Report sang mga Manugbantala sang Ginharian

Ang Pagpangita sing Kamatuoran Ginpadyaan

ANG Biblia nagasiling sa aton nga “pangitaa si Jehova, . . . tawga ninyo sia.” (Isaias 55:6) Si Solomon ginsilingan ni Jehova: “Kon pangitaon mo [si Jehova], makita sia nimo.” (1 Cronica 28:9) Ginpangita sang isa ka pamatan-on nga babayi ang kamatuoran nahanungod kay Jehova kag ginpadyaan sing bugana.

Katapo sia sang ­State ­Church of Fin­land kag nag-eskwela sa Con­fir­ma­tion ­School, nagalaum nga makita niya ang kamatuoran nahanungod sa Dios. Apang, napaslawan sia. Wala nila pirme ginabasa ang Biblia sa eskwelahan. Sa katunayan, ginpaandaman sia sang pari nga indi pagbasahon ini, kay magapierde ini sang iya katimbang sa panghunahuna.

Apang, nagsugod sia sa pagbasa sang Biblia sang makatapos na sia sa pag-eskwela. Nagsimba man sia, apang wala sia sing nakita nga kaayawan didto. Nian nagsimba sia sa Iglesia sang Pentecostal diin sia “nagsulod sa pagtuo.” Nangamuyo sila para sa iya kag ginsilingan sia nga natigayon na niya karon ang pagtuo. Apang wala sia magbatyag nga mas suod sa Dios sang sa ginbatyag niya anay.

Nagsulat sia sa “Gang and ­Street Ser­vice Cen­ter” agod buligan, apang ginhatagan lamang sia sang numero sang telepono. Sang nagtawag sia, ginsabat sia sang isa ka Metodista nga nangamuyo para sa iya kag ginsilingan sia nga wala sing kabilinggan kon ano nga simbahan ang iya tambongan basta indi lang sia magbuylog sa mga Saksi ni Jehova ukon sa mga Mormons!

Nagsimba sia sa Peo­ple’s Mis­sion kag ginhatagan sia sing mga tracts nga inugpanagtag nga natig-ulohan Je­ho­vah’s Wit­ness­es, the De­cep­tion of the Time of the End. Wala man ini magpaayaw sa iya pagpangita sing kamatuoran ukon naghatag sa iya sing katuyoan sa kabuhi.

Nian ginduaw niya ang tiya kag nakibot sia sang ginsilingan sia sang iya tiya nga nagatuo sia nga ang mga Saksi ni Jehova amo ang nagatudlo sang kamatuoran. Matawhay nga ginbasa sang iya tiya ang mga kasulatan gikan sa Biblia nga nagapamatuod nga katuyoan sang Dios nga himuon ini nga duta nga isa ka paraiso, kag ginhatagan niya sia sang libro nga Ang Kamatuoran nga Nagadul-ong sa Kabuhi nga Dayon. Ginbasa niya ang libro upod ang katuyoan nga pangitaan ini sing sayop—agod baison ini—apang nadiparahan niya sang ulihi nga nagaunod gali ini sang kamatuoran, nagapakita sa iya sang katuyoan sa kabuhi nga ginapangita niya. Ginsulatan niya ang mga manugbalhag agod mangabay sing iban pa nga mga libro kag nangabay nga may magaduaw sa iya. Duha ka adlaw lamang sang ulihi, nag-abot ang duha ka payunir nga mga utod nga babayi sa iya balay. Ginhimus ang pagtuon sa Biblia kag ang pamatan-on nagsugod sa pagtambong sa mga miting sa Kingdom Hall, diin nahamuot sia sing tudok kag natandog bangod sang mahigugmaon nga palibot nga nagaluntad didto. Nagpadayon sia sa iya pagtuon sang Biblia, ginbawtismohan isa ka tuig sang ulihi, nagsugod sa pagpayunir, kag nagtambong sa Pio­neer Ser­vice ­School. “Sa katapusan nangin malipayon na ako,” siling niya. Ang iya pagpangita sing kamatuoran ginpadyaan.

Ang kaanggid nga mga eksperiensia ginsulit sing linibo ka beses sa ‘konklusion sining sistema sang mga butang,’ samtang si Jesus, ang Maayo nga Manugbantay, nagatipon sang iya “iban nga mga karnero” subong gintagna sa Juan 10:16. (Mateo 24:3) Malipayon, nian, yadtong nagapangita sang kamatuoran sang Biblia kag ginapadyaan sang Dios.—Mateo 7:7.