nga Kauturan.” Ano ang “mga suludlan nga duta”? “Mahimo gid nga nagapatuhoy ini sa aton subong dihimpit nga mga tawo,” siling niya. Ano ang “bahandi”? “Amo ang aton Cristianong ministeryo,” paathag niya. (2 Corinto 4:⁠1) Kag ano ang dapat himuon sa sining bahandi? “Ang bahandi nga gintugyan sa aton ni Jehova indi dapat taguon. Gani, mahal nga mga misyonero sa palaabuton, ipaambit ina nga bahandi bisan diin man kamo magkadto, kag tudlui ang madamo kon paano ini ipaambit.”

Isa ka mamingawon nga tinion sang si Albert D. Schroeder nagsugod sa paghambal, kay sia anay ang rehistrador sang Eskwelahan sang Gil­ead sang magsugod ini. “Tunga sa Siglo sang Teokratikong Paghanas” ang iya tema. “Makahibalo si Jehova kon paano maghatag sing epektibo nga paghanas, kag nahimo niya ini,” siling niya. Paano? Ginpatuhuyan ni Utod ­Schroeder ang paghanas nga nabaton paagi sa duha ka eskwelahan nga natukod sang 50 ka tuig nga nagligad​—⁠ang Teokratikong Eskwelahan sa Pagministro kag ang Eskwelahan sang Gil­ead. Ginpakita niya nga ang isa ka mapuslanon nga kasangkapan sa paghatag sing sibu nga ihibalo amo ang New World Translation. Ginpasalig niya ang mga gradwado: “Makakadto kamo sa inyo mga teritoryo sa luwas upod ang dakung pagsalig nga ang Sosiedad bugana nga magaaman sa inyo sing sibu nga ihibalo tuhoy sa mga katuyuan ni Jehova.”

Si Milton G. Henschel, presidente sang Watch Tower Bible and Tract Society of Pennsylvania, naghambal sa tema nga “Labi Pa sa mga Mandadaug.” Ginkuha ni Utod Hen­schel ang iya tema gikan sa tuigan nga teksto sang 1943: “Labi pa sa mga mandadaug paagi sa iya nga naghigugma sa aton.” (Roma 8:​37, King James Version) Isa yadto ka nagakaigo nga tuigan nga teksto, paathag niya, bangod sa tunga sang Inaway Kalibutanon II, ang aton kauturan sa madamong pungsod ginhingabot sadto. Ginbasa ni Utod Hen­schel ang pila ka kinutlo gikan sa isyu sang Watchtower nga nagpaathag sadtong tuigan nga teksto kag dayon nagpaathag: “Ini nga artikulo sang Watchtower [Enero 15, 1943] gintun-an sang bulan sang Pebrero sang una nga klase sang Gil­ead, kag ginhanda sini sila para sa kon ano ang matabo sadto.” Madamo sang mga gradwado sa nagligad nga 50 ka tuig ang nakapamatuod na sang ila kaugalingon subong mga mandadaug, paathag niya. Kamusta ang ika-94 nga klase? “Unungi ninyo si Jehova, unungi ninyo ang iya gugma, kag pat-od nga magadaug kamo.”

Pagkatapos sang mga pamulongpulong sang aga, ginpaambit sang tsirman ang pila sang mga panamyaw nga nabaton gikan sa nanuhaytuhay nga kadutaan. Nian nag-abot ang tinion nga ginakalangkagan sang 24 ka mag-asawa​—⁠ang pagpanghatag sing mga diploma. Ti, opisyal na karon nga mga gradwado sang Gil­ead ang mga estudyante sang Gil­ead! Naghalin sila sa 5 ka pungsod, apang ang ila asaynment magadala sa ila sa 17 ka kadutaan, lakip ang Hong Kong, Taiwan, Mozam­bique, kag mga bahin sang Nasidlangan nga Europa.

Sa tapos sang intermisyon, nagsugod ang programa para sa hapon paagi sa pinalip-ot nga Pagtinuon sa Lalantawan, nga gindumalahan ni Rob­ert L. Butler. Nian ginpasundayag sang mga gradwado ang pila sang talalupangdon nga mga eksperiensia nga inagihan nila samtang nagapanaksi malapit sa Wall­kill, Nueva York. Ginpabanaag sang programa ang isa sang mga butang nga walay duhaduha nga nagdala sa ila sa Gil­ead​—⁠ang ila madalom nga gugma sa pag-alagad sa latagon.

Pagkatapos sang programa sang mga estudyante, madamo sa tumalambong ang nagpalibog kon bala ang programa magapasundayag sing butang nga pinasahi agod saulugon ang ika-50 nga tuig sang Eskwelahan sang Gil­ead. Wala sila malugaw-i!​—⁠Tan-awa ang kaupod nga kahon, “Pagrepaso sa 50 ka Tuig sang Eskwelahan sang Gil­ead.”

