Malapit Na ang Kaluwasan Para sa mga Tawo nga may Diosnon nga Debosyon!

“Si Jehova makahibalo magluwas sang mga tawo nga may diosnon nga debosyon sa mga pagsulay, kag magtigana sang mga dimatarong sa idalom sang silot tubtob sa adlaw sang paghukom.”​—⁠2 PEDRO 2:⁠9.

1. (a) Anong masubo nga mga kahimtangan ang ginaatubang sang katawhan sa aton kaadlawan? (b) Bangod sini, anong mga pamangkot ang pagabinagbinagon naton?

NAGALALA ang mga problema sa kabuhi para sa tanan nga katawhan. Matuod ini nagapuyo man ang isa sa mga lugar nga bugana ang materyal nga mga butang ukon sa mga lugar nga kulang sing suplay. Yara bisan diin ang pagkawalay kalig-onan. Luwas sa dimalig-on nga kahimtangan sa ekonomiya, ang planeta nga Duta ginasalakay sang mabug-at nga problema may kahilabtanan sa katinlo sa palibot, nga nagabutang sa katalagman sang tanan nga nagakabuhi diri. Lapnag ang balatian. Ang makalalaton nga mga sakit, mga balatian sa tagipusuon, kag kanser nagapatay sang madamo. Ang imoralidad nagatuga sing daku nga halit sa emosyon sang tawo kag sa kabuhi sang pamilya. Luwas sini nga tanan, ang kalibutan puno sing kasingki. Bangod sang ginaatubang sang tawhanon nga katilingban, nagapamangkot kita sing realistiko: May maayo gid bala nga rason sa pagpaabot sing temprano nga kaluwasan? Kon amo, paano ini magaabot, kag para kay sin-o?​—⁠Ipaanggid ang Habacuc 1:​2; 2:​1-3.

2, 3. (a) Ngaa nasapwan naton karon nga ang ginasiling sang 2 Pedro 2:9 makapalig-on gid? (b) Anong ispisipiko nga buhat sang pagluwas ang ginatudlo sang Biblia subong sadsaran sang pagpalig-on?

² Ang nagakatabo sa aton adlaw nagapahanumdom sa aton sang iban nga importante nga hitabo sa maragtas sang tawo. Ginpatalupangod ni apostol Pedro ang pagluwas nga ginhimo sang Dios sadtong mga okasyon kag nian naghatag sining makapalig-on nga konklusion: “Si Jehova makahibalo magluwas sang mga tawo nga may diosnon nga debosyon sa mga pagsulay.” (2 Pedro 2:9) Talupangda ang konteksto sinang pinamulong, sa 2 Pedro 2:​4-10:

³ “Kay kon ang Dios wala magpaiway sang mga anghel sang nakasala sila, kundi ginhulog sila sa Tartaro, kag gintugyan sila sa mga kadadalman sang kadudulman nga itigana sa paghukom; kag kon wala niya pagpaiwaya ang daan nga kalibutan, apang gintipigan si Noe, nga manugbantala sang pagkamatarong, kaupod sang iban nga pito sang gin-anaw niya ang kalibutanon sang mga didiosnon; kon sang gin-abo niya ang mga siudad sang Sodoma kag sang Gomorra gintagudilian sila sa kalaglagan kag ginhimo sila nga huwaran sa mga buot magkabuhi sing didiosnon; kag kon iya ginluwas ang matarong nga si Lot, nga ginsakit sing lakas sang maulagon nga paggawi sang mga malauton​—⁠kay yadtong tawo nga matarong nga nagapuyo sa tunga nila, sa pagtan-aw kag sa pagpamati, ginsakit ang iya matarong nga kalag adlaw-adlaw sang ila mga binuhatan nga malinapason​—⁠si Jehova makahibalo magluwas sang mga tawo nga may diosnon nga debosyon sa mga pagsulay, kag magtigana sang mga dimatarong sa idalom sang silot tubtob sa adlaw sang paghukom, kag labi na gid ang mga nagasunod sa unod sa kailigbon sang kadagtaan kag nagatamay sang pagbulut-an.” Subong sang ginapakita sina nga teksto, ang natabo sang adlaw ni Noe kag sang panahon ni Lot puno sing kahulugan para sa aton.

