Si Jehova—Mahigugmaon sang Pagkamatarong kag Katarungan
GINPAMANGKOT sang isa ka bata nga babayi sa Sarajevo ang iya kaugalingon kon ngaa ang kabataan sa iya siudad dapat magbatas sing daku nga pag-antos. “Wala kami sing ginhimo nga bisan ano. Inosente kami,” siling niya. Ang akig nga mga iloy sa Argentina nagdemonstrasyon sa plasa sa Buenos Aires sa sulod sang mga 15 ka tuig, bilang protesta sa pagkadula sang ila mga anak nga lalaki. Ang isa ka Aprikano nga si Emmanuel, nga ang iya iloy kag tatlo ka utod nga babayi mapintas nga ginpatay sang nagsilabo ang etniko nga kasingki, nagainsister: “Ang tanan dapat magbaton sing makatarunganon nga bayad . . . Luyag namon ang katarungan.”
Ang katarungan amo ang isa sang pangunang mga kinaiya ni Jehova nga Dios. “Ang tanan niya nga dalanon katarungan,” siling sang Biblia. Sa pagkamatuod, si Jehova “mahigugmaon sang pagkamatarong kag katarungan.” (Deuteronomio 32:4; Salmo 33:5) Agod makilala sing maayo ang Dios, dapat naton mahangpan ang iya igbalatyag sang katarungan kag tun-an nga ilugon ini.—Oseas 2:19, 20; Efeso 5:1.
Ang aton panghunahuna sa katarungan mahimo nga naimpluwensiahan sang kon ano ang pagkabig sang mga tawo sa sining kinaiya. Sa iban nga bahin sang kalibutan, ang katarungan masami ginalaragway subong isa ka nabutahan nga babayi nga nagauyat sing espada kag timbangan. Ang tawhanon nga katarungan dapat nga wala sing ginapasulabi, kon sayuron, wala naapektuhan sang manggad ukon impluwensia. Dapat sini timbangon sing maayo ang pagkamakasasala ukon pagkawalay sala sang akusado. Paagi sa espada sini, dapat amligan sang katarungan ang mga wala sing sala kag silutan ang mga nakasala.
Ang libro nga Right and Reason—Ethics in Theory and Practice nagasiling nga “ang katarungan ginaangot sa layi, obligasyon, mga kinamatarong, kag mga katungdanan, kag ginahatag ang katapusan nga desisyon suno sa pagkawalay nadampigan ukon suno sa kon ano ang napanilagan sang isa.” Apang ang katarungan ni Jehova nagalabaw sa sinang depinasyon. Makita naton ini paagi sa pagbinagbinag sa mga binuhatan kag mga kinaiya ni Jesucristo, nga kaangay gid sang iya langitnon nga Amay.—Hebreo 1:3.
Ang mga pinamulong sa Isaias 42:3 gin-aplikar kay Jesus sang manunulat sang Ebanghelyo nga si Mateo, nga nagsiling: “Ang tabun-ak nga basag indi niya pagbalion, kag ang pabilo nga nagairaw indi niya pagpalungon, tubtob ipahayag niya ang katarungan nga may kadalag-an.” Si Jesus nagpahayag sing makalulugpay nga mensahe sa mga tawo nga kaangay sang tabun-ak nga basag nga nabali kag gintapak pa gani. Kaangay sila sang pabilo sang nagairaw nga suga, subong nga ang ila katapusan nga kirab sang kabuhi daw mapalong na. Sa baylo nga balion sing malaragwayon ang tabun-ak nga basag kag palungon ang pabilo nga nagairaw, ginkaluy-an ni Jesus ang mga nasit-an, gintudluan kag gin-ayo sila, gin-athag sa ila ang katarungan ni Jehova nga Dios. (Mateo 12:10-21) Subong sang gintagna ni Isaias, ina nga sahi sang katarungan nagainspirar sing paglaum.
Ang Kaluoy kag ang Katarungan ni Jehova
Ang kaluoy isa ka matuodtuod nga bahin sang katarungan sang Dios. Nakilal-an ini sang si Jesus yari sa duta. Gintiglawas niya sing himpit ang mga talaksan sang Dios sa katarungan kag pagkamatarong. Apang, ang Judiyong mga escriba kag mga Fariseo nagpanikasog nga matigayon ang pagkamatarong paagi sa pagsunod sa estrikto nga kodigo sang mga kasuguan—ang kalabanan ginhimo nila. Ang ila legalistiko nga katarungan masunson nga nagadula sang kaluoy. Ang madamo nga binais sa tunga ni Jesus kag sang mga Fariseo nagalibot sa sining isyu: Ano ang matuod nga katarungan kag pagkamatarong?—Mateo 9:10-13; Marcos 3:1-5; Lucas 7:36-47.
