Si Jehova Amo ang Akon Manugtabang

“Magpakaisog kag magsiling: ‘Si Jehova amo ang akon manugtabang; indi ako mahadlok. Ano bala ang himuon sang tawo sa akon?’ ”​—⁠HEBREO 13:⁠6.

1, 2. (a) Ang salmista kag si apostol Pablo nagpabutyag sing anong pagsalig kay Jehova? (b) Anong mga pamangkot ang nagautwas?

SI Jehova nga Dios amo ang masaligan nga tuburan sang bulig. Nahibaluan ini sang salmista bangod sang eksperiensia kag makasiling: “Si Jehova yari sa akon luyo; wala ako sing kahadlok. Ano bala ang mahimo sang tawo sa akon?” (Salmo 118:6) Ang kaanggid nga balatyagon ginpabutyag ni apostol Pablo sang ginsulat niya ang iya inspirado sang Dios nga sulat sa Hebreo nga mga Cristiano.

² Ayhan nagabalikwat sang pinamulong sang salmista gikan sa Griegong Septuagint, ginsilingan ni Pablo ang mga masigkatumuluo: “Magpakaisog kag magsiling: ‘Si Jehova amo ang akon manugtabang; indi ako mahadlok. Ano bala ang himuon sang tawo sa akon?’ ” (Hebreo 13:6) Ngaa nagsulat ang apostol sa sining paagi? Kag ano ang maton-an naton gikan sa konteksto?

Nagakinahanglan sang Bulig ni Jehova

3. (a) Sa idalom sang anong mga sirkunstansia nga si Jehova napamatud-an nga Manugtabang kay Pablo? (b) Ngaa ang Hebreo nga mga Cristiano labi na nga nagakinahanglan kay Jehova subong Manugtabang nila?

³ Si Pablo isa ka nagasakripisyo sang kaugalingon nga saksi nga may pamatuod nga si Jehova amo ang iya Manugtabang. Ginbuligan sang Dios ang apostol sa atubangan sang madamong kabudlayan. Si Pablo ginbilanggo, ginbunal, kag ginbato. Sa iya mga paglakbay subong Cristianong ministro, nakaeksperiensia sia sing pagkalunod sa barko subong man sing madamo iban pa nga mga katalagman. Naanad sia sa kabudlayan, walay tulog nga mga gab-i, gutom, uhaw, bisan sing pagkahubo. “Walay labot sining mga butang,” siling niya, “nagapalibog sa akon adlaw-adlaw ang paghimud-os tungod sa tanan nga mga kongregasyon.” (2 Corinto 11:​24-29) Si Pablo may amo sina nga sahi sang paghimud-os para sa Hebreo nga mga Cristiano. Ang mga adlaw sang Jerusalem ilisipon na lamang, kag ang Judiyong mga kauturan nga lalaki kag babayi sang apostol sa Judea magaatubang sing dakung mga pagtilaw sa pagtuo. (Daniel 9:​24-27; Lucas 21:​5-24) Gani ginakinahanglan nila si Jehova subong Manugtabang nila.

4. Anong sadsaran nga laygay ang ginpresentar sa bug-os nga sulat sang mga Hebreo?

⁴ Sa pamuno sang iya sulat sa Hebreo nga mga Cristiano, ginpakita ni Pablo nga maagom lamang ang bulig sang Dios kon ginpamatian nila ang Anak sang Dios, si Jesucristo. (Hebreo 1:​1, 2) Ining punto ginbinagbinag sa sulat. Halimbawa, sa pagsakdag sining laygay, ginpahanumdom sang apostol ang iya mga bumalasa nga ang mga Israelinhon ginsilutan tungod sang pagkadimasinulundon sa kamingawan. Labi na gid nga ang Hebreo nga mga Cristiano indi makapalagyo sa silot kon sikwayon nila ang ginsiling sa ila sang Dios paagi kay Jesus kag mangin mga apostata nga nagatuman sang Mosaikong Kasuguan nga ginhamulag sang halad ni Cristo!​—⁠Hebreo 12:​24-27.

Nagapanghikot ang Paghiliutod nga Gugma

5. (a) Anong iban nga laygay ang ginahatag sang sulat sa mga Hebreo? (b) Ano ang ginasiling ni Pablo nahanungod sa gugma?