Kalim-an ka tuig ang nagligad, ginpakita ni Utod ­Knorr nga isa sia ka tawo nga may pagtuo kag panan-awon. Ang iya pagpati nga ang Eskwelahan sang Gil­ead magamadinalag-on ginpabutyag sa iya nagabukas nga pamulongpulong sa una nga klase, sang nagsiling sia: “Nagapati kita nga, suno gid sa ngalan sini, isa ka ‘tinumpok nga saksi’ ang magagikan sa sining duog kag magakadto sa tanan nga bahin sang kalibutan kag ina nga saksi mangin isa ka monumento sa himaya sang Dios nga indi gid malaglag. Kamo subong ordenado nga mga ministro magapahamtang sang inyo bug-os nga pagsalig sa Labing Mataas, nakahibalo nga ubayan niya kamo, tuytuyan kag sa tanan nga tion nga kinahanglan ninyo ini, kag mahibaluan man ninyo nga sia man isa ka Dios nga mapakamaayuhon.”⁠a

Kalim-an ka tuig sang ulihi, ang Eskwelahan sang Gil­ead nagabaskog gihapon! Ang mga gradwado sang ika-94 nga klase may pribilehiyo karon nga sundon ang kapin sa 6,500 ka gradwado nga nauna sa ila. Kabay nga ipahamtang nila ang ila bug-os nga pagsalig sa Labing Mataas samtang ginahimo nila ang ila bahin sa pagtumpok sing isa ka “tinumpok nga saksi” nga mangin isa ka monumento sa himaya ni Jehova nga Dios.

[Footnote]

[Kahon sa pahina 25]

Mga Estadistika sang Klase

Kabilugan nga kadamuon sang mga estudyante: 48

Kadamuon sang mga pungsod nga gintiglawas: 5

Kadamuon sang mga pungsod nga ginpadalhan: 17

Promedyo nga edad: 32

Promedyo nga tinuig sa kamatuoran: 15.3

Promedyo nga tinuig sa bug-os tion nga ministeryo: 9.6

[Kahon sa pahina 26, 27]

PAGREPASO SA 50 KA TUIG SANG ESKWELAHAN SANG GIL­EAD

Ano nga paagi sa pagdumdom sang maragtas sang Gil­ead ang maayo pa sa mga nakaeksperiensia sini​—⁠ang nagligad nga mga gradwado, mga instruktor, kag ang iban pa nga nagbulig sa pag-organisar sini? Nalipay gid ang tumalambong samtang namati sila sa bahin nga “Pagrepaso sa 50 ka Tuig sang Eskwelahan sang Gil­ead,” nga gindumalahan ni Theo­dore ­Jaracz.

Ano ang mga kahimtangan nga nagdul-ong sa pagtukod sa eskwelahan? Ginpaathag ni Utod ­Schroeder nga sia kag ang duha pa ka instruktor ginhatagan sing apat ka bulan lamang sa pag-organisar sang eskwelahan. “Apang pag-abot sang Lunes, Pebrero 1, 1943, handa na kami sa dedikasyon sini.”

Ano ang kahimtangan sang unang mga misyonero nga ginpadala? Naghinumdom si Utod Hen­schel: “Nagpahimo kami sa ship­ping de­part­ment sang Sosiedad sing mga kahon nga kahoy agod sudlan sang tanan nga pagkabutang nga luyag dalhon sang mga misyonero. Pag-abot sang mga kahon, mahalungon nga ginbuksan nila ini kag ginpanguha ang ila mga pagkabutang. Apang ginhimo nila nga mga kabinet ang kahoy sang mga kahon.” Sang ulihi, siling niya, nagpatindog ang Sosiedad sing kasarangan nga mga puluy-an para sa mga misyonero.

Masunod sa programa, ginpaambit sang pila ka gradwado sang una nga mga klase sang Gil­ead nga karon mga katapo na sang pamilya Bethel sa Estados Unidos ang ila mga natandaan, ang ila mga balatyagon, kag ang ila mga eksperiensia. Natandog gid ang bug-os nga tumalambong sa ila mga komento.

“Sang mabaton ko ang imbitasyon nga mag-eskwela sa una nga klase, natukiban ko nga ang akon iloy may kanser. Apang sanglit 16 anyos pa sia sang magsugod sia sa pagpayunir, ginlaygayan gid niya ako nga batunon ang imbitasyon. Gani upod ang daw walay pasingadtuan nga mga balatyagon kag pagsalig kay Jehova, nagkadto ako sa ­South Lansing. Naluyagan ko gid kag gin-apresyar sing tudok ang paghanas sa Gil­ead. Natapos sang akon iloy ang iya dutan-on nga kurso wala madugay sa tapos sang akon gradwasyon.”​—⁠Char­lotte ­Schroeder, nag-alagad sa Mexico kag El Salvador.

“Sanglit gin-atipan na ako ni Jehova sa bahin sang duta nga akon nahamtangan, ginhunahuna ko nga bisan diin man ako magkadto iya gihapon ini duta, kag atipanon niya ako. Gani malipayon gid nga ginbaton ko ang imbitasyon sa una nga klase.”​—⁠Julia Wild­man, nag-alagad sa Mexico kag El Salvador.