Gin-ilustrar ni Jesus kon paano pakig-angutan ang iban sa makatarunganon kag matarong nga paagi. Ang isa ka tawo nga batid sa Kasuguan namangkot anay kay Jesus kon ano ang kinahanglanon agod mapanubli ang kabuhi nga walay katapusan. Bilang sabat ginpamangkot sia ni Jesus sing isa ka pakiana kag ginhatagan sia sing komendasyon sang nagsabat sia nga ang duha ka labing importante nga mga kasuguan amo ang paghigugma sa Dios upod sa bug-os nga tagipusuon, kalag, hunahuna, kag kusog kag ang paghigugma sa isigkatawo subong sang kaugalingon. Nian ang tawo namangkot: “Sin-o gid bala ang akon isigkatawo?” Si Jesus nagsabat paagi sa pagsaysay sang ilustrasyon sang mainabyanon nga Samariahanon.—Lucas 10:25-37.
Ang pagkamatarong kag maluluy-on nga katarungan ni Jehova ginpakita sa ilustrasyon ni Jesus tuhoy sa Samariahanon. Paagi sa maalwan nga pagbulig sa isa ka nasamad nga lalaki nga wala niya makilala, ang Samariahanon nakahimo sing butang nga matarong, makatarunganon, kag maluluy-on. Ginpakita mismo ni Jesus ang amo man nga espiritu sang yari sia sa duta. Matarong sia kag makatarunganon. Dugang pa, ginhatag niya ang iya kabuhi sa kubos nga mga tawo, sa makasasala kag dihimpit nga katawhan nga nagabatas sing pag-antos, balatian, kag kamatayon. Gin-angot ni apostol Pablo ang pagkamatarong sa gawad nga aman. Sia nagsulat: “Subong nga paagi sa isa ka paglapas ang resulta sa tanan nga sahi sang tawo amo ang katagudilian, gani subong man paagi sa isa ka buhat sang pagpakamatarong [ukon, “isa ka matarong nga buhat,” footnote] ang resulta sa tanan nga sahi sang tawo amo ang pagpahayag sa ila nga matarong para sa kabuhi.” (Roma 5:18) Ining “isa ka matarong nga buhat” amo ang paagi sang Dios sa pagluwas sa matinumanon nga katawhan gikan sa makalilisang nga mga resulta sang sala ni Adan, nga sa sini may direkta sila nga salabton.
Ang katarungan sang Dios nagapanikasog sa pagtubos sa makasasala nga mga tawo kag sa pagsakdag man sa matarong nga mga prinsipio. Ang pagkunsinti sa sala lunsay dimakatarunganon kag dimahigugmaon, kay ginapalig-on sini ang pagkamalinapason. Sa pihak nga bahin, kon ang katarungan sang Dios ginlatiran lamang sa paghatag sing padya ukon silot, ang kahimtangan sang katawhan mahimo nga wala sing paglaum. Suno sa Biblia, “ang bayad nga ginabayad sa sala amo ang kamatayon” kag “wala sing bisan sin-o nga matarong, wala bisan isa.” (Roma 3:10; 6:23) Sa dakung personal nga bili sa iya kaugalingon kag sa iya hinigugma nga Anak, si Jehova nag-aman sing katumbas nga halad para sa mga sala.—1 Juan 2:1, 2.
Ang gawad nagapakita nga ang balaan nga katarungan ginabalighot sa may prinsipio nga gugma (Griego, a·gaʹpe). Sa pagkamatuod, ang katarungan sang Dios amo ang pagpadapat sang iya matarong nga mga prinsipio—isa ka pagpabanaag sa kon ano ang iya talaksan sa moralidad. Busa, kon ginahimo sang Dios, ang a·gaʹpe amo ang gugma nga sa sini napasad ang balaan nga katarungan. (Mateo 5:43-48) Gani kon nahantop gid naton ang katarungan ni Jehova, magasalig kita sing bug-os sa iya hudisyal nga mga desisyon. Subong “Hukom sang bug-os nga duta,” pirme niya ginahimo kon ano ang husto.—Genesis 18:25; Salmo 119:75.
Iluga ang Katarungan ni Jehova
Ang Biblia nagalaygay sa aton nga “mangin mga manug-ilog sang Dios.” (Efeso 5:1) Nagakahulugan ini sang pag-ilog sa iya katarungan subong man sa iya gugma. Apang, bangod mga dihimpit kita, ang aton mga dalanon indi subong kataas sang iya ni Jehova nga Dios. (Isaias 55:8, 9; Ezequiel 18:25) Gani paano naton pamatud-an nga mahigugmaon kita sang pagpakamatarong kag katarungan? Paagi sa pagsul-ob sang “bag-ong personalidad, nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:24) Nian higugmaon naton kon ano ang ginahigugma sang Dios kag dumtan kon ano ang iya ginadumtan. Ang “matuod nga pagkamatarong” nagalikaw sa kasingki, imoralidad, kahigkuan, kag apostasya, kay nagasupak ini sa kon ano ang balaan. (Salmo 11:5; Efeso 5:3-5; 2 Timoteo 2:16, 17) Ang diosnon nga katarungan nagapahulag man sa aton sa pagpakita sing hanuot nga interes sa iban.—Salmo 37:21; Roma 15:1-3.