⁵ Ang sulat sa mga Hebreo nagahatag sa palaabuton nga mga manunubli sang langitnon nga Ginharian sing laygay sa kon paano sundon ang ila Huwaran, si Jesucristo, ‘nga nagdulot sa Dios sing balaan nga pag-alagad nga may diosnon nga kahadlok kag kahangawa,’ kag naghimo kay Jehova subong ila Manugtabang. (Hebreo 12:​1-4, 28, 29) Ginlaygayan ni Pablo ang mga masigkatumuluo sa pagtipon sing tayuyon kag sa ‘pagpalig-onay sa isa kag isa sa gugma kag sa maayong mga buhat.’ (Hebreo 10:​24, 25) Karon sia naglaygay: “Padayuna ninyo ang gugma sa paghiliutod.”​—⁠Hebreo 13:⁠1.

6. Sa anong kahulugan ginhatag ni Jesus sa iya mga sumulunod ang “bag-ong sugo” nahanungod sa gugma?

⁶ Ginapangayo ni Jesus ina nga gugma sa iya mga sumulunod, kay sia nagsiling: “Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. Sa sini ang tanan nga tawo makahibalo nga kamo mga disipulo ko, kon maghigugmaanay kamo.” (Juan 13:​34, 35) Isa ini ka “bag-ong sugo” sa bagay nga nagkinahanglan ini sing labi pa sa ginakinahanglan sang Mosaikong Kasuguan, nga nagasiling: “Higugmaon mo ang imo isigkatawo [kaingod] subong sang imo kaugalingon.” (Levitico 19:18) Ang “bag-ong sugo” nagkinahanglan sing labi pa sa paghigugma sang isa sa iya isigkatawo subong sang iya kaugalingon. Nagkinahanglan ini sing nagasakripsiyo sa kaugalingon nga gugma tubtob sa punto nga ihatag ang kabuhi tungod sa isa. Ang kabuhi kag kamatayon ni Jesus nagpakita sina nga sahi sang gugma. Ginpatuhuyan ni Tertullian ining nagapakilala nga tanda sang ginbalikwat niya ang mga komento sang kalibutanon nga mga tawo nahanungod sa mga Cristiano kag nagsiling: “ ‘Toloka,’ siling nila, ‘kon daw ano ka daku ang paghigugmaanay nila sa isa kag isa . . . kag kon daw ano sila ka handa manginmatay tungod sa kada isa.’ ”​—⁠Apology, kapitulo XXXIX, 7.

7. Paano napamatud-an ang paghiliutod nga gugma pagkatapos sang Pentecostes 33 C.⁠E.?

⁷ Ang paghiliutod nga gugma makita sa tunga sang mga disipulo ni Jesus pagkatapos sang Pentecostes 33 C.⁠E. Agod madamo sang bag-ong bawtismado nga mga tumuluo gikan sa malayong lugar ang makapadayon sang ila pagtener sa Jerusalem kag makatuon sing dugang nahanungod sa aman sang Dios para sa kaluwasan paagi kay Cristo, “ang tanan nga nagtuo nagtingob kag kalabilogan nila ang tanan nga butang, kag ginbaligya nila ang ila pagkabutang kag galamiton kag ginpanagtag ini sa tanan, suno sa kinahanglan sang tagsatagsa.”​—⁠Binuhatan 2:​43-47; 4:​32-37.

8. Ano ang pamatuod nga ang paghiliutod nga gugma nagaluntad sa tunga sang mga Saksi ni Jehova karon?

⁸ Ang paghiliutod nga gugma nagaluntad sa tunga sang mga Saksi ni Jehova sa aton tion. Halimbawa, pagkatapos sang Inaway Kalibutanon II, ang gugma nagpahulag sa katawhan sang Dios sa pagbuhat sang duha ka tuig kag tunga nga kampanya sa pagbulig. Ang mga Saksi sa Can­a­da, Sweden, Swit­zerland, Estados Unidos, kag iban pa nga kadutaan nagdonar sing panapton kag kuwarta agod ibakal sing pagkaon para sa mga masigkatumuluo sa nagainaway nga mga pungsod sang Austria, Bel­gium, Bulgaria, China, Czecho­slovakia, Denmark, Inglaterra, Finland, Pransya, Alemanya, Gresya, Hungaryo, Italya, Nether­lands, Norway, Pilipinas, Poland, kag Romania. Isa lamang ini ka halimbawa, kay ang mga alagad sang Dios sining karon lang nagpakita sina nga gugma para sa Cristianong mga biktima sang mga linog sa Peru kag Mex­i­co, sa bagyo nga hangin sa Ja­mai­ca, kag sa kaanggid nga kapahamakan sa iban nga lugar. Sa sini kag sa madamo iban pa nga paagi, ang katawhan ni Jehova ‘nagpadayon sang ila paghiliutod nga gugma.’

