Ang Kabuhi kag Ministeryo ni Jesus

Tanda sang Katapusan nga mga Adlaw

MARTES sang hapon na karon. Samtang nagalingkod si Jesus sa Bukid sang Olivo, nga nagatan-aw sang templo sa ubos, nagpalapit sa iya sanday Pedro, Andres, Santiago, kag Juan. Nabalaka sila nahanungod sa templo, kay bag-o lang gintagna ni Jesus nga ‘walay mabilin diri nga isa ka bato sa ibabaw sang isa.’

Apang mahimo nga may iban pa sila nga ginahunahuna sang nagpalapit sila kay Jesus. Pila ka semana antes, nagpamulong sia nahanungod sa iya “presensia,” ang tion nga “ang Anak sang tawo ipahayag.” Kag sa mas nauna nga okasyon, ginsugiran niya sila nahanungod sa “konklusion sang sistema sang mga butang.” Gani nalangkag katama ang mga apostoles.

“Isugid sa amon,” siling nila, “san-o bala mahanabo ini [nga nagaresulta sa pagkalaglag sang Jerusalem kag sang iya templo], kag ano bala ang tanda sang imo presensia kag sang konklusion sang sistema sang mga butang?” Sa katunayan, may tatlo ka bahin ang ila pamangkot. Una, luyag nila mahibaluan ang nahanungod sa katapusan sang Jerusalem kag sang templo sini, nian ang nahanungod sa presensia ni Jesus nga may gahom sa Ginharian, kag sa katapusan nahanungod sa katapusan sang bug-os nga sistema sang mga butang.

Sa iya malaba nga sabat, ginsabat ni Jesus ang tanan nga tatlo ka bahin sang pamangkot. Naghatag sia sing tanda nga nagapakilala nga ang Judiyong sistema sang mga butang matapos; apang naghatag sia sing dugang pa. Naghatag man sia sing tanda nga magapaalisto sa iya palaabuton nga mga disipulo nga nagakabuhi sila sa tion sang iya presensia kag malapit sa katapusan sang bug-os nga sistema sang mga butang.

Samtang nagaligad ang mga tinuig, nakita sang mga apostoles ang katumanan sang tagna ni Jesus. Huo, ang mga butang mismo nga gintagna niya nagsugod nga mahanabo sa ila adlaw. Busa, ang mga Cristiano nga nagakabuhi 37 ka tuig sang ulihi, sang 70 C.⁠E., wala maabti nga dihanda sa pagkalaglag sang Judiyong sistema kag sang templo sini.

Apang, ang presensia ni Cristo kag ang konklusion sang sistema sang mga butang wala matabo sang 70 C.⁠E. Ang iya presensia nga may kagamhanan sa Ginharian natabo sang ulihi pa. Apang san-o? Ang pagbinagbinag sa tagna ni Jesus nagapakita sini.

Si Jesus nagatagna nga may “mga inaway kag mga kinonokono sang mga inaway.” “Ang pungsod magatindog batok sa pungsod,” kag may yara kakulang sing pagkaon, linog, kag mga kamatay. Ang iya mga disipulo pagadumtan kag pagapatyon. Ang dimatuod nga mga manalagna magalutaw kag magapatalang sa madamo. Ang pagkamalinapason magabuad, kag ang gugma sang kalabanan magabugnaw. Sa amo man nga tion, ang maayong balita sang Ginharian sang Dios ibantala sa bug-os napuy-an nga duta subong panaksi sa tanan nga kapungsoran.

Bisan pa nga ang tagna ni Jesus may limitado nga katumanan antes sang pagkalaglag sang Jerusalem sang 70  C.⁠E., ang daku nga katumanan sini natabo sa tion sang iya presensia kag sang konklusion sang sistema sang mga butang. Ang mahalungon nga pagrepaso sa mga hitabo sa kalibutan kutob sang 1914 nagapakita nga ang importante nga tagna ni Jesus nakatigayon sing daku nga katumanan kutob sina nga tuig.

Ang isa pa ka bahin sang tagna nga ginhatag ni Jesus amo ang pagluntad sang “makangilil-ad nga butang nga nagatuga sing kahapayan.” Sang 66 C.⁠E. ining makangilil-ad nga butang nagluntad sa dagway sang “nalikupan sing mga hangaway” sang Roma nga nagalibot sa Jerusalem kag nagpaluya sang pader sang templo. Ang “makangilil-ad nga butang” nagatindog sa kon diin indi ini dapat.

Sa daku nga katumanan sang tanda, ang makangilil-ad nga butang amo ang Liga de Nasyones kag ang nagbulos sa sini, ang Nasyones Unidas. Ining bug-os kalibutan nga organisasyon sa paghidait gintamod sang Cristiandad subong tal-us sang Ginharian sang Dios. Makangilil-ad gid! Gani, sa ulihi, ang mga kagamhanan sa politika nga nabuylog sa NU magabalikid sa Cristiandad (antitipiko nga Jerusalem) kag magahapay sa iya.

Busa si Jesus nagtagna: “Nian magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” Samtang ang kalaglagan sang Jerusalem sang 70 C.⁠E. daku gid nga kapipit-an, nga kapin sa isa ka milyon ang ginakunokuno nga napatay, indi ini mas daku nga kapipit-an sang sa bug-os globo nga Anaw sang kaadlawan ni Noe. Gani ang daku nga katumanan sini nga bahin sang tagna ni Jesus manug-abot pa. Mateo 24:​2-22; 13:​40, 49; Marcos 13:​3-20; Lucas 21:​7-24; 19:​43, 44; 17:​20-30; 2 Timoteo 3:​1-5.

◆ Ano ang nagtiklod sa pamangkot sang mga apostol, apang ano pa ang mahimo nga ginahunahuna nila?

◆ Ano nga bahin sang tagna ni Jesus ang natuman sang 70 C.⁠E., apang ano ang wala matabo sadto?

◆ San-o nakatigayon sing unang katumanan ang tagna ni Jesus, apang san-o ini may daku nga katumanan?

◆ Ano ang makangilil-ad nga butang sa iya una kag katapusan nga mga katumanan?

◆ Ngaa ang dakung kapipit-an wala sing katapusan nga katumanan sa pagkalaglag sang Jerusalem?