“Makalilipay gid yadto! Makahambal kami sa tagsa ka ganhaan. Sa una nga bulan pa lang, nakapahamtang ako sing 107 ka libro kag nagdumala sing 19 ka pagtuon sa Biblia. Sang ikaduha nga bulan nangin 28 ang akon pagtuon sa Biblia. Sa pagkamatuod, may mga butang nga dapat namon pakigbagayan​—⁠ang init, kagin-uton, mga insekto. Apang isa gid ka matahom nga pribilehiyo nga mangin didto. Butang ini nga indi ko gid malipatan.”​—⁠Mary ­Adams, ikaduha nga klase, tuhoy sa iya asaynment sa Cuba.

“Ang paniempo amo ang isa sang daku gid nga mga balagbag sa amon sa Alaska. Tuman gid katugnaw sa aminhan, kay ang temperatura naganubo tubtob sa 50 de­grees ubos sa zero Cel­sius kag matugnaw pa. Ang mga minuro sang mga Indian kag ang nabaw-ing nga gamay nga mga duog sa bagatnan-sidlangan sang Alaska makadtuan lamang paagi sa sakayan ukon eroplano.”​—⁠Juan Er­richetti, ikatlo nga klase.

“Para sa akon ang Gil­ead isa ka imbitasyon gikan kay Jehova paagi sa iya dutan-on nga organisasyon sa pagpalig-on sa aton sa espirituwal kag sa pagpakita sa aton sang isa ka matahom gid nga sahi sang pagkabuhi.”​—⁠Mildred Barr, ika-11 nga klase, nag-alagad sa Irlandiya.

Dugang pa sang makalilipay nga mga interbyu ang nagsunod​—⁠Lu­cille Hen­schel (ika-14 nga klase, nag-alagad sa Venezuela), Margareta ­Klein (ika-20 nga klase, nag-alagad sa Bolivia), Lu­cille Coul­trup (ika-24 nga klase, nag-alagad sa Peru), Lor­raine Wal­len (ika-27 nga klase, nag-alagad sa Brazil), Wil­liam kag Sandra Malen­fant (ika-34 nga klase, nag-alagad sa Moroc­co), Ger­rit ­Lösch (ika-41 nga klase, nag-alagad sa Aus­tria), kag David ­Splane (ika-42 nga klase, nag-alagad sa Senegal).

Ano ang ginhimo sang mga utod nga lalaki nga nakaalagad subong mga instruktor? Gin-interbyu man ang pila sa ila​—⁠sanday Rus­sell Kurzen, Karl ­Adams, Har­old Jack­son, Fred Rusk, Har­ry Peloyan, Jack Red­ford, kag Uly­sses ­Glass. Ginhinumdom nila ang ila pribilehiyo, kag nagpabutyag kon paano ini nakaapektar sa ila tubtob karon.

Ang makakulunyag nga pamatuod sa pagkaepektibo sang nahanas sa Gil­ead nga mga misyonero ginhatag ni ­Lloyd Bar­ry, nga nakaalagad sa Hapon. Sang 1949, sang 15 ka misyonero ang ginpadala didto, wala pa sa napulo ang mga manugbantala sa bug-os nga Hapon. Apang pagligad sang 44 ka tuig, kapin sa 175,000 ang mga manugwali sang Ginharian sa sina nga duta! Masunod gin-asoy ni Rob­ert Wal­len ang talalupangdon nga kadalag-an sang pila ka misyonero sa pagbulig sa mga tawo pasulod sa kamatuoran, lakip ang isa ka misyonera nga didto sa Panama sa kapin sa 45 ka tuig kag nakabulig sa 125 ka tawo sa pagdedikar kag sa pagpabawtismo.

Ang pinakadaku nga bahin sang bug-os nga programa nalab-ot sang ang tanan sa tumalambong nga mga gradwado sa Gil­ead gin-agda nga magsaka sa entablado. Isa gid yadto ka makatalandog nga tinion. Ang nagasundanay nga kauturan nga mga lalaki kag mga babayi​—⁠89 sa pamilya Bethel dugang sa bisita nga mga gradwado​—⁠nagkubay sa alagyan pasaka sa hagdan padulong sa entablado. Ginbuylugan sila sang mga utod nga lalaki nga nakaalagad subong mga instruktor sang nagligad nga tinuig, kag dayon sang ika-94 nga klase​—⁠mga 160 tanan!

“Nagmadinalag-on gid bala ang hilikuton sang Eskwelahan sang Gil­ead sa paghanas sing mga misyonero para sa iban nga mga kadutaan?” pamangkot ni Utod ­Jaracz. “Ang ebidensia sang nagligad nga 50 ka tuig isa ka nagadaguob nga huo!”

[Piktyur sa pahina 25]

Ika-94 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginnumeruhan halin sa una pa likod, kag ang mga ngalan nalista halin sa wala pa tuo sa tagsa ka raya.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.