Mangin Maabiabihon

9. (a) Anong diosnon nga kinaiya ang ginsambit sa Hebreo 13:​2? (b) Paano ang iban ‘nag-amoma sang mga anghel’ nga wala nila mahibalui?

⁹ Masunod nga ginsambit ni Pablo ang isa pa ka kinaiya nga ginapakita sadtong nagailog kay Cristo, ‘nagadulot sing balaan nga pag-alagad nga may diosnon nga kahadlok kag kahangawa,’ kag nagahimo kay Jehova subong ila Manugtabang. Sia naglaygay: “Dili kamo malimot sa pagsapopo sa mga dumuluong, kay sa sini ang iban nakaamoma sing mga anghel, sa wala nila mahibalui.” (Hebreo 13:2) Sin-o ang “nakaamoma sing mga anghel” nga wala nila mahibalui? Ti, si patriarka Abraham nag-amoma sa tatlo ka anghel. (Genesis 18:​1-22) Duha sa ila ang naglakat, kag ginpasulod sang iya hinablos nga si Lot ini man nga mga estranghero sa iya puluy-an sa Sodoma. Apang, sa wala pa sila makahalin, ang balay ni Lot ginpalibutan sang isa ka kadam-an, “kutob sa magamay tubtob sa dalagku.” Ginhingyu nila kay Lot nga ihatag niya ang iya mga bisita tungod sa imoral nga katuyuan, apang matigdas sia nga nagdumili. Bisan wala ini mahibalui primero ni Lot, gin-amoma niya ang mga anghel, nga sang ulihi nagbulig sa iya kag sa iya mga anak nga dalaga sa pagpalagyo sa kamatayon sang ‘ginpaulan ni Jehova sa Sodoma kag Gomora ang kalayo kag asupre gikan sa langit.’​—⁠Genesis 19:​1-26.

10. Anong mga pagpakamaayo ang ginaagom sang maabiabihon nga mga Cristiano?

¹⁰ Ang maabiabihon nga mga Cristiano nagaagom sing madamong pagpakamaayo. Nakabati sila sang makalilipay nga mga eksperiensia nga ginsugid sang ila mga bisita kag nakabenepisyo gikan sa ila makapaladya sa espirituwal nga pagpakig-upod. Si Gayo ginhatagan sing komendasyon bangod sang pag-amoma sa mga masigkatumuluo, “labi na gid sa mga dumuluong,” subong nga madamo sang katawhan ni Jehova karon ang nagaamoma sa nagalakbay nga mga manugtatap. (3 Juan 1, 5-8) Ang pagkamangin maabiabihon isa sa kalipikasyon agod matangdo subong isa ka gulang. (1 Timoteo 3:​2; Tito 1:​7, 8) Talalupangdon man nga si Jesus nagsaad sing mga pagpakamaayo sa Ginharian sa katulad karnero nga mga indibiduwal nga maabiabihon nga nakahimo sing maayo sa iya hinaplas nga “mga kauturan.”​—⁠Mateo 25:​34-40.

Dumduma ang mga Ginahingabot

11. Ngaa ang laygay sa Hebreo 13:3 nahisanto sa sini?

¹¹ Ang mga nagahandum sang bulig ni Jehova kag ‘nagadulot sing balaan nga pag-alagad sa iya nga may diosnon nga kahadlok kag kahangawa’ indi dapat magkalipat sa mga masigkatumuluo nga nagaantos. Nahangpan ni Pablo ang mga kabudlayan nga ginbatas sang ginapintasan nga mga Cristiano. Pila ka tion antes, ang mga disipulo nag-alaplaag bangod sang paghingabot, kag ang iya kaupod nga manugpangabudlay nga si Timoteo bag-o lang ginpaguwa sa bilanggoan. (Hebreo 13:​23; Binuhatan 11:​19-21) Ang Cristianong mga misyonero nagalakbay man sa paghuman sing bag-ong mga kongregasyon ukon sa pagpalig-on sa espirituwal sa mga nagaluntad na. Sanglit madamo sang mga kauturan nga lalaki kag babayi sadto anay mga Gentil, ang iban sa Hebreong mga Cristiano mahimo nga wala magkabalaka katama sa ila. Nagakaigo, nian, ang laygay: “Dumduma ninyo ang mga yara sa bilanggoan subong nga daw yara sa bilanggoan upod sa ila, kag sila nga ginapintasan, sanglit nga yara man kamo sa lawas.”​—⁠Hebreo 13:⁠3.