Ang Espiritu nga Lapnag sang Adlaw ni Noe

4. Sadtong kaadlawan ni Noe, ngaa gintamod sang Dios ang duta nga malaut? (Salmo 11:5)

⁴ Ang maragtason nga kasaysayan sa Genesis kapitulo 6 nagasugid sa aton nga sang adlaw ni Noe ang duta nangin dunot sa itololok sang matuod nga Dios. Ngaa? Bangod sang kasingki. Indi ini malaka lamang nga kaso sang kriminal nga kasingki. Ang Genesis 6:​11 nagasugid nga ang “duta napun-an sing kasingki.”

5. (a) Ano nga panimuot sa bahin sang katawhan ang nag-amot sa kasingki sang kaadlawan ni Noe? (b) Ano ang ginpaandam ni Enoc nahanungod sa pagkadidiosnon?

⁵ Ano ang sa likod sini? Ang kasulatan nga ginbalikwat gikan sa 2 Pedro nagapatuhoy sa didiosnon nga mga tawo. Huo, lapnag sadto anay ang didiosnon nga espiritu. Nagadalahig ini indi lamang sang kinaandan nga dipagsapak sa kasuguan sang Dios kundi sa mabinatuon nga panimuot sa Dios mismo.⁠a Kag kon ang mga tawo nagabatu sa Dios, mangin mabuot bala sila sa ila pagpakig-angot sa ila isig­katawo? Wala pa matawo si Noe, ini nga pagkadidiosnon lapnag na kaayo amo kon ngaa ginpatagna ni Jehova si Enoc nahanungod sa mahanabo. (Judas 14, 15) Ang ila pagbatu sa Dios pat-od gid nga nagdul-ong sa balaan nga paghukom.

6, 7. Ano nga sitwasyon nga nagadalahig sa mga anghel ang daku nga kabangdanan sang malain nga kahimtangan antes sang Anaw?

⁶ May isa pa ka impluensia nga nag-amot sa kasingki sadto anay. Ang Genesis 6:​1, 2 nagapatalupangod sini sang ini nagsiling: “Sang nagsugod pagbuad ang mga tawo sa kadaygan sang duta kag natawo sa ila ang mga anak nga babayi, ang lalaki nga mga anak sang matuod nga Dios nakakita sang babayi nga mga anak sang tawo nga maayoayo sila; kag nagpangasawa sila sang tanan nga ila napilian.” Sin-o ining lalaki nga mga anak sang matuod nga Dios? Indi sila mga tawo. Sa nagligad nga mga siglo ang mga lalaki nakatalupangod kag nakapangasawa sang matahom nga mga babayi. Ining lalaki nga mga anak sang Dios mga anghel nga nagmateryalisar. Sa Judas 6, ginalaragway sila subong “mga anghel nga wala magtipig sang ila kaugalingon nga kahimtangan kundi nagbiya sang ila nagakaigo ­nga puluy-an.”​—⁠Ipaanggid ang 1 Pedro 3:​19, 20.

⁷ Sang ining labaw sa tawo nga mga tinuga nga nagmateryalisar subong tawo naghulid sa mga anak nga babayi sang tawo, ano ang resulta? “Sadtong mga adlaw ang mga Nefilim yara pa sa duta, kag sa tapos man sadto, sang naghiusa ang mga anak nga lalaki sang matuod nga Dios sa babayi nga mga anak sang mga tawo kag nagpanganak sila sa ila, ini sila amo ang gamhanan nga mga lalaki nga kutob sa dumaan, mga lalaki nga bantog.” Huo, ang mga anak sang dikinaugali nga pag-asawahay mga Nefilim, mga gamhanan nga naggamit sang ila superyor nga mga ikasarang sa pagsimusimo sa iban.​—⁠Genesis 6:⁠4.