Dugang pa, kon ginaapresyar naton ang maluluy-on nga kinaugali sang katarungan sang Dios, indi kita mahuyog sa paghukom sa espirituwal nga mga kauturan nga lalaki ukon babayi. Paano naton sila mahangpan subong sang paghangop ni Jehova? Indi bala naton sila hukman pasad sa aton kaugalingon may nadampigan nga pagtamod? Sa amo, si Jesus nagpaandam: “Dili kamo maghukom agod indi kamo paghukman; kay sa paghukom nga inyo ginahukom, hukman kamo; kag sa talaksan nga ginataksan ninyo, takson kamo. Ngaa bala ginamulalong mo ang puling nga yara sa mata sang imo utod, apang wala mo pagsapaka ang balayanon nga yara sa imo kaugalingon nga mata? Ukon paano bala ang pagsiling mo sa imo utod, ‘Ipakuha sa akon ang puling sa imo mata’; samtang, tan-awa! may balayanon sa imo kaugalingon nga mata? Salimpapaw! Kuhaa anay ang balayanon sa imo kaugalingon nga mata, kag ugaling makakita ka sing maayo sa pagkuha sang puling sa mata sang imo utod.” (Mateo 7:1-5) Ang bunayag nga pag-usisa sa aton kaugalingon nga mga dikahimpitan magapugong sa aton sa paghimo sing mga paghukom nga mahimo kabigon ni Jehova nga dimatarong.
Ang gintangdo nga mga gulang sa kongregasyon obligado sa paghukom sa mga kaso sang mabug-at nga sala. (1 Corinto 5:12, 13) Kon nagahimo sini, ginadumdom nila nga ang katarungan sang Dios nagapanikasog sa pagpakita sing kaluoy kon posible. Kon wala sing sadsaran para sa sini—subong sa kaso sang dimahinulsulon nga mga makasasala—ang kaluoy indi mahimo mapakita. Apang ang mga gulang wala nagasikway gikan sa kongregasyon sang isa nga nakasala bangod sang pagtimalos. Nagalaum sila nga ang pag-disfellowship mismo nga buhat magapamadmad sa iya. (Ipaanggid ang Ezequiel 18:23.) Sa idalom sang pagkaulo ni Cristo, ang mga gulang nagapangalagad sa interes sang katarungan, kag nagalakip ini sang mangin subong sang “palalipdan sa hangin.” (Isaias 32:1, 2) Busa dapat sila magpakita sing pagkawalaynadampigan kag pagkamakatarunganon.—Deuteronomio 1:16, 17.
Magsab-ug sing mga Binhi sang Pagkamatarong
Samtang nagahulat kita sang matarong nga bag-ong kalibutan sang Dios, dapat naton ‘pangitaon ang pagkamatarong’ agod maagom ang balaan nga kahamuot. (Sofonias 2:3; 2 Pedro 3:13) Ining ideya ginlaragway sing matahom sa sining mga pulong, nga masapwan sa Oseas 10:12: “Sab-ug kamo nga sa inyo sing pagkamatarong; mag-ani suno sa mahigugmaon nga kalulo. Pangumahi ang mapangumahan nga duta, samtang may tion sa pagpangita kay Jehova tubtob nga mag-abot sia kag maghatag sa inyo sing instruksion sa pagkamatarong.”
Sa aton matag-adlaw nga pagkabuhi, mahimo nga may madamo kita sing kahigayunan sa ‘pagsab-ug sing mga binhi sa pagkamatarong,’ subong sang ginlaragway ni Jesus sa iya parabola sang mainabyanon nga Samariahanon. Si Jehova nagapasalig nga ‘magaani kita suno sa mahigugmaon nga kalulo.’ Kon padayon kita sa paglakat sa “banas sang katarungan,” padayon kita nga magabaton sing instruksion sa pagkamatarong sa idalom sang paggahom sang Ginharian. (Isaias 40:14) Samtang nagaligad ang tion, walay duhaduha nga maapresyar naton sing labi pa nga si Jehova mahigugmaon sang pagkamatarong kag katarungan.—Salmo 33:4, 5.
[Retrato sa pahina 23]
Ang mainabyanon nga Samariahanon nagahatag sang halimbawa sang katarungan ni Jehova
[Retrato sa pahina 23]
Si Jesus naluoy sa mga tawo nga nasit-an, nga kaangay sang tabun-ak nga basag