12. Paano naton maaplikar ang laygay nga dumdumon pirme ang ginapintasan nga mga masigkatumuluo?

¹² Ang mga Hebreo ‘may kaluoy sa mga binilanggo’ apang indi dapat malipat sa matutom nga mga masigkasumilimba, mga Judiyo man sila ukon mga Gentil. (Hebreo 10:34) Apang kamusta kita? Paano naton ginapakita nga ginadumdom naton ang ginapintasan nga mga Cristiano? Sa iban nga hitabo mahimo nagakaigo para sa aton ang mag-apelar sa mga awtoridad sang gobierno paagi sa sulat sa panikasog nga buligan ang mga masigkatumuluo nga nabilanggo bangod sang ila pagtuo sa mga kadutaan diin ginadumilian ang pagbantala sang Ginharian nga hilikuton. Labi na gid nga dapat naton sila dumdumon sa aton mga pangamuyo, nagasambit pa gani sang iban sa ngalan, kon posible. Ang paghingabot sa ila nagaapektar gid sa aton, kag ginapamatian ni Jehova ang aton hanuot nga mga pangabay tungod sa ila. (Salmo 65:​2; Efeso 6:​17-20) Samtang wala kita sa amo man nga selda sang bilanggoan, daw subong bala nga nabilanggo kita kaupod nila kag mahimo makahatag sing bulig kag pagpalig-on. Ang ginpanganak sang espiritu nga mga Cristiano pat-od gid nga nagasimpatiya sa ginapintasan nga mga hinaplas. (Ipaanggid ang 1 Corinto 12:​19-26.) May amo man sila nga kabalaka sa ila ginahingabot nga mga kaupdanan nga may paglaum sa duta, nga nagaantos man sing madamong sahi sang kapintas sa kamot sang mga manughingabot. Nagakaigo ina nga patugsiling, sanglit kita tanan yara pa sa lawas kag nagaagom pa sing mga pag-antos kag paghingabot subong mga sumilimba ni Jehova.​—⁠1 Pedro 5:​6-11.

Ang Pag-asawahay Dapat Mangin Dungganon

13. Sa kahulugan, ano ang ginasiling ni Pablo sa Hebreo 13:​4?

¹³ Ang pagsunod sa halimbawa ni Cristo kag ang ‘pagdulot sing balaan nga pag-alagad kay Jehova nga may diosnon nga kahadlok kag kahangawa’ dapat mag-apektar sa aton kabalaka para sa iban sa madamong paagi. Ang pagsiling nga “yara man kamo sa lawas,” ginsambit ni Pablo ang kaangtanan nga may lawasnon, ukon pisikal, nga bahin nga naghatag sing kahigayunan sa pagpakita sing nagakaigo nga pagtahod sa iban. (Hebreo 13:3) Ginhatagan niya ang Hebreo nga mga Cristiano sini nga laygay: “Paghuptan sing dungganon sang tanan ang pag-asawahay, kag ang higdaan sang pagkasal dipagdagtaan, kay hukman sang Dios ang mga makihilawason kag mga makihilahion.” (Hebreo 13:4) Nagakaigo gid ini nga laygay, bangod ang seksuwal nga imoralidad lapnag sa Romanong Emperyo! Kinahanglan man nga pamatian sang karon nga mga Cristiano ining mga pulong bangod sang manubo nga talaksan sa moral sang kalibutan kag sang katunayan nga kada tuig linibo ang nadisfellowship sa kongregasyon bangod sang seksuwal nga imoralidad.

