Maghatag sing mga Halad nga Nagapahamuot kay Jehova
“Paagi [kay Jesucristo] maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.”—HEBREO 13:15.
1. Ano ang ginpalig-on ni Jehova sa makasasala nga mga Israelinhon nga himuon?
SI Jehova amo ang Manugtabang sang mga nagahatag sing kalahamut-an nga halad sa iya. Busa, ang iya kahamuot yara anay sa mga Israelinhon nga naghatag sing mga halad nga sapat. Apang ano ang natabo sa tapos sila liwat kag liwat nga nagpakasala? Paagi kay manalagna Oseas, ginlaygayan sila: “O Israel, balik ka kay Jehova nga imo Dios, kay tungod sa imo kalautan napukan ka. Dala kamo sing mga pulong kag magbalik kay Jehova. Isiling sa iya, ‘Kuhaa ang bug-os nga kalautan; kag batona ang maayo, kag ihatag namon subong sang mga tinday nga baka nga lalaki ang dulot sang amon mga bibig.’ ”—Oseas 14:1, 2.
2. Ano ang ‘mga tinday nga baka nga lalaki sang mga bibig,’ kag paano ginpatuhuyan ni apostol Pablo ang tagna ni Oseas?
2 Gani ang mga katawhan anay sang Dios ginlaygayan sa paghatag kay Jehova nga Dios sing ‘mga tinday nga baka nga lalaki nga dulot sang ila mga bibig.’ Ano ini? Ti, mga halad sang hanuot nga pagdayaw! Nagapatuhoy sa sining tagna, ginlaygayan ni apostol Pablo ang Hebreo nga mga Cristiano nga ‘maghalad sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sing dayag sang iya ngalan.’ (Hebreo 13:15) Ano ang makabulig sa mga Saksi ni Jehova sa paghatag sina nga mga halad karon?
“Iloga ang Ila Pagtuo”
3. Sa kahulugan, ano ang ginasiling ni apostol Pablo sa Hebreo 13:7, nagapautwas sing anong pamangkot?
3 Ang pag-aplikar sang laygay nga ginhatag ni Pablo sa mga Hebreo magabulig sa aton sa paghatag sing kalahamut-an nga mga halad sa aton Dakung Manugtabang, si Jehova nga Dios. Halimbawa, ang apostol nagsulat: “Dumduma ang nagapanguna sa inyo, nga naghambal sa inyo sang pulong sang Dios, kag samtang ginabinagbinag ninyo ang bunga sang ila pagginawi iloga ang ila pagtuo.” (Hebreo 13:7) Sin-o ang ginapatuhuyan ni Pablo sang nagsiling sia, “Dumduma ang nagapanguna sa inyo,” ukon “mga gobernador ninyo”?—New World Translation Reference Bible, footnote.
4. (a) Suno sa Griegong teksto, ano ang ginahimo sang mga “nagapanguna”? (b) Sin-o ang “nagapanguna” sa tunga sang mga Saksi ni Jehova?
4 Si Pablo nagpamulong tuhoy sa mga “nagapanguna,” ukon nagadumala. (Bersikulo 7, 17, 24) Ang Ingles nga tinaga nga “govern” naghalin paagi sa Latin gikan sa Griegong ky·ber·naʹo, nga nagakahulugan sing “nagapiloto sa sakayan, nagatuytoy, nagadumala.” Ang Cristianong mga gulang nagadumala paagi sa paggamit sang ila “mga ikasarang sa pagtuytoy” (Griego, ky·ber·neʹseis) sa pag-aman sing pagpanguna kag pagtuytoy sa lokal nga mga kongregasyon. (1 Corinto 12:28) Apang ang mga apostoles kag ang iban nga mga gulang sa Jerusalem nagpangalagad subong isa ka hubon sa paghatag sing panuytoy kag laygay sa tanan nga mga kongregasyon. (Binuhatan 15:1, 2, 27-29) Busa, sa karon, ang nagadumala nga hubon sang mga gulang nagahatag sing espirituwal nga pagtatap sa mga Saksi ni Jehova sa bug-os nga kalibutan.
