Ihambal sa Ila nga Palangga Mo Sila
Si Ong-Li isa sa mga Saksi ni Jehova sa Bulgaria. May ginatudluan sia sa Biblia nga isa babayi nga si Zlatka, pero ang bana sini wala nagatuon sa Biblia. Si Ong-Li nagsiling: “Sang gintun-an namon ang parte sa pagkabuhi sang pamilya, ginpadaku ko nga importante gid nga ihambal sa amon bana kag sa mga bata nga palangga namon sila. Gintulok ako sing masinulub-on ni Zlatka. Nagsiling sia nga wala gid niya mahambal sa iya bana ukon sa iya siam ka tuig nga bata nga palangga niya sila!”
Si Zlatka nagpaathag, “Handa ako nga himuon ang tanan para sa ila pero indi ko gid mahambal ina nga mga tinaga.” Nagdugang pa sia, “Si Nanay wala gid makahambal sa akon nga palangga niya ako, kag si Lola wala man nakahambal kay Nanay nga palangga niya sia.” Ginpakita ni Ong-Li kay Zlatka sa Biblia nga ginhambal gid ni Jehova nga palangga niya si Jesus. (Mateo 3:17) Ginpalig-on niya si Zlatka nga ipangamuyo ini kay Jehova kag himuon nga tulumuron nga ihambal sa iya bana kag bata nga palangga niya sila.
Si Ong-Li nagsiling: “Pagligad sang duha ka adlaw, si Zlatka malipayon nga nagsugid sa akon nga nangamuyo sia sing bulig kay Jehova. Pagpauli sang iya bana, ginsugiran niya sia nga natun-an niya sa iya pagtuon sa Biblia nga dapat gid respetuhon kag palanggaon sang asawa ang iya bana. Nagdulog sia sing makadali, kag dayon ginsilingan ang iya bana nga palangga gid niya ini! Sang magpauli ang iya bata nga babayi, ginhakos ini ni Zlatka kag ginsilingan nga palangga niya sia! Si Zlatka nagsiling sa akon: ‘Daw nagabutan ako sang tunok. Sa sulod sang mga tinuig, wala ko gid mahambal ang akon ginabatyag, pero sa bulig ni Jehova, nahambal ko gid man ang akon pagpalangga sa akon pamilya.’
Si Ong-Li padayon nga nagatanyag sing pagtuon sa Biblia sa iya mga kaingod
“Pagligad sang isa ka semana,” padayon ni Ong-Li, “nagkitaay kami sang bana ni Zlatka, kag nagsiling sia sa akon: “Damu ang nagahambal sa akon nga indi dapat magtuon sing Biblia si Zlatka upod sa imo, pero nakita ko nga daku gid ang nabulig sa amon pamilya sang iya pagtuon sa Biblia. Mas malipayon subong ang amon pag-asawahay.”