Diosnon nga Debosyon—Mapuslanon Para sa Tanan nga Butang

NAHIBALUAN sang mga Saksi ni Jehova nga ang “diosnon nga debosyon mapuslanon para sa tanan nga butang” kag kinahanglanon sa matuod nga pagsimba. (1 Timoteo 4:8) Kon wala ini, ang relihion pormalismo lamang. Busa ang “Diosnon nga Debosyon” amo ang nagakaigo nga ngalan para sa serye sang distrito nga mga kombension nga nagsugod sang nagligad nga Hunyo.

Sang Agosto, tatlo ka kombension ang ginhiwat sa Poland sa likod sang makalilipay nga hitabo. Natabo ini sa tapos ginhatag ang opisyal nga pagkilala sa mga Saksi ni Jehova sadtong Mayo. (Para sa iban nga detalye nahanungod sa mga kombension sa Poland, tan-awa ang Awake! sang Disiembre 22, 1989.) Repasuhon naton diri ang programa sa kombension nga ginpresentar sa Poland.

Piątek w Poznaniu (Biernes sa Poznan)

Nagapangayo sing tinapay kag kahilwayan, 50,000 ka demonstrador ang nagrayot sa Poznan sang Hunyo 1956. Nagresulta ini sa kapin sa 50 ka patay kag sa pagluntad sang bag-ong Polako nga gobierno. Sa kabaliskaran, 33 ka tuig sang ulihi, sa isa ka atmospera nga may bugana nga espirituwal nga tinapay kag Cristianong kahilwayan, ang mahidaiton nga mga Cristiano nagtipon didto sa pagpamati sing pamulongpulong nahanungod sa “Pag-alagad sa Dios nga Nagakinahanglan sing Eksklusibo nga Debosyon,” ang tema sang Biernes. Isa ka kataason nga 40,442 ang nagtipon didto sang Domingo.

Pagkatapos sang nagaabiabi nga pamulongpulong sang tsirman sang kombension kag sang interbyu sa mga tawo nga “Nagakabuhi Upod ang Bug-os nga Diosnon nga Debosyon,” ginhatag ang praktikal nga laygay sa pamulongpulong nga “Likawi ang mga Bibig nga Makasalaklaw.” Daw ano kahapos nga ang walay pulos nga hambal mangin makasalaklaw nga kutsokutso! Kag ang makahalalit nga kutsokutso makadul-ong sa makamamatay nga pagbutangbutang. Apang antes ikutsokutso ang iban nga tawo, ang hamtong nga mga Cristiano, nga nalangkag sa pag-amlig sa paghidait kag paghiusa, maalamon nga nagapamangkot sang ila kaugalingon: ‘Mahambal bala ini ni Jesus? Dapat bala ini ipamaba? Makapalig-on bala ini? Ano ang rason ko ngaa ipamaba ini?’

Pinasahi sa mga kombension sa Poland amo ang tion nga ginpain sa kada adlaw sa pagpamati sa mga report nga ginhatag sang mga Saksi gikan sa iban nga pungsod. Ang mga eksperiensia nga ginsugid sang mga delegado nga nagarepresentar sa 24 ka lainlain nga pungsod nagpadaku sa kamatuoran nga yari diri ang isa ka internasyonal nga pamilya nga tunay nga nahiusa sa pagkilala sa kamatuoran nga “Si Jehova Nagakinahanglan sing Eksklusibo nga Debosyon.” Bangod ang Dios takus makabaton sina nga debosyon, ang iya mga alagad dapat mangin dinabahinbahin sa gugma kag pagsimba. Ang halimbawa ni Jesus nagailustrar nga wala sing tunga nga tagipusuon nahanungod sa eksklusibo nga debosyon.

Ang diosnon nga debosyon nagalakip sang tanan nga ginahimo naton. Busa, ang tatlo-ka-bahin nga paghinun-anon nagpaandam sa mga Cristiano nga “Likawi ang Pagtalang” tuhoy sa pagkaon kag pag-inom, pagpamayo kag pagpamustora, kag kalingawan. Ang pagkahakog kag pagpahubog mga dagway sang kahamkon nga nagaburon sang espirituwal nga igbalatyag, nagatuga sing problema sa kapagros, nagaganyat sa malain nga paggawi, kag nagadul-ong sa mga aksidente. Ang sobra nga estilo sa pamayo​—indi maugdang, dikinaandan, indi ordinaryo, ukon malaw-ay​—dapat likawan. Ang mahigko, dipormal katama, ukon hapit sa lawas nga panapton indi maayo. Ang isyu indi ang sa kon bala ang estilo uso, kundi sa kon bala ini nagakaigo para sa ministro sang Dios. Kag ang kalingawan nga namantsahan sing pagrebelde, kasingki, droga, okultismo, ukon seksuwal nga imoralidad indi para sa mga Cristiano.​—Filipos 1:27.

