Mangin Saksi Ka Bala Para sa Matuod nga Dios?
‘“Kamo ang akon mga saksi,’ siling ni Jehova, ‘kag ako ang Dios.’”—ISAIAS 43:12.
1. Ngaa dapat naton padunggan ang matuod nga Dios?
SA WALA pa mapatay si Jesus, ‘ginbayaw niya ang iya mga mata sa langit’ agod mangamuyo. Gintawag niya ang Isa nga iya ginpangamuyuan subong “ang lamang matuod nga Dios.” (Juan 17:1, 3) Sing makatarunganon, isa lamang ang buhi kag matuod nga Dios, ang Soberano sang uniberso, ang Manunuga. Sanglit utang naton ang aton pagluntad sa matuod nga Dios, dapat naton sia hatagan sing dungog nga takus sa iya. Subong ginapabutyag sang Bugna 4:11: “Takus ka, Jehova, nga amon Dios, sa pagbaton sing himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nagluntad sila kag gintuga.”
2. (a) Ano ang makatarunganon nga tuohan nahanungod sa matuod nga Dios? (b) Paano sia nagakomunikar sa mga luyag magsimba sa iya?
2 Makatarunganon paabuton nga indi pagpabay-an sang matuod nga Dios ang malain nga mga kahimtangan tubtob san-o nga nagmantsa sa iya mga tinuga sa duta. Kag makatarunganon man patihan nga pahibaluon niya ang iya mga sumilimba sang iya himuon kag kon ano ang luyag niya nga himuon nila antes sia maghukom. (Amos 3:7) Paano sia nagakomunikar sa mga nagapangita sing kamatuoran? Ginagamit niya ang handa nga mga tawo subong iya mga humalambal. “‘Mga saksi ko kamo,’ siling ni Jehova . . . ‘Una sa akon wala gid sing dios nga ginhuman, kag wala na gid sa ulihi nakon. Ako —ako si Jehova, kag luwas sa akon wala sing manluluwas.’” (Isaias 43:10, 11) Apang paano makilala sang isa ka tawo ang mga ginagamit sang matuod nga Dios subong iya mga saksi? Paano sila, kag ang ila mensahe, nagakatuhay sa mga sumilimba sa iban nga mga dios?
Isa ka Hangkat sa Iban nga mga Dios
3. Ano ang panghangkat ni Jehova sa tanan nga iban pa nga mga dios?
3 Gin-inspirar ni Jehova si Isaias agod irekord ining hangkat sa tanan nga iban pa nga dios: “Sin-o sa ila [mga dios sang mga pungsod kag katawhan] ang makapahayag sining [sibu nga tagna]? Ukon mapabati bala nila sa aton ang nahaunang mga butang [nga mahanabo sa palaabuton]? Padalha sila [mga dios] sang ila mga saksi, agod nga mapakamatarong sila [mga dios], ukon papamatia sila [katawhan sang mga pungsod] kag magsiling, ‘Kamatuoran ini!’” (Isaias 43:9) Sa amo ginahangkat ni Jehova ang tanan nga dios nga ginasimba sang katawhan sa pagpamatuod nga sila mga dios. Ang ila mga saksi dapat magpatubas sing ebidensia nga ang ila mga dios masaligan kag takus simbahon.
4. Paano naton mahibaluan nga ang mga dios sang dumaan nga mga pungsod wala sing pulos?
4 Apang ano ang napatubas sadtong mga dios kag sang ila mga sumilimba? Gindala bala nila kita sa matuod nga paghidait, kabuganaan, kapagros, kag kabuhi? Ang maragtas nagapamatuod nga ang madamo nga dios sang dumaan nga mga pungsod napamatud-an nga wala sing pulos kag wala sing gahom. Wala gani sila maluwas subong mga butang nga ginasimba, kay wala na sila karon. Ang madamo nga dios sang dumaan nga Egipto, Asiria, Babilonia, Medo-Persia, Gresya, Roma, kag sang iban pa nga mga pungsod napamatud-an nga indi matuod. Nagaluntad lamang sila sa mga libro sang maragtas ukon sa mga museo nga sa diin ang ila mga estatwa mga butang lamang nga ginatan-aw.