8. Ano ang reaksion ni Jehova sa malain nga kahimtangan sa duta?

⁸ Nangin ano gid kalain ang kahimtangan? Naglab-ot ini sa punto nga “nakita ni Jehova nga ang pagkamalaut sang tawo daku sa duta kag nga ang tagsa ka painoino sang mga hunahuna sang iya tagipusuon malaut gid sing dalayon.” Ano ang reaksion ni Jehova sa sini? “Nagpakalisud ini kay Jehova nga nahimo niya ang tawo sa duta, kag nagpasakit ini sa iya tagipusuon.” Wala ini nagakahulugan nga nagsala ang Dios sang gintuga niya ang katawhan. Sa baylo, nagkalisud sia nga sa tapos niya ginhimo ang tawo, nangin tuman kalain ang ila paggawi amo kon ngaa napilitan sia nga laglagon sila.​—⁠Genesis 6:​5-7.

Ang Dalanon nga Nagdul-ong sa Kaluwasan

9. (a) Ngaa nakig-angot sing kalahamut-an ang Dios kay Noe? (b) Anong abanse nga impormasyon ang ginhatag sang Dios kay Noe?

⁹ Nahanungod kay Noe, sia “nakapahamuot sa mga mata ni Jehova. . . . Si Noe tawo nga matarong. Sia himpit sa iya mga kadungan. Si Noe naglakat upod sa matuod nga Dios.” (Genesis 6:​8, 9) Gani ginpahibalo sing abanse ni Jehova si Noe nga pahanabuon Niya ang tugob-globo nga anaw kag ginsugo sia nga magpatindog sing arka. Ang tanan nga katawhan, luwas kay Noe kag sa iya panimalay, pagadulaon sa kadaygan sang duta. Bisan ang mga sapat pagalaglagon, luwas sa pila ka tiglawas sang kada pangunang sahi nga pasudlon ni Noe sa arka.​—⁠Genesis 6:​13, 14, 17.

10. (a) Ano nga paghanda ang kinahanglan nga himuon para sa kaluwasan, kag daw ano ka daku nga hilikuton? (b) Ano ang talalupangdon nahanungod sa kon paano gin-atipan ni Noe ang iya asaynment?

¹⁰ Ining abanse nga ihibalo nagtugyan sing mabug-at nga responsabilidad kay Noe. Kinahanglan itukod ang arka. Kaangay sang daku nga kahon ang korte sini, nga mga 40,000 metro kubiko ang magamit nga espasyo sa sulod. Kinahanglan ini butangan ni Noe sing pagkaon kag nian tipunon ang mga sapat kag mga pispis, “tagsa ka sari,” para maluwas sila. Isa ini ka proyekto nga nagakinahanglan sing madamong tinuig agod matapos. Ano ang reaksion ni Noe? “Ginhimo [niya] ini suno sa tanan nga ginsugo sang Dios sa iya. Amo ang ginhimo niya.”​—⁠Genesis 6:​14-16, 19-22; Hebreo 11:⁠7.

11. Tuhoy sa iya mismo panimalay, anong importante nga responsabilidad ang gintugyan kay Noe?

¹¹ Samtang ginahimo ini, kinahanglan man nga si Noe maghinguyang sing tion agod pabakuron ang espirituwalidad sang iya panimalay. Kinahanglan man nga amligan sila agod indi nila mailog ang masingki nga paggawi kag mabinatuon nga panimuot sang mga tawo sa palibot nila. Importante man nga indi sila mangin sobra kasako sa matag-adlaw nga pagkabuhi. May ginapahimo ang Dios sa ila, kag importante nga isentro nila sa sini ang ila bug-os nga pagkabuhi. Nahibaluan naton nga ginbaton sang panimalay ni Noe ang iya instruksion kag nagtuo kaangay niya bangod si Noe, ang iya asawa, ang ila tatlo ka anak nga lalaki, kag tatlo ka umagad​—⁠walo sila tanan​—⁠nakabaton sing kahamuot sa Kasulatan.​—⁠Genesis 6:​18; 1 Pedro 3:⁠20.