Ang programa sang Biernes sang hapon ginsugdan sang pamulongpulong nga “ ‘Ang Matutom nga Ulipon’ kag ang Iya Nagadumala nga Hubon.” Nagasalig sa katutom sang iya matutom nga mga tinuga, si Jehova nagatugyan sing awtoridad. Amo man ang iya Anak. Sa tunga sang iya hinaplas nga mga sumulunod, “ang matutom kag mainandamon nga ulipon,” ginpili niya ang iban sa pag-alagad subong kitaon nga nagadumala nga hubon. (Mateo 24:45) Sadtong unang siglo, ini nga grupo ginahuman sang mga apostoles kag madamong iban pa tigulang nga lalaki sa Jerusalem.

Sa modernong tion ang Nagadumala nga Hubon nakilal-an upod sa editoryal nga katapo sang Watch Tower Society kag sang iya hubon sang mga direktor. Apang ang Nagadumala nga Hubon tuhay sa legal nga korporasyon, subong sang ginpaathag sang humalambal: “Bangod ang pagluntad sang korporasyon legal lamang, nga may permanente nga geograpiko nga ulong talatapan, mahimo ini dulaon ni Cesar, ang Estado.” Apang indi ang Nagadumala nga Hubon, nga indi isa ka legal nga instrumento kundi nga ang mga katapo “gintangdo paagi sa balaan nga espiritu sa idalom sang panuytoy ni Jehova kag ni Cristo.” Gani, ang Nagadumala nga Hubon padayon nga nagapanghikot kag nagabaton sing bug-os nga suporta sang mga Saksi ni Jehova sa bug-os nga kalibutan.

Ang mga kombension sa Poland gintambungan sang 5 ka katapo sang karon 12-ka-tawo nga Nagadumala nga Hubon. Ang isa sa ila naghatag sang key­note add­dress, “Kon Ngaa Hibaluon ang Balaan nga Tinago sang Diosnon nga Debosyon.” Ginpakita diri nga ang tinago sang diosnon nga debosyon indi na isa ka sekreto, bangod “napersonipikar ini kay Jesus.” Ginsaysay sang humalambal ang anum ka bahin sining balaan nga tinago nga ginsambit sa 1 Timoteo 3:​16, kag nagsiling: “Ang aton apresasyon para sa balaan nga tinago sang diosnon nga debosyon dapat pirme magtuytoy sa aton sa pagsunod sing maayo sa mga tikang ni Jehova.”

Gin-athag sang duha ka simposium nga ang diosnon nga debosyon ginakinahanglan sang bata kag tigulang. Ang mga ginikanan amo ang may salabton sa paghatag sa ila kabataan sing espirituwal nga panublion paagi sa pagtudlo sa ila nga palambuon ang nagakaigo nga paghibalo sang husto kag sayop. Ang makahulugan nga pagtuon sang pamilya, lakip ang realistiko nga paghinun-anon sa mga problema sang bata, kinahanglanon gid. Pirme alisto sa mga senyales sang katalagman, ang mga ginikanan dapat magbantay sa kabataan batok sa dimaayo nga pakig-upod, bisan sa sulod sang kongregasyon.

Sa pihak nga bahin, kon ang pamatan-on magkabuhi sing makapaladya, dapat sila magtan-aw kay Cristo, nga ‘nagbilin sing sulundan para masunod nila sing maayo ang iya tikang.’ (1 Pedro 2:21) Sing nagakaigo, ginpamangkot sila: “Kon kamo ginpadaku sa kamatuoran, nahibaluan ninyo kon ano ang inyo ginapatihan, apang nahibaluan bala ninyo kon ngaa?” Ginlaygayan sila nga himuon ang kamatuoran nga ila paagi sa pagpamatuod sa ila kaugalingon nga ang Biblia amo ang Pulong sang Dios kag nga ang mga Saksi ni Jehova tunay nga may kamatuoran.

