Katarungan Para sa Tanan nga Pungsod sa Indi Madugay
“Katarungan—dapat mo sundon ang katarungan, agod nga magkabuhi ka kag magpanubli sang duta nga ginahatag sa imo ni Jehova nga imo Dios.”—DEUTERONOMIO 16:20.
1. Ano ang orihinal nga katuyuan sang Dios para sa tawo, kag paano lamang niya matuman ini?
ANG katuyuan ni Jehova nga Dios sa pagtuga sa lalaki kag babayi amo nga tugbon ang duta sing himpit nga mga tinuga. Sila tanan magadayaw sa iya kag magapakigbahin sa pagsakop sa duta. (Genesis 1:26-28) Sanglit ang tawo ginhimo sa dagway kag kaangay sang Dios, ginsangkapan sia sing mga kinaiya nga kaalam, katarungan, gugma, kag gahom. Matuman lamang sang tawo ang katuyuan para sa iya sang iya Magbubuhat paagi sa balanse nga paggamit sining mga kinaiya.
2. Daw ano ka importante ang pagsunod sa katarungan para sa mga anak sang Israel?
2 Subong ginpatalupangod sa nagligad nga artikulo, nagrebelde ang tawo sa mga dalanon sang Dios kag ginpamatbatan sing kamatayon. Karon, bangod sang pagkadihimpit, imposible na nga matuman niya ang orihinal nga katuyuan sang Dios para sa katawhan. Ang diikasarang sang tawo sa pagpakita sing himpit nga katarungan nangin daku nga kabangdanan sa sining kapaslawan. Indi katingalahan, nian, nga ginpahanumdom ni Moises ang mga anak sang Israel: “Katarungan—dapat mo sundon ang katarungan”! Ang ila kabuhi kag ang ikasarang sa pag-agaw sa Ginsaad nga Duta nasandig sa ila pagsunod sa katarungan.—Deuteronomio 16:20.
Landong sang Maabot nga Maayong mga Butang
3. Ngaa importante sa aton karon nga usisaon ang mga pagpakig-angot ni Jehova sa Israel?
3 Ang mga pagpakig-angot ni Jehova sa pungsod sang Israel nagapalig-on sang aton pagsalig nga ipakita gid niya sing maathag ang iya katarungan sa mga pungsod paagi sa iya pinili nga Alagad, si Jesucristo. Ginpaathag ini ni apostol Pablo: “Kay ang tanan nga nasulat sadto anay ginsulat sa pagtudlo sa aton, agod nga paagi sa aton pagbatas kag paagi sa pagpabakod sang Kasulatan may paglaum kita.” (Roma 15:4) Sanglit ang Dios “nagahigugma sang pagkamatarong kag katarungan,” ginpatuman niya sa mga Israelinhon nga ilugon sia sa tanan nila nga pagpakig-angot sa isa kag isa. (Salmo 33:5) Makita ini sing maathag paagi sa pag-usisa sang pila sang 600 ka kasuguan nga ginhatag sa Israel.
4. Paano ginhusay ang mga problema tuhoy sa mga kinamatarong sang mga banwahanon sa idalom sang Mosaikong Kasuguan?
4 Wala mag-utwas ang mga problema tuhoy sa mga kinamatarong sang mga banwahanon sang ginsunod ang Mosaikong Kasuguan. Tuhoy sa di-Israelinhon nga nagpuyo sa pungsod, ang Levitico 19:34 nagasiling: “Ang dumuluong nga nagapanlugayaw upod sa inyo mangin subong sia sang tumandok sa tunga ninyo; kag higugmaon mo sia subong sang imo kaugalingon.” Daw ano ka matarong kag mahigugmaon nga kahimusan! Dugang pa, ang mga hukom kag mga saksi lunsay ginlaygayan: “Dili ka magsaksi sa kasaba sa pagbuylog sa kadam-an agod patikuon ang katarungan. Tuhoy sa imol, dili ka magdampig sa iya kasaba.” (Exodo 23:2, 3) Hunahunaa lamang ina—katarungan para sa manggaranon kag imol!