5. Ano ang mahimo ipamangkot naton nahanungod sa mga dios sang modernong tion?
5 Apang, mas maayo bala ang modernong mga dios kag ang ila mga sumilimba sa mga dumaan? Ang Hindu nga relihion lamang may minilyonmilyon ka dios. Ang mga Budhista, mga Katoliko, mga Confucianista, mga Judiyo, mga Protestante, mga Shintoista, mga Taoista, kag madamo pa may ila kaugalingon nga mga dios. Sa Aprika, Asia, kag sa bisan diin, ang puersa sang kinaugali, mga sapat kag mga butang ginasimba subong mga dios. Ang nasyonalismo kag materyalismo, kag bisan ang kaugalingon sang tawo, nangin mga dios, kay madamo nga tawo ang nagahatag sang ila una nga debosyon sa ila. Diin nga paagi sang pagsimba ang aktuwal nga nagarepresentar sa isa nga nagsiling: “Ako si Jehova, kag wala na gid sing iban. Luwas sa akon wala sing Dios”?—Isaias 45:5.
“Paagi sa Ila mga Bunga Makilala Ninyo Sila”
6. Paano naton makilala ang matuod nga pagsimba gikan sa dimatuod nga pagsimba?
6 Naghatag si Jesus sing masaligan nga talaksan sa pagkilala kon ano ang matuod ukon dimatuod sa relihion. Sia nagsiling: “Paagi sa ila mga bunga makilala ninyo sila. . . . Ang tagsa ka kahoy nga maayo nagapamunga sing maayo nga bunga, apang ang malain nga kahoy nagapamunga sing malain nga bunga . . . Ang tagsa ka kahoy nga wala nagapamunga sing maayo nga bunga ginapulod kag ginadap-ong sa kalayo.” (Mateo 7:16-19) Sa amo, agod makilala ang matuod nga Dios gikan sa mga dimatuod, kag ang matuod nga mga sumilimba gikan sa mga indi matuod, dapat naton usisaon kon ano ang ila ginapatubas. “Maayo” bala ang ila mga bunga, ukon “malain” bala?
7. Ano ang ginasugid sang maragtas sining siglo nahanungod sa mga relihion sining kalibutan?
7 Halimbawa, diin sa mga relihion sang kalibutan ang nakapaluntad sing matuod nga paghidait sa tunga sang ila mga sumalakdag sa bug-os nga duta? Sa pagkamatuod, ang mga katapo sang matuod nga relihion, nga espirituwal nga mag-ulutod, indi dapat magpatyanay. Apang isa ka gatos ka milyon ka tawo ang napatay sa mga inaway sining ika-20 nga siglo, kag ina tanan nga inaway ginsakdag sang mga relihion sining kalibutan. Subong resulta, ang relihioso nga mga tawo nagpatay sa iban nga relihioso nga mga tawo. Sa masami, ginpatay nila ang mga tawo nga pareho nila sing relihion. Nagpatyanay ang Katoliko sa Katoliko, Protestante sa Protestante, Muslim sa Muslim, kag amo man ang ginhimo sang iban nga relihion.
8. Paano ang mga tumalan-aw nagakomento tuhoy sa relihioso nga kapaslawan sa aton tion?
8 Sa isa ka editoryal nga natig-uluhan “Ang Kasingki nga Ginhimo sa Ngalan sang Dios,” si Mike Royko, nga daw subong nagahambal sa Dios, nagsiling tuhoy sa mga relihion sining kalibutan: “Ginapabutyag nila ang ila debosyon sa imo paagi sa pagpatyanay sing ginatosgatos. Sa banta ko ginahangop nila nga kon mapatay sang isa ka bahin ang pihak nga bahin, magapamatuod ini nga ang ila paagi sang pagsimba sa imo amo ang husto.” Nagsiling sia nga samtang ang papa nagalaragway sang iya kaugalingon subong mahidaiton nga tawo, “ang iya mga sumulunod nakilal-an nga nagapatulo sing pila ka milyon nga galon sang dugo kon maakig sila.” Subong man, sang ang anay Presidente Carter sang Estados Unidos nagsiling nga “ang kalibutan nagbuang,” sia nagsiling: “Ang daku nga relihiosong pagpati, nga dapat maghigot sa katawhan sa gugma, daw masami nga bahin sang pagkabuang kag pagpatay.”