Sa madamong pungsod ini nga paghinun-anon gintakpan sang pagpaguwa sa bag-ong 320-pahina nga libro Questions Young People Ask​—Answers That Work. (Tan-awa palihog ang kaupod nga kahon, “ ‘Isa ka Dulot Halin kay Jehova’ Para sa mga Pamatan-on.”) Ginalauman nga ang mga pamatan-on sa Poland kag sa iban pa nga mga pungsod sa Nasidlangan nga Europa makabenepisyo man sa pila ka adlaw gikan sa sining matahom nga laygay nga ginaunod sining publiko paagi sa pagbasa sini sa ila kaugalingon nga hambal.

Sobota w Chorzowie (Sabado sa Chorzów)

Ang Chorzów isa ka industriyal nga sentro sa tunga sang minahan sang uling sa nabagatnan nga Poland. Ang Silesian nga minahan sang uling nakahatag gid sing daku nga ganansia sa ekonomiya para sa sina nga lugar. Apang ang pangunang topiko nga ginhambalan sa tunga sang 65,710 ka tawo sa Slaski Stadium sang nagligad nga Agosto amo ang daku pa nga sahi sang ganansia.

“Ang Diosnon nga Debosyon Nagakahulugan sing Daku nga Ganansia,” ang tema para sa Sabado, ginpaathag sang unang humalambal sa hapon nga sesyon. (1 Timoteo 6:6) Nagapadaku nga matuod ang pinamulong sang humalambal amo ang interbyu sa mga indibiduwal nga nakaeksperiensia sing daku nga ganansia sa ila kaugalingon nga kabuhi paagi sa paghimud-os sing diosnon nga debosyon.

Sa programa sadto nga aga, ang mga benepisyo sang paghimud-os sing diosnon nga debosyon ginpadaku sa isa ka simposium. “Paagi sa Regular nga Pagbasa [sang Pulong sang Dios] Upod ang Paghantop,” nga nagausisa sang kahulugan sang aton ginabasa, kag mapangamuyuon nga nagabinagbinag kon paano iaplikar ang aton naton-an, kita subong mga Cristiano nagalakat sa diosnon nga debosyon “Paagi sa Pirme Pagpaiwag sang Aton Kapawa.” (Josue 1:8) Ginpaathag nga kon ang kada isa sang mga Saksi ni Jehova sa bug-os nga kalibutan magahinguyang sing 15 minutos kada adlaw sa dipormal nga pagpakigsugilanon sa iban, mahinguyang ang dugang nga 327 milyon ka oras kada tuig sa pagbantala sang Ginharian nga hilikuton.

Ang diosnon nga debosyon ginahimud-osan man “Paagi sa Pagbatu sa Pagsulay.” Ang pagkaon, ilimnon, sekso, ukon kuwarta, bisan pa indi malain sa ila kaugalingon, mahimo mangin malain sa idalom sang dinagakaigo nga sirkunstansia. Proteksion nga likawan ang dikinahanglanon nga pagpadayag sa kaugalingon sa materyalismo, pornograpiya, droga, kag pagpahubog sang kalibutan, subong man sa pagsako sa kalipayan, subong sang musika, hampang, kag sosyal nga aktibidades. Importante ang pangamuyo. Ang mga Cristiano dapat magtuon sa pagdumot sa malain. Nagakaigo ini, bangod ginpakita sang masunod nga humalambal nga dapat sila “Indi Na Magkabuhi Tungod sa Kabubut-on sang Tawo Kundi Tungod sa Iya sang Dios.”

Madamo pa nga mga tawo ang nagapamat-od sa paghimo sina. Nakita ini sang 2,663 ka bag-ong mga Saksi ang dayag nga nagpabutyag sang ila determinasyon sa “Paghimud-os sang Diosnon nga Debosyon Subong Dedikado, Bawtismado nga mga Cristiano.” (Sa tatlo tanan ka kombension sa Poland, ang mga kandidato sa bawtismo nagdamo sing 6,093.) Agod huptan ang kalipay sa pag-alagad kay Jehova, ang mga ginbawtismuhan ginpalig-on sa pagpamalandong sa madamong rason nga magkalipay: pagpakig-abyan ni Jehova, ang ila bug-os kalibutan nga paghiliutod, kag ang paglaum nga kabuhi sa Paraiso.