5. Ngaa kag paano kita dapat mangamuyo para sa mga gulang sa kongregasyon kag mga katapo sang Nagadumala nga Hubon?
5 Ang lokal nga mga gulang kag mga katapo sang Nagadumala nga Hubon nagapanguna sa tunga naton; busa, dapat naton sila tahuron kag ipangamuyo nga hatagan sila sang Dios sing kaalam nga kinahanglanon sa pagdumala sa kongregasyon. (Ipaanggid ang Efeso 1:15-17.) Daw ano gid ka nagakaigo nga dumdumon naton ang bisan sin-o nga ‘nagapamulong sang pulong sang Dios sa aton’! Si Timoteo gintudluan indi lamang sang iya iloy kag lola kundi sang ulihi ni Pablo kag sang iban man. (2 Timoteo 1:5, 6; 3:14) Gani nabinagbinag ni Timoteo kon ano ang bunga sang pagginawi sadtong nagapanguna kag nailog niya ang ila pagtuo.
6. Kay sin-o pagtuo ang dapat naton ilugon, apang sin-o ang ginailog naton?
6 Ang mga indiduwal subong nanday Abel, Noe, Abraham, Sara, Rahab, kag Moises nagpakita sing pagtuo. (Hebreo 11:1-40) Busa, mailog naton ang ila pagtuo nga wala sing pangalag-ag bangod napatay sila nga matutom sa Dios. Apang sarang man naton ‘mailog ang pagtuo’ sang matutom nga mga lalaki nga nagapanguna karon sa tunga naton. Sa pagkamatuod, wala naton ginasunod ang dihimpit nga mga tawo, kay ginahugod naton ang aton itololok kay Cristo. Subong sang ginsiling sang manugbadbad sang Biblia nga si Edgar J. Goodspeed: “Ang mga baganihan sang una indi mga modelo sang tumuluo, kay may maayo pa sia nga sulundan kay Cristo . . . Ang Cristianong manugdalagan dapat maghugod sang iya itololok kay Jesus.” Huo, ‘si Cristo nagbatas tungod sa aton, nagbilin sa aton sing sulundan agod pagsundon naton sing maayo ang iya mga tikang.’—1 Pedro 2:21; Hebreo 12:1-3.
7. Paano dapat maapektuhan sang Hebreo 13:8 ang aton panimuot nahanungod sa pag-antos tungod kay Jesucristo?
7 Nagahugod sang aton igtalupangod sa Anak sang Dios, si Pablo nagdugang: “Si Jesucristo amo man kahapon kag karon, kag sa gihapon.” (Hebreo 13:8) Ang matutom nga mga saksi kaangay ni Esteban kag ni Santiago nagpakita sing dimationg nga integridad, sunod sa malig-on nga sulundan ni Jesus. (Binuhatan 7:1-60; 12:1, 2) Bangod handa sila mapatay subong mga sumulunod ni Cristo, ang ila pagtuo takus nga ilugon naton. Sang nagligad, karon, kag bisan sa palaabuton, ang diosnon nga mga tawo wala nagaisol gikan sa pag-antos sing pagkamartir subong mga disipulo ni Jesus.
Likawi ang Dimatuod nga mga Panudlo
8. Paano mo iparaprase ang pinamulong ni Pablo sa Hebreo 13:9?
8 Ang wala nagabalhin nga personalidad kag mga panudlo ni Jesus dapat maghimo sa aton nga magpabilin sa kon ano ang gintudlo niya kag sang iya mga apostoles. Ang mga Hebreo ginsilingan: “Dili kamo magpadaladala sa sarisari kag tuhay nga mga panudlo; kay maayo nga ang tagipusuon palig-unon sa dibagay nga kaluoy, indi sa mga kalan-on, nga ang mga nagagawi sa ila wala makapulos.”—Hebreo 13:9.
9. Anong superyor nga mga butang ang gintudlo ni Pablo sa sulat sa Hebreo nga mga Cristiano?
9 Gintudlo sang mga Judiyo ang mga butang subong sang tumalagsahon nga paghatag sang Kasuguan sa Bukid Sinai kag sang mapinadayunon nga pagkahari ni David. Apang ginpakita ni Pablo sa Hebreo nga mga Cristiano nga bisan pa ang pagtukod sa Kasuguan nga katipan makahalawhaw, si Jehova labi kakusog nga nagapanaksi paagi sa mga tanda, mga paandam, gamhanan nga mga buhat, kag pagpasagahay sang balaan nga espiritu sang ang bag-ong katipan ginsugdan. (Binuhatan 2:1-4; Hebreo 2:2-4) Ang langitnon nga Ginharian ni Cristo indi mahimo matay-ug, subong anay sa dutan-on nga pagkahari sang Davidikong mga gumalahom sang 607 B.C.E. (Hebreo 1:8, 9; 12:28) Dugang pa, ginatipon ni Jehova ang mga hinaplas sa wala pa ang labi pa ka makahalawhaw katama sang sa milagruso nga pagpakita sa Bukid Sinai, kay sila nagapakadto sa langitnon nga Bukid Sion.—Hebreo 12:18-27.