9. Ngaa indi naton dapat sundon ang “wala sing pulos nga mga dios”?
9 Inang malain nga mga bunga dapat nga amo ang kabaliskaran sang dapat ipatubas sang mga nagasimba sa matuod nga Dios. (Galacia 5:19-23) Busa, ang mga nagasakdag sa nagainaway nga mga relihion kag mga pilosopiya bahin sang dimatuod nga pagsimba subong gid anay sang dumaan nga mga Egiptohanon, mga Asirianhon, mga Babilonianhon, kag iban pa nga nagsalig sa “wala sing pulos nga mga dios nga apa.” (Habacuc 2:18) Kag subong nga ang matagnaon nga pulong sang matuod nga Dios natuman sa dumaan nga dimatuod nga pagsimba, matuman man ini sa aton tion: “Ang wala sing pulos nga mga diosdios magataliwan sing bug-os.” (Isaias 2:18) Masaligan ang iya paandam: “Dili kamo magliso sa wala sing pulos nga mga dios.”—Levitico 19:4.
Sin-o ang mga Nagapanaksi Para kay Jehova?
10. Mga saksi bala para sa matuod nga Dios ang mga sumalakdag sang mga relihion sining kalibutan?
10 Ang isa ka saksi para sa matuod nga Dios dapat isa nga nagapamatuod nahanungod sa Iya. Ginahimo bala ina sang mga sumalakdag sang mga relihion sining kalibutan? Daw ano kasunson ang mga tawo sining mga relihion nagapakighambal sa imo nahanungod sa ila pagsimba? San-o sila nagduaw sa imo balay agod magpanaksi nahanungod sa ila dios? Ang hangkat nga ginpaguwa sang matuod nga Dios sa mga dimatuod nga magpatubas sing mga saksi wala ginpamatian. Ang katawhan sang mga relihion sining kalibutan wala nagahimo sina nga pagpanaksi. Indi sila makasugid sa imo kon sin-o ang matuod nga Dios ukon ano ang iya mga katuyuan. Wala sila gintudluan sang ila mga klero sing kamatuoran. “Bulag sila nga mga manugtuytoy. Kon ang bulag magtuytoy sa bulag, sila nga duha mahulog sa buho.”—Mateo 15:14.
11. Sin-o lamang ang nagapanaksi sa ngalan sang matuod nga Dios?
11 Sin-o ang handa sa pagsakripisyo sing tion, materyal nga mga manggad, kag sang ila pa gani kabuhi, sa pagpanaksi para sa matuod nga Dios? Sin-o ang nagasugid sa mga tawo nga ang matuod nga Dios nagasiling: “Ako si Jehova. Amo ina ang akon ngalan”? (Isaias 42:8) Sin-o ang nagapanudlo nga “ikaw lamang, nga ang imo ngalan amo si Jehova, amo ang Labing Mataas sa bug-os nga duta”? (Salmo 83:18) Sang iya tion, si Jesus nagsiling sa matuod nga Dios: “Ginpahayag ko ang imo ngalan.” (Juan 17:6) Sa aton tion, mga saksi ni Jehova lamang ang makasiling sina. Daw ano ka nagakaigo ang ila ngalan—mga Saksi ni Jehova!