Ang Cristianong pagpasakop ginhinun-anunan sa pamulongpulong nga “Pagpakita sang mga Buhat sang Diosnon nga Debosyon​—Subong mga Lalaki sa Idalom sang Pagkaulo ni Cristo.” Ang mga lalaki nga nagabuhat sing diosnon nga debosyon magaatipan sang mga katungdanan sa pamilya sa mahigugmaon kag tulad-Cristo nga paagi. “Subong mga Babayi nga Nagapakita sing Nagakaigo nga Pagpasakop,” ang aton Cristianong mga utod nga babayi mangin masinakdagon, wala nagaimpluensia sing sayop sa ulo sang pamilya ukon nagatugot sang emosyon sa pagtiklod sa ila nga makahimo sing dimalaamon nga desisyon. “Subong mga Kabataan nga Nagatuman sa mga Ginikanan,” ang mga kabataan magatuon sa pagtuman, sa pagkomento sa mga miting, kag sa pagpakigbahin sa Cristianong ministeryo.

Maayo gid nga laygay! Apang, ang dimatuod nga relihion makasulubo nga wala gid makahatag sinang nagakaigo nga pagtuytoy! Bangod sini, nagakabagay ini sang matigdas nga pagkondenar, nga amo ang ginpaathag sa pamulongpulong “Pagbuyagyag sa ‘Tawo sang Pagkamalinapason.’ ” Ining isa nga makatalanhaga ginpakita subong “isa ka grupo nga ‘tawo,’ ang bug-os relihioso nga klero sang apostata nga Cristiandad.” Tungod sang ila paghingabot sa mga alagad sang Dios, ang klero ginabuylugan karon sang “modernong mga apostata, nga nagaangkon anay nga mga Saksi, [apang nga] nagbalik sa suka nga doktrina sang Cristiandad kag nakighimbon sa espirituwal nga mga palahubog sang Babilonia nga Daku sa pagbunal kag sa pagsalakay sa matutom kag mainandamon nga ulipon nga klase ni Jehova.” Ang palakpak nagpakita sing pag-ugyon sang ang humalambal nagsiling: “Padayon naton nga ibuyagyag ang Babilonia nga Daku kag ang iya ‘tawo sang pagkamalinapason.’ ”

Nagakinahanglan ini sing kasidla, labi na sa tion nga, suno kay M. G. Henschel, katapo sang Nagadumala nga Hubon, kalabanan nga tawo “nagatalikod sa Dios kag sa iya Pulong, ang Biblia.” Bisan pa ang “pagtahod para sa Biblia sa karon manubo gid katama,” ang Biblia nagpabilin nga mabakud sa pagtilaw sang tion. Ang humalambal nangatarungan nga “wala sing libro nga ginpatubas lamang sang tawo ang mahantupan gid sing maayo kag pirme nga husto.” Nagsiling sia nga “ang mga Saksi ni Jehova nagatugot sa Pulong sang Dios sa paghatag sing gahom sa ila kabuhi [kag] ang resulta nga internasyonal nga paghiliutod sang matuod nga mga Cristiano isa ka makusog nga pamatuod nga ang Biblia inspirado nga Pulong sang Dios.” Ang adlaw makalilipay nga gintakpan paagi sa pagpahibalo sa bag-ong libro nga The Bible​—God’s Word or Man’s?, nga ginpaguwa sa madamo nga hambal.

Niedziela w Warszawie (Domingo sa Warsaw)

Ang mga bisita sa Warsaw masami nga nagakadto sa memoryal nga tanda sa lugar sang bantog nga Warsaw Ghetto, diin gintipon sang mga Nazi ang ginatos ka libo ka Judiyo nga palatyon sadtong Inaway Kalibutanon II. Apang, nahamtang mga pila ka minuto lamang ang kalayuon sakay sa salakyan, ang X-Lecia Stadium nag-awas, sang Agosto 13, bangod sang 60,366 ka tawo nga nagkari sa pagpamati sa panghunahuna nahanungod sa “Isikway ang Pagkadidiosnon kag Magkabuhi Upod ang Diosnon nga Debosyon,” ang tema para sa Domingo.​—Tito 2:12.