10. Suno sa Hebreo 13:9, paagi sa ano ang tagipusuon ginapalig-on?
10 Busa ang mga Hebreo kinahanglan nga maglikaw ‘nga magpadaladala sa sarisari kag tuhay nga mga panudlo’ sang mga sumilimba sang Judaismo. (Galacia 5:1-6) Indi paagi sa sinang mga panudlo kundi ‘paagi sa dibagay nga kaluoy sang Dios nga ang tagipusuon mapalig-on’ agod magpabilin nga dimationg sa kamatuoran. Ang iban nagbaisay nahanungod sa pagkaon kag mga halad, kay si Pablo nagsiling nga ang tagipusuon napalig-on “sa mga kalan-on, nga ang mga nagagawi sa ila wala makapulos.” Ang espirituwal nga kapuslanan nagaresulta bangod sang diosnon nga debosyon kag apresasyon para sa gawad, indi bangod sang dinagakaigo nga pagkabalaka nahanungod sa pagkaon sang pila ka kalan-on kag pagsaulog sa partikular nga mga adlaw. (Roma 14:5-9) Dugang pa, ang halad ni Cristo ginpawalay pulos sang Levitico nga mga halad.—Hebreo 9:9-14; 10:5-10.
Mga Halad nga Nagapahamuot sa Dios
11. (a) Ano ang kahulugan sang pinamulong ni Pablo sa Hebreo 13:10, 11? (b) Ano ang malaragwayon nga halaran sang mga Cristiano?
11 Ang Levitico nga mga saserdote nagkaon sang karne gikan sa ginhalad nga mga sapat, apang si Pablo nagsulat: “May aton kita nga halaran nga sa sini walay kinamatarong sa pagkaon ang mga nagaalagad sa kayangkayang [tabernakulo]. Kay ang mga lawas sadtong mga sapat nga ang ila dugo ginadala sang pinakamataas nga saserdote sa santuaryo subong nga halad tungod sa sala ginasunog sa guwa sang dologan” sa Adlaw sang Katumbasan. (Hebreo 13:10, 11; Levitico 16:27; 1 Corinto 9:13) Ang mga Cristiano may yara malaragwayon nga halaran nga nagakahulugan sang pagpalapit sa Dios sa sadsaran sang halad ni Jesus nga nagatumbas para sa mga sala kag nagaresulta sa pagpatawad ni Jehova kag kaluwasan padulong sa kabuhi nga dayon.
12. Sa Hebreo 13:12-14, ano ang ginlaygay sa hinaplas nga mga Cristiano nga himuon?
12 Wala ginapilit ni Pablo ang pagkaanggid sa Adlaw sang Katumbasan, apang sia nagadugang: “Gani si Jesus man nag-antos sa luwas sang gawang [sang Jerusalem] agod nga mapakabalaan niya ang katawhan paagi sa iya kaugalingon nga dugo.” Didto si Cristo napatay kag nag-aman sing epektibo sang bug-os nga katumbasan nga halad. (Hebreo 13:12; Juan 19:17; 1 Juan 2:1, 2) Ginpalig-on ni apostol Pablo ang masigka hinaplas nga mga Cristiano: “Busa, magkadto kita sa iya [kay Cristo] sa luwas sang dologan, nga nagadala sang kahuluy-an tungod sa iya, kay diri wala kita sing siudad nga nagapadayon, kundi nagapangita kita sang siudad nga palaabuton.” (Hebreo 13:13, 14; Levitico 16:10) Bisan pa ginpakahuy-an kita subong sang ginhimo kay Jesus, nagapadayon kita subong mga Saksi ni Jehova. Aton ‘ginasikway ang pagkadidiosnon kag kalibutanon nga mga kailigbon kag nagkabuhi sang but-anan kag pagkamatarong kag diosnon nga debosyon sa tunga sining karon nga sistema sang mga butang’ samtang nagatan-aw sa bag-ong kalibutan. (Tito 2:11-14; 2 Pedro 3:13; 1 Juan 2:15-17) Kag ang mga hinaplas sa tunga naton hanuot nga nagapangita sing “siudad,” ang langitnon nga Ginharian.—Hebreo 12:22.
