Report sang mga Manugbantala sang Ginharian
Ginahiusa sang Gugma ang mga Pamilya
ANG paghiusa sa pamilya matigayon lamang kon ang pag-asawahay napasad sa gugma nga ginatuytuyan sing pagkadimakagod. Ina nga gugma nagagikan kay Jehova, ang Dios sang gugma, gani isa ini ka bunga sang espiritu sang Dios. (Galacia 5:22, 23; 1 Juan 4:8) Ang masunod nga mga eksperiensia nagailustrar kon paano ang gugma nga napasad sa ihibalo sa Biblia nagpahiusa sa mga pamilya.
Hong Kong
◻ Sa Hong Kong ginsugdan sang isa ka payunir ang pagtuon sa Biblia sa puluy-an upod sa isa ka iloy kag sa iya duha ka anak nga babayi. Nagpabutyag sing kabalaka ang bana nga basi madalahig sia sa radikal nga relihioso nga grupo. Ginpanugda sang payunir sa asawa nga agdahon niya ang iya bana nga maglingkod sa pagtuon kag mamat-od para sa iya kaugalingon, nga ginhimo niya. Samtang, ang asawa nagsugod sa pagtambong sa mga miting, apang nabudlayan sia sa paghanas sa iya mga anak. Pirme niya ginaakigan ang magulang kag ginapabay-an ang manghod. Nian naburuka nga sia kag ang iya bana may mga problema. Ang ila pag-away masami nga nagadul-ong sa kasingki, kag makapila nga kinahanglan tawgon ang polis. Gingamit sang payunir ang gamhanan nga Pulong sang Dios sa pagtudlo sa ila kon paano ipakita ang diosnon nga gugma sa ila pag-asawahay. Wala madugay ang daan nga mga dalanon kag mga batasan nagsugod sa pagbalhin. Sila nga duha regular nga nagtambong sa mga miting, kag mas malipayon nga atmospera ang nagluntad sa balay. Gin-untatan sang bana ang pagpanigarilyo kag nagbuylog na karon sa Teokratikong Eskwelahan sa Ministeryo. Ang asawa isa na karon ka bawtismado nga manugbantala.
Ang paghiusa sang pamilya natigayon paagi sa pagpakita sing gugma, isa ka bunga sang espiritu sang Dios.
Britanya
◻ Ang eksperiensia gikan sa Britanya nagailustrar kon paano ginapakamaayo ni Jehova ang bana nga nagapakita sing gugma, pagpailob, kag pagbatas sa pagpakig-angot sa iya asawa. Sang manugsulod pa lang ang bana sa kamatuoran sang nagligad nga 12 ka tuig, ang mabaskog nga pagpamatok sang iya asawa nagdul-ong sa iya sa pagtigayon sing legal nga diborsio. Apang, nagpadayon ang bana sa pagpakita sa iya sing kalolo, ginapat-od nga ginaatipan ang iya pinansial nga mga kinahanglanon, nagahimo sang diutay nga mga hilikuton para sa iya sing regular. Pagligad sang apat ka tuig kag walay sapayan sang iya pagpamatok anay, namat-od sia nga sambiton sa iya liwat ang kamatuoran. Sang manugda sia nga magtuon sia sa Biblia upod sa isa ka utod nga babayi, nagsugot sia, sa iya daku nga kakibot. Sang ulihi nagtindog sia sa kamatuoran kag ginbawtismuhan. Wala gid madula sang bana ang iya gugma sa iya, kag sang mapamatud-an niya nga ginbaton niya ang kamatuoran, ginhagad niya sia nga magpakasal sila liwat. Nalipay sia, nga wala gid magpaabot sa iya nga himuon ini bangod sang iya anay malain nga panimuot. Nag-asawahay sila liwat karon sing halos walo ka tuig na, kag sila nga duha nagauswag sing maayo sa kamatuoran.
Bagatnan nga Pasipiko
◻ Sang nagligad nga 20 ka tuig, ang isa ka pamatan-on nga lalaki sa isa ka isla sa Tuvalu sa Bagatnan nga Pasipiko nagsulat sa Watch Tower Society nga nagapangayo sing literatura. Wala sing Saksi sa isla sadtong tion. Walay sapayan, ginbasa niya ang literatura sing isahanon kag nakilala niya ini subong amo ang kamatuoran. Apang, ang iya asawa mabaskog nga nagpamatok sa iya bag-ong pagtuluohan, gani ginbiyaan niya ini.
Sining karon lang, sang matigayon na ang literatura sa Tuvaluan, nakatigayon ang asawa sing pila ka publikasyon kag ginbasa niya ini. Nakilala niya karon ang kamatuoran kag nagreklamo sia sa iya bana: “Sining tanan nga nagligad nga tinuig yara sa imo kapawa, apang wala mo ini pagbayawa sing mataas. Ngaa wala mo man lang ginpaathag sa akon kon ngaa ginapatihan mo nga husto ang mga Saksi?” Karon nahiusa sa kamatuoran sang Biblia, ining mag-asawa nagsugod sa pagpakig-upod sa mga Saksi.
Sang ang ila duha ka anak nga babayi nga nagaeskwela sa Fiji, nagpauli, ginpahibalo sila sang mga ginikanan sang ila desisyon nga mangin mga Saksi ni Jehova. Ginpalig-on nila ang ila mga anak nga magbuylog sa ila sa pagtuon sa Biblia, apang sa ila kakibot, nasapwan nila nga nagatambong na gali sila sa mga miting sa Fiji. Malipayon nga ginbaton sang pamilya ang kamatuoran, kag ang amay, ang iloy, kag ang isa sang mga anak nga babayi nangin mga manugbantala sang Ginharian.
Daw ano ka makalilipay nga makita kon paano ang kamatuoran sang Biblia kag ang gugma nagahiusa sa mga pamilya sa bug-os nga kalibutan.