12. Subong sang ginapakita sang 2 Pedro 2:​5, ano nga reponsabilidad ang matutom nga gintuman ni Noe?

¹² May isa pa ka responsabilidad si Noe​—⁠ang magpaandam nahanungod sa nagapakari nga Anaw kag ang magpahibalo kon ngaa magakari ini. Maathag nga gintuman niya sing matutom ina nga responsabilidad, kay ginpatuhuyan sia sang Pulong sang Dios subong “manugbantala sang pagkamatarong.”​—⁠2 Pedro 2:⁠5.

13. Anong mga kahimtangan ang nag-atubang kay Noe samtang ginatuman niya ang iya hatag-Dios nga asaynment?

¹³ Karon hunahunaa lamang ang kahimtangan sang gintuman ni Noe ina nga asaynment. Ibutang ang imo kaugalingon sa iya kahimtangan. Kon ikaw si Noe ukon katapo sang iya panimalay, ginapalibutan ka sang kasingki nga ginahimo sang mga Nefilim kag sang didiosnon nga mga tawo. Direkta nga nagaatubang ka sang impluensia sang rebelyuso nga mga anghel. Samtang ginahimo mo ang arka, ginayaguta ka. Kag tuig-tuig samtang nagapaandam ka nahanungod sa nagapakari nga Anaw, nakita mo ang mga tawo nga ­masako gid sa ila matag-adlaw nga pagka­buhi sa bagay nga “wala sila magsapak”​—⁠sa amo, “tubtob nga nag-abot ang anaw kag nagdala sa ila nga tanan.”​—⁠Mateo 24:​39; Lucas 17:​26, 27.

Ano ang Kahulugan sa Imo sang Eksperiensia ni Noe?

14. Ngaa wala kita karon mabudlayan sa paghangop sang kahimtangan nga gin-atubang ni Noe kag sang iya panimalay?

¹⁴ Indi mabudlay handurawon ina nga kahimtangan para sa kalabanan sa aton. Ngaa indi? Bangod ang mga kahimtangan sa aton kaadlawan kaanggid gid sadto anay sang kaadlawan ni Noe. Ginsiling ni Jesucristo nga amo gid sini ang paabuton. Sa iya daku nga tagna nahanungod sa iya presensia sa konklusion sang sistema sang mga butang, si Jesus nagtagna: “Subong sang mga adlaw ni Noe, amo man ang presensia sang Anak sang tawo.”​—⁠Mateo 24:⁠37.

15, 16. (a) Daw ano katuod nga, kaangay sang kaadlawan ni Noe, ang duta karon napun-an sing kasingki? (b) Anong kasingki ang partikular nga ginaeksperiensia sang mga alagad ni Jehova?

¹⁵ Amo gid bala sina ang natabo? Ang kalibutan bala karon puno sang kasingki? Huo! Sobra sa isa ka gatos ka milyon ka tawo ang napatay sa mga inaway sini nga dag-on. Ang iban sang amon mga bumalasa personal nga nakabatyag sang epekto sini. Madamo pa ang ginapahog sang mga kriminal nga luyag kuhaon ang ila kuwarta ukon mga pagkabutang. Kag ang mga pamatan-on nadayag sa kasingki sa eskwelahan.

¹⁶ Apang, ang mga alagad ni Jehova may labi pa nga ginaeksperiensia sang sa halit sang inaway ukon kriminal nga kasingki. Ginahimuan man sila sing kasingki bangod sila indi bahin sang kalibutan kundi nagapanikasog nga mangin mga tawo nga may diosnon nga debosyon. (2 Timoteo 3:​10-12) Kon kaisa ina nga kasingki sa dagway lamang sang pagtiklod ukon pagtampa; kon kaisa nagalakip ini sang pagpierde sa propiedad, mapintas nga pagsakit, kag bisan sang pagpatay.​—⁠Mateo 24:⁠9.