13. Ang mga halad nga nagapahamuot sa Dios wala lamang nagalakip sang ano?
13 Masunod nga ginsambit ni Pablo ang mga halad nga nagapahamuot sa Dios, nga nagasulat: “Paagi sa iya [kay Jesus] maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan. Dili malimot sa paghimo sing maayo kag sa pagpanagtag sang yara sa imo, kay sa amo nga mga halad nahamuot ang Dios.” (Hebreo 13:15, 16) Ang Cristianong mga halad wala nagalakip sang mga buhat lamang sang kaluoy. Ang katawhan sa kabilugan nagahimo sina. Halimbawa, natabo ini sang ang katawhan sa madamong pungsod nagbulig sa mga biktima sang linog sa Sobyet Armenia sang talipuspusan sang 1988.
14. Ang paghalad sa Dios sing kalahamut-an nga halad nagapadaku sang anong buluhaton?
14 Ang balaan nga pag-alagad nga aton ginadulot kay Jehova nga “may diosnon nga kahadlok kag kahangawa” napasad sa nagasakripisyo sa kaugalingon nga sahi sang gugma nga ginpakita ni Jesus. (Hebreo 12:28; Juan 13:34; 15:13) Ining pag-alagad nagapadaku sa aton pagbantala nga hilikuton, kay paagi kay Cristo subong Mataas nga Saserdote ‘nagadulot kita sa Dios sing halad sang pagdayaw, ang bunga sang mga bibig nga nagatu-ad sing dayag sang iya ngalan.’ (Oseas 14:2; Roma 10:10-15; Hebreo 7:26) Sa pagkamatuod, kita “dili malimot sa paghimo sing maayo kag sa pagpanagtag sa iban,” lakip sa iban sang “mga tagapanimalay sang pagtuo.” (Galacia 6:10) Labi na kon ang mga masigka Cristiano nagaagom sing kalamidad ukon nagakinahanglan ukon yara sa kasisit-an, nagahatag kita sing mahigugmaon nga bulig sa materyal kag sa espirituwal. Ngaa? Bangod nagahigugmaanay kita sa isa kag isa. Luyag man naton nga sila magapadayon sa pagtu-ad sang ila pagtuo nga wala nagapangalag-ag, “kay sa amo nga mga halad nahamuot ang Dios.”—Hebreo 10:23-25; Santiago 1:27.
Mangin Mapasakupon
15. (a) Paano mo iparaprase ang laygay sa Hebreo 13:17? (b) Ngaa dapat ipakita ang pagtahod para sa mga nagapanguna?
15 Agod makadulot sing kalahamut-an nga mga halad, dapat kita magkooperar sing bug-os sa organisasyon sang Dios. Wala nagapabugal tuhoy sa awtoridad, si Pablo nagsulat: “Tumana ang mga nagapangulo sa inyo kag magpasakop sa ila, kay nagapulaw sila tungod sa inyo mga kalag subong nga sila ang magahatag sing husay; maghimo sila sini nga may kalipay kag indi nga may pagbakho, kay ina walay kapuslanan sa inyo.” (Hebreo 13:17) Dapat kita magtahod sa gintangdo nga mga gulang nga nagapanguna sa kongregasyon, agod indi sila magbakho sa kasubo tungod sa aton kakulang sing kooperasyon. Ang indi naton pagpasakop mahimo magapabug-at sa mga manugtatap kag magaresulta sa aton espirituwal nga kahalitan. Ang espiritu sang kooperasyon nagapahapos para sa mga gulang sa paghatag sing bulig kag nagaamot sa paghiusa kag sa pag-uswag sang pagbantala sang Ginharian nga hilikuton.—Salmo 133:1-3.