5. Ipaanggid ang kasuguan tuhoy sa krimen sa idalom sang Mosaikong Kasuguan sa iban nga kasuguan karon.
5 Sa idalom sang Mosaikong Kasuguan, ang kasuguan tuhoy sa mga kriminal labaw gid sa kasuguan sa mga libro sang palatukuran sang mga pungsod karon. Halimbawa, ang kawatan wala ginabilanggo agod mangin lulan sa mapisan nga mga tawo nga nagatuman sa Kasuguan. Dapat sia magtrabaho kag bayaran sing doble ukon kapin pa ang iya kinawatan. Gani wala sing madula sa biktima. Pananglit indi magtrabaho kag indi magbayad ang kawatan. Sa sina nga kaso, ginabaligya sia sa pagkaulipon tubtob mabayaran ang kinawat. Kon mangin batinggilan sia gihapon, ginapatay sia. Sa sining paagi ang katarungan ginahimo sa biktima, kag isa ini ka daku nga pangpahadlok sa iban nga mahimo may huyog sa pagpangawat. (Exodo 22:1, 3, 4, 7; Deuteronomio 17:12) Dugang pa, sanglit ang kabuhi balaan sa mga mata sang Dios, ang bisan sin-o nga manugpatay ginapatay. Ginakuha sini ang malaut kag manugpatay nga tawo gikan sa pungsod. Walay sapayan, ginapakitaan sing kaluoy ang nakapatay sing dihungod.—Numeros 35:9-15, 22-29, 33.
6. Sa anong konklusyon ang pag-usisa sa kasuguan sang Israel nagadul-ong sa aton?
6 Sin-o, nian, ang makapanghiwala nga ang tanan nga hudisyal nga pagpakig-angot sang Dios sa pungsod sang Israel may katarungan? Busa, daw ano nga pagpalig,-on, daw ano nga paglaum, ang mabatyagan naton kon binagbinagon naton kon paano tumanon ang saad sang Dios sa Isaias 42:1 paagi kay Cristo Jesus! Didto ginapasalig kita: “Magadala sia sing katarungan sa mga kapungsuran.”
Katarungan nga Nabalanse sa Kaluoy
7. Ilaragway ang maluluy-on nga mga pagpakig-angot ni Jehova sa Israel.
7 Ang katarungan sang Dios nabalanse sa kaluoy. Maathag ini nga ginpasundayag sang magrebelde ang mga Israelinhon sa matarong nga mga dalanon sang Dios. Pamatii ang paglaragway ni Moises sa maluluy-on nga pag-atipan ni Jehova sa ila sa tion sang ila 40 ka tuig sa kahanayakan: “Nakita niya sia sa kahanayakan, kag sa isa ka mamingaw, kigas nga desyerto. Gin-apinan niya sia, gin-atipan, gin-amligan subong sang tawo-tawo sang iya mata. Subong sang agila nga nagaukay sang iya pugad, nga nagalupadlupad sa ibabaw sang iya buto, nga nagahumlad sang iya mga pakpak, nga nagakuha sa ila, nga nagadala sa ila sa ibabaw sang iya mga kuyos, si Jehova lamang ang nagtuytoy sa iya.” (Deuteronomio 32:10-12) Sang ulihi, sang mangin apostata ang pungsod, si Jehova nagpakiluoy: “Talikod kamo, palihog, gikan sa inyo malaut nga mga dalanon kag gikan sa inyo malaut nga mga buhat.”—Zacarias 1:4a.
8, 9. (a) Tubtob sa anong kasangkaron ginpasangkad sang Dios ang iya maluluy-on nga katarungan sa mga Judiyo? (b) Anong katapusan nga kalaglagan ang nag-abot sa ila, apang ano ang masiling tuhoy sa pagpakig-angot sang Dios sa ila?
8 Ginpabungulan ang pagtanyag ni Jehova sing kaluoy. Paagi kay manalagna Zacarias, ang Dios nagsiling: “Wala sila magpamati, kag wala sila magtalupangod sa akon.” (Zacarias 1:4b) Gani ang maluluy-on nga katarungan sang Dios nagtiklod sa iya nga ipadala ang iya bugtong nga Anak agod buligan sila sa pagpanumbalik sa Iya. Ginpakilala ni Juan Bautista ang Anak sang Dios sa pagsiling: “Yari karon, ang Kordero sang Dios nga nagakuha sang sala sang kalibutan!” (Juan 1:29) Sa pila ka tuig, walay kalapyo nga gintudluan ni Jesus ang mga Judiyo sang matarong nga mga dalanon sang Dios, nga nagahimo sing dimaisip nga mga milagro kag sa amo nagpamatuod nga sia ang gintagna nga Manluluwas. (Lucas 24:27; Juan 5:36) Apang ang katawhan wala magpamati ukon magtuo. Busa, napahulag si Jesus sa pagtuaw: “Jerusalem, Jerusalem, nga nagapatay sang mga manalagna kag nagabato sang mga pinadala sa iya,—makapila kuntani nga luyag ko tipunon ang imo mga anak subong sang isa ka munga nga nagatipon sang iya mga piso sa idalom sang iya mga pakpak! Apang indi kamo luyag. Yari karon! Ang inyo balay ginapatumbayaan.”—Mateo 23:37, 38.