Ang pagkabuhi upod ang diosnon nga debosyon maathag nga wala nagatugot sang pagpadayag sing kalibutanon nga espiritu sang independensia. Ang matuod-sa-kabuhi nga drama nga “Magpasakop Kamo kay Jehova,” nga ginpresentar sa tipiko Polako nga entusiasmo, nagpadaku sang kinahanglanon nga mga pagbalhin nga dapat himuon sang mga Cristiano agod matigayon ang kahamuot sang Dios.

Ang isa ka katapo sang Nagadumala nga Hubon nagbalikwat sang 1 Corinto 8:​6, nga nagasiling: “Sa aton may isa ka Dios ang Amay.” Ginpakita niya nga ang pangunang doktrina sang Cristianismo indi ang Trinidad, subong sang ginapangangkon sang madamo, kundi ang pagbindikar kay Jehova paagi sa iya Ginharian sa idalom ni Cristo. “Ang Trinidad nga panudlo liw-as sa kamatuoran, pag-apostata sa sini,” paathag niya. Busa, ang katawhan nga nagatawag kay Maria nga iloy sang Dios kag ang Manugpatunga sa ulot sang Dios kag sang tawo wala “nagatuo sa Dios sa sibu nga ihibalo.” (Roma 1:28) Sing nahisuno, “ang pagsimba sa Dios sing nagakaigo nagakahulugan sang pagsikway sa Trinidad nga doktrina.” Ginpalakpakan sang ginpaguwa ang 32-pahina nga brosyur, Czy wierzyć w Trójcę? (Dapat Ka Bala Magpati sa Trinidad?) Daw ano gid kaayo nga kasangkapan para sa pagbuyagyag sa pagkadimatuod sining wala nagapadungog sa Dios nga doktrina!

Ang kaluwasan wala gid mag-abot para sa mga biktima sa Warsaw Ghetto. Apang ang saad sang Dios, subong sang ginpaathag sa pamulongpulong publiko, amo nga “Ang Kaluwasan Malapit Na Para sa Katawhan sang Diosnon nga Debosyon!” (2 Pedro 2:9) Amo sini bisan pa ang mga Cristiano biktima sang duha ka kasingki​—ang adlaw-adlaw nga sahi kag nga gindirekta batok sa ila sa dagway sang paghingabot. Nagapanawagan sang pag-usisa sa kaugalingon, ginpadaku sang humalambal nga “ang kaluwasan para lamang sa mga tawo sang diosnon nga debosyon, yadtong ang debosyon tunay, yadtong ang pagkamatinumanon isa ka ekspresyon sang katutom.”

Pagkatapos sang katapusan nga pahanumdom nga “Magmainit sa Espiritu,” ang kombension nagtapos paagi sa makapulukaw nga presentasyon sa tema “Ang Aton Dalayon nga Paghanas sa Diosnon nga Debosyon Mapuslanon.” Nian ginbuksan sang mga kombensionista ang ila bag-ong Polako nga song­book, nga gin-imprinta pila pa lamang ka semana ang nagligad, kag nahiusa nga naghalad sing “Isa ka Pangamuyo sang Pasalamat” sa dagway sang ambahanon 45.

Nagsunod ang hanuot nga pangamuyo sa paghinakop, kag nian ang nagadaguob nga palakpak sa Warsaw, Poznan, kag Chorzów. Sa Warsaw ang mabaskog nga palakpak sang linaksa ka kamot naglanog sa sulod sang kapin sa 11 ka minutos. Wala sing isa ang luyag maghalin, kag ang mabaskog nga palakpak nga nagatindog, nga nagapakita gid sang kasadya sining daku nga kadam-an sang mga Saksi, nga sa ila linibolibo ang nagtambong sang ila unang-tatlo-ka-adlaw nga kombension, dramatiko nga nagpakita sang ila pasalamat kay Jehova kag sa iya organisasyon. Subong ini sa ginasiling sang Salmo 47:​1, 2: “O tanan kamo nga katawhan, pamalakpak sang inyo mga kamot. Singgit kamo sa Dios sa tingog sang pagdaug. Kay si Jehova, ang Labing Mataas, makakulugmat, sia dakung Hari sa bug-os nga duta.” Samtang ang isa sang pinakadaku nga hitabo sa modernong-adlaw nga maragtas sang mga Saksi ni Jehova natapos, ang hanuot nga mga utod naghanda sang paglakbay pauli, ang ila mga tagipusuon puno sing kalipay kag sing determinasyon nga dugangan ang dakung panaksi sa Ginharian nahisuno sa hamili nga halimbawa ni Jesus sa diosnon nga debosyon.