Pagpanaksi Nahanungod sa Ginharian
12. Anong importante nga panudlo ang dapat nga ginasugid sa iban sang matuod nga mga saksi?
12 Dugang sa pagpakilala sa matuod nga ngalan sang Dios, ano, labi na, ang ginahambal sang iya mga Saksi nahanungod sa iya mga katuyuan? Naghatag si Jesus sing halimbawa paagi sa pagtudlo sa iya mga sumulunod nga mangamuyo sa matuod nga Dios: “Magkari ang imo ginharian.” (Mateo 6:10) Ang langitnon nga Ginharian sang Dios amo ang pangulohan nga sa ulihi magagahom sa bug-os nga duta. (Daniel 2:44) Amo ini ang tema sang pagpanudlo ni Jesus. (Mateo 4:23) Bangod ang Ginharian amo lamang ang solusyon sa mga palaligban sang katawhan, sia naglaygay: “Padayon, nian, nga pangitaon anay ang ginharian kag ang iya pagkamatarong.”—Mateo 6:33.
13. (a) Ano ang ginapakita sang mga kamatuoran nahanungod sa pagbantala sang mga Saksi ni Jehova tuhoy sa Ginharian sang Dios? (b) Paano ang pagbantala sing Ginharian isa ka pamatuod nga si Jehova amo lamang ang Dios sang matuod nga tagna?
13 Sin-o sa karon ang nagapamatuod para sa Ginharian sang Dios? Si Propesor C. S. Braden, maalam nga estudyante sa mga relihion sang kalibutan, nagsiling: “Literal nga ginkobrehan sang mga Saksi ni Jehova ang duta paagi sa ila pagpanaksi. . . .Mahimo masiling sing maminatud-on nga wala sing isa ka relihioso nga grupo sa kalibutan ang nakapakita sing kapin nga kakugi kag pagbatas sa pagtinguha nga ipalapnag ang maayong balita sang Ginharian sang sa mga Saksi ni Jehova.” Apang ginsulat niya ina sang halos 40 ka tuig na nga nagligad! Sa karon daku pa nga pagpanaksi sa Ginharian ang ginahimo, kay napulo ka beses ang kalabawon sang mga Saksi karon! Mga tatlo ka milyon kag tunga sa ila, sa kapin sa 54,900 ka kongregasyon sa bug-os nga duta, ang nagapamatuod sa Ginharian, kag ang ila kadamuon madasig nga nagadugang. Ining maayo nga bunga isa ka pamatuod nga si Jehova amo ang Dios sang matuod nga tagna. Sia ang nag-inspirar sa iya Anak, nga si Jesus, sa pagtagna nahanungod sa aton tion: “Ibantala ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”—Mateo 24:14; Juan 8:28.
Pag-ilog sa Gugma sang Dios
14. Anong kinaiya ang dapat ilugon sang matuod nga mga saksi sang Dios, kag ano ang kahulugan kon indi sila?
14 Ang matuod nga mga saksi sang Dios dapat mag-ilog sa iya nagapanguna nga kinaiya—ang gugma. “Ang wala nagahigugma wala makakilala sa Dios, kay ang Dios gugma.” (1 Juan 4:8) Sa pagkamatuod, “ang mga anak sang Dios kag ang mga anak sang Yawa ginpahayag paagi sa sining kamatuoran: Ang bisan sin-o nga wala nagahimo sing matarong indi iya sang Dios, amo man ang wala nagahigugma sang iya utod. . . . Dapat kita maghigugmaanay; indi kaangay kay Cain nga iya sang malauton kag nagpatay sang iya utod.”—1 Juan 3:10-12.
15. Ngaa makasiling kita nga ang mga Saksi ni Jehova nagapakita sing matuod nga gugma?
15 Ang mga Saksi ni Jehova lamang ang may amo sina nga sahi sang gugma. Wala sila nagapasakop sa mga dios sang inaway, nasyonalismo, kag rasismo. Wala sila nagasupurta sa bisan anong mga inaway sining kalibutan kag gani wala gid sa kahimtangan nga sa diin supurtahan nila ang pagpatay sa ila espirituwal nga kauturan sa iban nga mga bahin sang kalibutan. Subong ginsiling ni Jesus, sila “indi bahin sang kalibutan” kag ‘nagtagob sang espada.’—Juan 17:14; Mateo 26:52.
