Determinado sa Pagkabuhi Suno sa Moral nga mga Talaksan ni Jehova

MAATHAG nga ginapakita sang Biblia nga kon ang lalaki kag babayi magpuyoay nga indi kasal, nagahimo sila sing pagpakighilawas kag, sa sina nga kahimtangan, indi magapanubli sang Ginharian sang Dios. (1 Corinto 6:9, 10) Ang isa ka eksperiensia gikan sa Britaniko nga West Indies nagasugid tuhoy sa isa ka pamatan-on nga babayi nga nakatuon sining kamatuoran.

Sa St. Lucia, duha ka Saksi ni Jehova, ang nakakadto sa pamatan-on nga babayi, kag nagpakita sia sing interes sa Biblia. Subong resulta, nasugdan ang pagtuon sa Biblia upod sa iya. Samtang nagauswag sia sa iya paghangop, nakita niya ang kinahanglanon nga bag-uhon ang moral sang iya kabuhi. Bisan pa apat ang iya kabataan, indi sia kasal kundi nagapuyopuyo lamang upod sa isa ka lalaki. Sia kag ang tawo nagpangabudlay sing lakas sa pagtukod sing diutay nga balay nga ginapuy-an nila nga anum.

Nahangpan nga ang iya kabuhi indi nahisanto sa matarong nga mga talaksan sang Dios, determinado ang pamatan-on nga babayi sa pagbag-o. Diin sa pakaslan niya ang lalaki nga iya ginapuyopuyo, ukon bulagan sia. Ginhambalan nila ini nga butang, apang wala sing handum ang lalaki nga magpakasal. Kontento na sia sa ila pagpuyoay. Ano ang ipahulag sa iya sang pagtuo nga himuon? Dapat sia magdesisyon kon luyag niya mapahamut-an si Jehova, kag sa tapos sang mapangamuyuon nga pagbinagbinag, namat-od sia nga magbulag sa lalaki. Apang sa diin sia maistar upod ang iya apat ka kabataan?

Sa tapos mahambalan ini nga butang upod sa lalaki, nagsugot sila sa kahimusan—tungaon nila ang balay! Upod ang mahigugmaon nga bulig sang kauturan, upod sa tawo nga iya ginapuyopuyo, ang balay natunga, tunga sa iya kag ang pihak nga tunga para sa tawo. Ang katunga sang balay nga para sa babayi ginsaylo sadto gid nga adlaw sa lain nga duog mga lima ka milya (8 ka kilometro) ang kalayuon. Sa sulod sang isa ka semana, gintukod ini liwat kag ginhimo nga duha sing kuarto nga balay.

Sa tapos mahimo ang kinahanglanon nga mga tikang nga ipahisuno ang iya kabuhi sa mga talaksan ni Jehova, nagsugod sia sa gilayon sa pag-alagad sa latagon, upod ang iya apat ka kabataan. Gindedikar niya ang iya kabuhi kay Jehova kag ginbawtismohan sa tapos sadto. Agod iselebrar ang okasyon, nagpalista sia subong auxiliary payunir. Ginpakamaayo sia karon sing dugang pa bangod ang iya bag-o nga balay ginagamit subong duog para sa pagtinuon sang kongregasyon sa libro nga sa promedyo ginatambongan sing 17. Sa pagkamatuod, ginpakamaayo ni Jehova ang iya determinasyon nga mangin matinlo nga sumilimba niya.