[Kahon sa pahina 27]

Ang Bag-ong mga Release Nagapukaw sang ‘Buhat sang Diosnon nga Debosyon’

Ang bag-ong libro nga The Bible​—God’s Word or Man’s? kag ang brosyur nga Dapat Ka Bala Magpati sa Trinidad? nagresulta sa madamong ekspresyon sang apresasyon. Ang isa ka utod nga babayi nagsulat nahanungod sa Trinidad nga brosyur: “Ako nahayanghag, nakunyag, kag nalipay sa sini. Salamat sa inyo tungod sang daku nga tion, enerhiya, kag pangabudlay nga ginkinahanglan sa pag-imprinta sa sining matahom nga publikasyon.”

Ang isa pa ka utod nga babayi nagsulat nahanungod sa libro nga The Bible​—God’s Word or Man’s?: “Luyag ko kamo pasalamatan halin sa alibutod sang akon kasingkasing bangod sining matahom nga bag-ong libro. Ayhan bisan kamo nakarealisar bala nga isa ini ka buhat sang taliambong? Masunson ko nga ginakuritan ang importante nga mga tinaga. Apang ginpunggan ninyo ako bangod kada isa ka tinaga importante. Bag-o ko lang natapos ang kapitulo 5, apang dapat ko isiling ang salamat.”

[Kahon sa pahina 30]

‘Isa ka Dulot Halin kay Jehova’ Para sa mga Pamatan-on

Ang talalupangdon nga bahin sang mga kombension sa Estados Unidos kag sa madamo iban pa nga kadutaan amo ang sesyon sang Biernes sang hapon, sang ang mga pamatan-on sa ulot sang edad nga 10 kag 19 ginpangabay sa paglingkod sa isa ka ginreserba nga seksion. Pagkatapos sang pinasahi nga serye sang mga pamulongpulong, ang tagsa ginhatagan sing libre nga kopya sang bag-ong libro nga Questions Young People Ask​—Answers That Work. Sa bug-os nga kalibutan, 8,840,000 ka kopya ang ginpaguwa sa 21 ka hambal, kag ginatos ka sulat sang apresasyon ang nabaton!

“Sa nagligad nga mga asambleya, may mga pamulongpulong nga ginhatag sa mga pamatan-on,” sulat sang isa ka tin-edyer nga babayi, “apang ang epekto sang pagpapungko sa amon tanan sing tingob indi mapatihan.” Sulat sang isa pa ka pamatan-on: “Naglingkod ako sa seksion para sa mga pamatan-on. Napalig-on gid ako sa sini sa bagay nga, kutob sadto, nagakuha na ako sing nota sa mga miting, nagatuon sing labi pa, kag nagakomento. Nagaplano ako sa pagpabawtismo sa masunod nga tig-ilinit.”

Para sa madamo nga pamatan-on, ang eksperiensia isa gid ka maragtas. “Sang ginpahibalo sang humalambal nga magalingkod kami sa isa ka pinasahi nga seksion,” saysay sang isa ka pamatan-on nga babayi, “nahibaluan ko nga may butang nga makalilipay nga mahanabo. Sang ginpahibalo nila ang pagpaguwa sa libro, nalipay gid ako katama nga daw mahibi ako. Nahibaluan ko gid nga may pag-ulikid kamo sa amon nga mga pamatan-on, apang nagtandog gid ini sang akon tagipusuon. Ini nga libro amo gid ang ginakinahanglan namon!”

“Nasulat ini sing maayo,” siling sang isa ka pamatan-on nga nagahingalan kay Leah, “kag ang mga laragway realistiko kag nagapahunahuna gid sa imo.” Ang edisyon sang mga libro sang kombension nagaunod sing malip-ot nga mensahe gikan sa Nagadumala nga Hubon nga napatuhoy “Sa Tanan Lamharon nga mga Saksi ni Jehova.” “Natandog gid ako sinang espesyal nga sulat,” sulat sang pamatan-on nga si Andreá. “Para sa akon daw subong bala nga ang isa nga gintangdo ni Jehova nga magpuyo kaupod niya sa langit nagapakighambal gid sa akon!”