16. Paano ang iban nagabulig sa pagkilala sa matuod nga mga saksi sang Dios?
16 Ang isa ka pagtuon nga natig-uluhan “Dugang Pa Nahanungod sa Pagpakamatarong sa Kasingki” nagsiling: “Ang mga Saksi ni Jehova dalayon nga nagtipig sang ila tindog sa indi masingki nga ‘Cristianong neutralidad’ . . . Ang ila padayon nga tindog batok sa bisan anong sahi sang pagserbisyo sa pungsod, militar ukon sibilyan, kag ang ila pagpangindi sa pagpadungog sa mga simbulo sang pungsudnon nga identidad nagresulta sa mga tion sang kasaba, pagkabilanggo, kag paghikot sang akig nga grupo sa madamo nga pungsod . . . Apang, ang mga Saksi wala gid magbalos sing kasingki.” Ang pamantalaan sa Brazil nga O Tempo nagsiling tuhoy sa ila: “Bisan pa madamo sing dalagku nga mga relihion upod ang ila propaganda sa tanan nga bahin sang globo, wala gid sing isa sa nawong sang duta karon ang nagapakita sing pareho nga gugma.” Ining matuod nga gugma, siling ni Jesus, nagapakilala sa matuod nga mga saksi sang Dios. “Paagi sa sini makilala sang tanan nga mga disipulo ko kamo, kon maghigugmaanay kamo.”—Juan 13:35.
Ang Paghingabot Nagapauswag sang Pagpanaksi
17, 18. Anong halimbawa kasan-o lang ang nagapakita kon paano ang paghingabot makadugang sa pagpanaksi sa Ginharian?
17 Ang paghingabot mahimo nga magresulta sa masangkad pa nga pagpanaksi sa Ginharian. Halimbawa, sa India mga 8,000 lamang ang saksi ni Jehova. Apang, kasan-o lang ang ngalan kag mga katuyuan ni Jehova ginhatagan sing masangkad nga publisidad sa sadto nga duta sang 11 ka Saksi nga kabataan nga nag-ilog sa nahaunang-siglo nga mga Cristiano ang nagsiling sa korte: “Dapat namon tumanon ang Dios subong manuggahom sa baylo sang mga tawo.” (Binuhatan 5:29) Ginpauntat ang Indian nga mga kabataan sa eskwelahan bangod sang indi pag-amba sing pungsudnon nga ambahanon. Apang ang Korte Suprema sang India nagdesisyon, subong ginreport sa Deccan Herald sang Bangalore, nga “wala sing obligasyon sa sining pungsod sa pag-amba sing Pungsudnon nga Ambahanon.” Ang Korte nagsiling nga ang mga kabataan “nagpakita sing nagakaigo nga pagtahod” kag nga ang ila indi pag-amba “wala sa bisan anong paagi nagkahulugan sing indi pagpasakop.” Nagmando ang Korte nga ang mga kabataan batunon liwat sa eskwelahan.
18 Ang amo gihapon nga pamantalaan nagsiling: “Ining mga kabataan nagpangindi sa pag-amba sing Pungsudnon nga Ambahanon bangod ginakabig sang mga Saksi ni Jehova ang ila kaugalingon subong mga Cristiano kag bug-os nga nahugod sa Ginharian sang Dios. . . . Busa wala sila nagapakigbahin sa bisan anong politikal nga hilikuton sang Estado.” Subong man, ang The Telegraph sang Calcutta nagreport: “Ang ginbuhat sang mga kabataan sa eskwelahan nagpabantog sa . . . mga Saksi ni Jehova, nga nagpabilin nga indi tanto ka kilala sa aton pungsod tubtob kasan-o lang.” Huo, ‘ibantala ining maayong balita sang ginharian subong panaksi sa tanan nga kapungsuran’ sa wala pa mag-abot ang katapusan.—Mateo 24:14.