14. Ngaa makasiling ka nga ang pag-asawahay dung­ganon?

¹⁴ Ang iban sadtong wala nagatahod sa pag-asawahay amo ang mga Essenes sadtong panahon ni Pablo. Masami nga wala sila sing asawa, kaangay sang mga klerigo karon nga nagakabig sing sayop sang selibasiya nga mas balaan sang sa kasal. Apang, paagi sa ginsiling ni Pablo sa Hebreo nga mga Cristiano, ginpakita niya sing maathag nga ang pag-asawahay dungganon. Makita ang mataas nga pagtahod para sa sini sang ginpabutyag ni Noemi ini nga handum para sa iya nabalo nga mga umagad, nga sanday Rut kag Orpa: “Kabay nga si Jehova magtugot nga makakita kamo sing pahuway ang tagsa sa inyo sa balay sang iya bana.” (Rut 1:9) Ginpakita man ni Pablo nga ‘sa ulihi nga mga tion ang iban magatalikod sa pagtuo, nga nagadumili sang pagpangasawa.’​—⁠1 Timoteo 4:​1-5.

15. Sin-o ang ginatawag nga mga makihilawason kag mga makihilahion sa Hebreo 13:​4, kag paano sila hukman sang Dios?

¹⁵ Ang mga Hebreo nga napaidalom anay sa Kasuguan apang gindala sa bag-ong katipan nakahibalo sang sugo: “Dili ka magpanglahi.” (Exodo 20:14) Apang yara sila sa imoral nga kalibutan kag nagkinahanglan sang paandam: “Ang higdaan sang pagkasal dipagdagtaan, kay hukman sang Dios ang mga makihilawason kag mga makihilahion.” Ang iban sang mga makihilawason amo ang diminyo nga mga tawo nga nagahimo sing seksuwal nga paghulid. Ang mga makihilahion amo labi na ang minyo nga mga indibiduwal nga nagahulid sa indi nila tiayon, nagadagta sang ila higdaan sang pagkasal. Bangod ang dimahinulsulon nga magbubuhat sang pakighilawas kag pakighilahi nagakabagay nga hukman sang Dios, indi man sila pagbatunon pasulod sa langitnon nga Bag-ong Jerusalem ukon magaagom sing kabuhi nga dayon sa duta sa idalom sang paggahom sang Ginharian. (Bugna 21:​1, 2, 8; 1 Corinto 6:​9, 10) Ining paandam nga indi pagdagtaan ang higdaan sang pagkasal dapat man magpahulag sa minyo nga mga Cristiano nga likawan ang mahigko nga seksuwal nga pagginawi upod sa ila mga tiayon, bisan pa wala sing butang nga dimatinlo nahanungod sa nagakaigo nga pagkasuod sa pisikal sa sulod sang pag-asawahay.​—⁠Tan-awa ang The Watchtower, Marso 15, 1983, pahina 27-31.

Kontento sa Kon Ano ang Yara

16, 17. Ano ang ginasiling sa Hebreo 13:​5, kag ngaa ang mga Hebreo nagakinahanglan sini nga laygay?

¹⁶ Makasapo kita sing pagkakontento kon ginailog naton ang aton Huwaran kag ‘nagadulot sing balaan nga pag-alagad nga may diosnon nga kahadlok kag kahangawa,’ nagasalig nga si Jehova amo ang aton Manugtabang. Ang sobra nga paghingamo sa materyal isa ka pagsulay. Apang ang mga Cristiano indi dapat magpadala sa sini. Ang mga Hebreo ginsilingan: “Panginluwas kamo sa gugma sa kuwarta, kag magkontento sang yara sa inyo. Kay sia nagsiling: ‘Indi ko ikaw nga mas-a pagpalugaw-an ukon pagpatumbayaan ko ikaw.’ ” (Hebreo 13:5) Ngaa ang mga Hebreo nagakinahanglan sini nga laygay?

¹⁷ Ayhan ang mga Hebreo nabalaka sing sobra nahanungod sa kuwarta bangod nadumduman nila ang “dakung tiggulutom” sang naggahom si Claudius Caesar (41-54 C.⁠E.). Grabe gid sadto ang gutom nga ang mga Cristiano bisan diin nagpadala sing bulig sa ila mga kauturan sa Judea. (Binuhatan 11:​28, 29) Suno sa Judiyong istoryador nga si Josephus, ang gutom naglawig sing tatlo ka tuig ukon kapin pa, nagresulta sa mapiguson nga kaimulon sa Judea kag Jerusalem.​—⁠Antiquities of the Jews, XX, 2, 5; 5, 2.

