Report sang mga Manugbantala sang Ginharian
“Malipayon ang Tawo nga Nakakita sing Kaalam”
INI nga hulubaton nagmatuod sa Korea, diin may yara na karon kapin sa 71,000 ka malipayon nga Saksi ni Jehova. (Hulubaton 3:13) Kag hunahunaa, 42 porsiento sining mga ministro ang yara sa bug-os tion nga pag-alagad! Ipakita sang masunod nga mga eksperiensia nga ang kalipay amo ang matigayon sang mga nagapangita sing matuod nga kaalam.
Ang isa ka babayi sa Pusan nagtambong sa isa sang mga simbahan sang Cristiandad sing 16 ka tuig. Kadamo gid sing dimakasulatanhon nga mga buhat ang napanilagan niya amo kon ngaa nagsugod sia sa paghunahuna nga mahimo wala sing Dios. Sa pihak nga bahin, indi niya mapanghiwala ang pagluntad sang Dios, gani sinsero nga nangamuyo sia sa Dios nga kuntani makita niya ang matuod nga iglesia kon may yari sini. Sa sini nga punto hinali niya napensaran ang mga Saksi ni Jehova, kag nadumduman niya nga ang iya iglesia nagtamay sa ila kag nagpaandam sa mga sumilimba batok sa ila bangod ang mga Saksi wala nagapati sa Trinidad, sa kalayuhon nga impierno, kag sa iban pa nga mga doktrina sang Cristiandad. Mahimo ayhan nga sila ang matuod nga iglesia? Sa bulig sang isa ka kaingod, nakita niya ang lokasyon sang Kingdom Hall. Pagkadason gid nga adlaw, nagtambong sia sa miting.
Nagdayaw sia sa kahim-ong sang miting. Wala sing panatiko nga pagsininggit ukon emosyonal nga pag-inamba subong sang nagakatabo sa iya iglesia. Ginpakilala sia sa isa ka Saksi nga handa sa pagtuon sang Biblia upod sa iya, kag ang una nga pagtuon nagdugay sing pila ka oras bangod sang iya madamo nga pamangkot. Sa ikaduha nga pagtuon, ginpahibalo niya nga magahalin sia sa iya iglesia kag mangin Saksi. Ginsingganan niya ang utod nga babayi nga indi na sia dapat magtuon pa, kay matambong na lang sia sa mga miting. Apang, ginpaathag sa iya ang bili sang personal nga pagtuon sang Biblia wala labot sa pagtambong sa mga miting. Ginbaton niya ang panugda, nagtuon sia sing maayo, kag sa sibu nga tion ginbawtismuhan.
Malipayon gid sia karon nga nakita niya ang kaalam sang matuod nga Dios, nga si Jehova, kag may paglaum nga mabuhi sing dayon sa bag-ong kalibutan sang Dios.
Ang Retirado nga Heneral Nakatuon sing Kamatuoran
Ang asawa sang isa ka heneral sang armi ginbawtismuhan sang 1962. Ang iya bana nagpamatok sa iya sang primero, apang sang ulihi nag-untat sia sa pagpamatok sa iya, kag sing untat-untat sa sulod sang madason nga 28 ka tuig, nanuhaytuhay nga mga utod nga lalaki ang nagtuon upod sa iya, sa pagtinguha nga mangin interesado sia sa kamatuoran. Nakatambong sia sa pila ka miting kag kombension, apang ginalikawan niya nga mangin serioso sa kamatuoran. Sang 1990 sia kag ang iya asawa nagkadto sa Japan, diin nagtambong sila sa isa ka distrito nga kombension. Sini nga okasyon namati sia sing maayo sa pamulongpulong—nga wala pa niya mahimo sang una. Nakibot sia sa maisog nga mga pamulongpulong nga nagabuyagyag sa butig nga relihion, apang nabuksan gid sini ang iya mga mata sa pagkasalimpapaw sang Cristiandad. Nahamuot sia sa kahim-ong kag kalipay sang katawhan sang Dios sa Japan, nga pareho lang sa iya nakita sa Korea. Pagbalik nila sa Korea, ginsugdan niya ang isa ka serioso nga pagtuon sang Biblia kag sang ulihi nabawtismuhan.
Gani pagkatapos sang iya bawtismo ano ang dapat niya himuon? Ginbiyaan niya ang iya katungdanan subong presidente sang isa ka bantog nga otel sang mga turista kag nagbuylog sa iya asawa sa bug-os tion nga ministeryo subong mga payunir. Ginabatyag niya nga ang pagregular payunir amo ang labing maayo nga paagi sa pagtumbas sa 28 ka tuig nga nawasi niya sang nagalikaw pa sia.
Narealisar na niya karon nga ang hulubaton nga “malipayon ang tawo nga nakakita sing kaalam” naaplikar man sa iya!