Pagtipon sing mga Saksi Para sa Matuod nga Dios
19. Ano ang dapat himuon sang bunayag sing tagipusuon nga mga tawo kon luyag nila magsimba sa matuod nga Dios?
19 Sa karon, ang matuod nga Dios, nga si Jehova, nagasugo sa iya katawhan nga magpanaksi sa iya pagkasoberano kag mga katuyuan. Samtang ginawali nila ang iya mensahe nga may daku pa nga kusog, ginatipon niya ang nagadugang nga kadamuon sang mga bunayag sing tagipusuon nga mga tawo gikan sa tanan nga pungsod nga magpakig-upod sa iya mga sumilimba. (Isaias 2:2-4) Ginabiyaan nila ang ila dimatuod nga mga dios kag nagaliso sa pagsimba sa matuod nga Dios, subong nga ang mga naghandum sa pagsimba kay Jehova ginhilway gikan sa pagkaulipon sa dumaan nga Babilonia, nga sa diin lapnag ang pagsimba sa dimatuod nga mga dios.—Isaias 43:14.
20, 21. Ngaa hilingagawon nga biyaan ang dimatuod nga mga dios karon kag indi mangin tumalan-aw lamang?
20 Mangin saksi ka bala para sa matuod nga Dios? Magatindog ka bala para sa matuod nga pagsimba kag magalikaw sa pag-ambit sa kasal-anan sa dugo kag sa moral sining kalibutan kag sang iya dimatuod nga mga dios? Ang Pulong sang Dios nagalaygay: “Guwa ka sa iya [Babilonianhon nga dimatuod nga pagsimba], katawhan ko, kon indi mo luyag nga makaambit sa iya mga sala, kag kon indi mo luyag makabaton sing bahin sa iya mga kalalat-an.” (Bugna 18:4) Huo, “magguwa,” maghikot na sa indi pa mangin ulihi! Indi mangin kaangay sang tawo, nga sang ginpamangkot nahanungod sa iya naluyagan nga relihion sang isa ka Katoliko nga magasin, nagsiling: “Sa banta ko isa ako ka Tumalan-aw ni Jehova. Nagapati gid ako sa ginatuohan sang mga Saksi ni Jehova—apang indi ko luyag madalahig.”
21 Apang, ang tagsa ka tawo sa duta madalahig sa indi madugay kon hukman na ni Jehova ang dimatuod nga mga dios sining kalibutan kag ang ila mga sumilimba: “Ang mga dios nga wala maghimo sang kalangitan kag sang duta mawala sa duta kag sa idalom sining kalangitan.” (Jeremias 10:11) Wala sing mga tumalan-aw sa amo nga tion. Mga saksi lamang para sa matuod nga dios kag indi, ang makita. (Mateo 24:37-39; 2 Pedro 2:5; Bugna 7:9-15) Mangin saksi ka bala para sa matuod nga Dios? Dapat gid, kay “ang matuod nga Dios amo ang aton Dios sang kaluwasan; kag iya ni Jehova nga Soberanong Ginuo ang pagluwas sa kamatayon.”—Salmo 68:20.
Repaso nga mga Pamangkot
◻ Ano ang panghangkat sang matuod nga Dios sa dimatuod nga mga dios?
◻ Paagi sa anong masaligan nga talaksan makilala naton ang matuod nga pagsimba gikan sa dimatuod nga pagsimba?
◻ Anong bunga ang nagapakita nga ang mga dios sining kalibutan wala sing pulos subong sang mga dumaan anay?
◻ Anong maayong bunga ang dapat ipatubas sang mga saksi para sa matuod nga Dios, kag sin-o ang nagapakita sini?
◻ Ngaa hilingagawon nga maghikot karon sa pagbiya sa dimatuod nga pagsimba?
[Mga Laragway sa pahina 16]
Ang wala sing pulos nga mga dios sang dumaan nga mga pungsod wala na ginasimba
[Laragway sa pahina 17]
Sa aton siglo mga isa ka gatos ka milyon ka tawo ang napatay sa mga inaway nga ginsakdag sang mga relihion sining kalibutan
[Ginkuhaan]
Retrato sang U.S. Army
[Laragway sa pahina 18]
Nagsiling si Jesus nga ang matuod nga mga saksi makilala paagi sa ila paghigugmaanay