9 Ginpunggan sang Dios ang iya malaglagon nga paghukom sing 37 pa ka tuig, tubtob sang 70 C.E. Nian gintugutan niya ang mga Romano sa paglaglag sa Jerusalem kag sa pagbihag sa linibolibo ka Judiyo. Kon binagbinagon naton ang pagkamainantuson kag pailob ni Jehova sa sulod sang madamo nga siglo, sin-o ang indi makakita sang tanda sang katarungan sa tanan niya nga pagpakig-angot sa panimalay sang Israel?
Katarungan Para sa Tanan nga Kapungsuran
10. Paano ang katarungan sang Dios ginpasangkad sa tanan nga pungsod?
10 Sa tapos ginsikway sang Israel si Jesus, si Santiago nagsiling: “Ang Dios sa nahauna nga tion nagliso sang iya igtalupangod sa mga kapungsuran sa pagkuha gikan sa ila sing katawhan para sa iya ngalan.” (Binuhatan 15:14) Ining “katawhan,” lakip ang pila ka Judiyo nga nagbaton kay Jesus subong Mesias, kolektibo nga nagaporma sang “[espirituwal] nga Israel sang Dios” kag ginahuman sang 144,000 ka ginpanganak sang espiritu nga mga sumulunod ni Cristo Jesus. (Galacia 6:16; Bugna 7:1-8; 14:1-5) Ang nahauna nga wala matuli nga Gentil nga nagtuo amo si Cornelio. Sang ginbaton ni Cornelio kag sang iya panimalay ang dalanon sang pagluwas sang Dios, si Pedro nagsiling: “Sa pagkamatuod nahantop ko nga ang Dios walay ginapasulabi, kundi ang tawo sa tagsa ka pungsod nga nagakahadlok sa iya kag nagabuhat sing pagkamatarong kalahamut-an sa iya.” (Binuhatan 10:34, 35) Ginapasangkad ni Pablo ang pagkamatarong sang pagkawalay pinasulabi ni Jehova sang magsiling sia: “Walay Judiyo ukon Griego, walay ulipon ukon hilway, walay lalaki ukon babayi; kay kamo tanan isa sa paghiusa kay Cristo Jesus. Dugang pa, kon kamo iya ni Cristo, binhi gid kamo ni Abraham, mga manunubli suno sa saad.”—Galacia 3:28, 29.
11. Ano ang ginsaad kay Abraham, kag paano ini matuman?
11 Ginapahanumdom kita diri sang dalayawon nga saad ni Jehova kay Abraham. Pasad sa pagkahanda sang patriarka nga ihalad ang iya hinigugma nga anak nga si Isaac, ang Dios nagsiling sa iya: “Bangod nga naghimo ka sining butang kag wala mo pag-idumili ang imo anak, ang imo bugtong nga anak, sa pagkamatuod pakamaayuhon ko ikaw . . . Kag paagi sa imo binhi ang tanan nga pungsod sang duta magapakamaayo sang ila kaugalingon.” (Genesis 22:16-18) Paano matuman ining saad? Ang “binhi ni Abraham” nga ginahuman ni Jesucristo kag sang iya 144,000 ka hinaplas nga mga sumulunod nga nagmatutom tubtob sa kamatayon, magagahom sa katawhan gikan sa langit sa isa ka libo ka tuig. (Bugna 2:10, 26; 20:6) Tuhoy sadtong ginpakamaayo nga tion, si Jehova nagapasalig sa aton: “Ang kabuganaan sang prinsipenhon nga paggahom kag sang paghidait wala sing katapusan.” Ngaa? Bangod “ang prinsipenhon nga paggahom” sinang Mesianikong Ginharian ‘tib-ungon sang katarungan kag pagkamatarong tubtob sa walay katubtuban.’—Isaias 9:7.