17. Lapnag bala karon ang pagkadidiosnon? Ipaathag.

¹⁷ Samtang ginahimo ini nga kasingki, ang didiosnon nga mga tawo, kon kaisa, matinaastaason nga nagapasipala sa Dios. Sa isa ka lugar sa Aprika, ang polis nagsiling: “Amon ang gobierno. Kadto kamo sa Dios, kon may yara gid man, kag mangayo kamo sing bulig sa iya.” Sa mga bilangguan kag mga kampo konsentrasyon, ang mga Saksi ni Jehova nag-atubang sa mga tawo kaangay ni Baranowsky, sa Sachsenhausen, Alemanya, nga nagyaguta: “Nagapakig-away ako kay Jehova. Tan-awon naton kon sin-o ang mas makusog, ako ukon si Jehova.” Wala madugay pagkatapos sadto, si Baranowsky nagmasakit kag napatay; apang ang iban padayon nga nagpakita sing kaangay nga panimuot. Ang mga opisyal nga nagahimo sing kampanya sang paghingabot indi amo lamang ang nagapakita sing pagpakig-away sa Dios. Sa bug-os nga kalibutan, nabatian kag nakita sang mga alagad sang Dios ang mga butang nga nagapakita nga ang nagahimo sini wala sing kahadlok sa Dios sa ila mga tagipusuon.

18. Sa anong paagi nga ang malauton nga mga espiritu nagaamot sa magamo nga kahimtangan sang katawhan?

¹⁸ Sa sining mga adlaw nga kaanggid sa panahon ni Noe, nasaksihan man naton ang pagpasilabot sang malauton nga mga espiritu. (Bugna 12:​7-9) Ining mga demonyo amo man ang mga anghel nga nagmateryalisar subong mga tawo kag nangasawa sa mga babayi sang kaadlawan ni Noe. Sang nag-abot ang Anaw, ang ila mga asawa kag mga kabataan nalaglag, apang yadtong dimatinumanon nga mga anghel napilitan sa pagbalik sa espirituhanon nga duog. Wala na sila sing lugar sa balaan nga organisasyon ni Jehova, apang ginbilanggo sila sa Tartaro, isa ka kahimtangan sang kadadalman sang kadudulman, nga wala na sing balaan nga sulu. (2 Pedro 2:​4, 5) Nagapanghikot sa idalom sang panuytoy ni Satanas, padayon nila nga nahuptan ang suod nga pagpakig-angot sa mga tawo kag, bisan indi na mahimo nga makamateryalisar, nagpanikasog sa pagkontrol sa mga lalaki, mga babayi, kag bisan sa mga kabataan. Ginahimo ini paagi sa okulto nga mga buhat. Ginapalig-on man nila ang katawhan nga magpinatyanay sa mga paagi nga supak sa tawhanon nga pangatarungan. Apang indi lang ina.

19. (a) Batok kay sin-o labi na nga ginapatuhoy sang mga demonyo ang ila kaakig? (b) Ano ang ginatinguhaan sang mga demonyo nga ipahimo sa aton?

¹⁹ Ginasugid sang Biblia nga ang mga demonyo nagapakig-away batok sa “nagabantay sang mga sugo sang Dios kag nagapanaksi kay Jesus.” (Bugna 12:​12, 17) Inang malaut nga mga espiritu amo ang pangunang mga manugsugyot sang paghingabot sa mga alagad ni Jehova. (Efeso 6:​10-13) Ginagamit nila ang tanan nga paagi sa pagpilit ukon sa pagsulay sa matutom nga mga tawo nga bungkagon ang integridad kay Jehova kag mag-untat sa pagbantala sang Ginharian ni Jehova nga si Jesus ang Mesianiko nga Hari.