Madamo ang nag-apresyar nga ang libro ginpresentar subong isa ka dulot. Panugiron sang isa ka ginikanan: “Nakahibi ako. Mga utod, lima sadtong mga pamatan-on mga bata ko, nga nagaedad sing 11 tubtob 16. Kuntani duha lamang ka libro ang masarangan ko baklon.” Sulat sang isa ka pamatan-on nga nagahingalan kay Mark: “Ginsuma ko kon mga pila ang gingasto agod mahatagan sing isa ka kopya ang kada isa, apang narealisar ko sang ulihi nga ang panuytoy sa sulod mahal kaayo. Kon ang libro makabulig sa isa lamang ka batinggilan nga pamatan-on pabalik sa dalan padulong sa kabuhi ukon, sing maayo pa, makabulig sa madamo sa aton nga makapabilin sa sina nga dalan, takus ini sa tanan nga bili.”

Madamong pamatan-on ang nakabenepisyo sa gilayon gikan sa libro. “Nagtambong ako sa amon kombension sang Hulyo 7-9,” siling sang isa ka pamatan-on, “kag pagka-Lunes, Hulyo 10, natapos ko ini!” Siling sang isa pa: “Ang katapusan duha ka kapitulo nagpalig-on gid sa akon nga binagbinagon sing labi pa ka serioso ang akon kabuhi. Manugpabawtismo na ako apang nagbag-o ang akon pensar. Karon nga nabaton ko ining matahom nga publikasyon, narealisar ko nga ‘ang kalibutan nagataliwan’ kag kinahanglan nga maghulag ako karon.”

“Bangod ang panahon nagbalhin,” sulat sang isa ka lamharon nga babayi, “pirme ko ginahunahuna nga wala mahibal-i sang mga may edad kon ano ang ginabatyag namon. Daku gid ang akon kalipay sa paghangop nga nagsayop ako. Ang inyo pagtalupangod sa amon nga mga lamharon nagpabatyag sa akon nga daw importante ako.” Sulat sang isa ka grupo sang mga pamatan-on gikan sa Sweden: “Nagabatyag kami nga nahangpan ninyo kami nga mga pamatan-on, kag nagabatyag man kami nga mas suod pa gid sa inyo.”

Ang isa ka pamatan-on nagbilog sang tanan sang nagsiling sia: “Kami sang akon utod nga lalaki kag utod nga babayi nanamian sa libro. Para sa amon isa ini ka dulot halin gid kay Jehova.” Ginapangamuyo namon nga ini nga dulot padayon nga magapanghikot para sa pagpakamaayo sa nagakahadlok sa Dios nga mga pamatan-on.

[Tsart sa pahina 29]

Diosnon nga Debosyon Nagadugang sa Europa!

1979 1984 1989 1979 1984 1989

ALEMANYA 129,342 140,681 159,819 1,154 1,009 1,694

AUSTRIA 17,847 20,908 25,153 236 257 307

BELGIUM 23,185 28,456 30,622 234 248 429

BRITANYA 113,910 137,008 160,704 605 937 1,344

DENMARK 21,057 23,267 24,645 122 147 249

ESPANYA 62,201 84,706 115,981 1,278 1,521 2,935

FINLAND 20,293 23,501 25,679 215 302 329

ITALYA 117,163 169,328 240,041 2,515 3,769 6,295

LUXEMBOURG 1,141 1,327 3,131 8 12 61

NETHERLANDS 36,768 42,060 44,185 126 143 271

NORWAY 10,327 11,352 13,829 107 159 294

POLAND — 94,134a 166,518 — 3,140b 6,093

PORTUGAL 35,108 47,843 59,797 862 1,068 1,546

PRANSYA 89,073 110,745 156,751 1,361 1,856 3,201

SWEDEN 21,286 25,204 30,943 279 323 410

SWITZERLAND 14,455 17,457 23,867 130 225 349

KABILUGAN 713,156 977,977 1,281,665 9,232 15,116 25,807

[Footnote]

[Piktyur sa pahina 26]

Ang pagpaguwa sa “Trinidad” nga brosyur isa ka tuburan sang kalipay sa Warsaw

[Piktyur sa pahina 31]

Ang bag-ong dedikado nga mga Saksi sa Chorzów nagahimud-os sang diosnon nga debosyon paagi sa pagpabawtismo