12. Tubtob sa anong kasangkaron naeksperiensiahan na ang mga pagpakamaayo sang Abrahamiko nga katipan?
12 Apang indi na kinahanglan pa nga hulaton ang Isa ka Libo ka Tuig nga Paggahom ni Jesucristo agod maagom ang mga pagpakamaayo sang Abrahamiko nga katipan. Ining mga pagpakamaayo ginaeksperiensiahan na sang “dakung kadam-an” sang katawhan “gikan sa tanan nga pungsod kag mga tribo kag mga katawhan kag mga hambal.” Paagi sa simbuliko nga ‘paglaba sa ila malaba nga panapton kag pagpaputi sini sa dugo sang Kordero,’ nga si Jesucristo, nakatigayon sila sing matarong nga tindog sa atubangan ni Jehova. Kaangay ni Abraham, sila nangin mga abyan ni Jehova! Sa pagkamatuod ang katarungan nagatanda sang paagi sa pagluwas ni Jehova sa minilyon gikan sa tanan nga pungsod.—Bugna 7:9, 14.
Nagapahisuno Ka Bala sa Matarong nga mga Dalanon sang Dios?
13, 14. (a) Anong personal nga pag-usisa sa tagipusuon ang dapat naton tanan himuon? (b) Paano naton mapabutyag ang aton pasalamat kay Jehova?
13 Natandog bala ang imo tagipusuon kag napahulag sang dalanon sang katarungan kag gugma sang Dios sa paghatag sa iya bugtong nga Anak subong gawad para sa imo? Handurawa ang ginabatyag ni Abraham sang ginpangabay sia ni Jehova nga ihalad ang iya anak, nga iya gid ginahigugma! Apang mas mabaskog ang ginbatyag sang Dios. Hunahunaa ang iya ginabatyag sang ang iya ginahigugma nga Anak nagaantos sing mga kahuy-anan, sing mga pasipala sang mga nagalalabay, sing daku nga kasakit sa usok sang pag-antos. Handurawa ang reaksion ni Jehova sa singgit ni Jesus: “Dios ko, Dios ko, ngaa ginpatumbayaan mo ako?” (Mateo 27:39, 46) Apang, ang katarungan nagpangayo nga tugutan ni Jehova nga Dios ang iya Anak nga mapatay sa sinang paagi agod pamatud-an ang iya integridad sa pagbindikar sang pagkamatarong sang Dios. Dugang pa, paagi sa pagtugot sa iya Anak nga mapatay, ginbuksan ni Jehova ang dalanon para sa aton kaluwasan.
14 Sa pagkamatuod, nian, ang aton pasalamat kay Jehova kag sa iya Anak dapat magpahulag sa aton nga kilalahon sing dayag: “Ang aton kaluwasan nagagikan sa aton Dios . . . kag sa Kordero.” (Bugna 7:10) Paagi sa positibo nga pagkilala sa sining paagi, ginapakita naton nga nagatuo kita sa mga pulong ni Moises: “Ang tanan nga dalanon [ni Jehova] katarungan.” (Deuteronomio 32:4) Daw ano nga kalipay ang ginadala naton sa tagipusuon ni Jehova kag sang iya Anak samtang ginakilala naton kag dayon ginasunod ang matarong nga mga dalanon sang Dios para sa kaluwasan sang tawo!
15. Ano ang importansia sa aton sang mga pulong ni Jesus kay Nicodemo?
15 Indi bala kita malipay nga ang aton mga masigkatumuluo sang katuigan 1870 malig-on nga nagtindog sa hulusayon tuhoy sa halad nga gawad? Indi bala kita malipay nga kita sa karon natungod sa isa ka organisasyon nga determinado gid sa pagsunod sa matarong kag mahigugmaon nga dalanon sang Dios para sa kaluwasan sang tawo? Kon nalipay kita, nian dapat naton hatagan sing pinasahi nga igtalupangod ang ginsiling ni Jesus kay Nicodemo: “Ginpadala sang Dios ang iya Anak sa kalibutan, indi sa paghukom sa kalibutan, kundi agod ang kalibutan maluwas paagi sa iya. Sia nga nagatuo sa iya indi paghukman. . . . Sia nga nagabuhat sing kamatuoran nagapalapit sa kapawa, agod nga ang iya mga buhat mapahayag nga napanghimo nahisanto sa Dios.” Agod malikawan ang malaglagon nga paghukom sang Dios, dapat naton pamatud-an ang aton pagtuo sa Anak paagi sa paghimo sing ‘mga buhat nga nahisanto sa Dios.’—Juan 3:17, 18, 21.
