Report sang mga Manugbantala sang Ginharian
Gikan sa Kapung-aw Padulong sa Kalipay
SI Jehova isa ka malipayon nga Dios. (1 Timoteo 1:11) Luyag niya nga magmalipayon man ang mga nagaalagad sa iya. Busa, kon ginapung-awan ang isa sang iya mga alagad, buligan sia ni Jehova sa pagbatas sang kasakit kag kon kaisa sa pagtigayon liwat sing malipayon nga espiritu. Ang masunod nga eksperiensia gikan sa Uruguay nagailustrar sini.
Isa ka utod nga babayi ang nagahulat sa klinika sa Montevideo sang resulta sang iya X-ray. Ang isa ka babayi nga nagapungko sa tupad niya ginanerbios gid sa kon ano ang isugid sa iya sang doktor subong resulta sang iya pagpaeksamin. Ginsugiran sia sang utod nga sugod sang mangin Saksi ni Jehova sia, wala gid sia sing ginakahadlukan. Apang, nagsiling ang babayi nga indi niya luyag ang mga Saksi bangod tuman kataas nga talaksan ang ginapaabot nila gikan sa mga tawo.
Nian ginsugiran sia sang utod kon paano ang ihibalo sa kamatuoran sang Biblia nakabulig sa iya. Namatyan sia sing 18 anyos nga anak nga babayi kag walo ka tuig nga ginpung-awan. Wala makabulig sa iya ang mga saykayatris ni ang malahalon nga mga bulong sa paglandas sining kapung-aw. Pila ka beses, siling niya, nga naospital sia, apang wala sia mag-ayo. Ang iya panimalay ginaatipan sang mga suluguon kay indi niya masarangan ang bisan ano. Nagtinguha sia sa paghikog bangod nadulaan sia sing interes sa kabuhi. Daw wala sing makabulig sa iya.
Nian, siling niya sa babayi, ginduaw sia sang isa sang mga Saksi ni Jehova kag ginbilinan sing pila ka literatura sa Biblia. Napukaw sadto ang iya interes sa Pulong sang Dios, kag ginsugdan niya basa ang Biblia tubtob sa katapusan. May butang nga nagsugod sa pagbag-o sa sulod niya. Nagabangon na sia kon aga kag interesado na sa iya panimalay. Sang ulihi namat-od sia nga sia ang maatipan sa iya balay kag nasapwan niya nga masarangan niya ini. Daw subong bala nga wala sia magmasakit! Nagpahalipay gid ini sa iya.
Wala sia magbalik sa saykayatris. Ang iya kabubut-on nga mabuhi napukaw sang iya ihibalo sa Pulong sang Dios, kag amo ini ang nangin pinakamaayo nga bulong. Ginpangita niya ang mga Saksi ni Jehova, kag ginsugdan nila ang regular nga pagtuon upod sa iya. Nagsugod man sia sa pagtambong sa mga miting, kag wala madugay nagpabawtismo sia. Bangod wala na sia ginatublag sang kapung-aw, malipayon sia karon sa pag-alagad kay Jehova.
Namati sing maayo ang babayi nga nagahulat. Nian nagsiling sia sa utod: “Sa sulod sang pila ka tion, pirme ko masugata ang mga Saksi ni Jehova; apang kon sa palaabuton, mangin isa ako sang mga Saksi ni Jehova, bangod ini sang bag-o mo lang masugid sa akon. Ang pagpamati sa imo daw subong sang pagkakita sing kapawa sa isa ka madulom nga duog.”
Madamo nga tawo sa bug-os nga kalibutan ang nakakita sa pagkawalay pulos sang pagtinguha nga lubaron sa ila kaugalingon ang mga problema sang kabuhi, kag nagaliso sila kay Jehova nga Dios. Daw ano ka malipayon sila nga matun-an ang nagapakari nga bag-ong kalibutan sang Dios nga sa diin ang tanan mangin malipayon, kag ang kapung-aw mangin butang sang nagligad!—Hulubaton 16:20.