Makasapo Ka sing Bilidhon nga mga Bahandi!

“MAY nakita ka bala?” pamangkot sang manggaranon nga Ingles. “Huo, makatilingala nga mga butang,” sabat sang Egiptologo. Ang tuig amo ang 1922, kag bag-o lang nakita ni Howard Carter ang lulubngan ni Faraon Tutan­khamen sa Nalupyakan sang mga Hari sa Egipto. Puno gid sing kakunyag ang pinamulong ni Carter:

“Sang maanad na ang akon mata sa kapawa, ang mga detalye sang hulot sa sulod amat-amat nga nag-athag, ang dikinaandan nga mga sapat, mga estatwa, kag bulawan​—⁠bisan diin may idlak sang bulawan. Sa makadali​—⁠ayhan walay katapusan sa iban nga nagahulat​—⁠naurongan ako sa kakibot . . . Wala gid namon ginhunahuna ang subong sini, isa ka hulot nga puno​—⁠daw isa ka museo​—⁠sang mga butang.” Nabatyagan kuno ni Carter “ang kinaugali nga ginapaabot . . . sang nagapangita sing bahandi.”

Nasapwan sa sina nga tukib ang makatilingala nga mga bahandi nga gintago sang nagligad nga kapin sa 3,000 ka tuig. Apang luyag sang Dios nga maghimo kita sing daku pa nga pagpangita sa bahandi. Isa ini ka pagpangita nga mas makapaladya sang sa bisan ano nga pagpangita sing mga hiyas, bulawan, ukon pilak. Ining pagpangita sing bahandi amo ang para sa diosnon nga kaalam, kag ang isa sang labing bilidhon nga manggad amo ang kabuhi nga dayon.​—⁠Juan 17:⁠3.

Kinahanglan ang Panikasog

Kinahanglan ang daku nga panikasog sa pagkutkot sa arkeolohiko nga lugar. Indi mahapos ang magkutkot sa wala ginapuy-i nga lugar ukon magdulhog sa makatalagam nga mga tubig sa pagpangita sing natago, nalubong, ukon nalunod nga bahandi. Apang ang mapisan nga mga nagapangita sing manggad malipayon nga nagahimo sina nga mga panikasog. Masunson nila nga ginaantos ang daku nga mga kabudlayan kag ginalandas ang daw imposible nga mga sablag. Ti, indi bala takus sang labi pa nga panikasog ang pagpangita sing diosnon nga kaalam?

Makasapo kita sing bilidhon nga mga bahandi kon manikasog kita sing lakas nga ton-an ang Biblia kag ang matuod nga Cristianong mga publikasyon nga gindesinyo sa pagbulig sa aton nga makita ang hiyas sang kaalam nga ginaunod sini. Kinahanglan ang padayon nga panikasog. Indi kita magamanggaranon kon nagsugod kita sa pagkutkot para sa materyal nga mga bahandi kag nag-untat pagkatapos sang hapaw nga pagkutkot. Amo man sina kon nagsugod kita sa pagkutkot para sa espirituwal nga mga bahandi kag sang ulihi nag-untat bangod abi naton makakalapoy gid nga padayunon ini. Para sa sadtong nagapanikasog nga matigayon ini “ang kaalam nga gikan sa hitaas.” (Santiago 3:17) Indi ka bala dapat maghimo sing kinahanglanon nga panikasog agod masapwan ang hamili nga mga bahandi sang diosnon nga kaalam?

[Picture Credit Line sa pahina 2]

Cover and page 3 photo: K. Scholz/H. Armstrong Roberts