16. Paano ang mga disipulo ni Jesus makahimaya sa langitnon nga Amay?
16 Si Jesus nagsiling: “Paagi sa sini ginahimaya ang akon Amay, nga magpamunga kamo sing madamo kag pamatud-an ang inyo kaugalingon nga mga disipulo ko. Kon magbantay kamo sang akon mga sugo, magapabilin kamo sa akon gugma, subong nga ako nagbantay sang mga sugo sang akon Amay kag nagapabilin sa iya gugma.” (Juan 15:8, 10) Ano ang pila sining mga sugo? Ang isa masapwan sa Juan 13:34, 35, nga sa diin ginsilingan ni Jesus ang iya mga disipulo: “Nagahatag ako sa inyo sing bag-ong sugo, nga maghigugmaanay kamo . . . Sa sini mahibaluan sang tanan nga tawo nga kamo mga disipulo ko, kon mahigugmaanay kamo.” Ang bunga nga gugma hayag sa tunga sang mga Saksi ni Jehova. Nagsugo man si Jesus: “Busa lakat kamo kag maghimo sing mga disipulo sa katawhan sang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo.” (Mateo 28:19, 20) Personal bala nga ginahimo mo ining ‘mga buhat nahisanto sa Dios’?
17. Anong resulta ang nagapakita nga ang pagbantala kag pagpanudlo nga hilikuton isa ka pasundayag sang katarungan ni Jehova?
17 Ang katarungan sang dalanon ni Jehova sa pagtugot sa mga sumulunod ni Jesus sa paghimo sining mga buhat sang pagbantala kag pagpanudlo mangin hayag kon binagbinagon naton ang nahimuan sang mga Saksi ni Jehova sa isa ka tuig lamang. Sang 1988, 239,268 ka bag-ong mga disipulo ang nabawtismuhan! Wala bala ini nagadala sing kalipay sa imo tagipusuon?
Ang Dios sang Katarungan Magahikot sing Madasig
18. Anong mga pamangkot ang mahimo mapautwas bangod sang paghingabot sa katawhan ni Jehova?
18 Ang hilikuton sa pagpanaksi wala ginhimo nga wala sing pagpamatok. Ginsilingan ni Jesus ang iya mga sumulunod: “Kon ginhingabot nila ako, hingabuton man nila kamo.” (Juan 15:20) Ang modernong-adlaw nga maragtas sang mga Saksi ni Jehova nagapamatuod sa sinang pinamulong. Naeksperiensiahan sang mga Saksi ni Jehova sa nagkalainlain nga pungsod ang mga pagdumili, mga pagbilanggo, mga pagpanakit, kag mga pagpaantos pa gani. Madumduman naton liwat ang matagnaon nga mga pulong ni Habacuc: “Ang kasuguan hugakâ, kag ang katarungan wala gid ginahimo.” Busa, kon kaisa, mahimo nga daw luyag mamangkot sang katawhan ni Jehova: ‘Ngaa nagatulok lamang si Jehova sa mga madaya? Ngaa nagahipos lamang Sia kon ginahalunhon sang malauton ang isa nga mas matarong sa iya?’—Habacuc 1:4, 13.
19. Anong palaanggiran ang ginhatag ni Jesus sa pagbulig sa aton nga mahangpan ang mga butang gikan sa pagtamod sang Dios?
19 Naghatag si Jesus sing palaanggiran nga nagabulig sa pagsabat sinang mga pamangkot kag makita naton ang mga butang gikan sa pagtamod sang Dios. Sa Lucas 17:22-37, ginlaragway ni Jesus ang masingki nga mga kahimtangan nga magatanda sang katapusan sining sistema sang mga butang. Nagsiling sia nga mangin kaanggid ini sang tion sa wala pa ang Anaw sang adlaw ni Noe kag sang pagkalaglag sang Sodoma kag Gomorra sang mga adlaw ni Lot. Nian, subong ginalaragway sa Lucas 18:1-5, nagliso si Jesus sa iya mga disipulo kag “nagsugid sa ila sing palaanggiran sa katuyuan nga dapat sila magpangamuyo pirme kag indi magpakaluya.” Nagsugid si Jesus tuhoy sa isa ka babayi nga balo nga may dakung kinahanglanon kag tuhoy sa “isa ka hukom” nga yara sa kahimtangan sa pagbulig sa iya. Ang babayi nga balo nagpadayon sa pagpakiluoy: “Pat-ura nga makatigayon ako sing katarungan gikan sa akon kasumpong.” Bangod sang iya pagpamilit, ‘ginpat-od [sang hukom sang ulihi] nga makatigayon sia sing katarungan.’