18. Ang laygay sa Hebreo 13:5 nagahatag sing anong leksion para sa aton?

¹⁸ May leksion bala diri para sa aton? Huo, kay bisan ano man sa aton ka imol, indi gid kita dapat maghigugma sang kuwarta ukon mabalaka sing sobra nahanungod sini. Sa baylo nga himud-osan ang materyal nga kalig-onan, ayhan nga mangin maibugon, dapat kita ‘magkontento sang yara sa aton.’ Si Jesus nagsiling: “Padayon, nian, nga pangitaa anay ang ginharian kag ang pagkamatarong [sang Dios], kag ining tanan iban pa nga butang idugang sa inyo.” (Mateo 6:​25-34) Ginpakita man niya nga dapat kita magkonsentrar sa pagkamangin “manggaranon sa Dios” bangod ‘ang aton kabuhi wala nagaresulta gikan sa mga butang nga naangkon naton.’ (Lucas 12:​13-21) Kon ang gugma sa kuwarta nagabutang sa katalagman sang aton espirituwalidad, nian, pamatian naton ang laygay ni Pablo sa mga Hebreo kag dumdumon man nga ang “diosnon nga debosyon nga may pagkakontento” may “dakung pagdaug.”​—⁠1 Timoteo 6:​6-8.

Magsalig kay Jehova

19. Anong pasalig ang ginhatag sang Dios kay Josue, kag paano kita dapat maapektuhan sini?

¹⁹ Subong mga sumulunod ni Jesus nga nagapanikasog sa ‘pagdulot sing balaan nga pag-alagad nga may diosnon nga kahadlok kag kahangawa,’ dapat naton ibutang ang aton pagsalig indi sa kuwarta kundi sa aton langitnon nga Amay, nga ang bulig importante. Bisan ano man nga problema ang ginaatubang naton, dapat naton dumdumon ang iya pagsalig: “Indi ko ikaw nga mas-a pagpalugaw-an ukon pagpatumbayaan ko ikaw.” (Hebreo 13:5) Ginpatuhuyan diri ni Pablo ang pinamulong sang Dios kay Josue: “Indi ako magpabaya sa imo ukon magbiya sa imo.” (Josue 1:​5; ipaanggid ang Deuteronomio 31:​6, 8.) Wala gid pagpabay-an ni Jehova si Josue, kag indi Niya kita pagpabayaan kon kita magasalig sa Iya.

20. (a) Ano ang tuigan nga teksto para sa 1990? (b) Sa walay kahadlok, ano ang dapat padayon nga himuon naton?

²⁰ Ang masaligan nga bulig sang Dios ipatalupangod sa tunga sang mga Saksi ni Jehova sa mga binulan sa unahan, kay ang ila 1990 nga tuigan nga teksto nagasiling: “Magpakaisog kag magsiling: ‘Si Jehova amo ang akon manugtabang.’ ” Ining mga pulong makita sa Hebreo 13:​6, diin ginbalikwat ni Pablo ang salmista kag ginsilingan ang mga Hebreo: “Agod kita magpakaisog kag magsiling: ‘Si Jehova ang akon manugtabang; indi ako mahadlok. Ano bala ang himuon sang tawo sa akon?’ ” (Salmo 118:6) Bisan pa ginahingabot, wala kita mahadlok, kay ang mga tawo indi makahimo sang labi pa sa ginapahanugot sang Dios. (Salmo 27:1) Bisan pa kita mapatay subong mga manughupot sing integridad, may yara kita paglaum nga ­pagkabanhaw. (Binuhatan 24:15) Gani magpadayon kita sa pagsunod sa aton Huwaran sa ‘pagdulot sing balaan nga pag-alagad nga may diosnon nga kahadlok kag kahangawa,’ nagasalig nga si Jehova amo ang aton Manugtabang.

Paano Mo Sabton?

◻ Ngaa ang Hebreo nga mga Cristiano labi nga nagakinahanglan sang bulig ni Jehova?

◻ Paano ang katawhan ni Jehova ‘nagapadayon sang ila paghiliutod nga gugma’?

◻ Ngaa dapat mangin maabiabihon?

◻ Ano ang himuon naton sa pagpakita nga ginadumdom naton ang ginapintasan nga mga masigkatumuluo?

◻ Ngaa dapat huptan nga dungganon ang pag-asawahay?