16. Ngaa nagakaigo ang magpasakop sa mga nagapanguna sa tunga naton?
16 Daw ano gid ka nagakaigo nga kita magpasakop sa mga nagapanguna! Nagapanudlo sila sa aton mga miting kag nagabulig sa aton sa ministeryo. Subong mga manugbantay, ginapanikasugan nila ang aton kaayuhan. (1 Pedro 5:2, 3) Nagabulig sila sa aton sa paghupot sing maayong kaangtanan sa Dios kag sa kongregasyon. (Binuhatan 20:28-30) Paagi sa pagpasakop sa maalamon kag mahigugmaon nga pagdumala, ginapakita naton ang pagtahod para sa Supremo nga Manugtatap, si Jehova nga Dios, kag sa iya Deputado nga Manugtatap, si Jesucristo.—1 Pedro 2:25; Bugna 1:1; 2:1–3:22.
Mangin Mapangamuyuon
17. Anong mga pangamuyo ang ginpangabay ni Pablo, kag ngaa makatarunganon nga makapangabay sia sini?
17 Sanglit si Pablo kag ang iya mga kaupod napahilayo sa mga Hebreo, ayhan bangod sang paghingabot, sia nagsiling: “Pangamuyo kamo tungod sa amon, kay ginasaligan namon nga may matin-aw kami nga kaisipan, nga nagahandum sa pagpangabuhi sing dungganon sa tanan nga butang. Apang nagalaygay ako sa inyo sing labi pa gid sa paghimo sini agod nga mapabalik ako sa inyo sa labing madali.” (Hebreo 13:18, 19) Kon si Pablo isa anay ka dibunayag nga tawo nga may nahirohan nga konsiensia, ano ang kinamatarong naton sa pagpangabay sa mga Hebreo nga magpangamuyo sa pagbuylog sa ila? (Hulubaton 3:32; 1 Timoteo 4:1, 2) Sa pagkamatuod, sia isa ka bunayag nga ministro, nga sa maayong konsiensia nagbato sa mga sumilimba sang Judaismo. (Binuhatan 20:17-27) Nagasalig man si Pablo nga makaupod niya sa dili madugay ang mga Hebreo kon ipangamuyo nila nga matabo ina.
18. Kon ginapaabot naton ang iban nga ipangamuyo kita, anong mga pamangkot ang mapamangkot naton?
18 Ang pagpangabay ni Pablo para ipangamuyo sang mga Hebreo nagapakita nga nagakaigo para sa mga Cristiano nga ipangamuyo ang isa kag isa, bisan nagasambit sang ngalan. (Ipaanggid ang Efeso 6:17-20.) Apang kon ginapaabot naton ang iban nga magpangamuyo tungod sa aton, indi bala kita dapat mangin kaangay sang apostol kag magapat-od nga kita may ‘bunayag nga konsiensia kag nagagawi sing bunayag sa tanan nga butang’? Bunayag ka bala sa tanan mo nga mga pagpakig-angot? Kag may pareho ka man bala nga pagsalig sa pangamuyo kay Pablo?—1 Juan 5:14, 15.
Nagahinakop nga mga Pulong kag Laygay
19. (a) Ano ang mapangamuyuon nga handum ni Pablo para sa mga Hebreo? (b) Ngaa ang bag-ong katipan isa ka walay katapusan nga katipan?
19 Napangabay ang pangamuyo sang mga Hebreo, ginpabutyag ni Pablo ang mapangamuyuon nga handum, nga nagasiling: “Karon ang Dios sang paghidait, nga nagbanhaw sang aton Ginuong Jesus, ang daku nga manugpahalab sang mga karnero, bangod sa dugo sang dayon nga katipan, maghimpit sa inyo sa tagsa ka maayong buhat sa paghimo sang iya kabubut-on, kag nagahikot sa aton sang nahamut-an sa iya itololok; paagi kay Jesucristo; nga sa iya ang himaya sa katuigan kag katuigan. Kabay pa.” (Hebreo 13:20, 21) Upod ang mahidaiton nga duta sa unahan, “ang Dios sang paghidait” nagbanhaw kay Cristo sa dimamalatyon nga kabuhi sa langit, diin ginpresentar ni Jesus ang merito sang iya ginpatulo nga dugo nga nagpaepektibo sang bag-ong katipan. (Isaias 9:6, 7; Lucas 22:20) Isa ini ka walay katapusan nga katipan bangod yadtong yari sa duta magabaton sing permanente nga mga benepisyo gikan sa serbisyo sang 144,000 ka espirituwal nga mga anak sang Dios nga nagagahom kaupod ni Jesus sa langit kag nga yara sa bag-ong katipan. (Bugna 14:1-4; 20:4-6) Paagi kay Cristo nga ang Dios, nga sa iya ginapatuhoy naton ang himaya, ‘nagahimpit sa aton sa tagsa ka maayong buhat sa paghimo sang iya kabubut-on kag nagahikot sa aton sang nahamut-an sa iya itololok.’