20. Anong leksion ang ginahatag sa aton sang palaanggiran ni Jesus?
20 Ano ang leksion para sa aton karon? Sa pagpatuhay sadtong dimatarong nga hukom kay Jehova, si Jesus nagsiling: “Pamatii ninyo ang ginsiling sang hukom nga dimatarong! Sa pagkamatuod, indi bala ang Dios magahatag sing katarungan sa iya mga pinili nga nagatuaw sa iya sa adlaw kag gab-i, bisan pa mainantuson sia sa ila? Nagasiling ako sa inyo, pahanabuon Niya ang katarungan sa ila sing madasig.”—Lucas 18:6-8a.
21. Paano naton dapat tamdon kag husayon ang aton personal nga mga problema?
21 Dumduma pirme nga kon tuhoy sa aton personal nga mga problema, ang bisan anong daw pagpalantang sa sabat sa aton mga pangabay wala nagakahulugan nga indi luyag sang Dios. (2 Pedro 3:9) Kon nagaantos kita sing isa ka sahi sang paghingabot ukon inhustisya kaangay sadtong babayi nga balo, makatuo kita nga pat-uron sang Dios nga himuon ang katarungan sa ulihi. Paano kita makapakita sina nga pagtuo? Paagi sa pagpangamuyo sing walay untat kag pagsakdag sang aton mga pangamuyo paagi sa paghupot sing matutom nga dalanon sang buhat. (Mateo 10:22; 1 Tesalonica 5:17) Paagi sa aton katutom, pamatud-an naton nga may yara pagtuo sa duta, nga may yara matuod nga mga nagahigugma sa katarungan, kag lakip kita sa ila.—Lucas 18:8b.
“Hinugyaw, Kamo nga mga Pungsod, Pati ang iya Katawhan”
22. Sa anong nota sang kadalag-an ginhinakpan ni Moises ang iya ambahanon?
22 Sang nagligad nga madamong siglo, ginhinakpan ni Moises ang iya ambahanon sa sining madaugon nga nota: “Hinugyaw, kamo nga mga pungsod, pati ang iya katawhan, kay itimalos niya ang dugo sang iya mga alagad, kag timalusan niya ang iya mga kaaway kag magahimo sing katumbasan tungod sa duta sang iya katawhan.” (Deuteronomio 32:43) Ang adlaw sang pagtimalos ni Jehova malapit na. Nagapasalamat gid kita nga nagapailob gihapon sia upod ang katarungan!
23. Anong makalilipay nga resulta ang nagahulat sa mga nagapakigbahin sa kalipay sang katawhan sang Dios?
23 Bukas pa ang dalan agod ang mga tawo sa tanan nga pungsod “makadangat sa paghinulsol,” apang wala sing tion nga uyangan. Si Pedro nagpaandam: “Ang adlaw ni Jehova magaabot subong sang makawat.” (2 Pedro 3:9, 10) Ginapangayo sang katarungan sang Dios nga laglagon sa indi madugay ining malaut nga sistema. Kon mag-abot ini, kabay nga masapwan kita sa tunga sang mga nagsabat sa makalilipay nga panawag: “Hinugyaw, kamo nga mga pungsod, pati ang iya katawhan.” Huo, kabay nga malakip kita sa mga malipayon nga nakakita nga ang tanan nga dalanon sang Dios may katarungan!
Paano Mo Sabton?
◻ Ngaa ang Mosaikong Kasuguan dapat magpalig-on sang aton pagtuo sa katarungan sang Dios?
◻ Ano ang dapat magtiklod sa aton sa pagsunod sa matarong nga mga dalanon sang Dios?
◻ Paano mahimaya si Jehova?
◻ Sa karon, sa diin lamang masapwan ang matuod nga kalipay?
[Piktyur sa pahina 25]
“Sa pagkamatuod nahantop ko nga ang Dios walay pinasulabi, kundi ang tawo sa tagsa ka pungsod nga nagakahadlok sa iya kag nagahimo sing matarong kalahamut-an sa iya.”—Binuhatan 10:34, 35
[Piktyur sa pahina 28]
Pahanabuon sang Dios ang katarungan para sa iya mga pinili nga nagatuaw sa iya