20. Paano mo iparaprase kag ipaathag ang nagahinakop nga laygay ni Pablo sa Hebreo nga mga Cristiano?
20 Wala nakapat-od sa reaksion sang mga Hebreo sa iya sulat, si Pablo nagsiling: “Nagapakiluoy ako sa inyo, mga kauturan, batasa ninyo ang akon pulong sang laygay [sa pagpamati sa Anak sang Dios, indi sa mga sumilimba sang Judaismo] kay nakasulat ako sa inyo sing malip-ot [nagabinagbinag sa iya mabug-at nga kaundan]. Hangpon ninyo nga si Timoteo nga aton utod nabuhian na [gikan sa bilanggoan], nga upod sa iya magapakigkita ako sa inyo kon mag-abot sia sing madali.” Ayhan nagasulat halin sa Roma, ang apostol naglaum nga kaupod ni Timoteo makaduaw sia sa mga Hebreo sa Jerusalem. Nian si Pablo nagsiling: “Abiabiha tanan sila nga nagapangulo [subong mapisan nga mga gulang] sa inyo kag ang tanan nga balaan [nga may langitnon nga paglaum]. Ang mga taga-Italya nagaabiabi sa inyo. Ang dibagay nga kaluoy [sang Dios] mangin kaupod ninyo tanan.”—Hebreo 13:22-25.
Isa ka Sulat nga May Mapinadayunon nga Balor
21. Ang sulat sa mga Hebreo nagabulig sa aton sa paghangop sang anong dalagkung mga punto?
21 Ayhan sing labi pa sa iban pa nga tolon-an sang Balaan nga Kasulatan, ang sulat sa mga Hebreo nagabulig sa aton sa paghangop sa importansia sang mga halad nga ginhalad sa idalom sang Kasuguan. Ang sulat maathag nga nagapakita nga ang halad ni Jesucristo amo lamang ang nagahatag sang kinahanglanon nga gawad para sa makasasala nga katawhan. Kag ang talalupangdon nga mensahe nga masapwan sa sulat amo nga dapat naton pamatian ang Anak sang Dios.
22. Ano ang pila ka rason para kita magpasalamat para sa sulat sa mga Hebreo?
22 Dugang pa, subong sang nakita naton sa duha ka nagligad nga artikulo, may iban pa kita nga rason sa pagpasalamat para sa inspirado sang Dios nga sulat sa mga Hebreo. Nagabulig ini sa aton nga indi maglapyo sa aton ministeryo, kag nagapuno sa aton sing kaisog, kay kita nakahibalo nga si Jehova amo ang aton Manugtabang. Dugang pa, nagabulig ini sa aton sa paggamit sang aton mga bibig kag sa tanan naton nga ikasarang sing dimakagod sa pagdulot sing balaan nga pag-alagad sa adlaw kag gab-i kag sa paghalad sing tinagipusuon nga mga halad nga nagapahamuot sa aton dalayawon kag mahigugmaon nga Dios, si Jehova.
Paano Mo Sabton?
◻ Paano ang sulat sa mga Hebreo nakabulig sa ila sa paglikaw sa dimatuod nga mga panudlo?
◻ Ang mga halad nga nagapahamuot sa Dios nagahugod sa anong importante nga buluhaton?
◻ Sin-o ang “nagapanguna,” kag ngaa magpasakop sa ila?
◻ Paano ang sulat sa mga Hebreo nagapadaku sa pangamuyo?
◻ Ngaa makasiling kita nga ang sulat sa Hebreo nga mga Cristiano may mapinadayunon nga balor?
[Mga piktyur sa pahina 23]
Ang mga halad nga kalahamut-an sa Dios nagalakip sang pagduaw kag pagpalig-on sa mga masigka Cristiano upod ang mahigugmaon nga pag-atipan