20. Paano ginatinguhaan sang mga demonyo nga upangan ang mga tawo nga mahilway sa kontrol nila? (Santiago 4:7)

²⁰ Ginapanikasugan sang mga demonyo nga upangan ang mga tawo nga nahidlaw sing paumpaw gikan sa ila mapiguson nga impluensia. Ang isa ka espiritista anay sa Brazil nagareport nga sang ang mga Saksi nagduaw sa iya balay, ang mga tingog sang demonyo nagsugo sa iya nga indi pagbuksan ang ganhaan; apang ginbuksan niya ini, kag naton-an niya ang kamatuoran. Sa madamo nga lugar direkta nga ginagamit sang mga demonyo ang mga nagapangaswang agod tinguhaan nga pauntaton ang hilikuton sang mga Saksi ni Jehova. Halimbawa, sa isa ka minuro sa Suriname, ang mga nagapamatok sa mga Saksi ni Jehova nagdangop sa isa ka kilala nga espiritista nga nagapahanabo sang hinali nga kamatayon sang mga tawo paagi lamang sa pagtudlo sa ila sang iya tanhaga nga sungkod. Kaupod sang iya mga manugsaot kag mga manugpatunog sang tambor, ang espiritista, nga ginsudlan sang demonyo, nag-atubang sa mga Saksi ni Jehova. Ginbungat niya ang iya tanhaga nga mga hambal kag gintudlo sa ila ang iya sungkod. Ginapaabot sang mga taga-minuro nga mapatay ang mga Saksi, apang ang espiritista amo ang nalipong kag gilayon nga ginpauli sang iya nahuy-an nga mga sumalakdag.

21. Kaangay sang kaadlawan ni Noe, ano ang reaksion sang kalabanan nga tawo sa aton pagbantala, kag ngaa?

²¹ Bisan sa mga lugar diin indi ginahimo sing dayag ang pagdiwatahan kag pangaswang, naeksperiensiahan sang mga Saksi ang magbantala sa mga tawo nga masako gid katama sa adlaw-adlaw nga pagkabuhi sa bagay nga indi nila luyag disturbuhon. Kaangay sang panahon ni Noe, ang kalabanan ‘wala nagasapak.’ (Mateo 24:​37-39) Mahimo nga ginadayaw sang iban ang aton paghiusa kag hinimuan. Apang ang aton espirituwal nga pagpatindog nga hilikuton​—⁠nga nagadalahig sang inoras nga personal nga pagtuon, regular nga pagtambong sa miting, kag pag-alagad sa latagon​—⁠tanan kabuangan sa ila. Ginayaguta nila ang aton pagsalig sa mga saad sang Pulong sang Dios bangod ang ila kabuhi nasentro sa materyal nga mga pagkabutang kag mga kalipayan sa unod nga ginatigayon nila karon.

22, 23. Paano ang mga hitabo sang kaadlawan ni Noe nagahatag sing pasalig nga luwason ni Jehova ang mga tawo nga may diosnon nga debosyon sa pagsulay?

²² Wala bala sing katapusan ang pag-abuso sang mga wala nagahigugma sa Dios sa matutom nga mga alagad ni Jehova? Indi gid! Ano ang natabo sadto anay sang kaadlawan ni Noe? Sa sugo sang Dios, si Noe kag ang iya panimalay nagsulod sa natapos na nga arka. Nian, sa tion nga gintalana sang Dios, “nabulwang ang tanan nga mga tuburan sang daku nga kadadalman kag ang mga talambuan sang langit nabuksan.” Ang Anaw nagpadayon tubtob nga natabunan bisan ang mga bukid. (Genesis 7:​11, 17-20) Ang mga anghel nga nagbiya sang ila nagakaigo nga puluy-an napilitan sa pagbilin sang ila nagmateryalisar nga tawhanon nga lawas kag nagbalik sa espirituhanon nga duog. Ang Nefilim kag ang tanan nga iban pa sadtong kalibutan sang didiosnon nga mga tawo, lakip yadtong wala nagsapak sa paandam ni Noe, ginlaglag. Sa pihak nga bahin, si Noe kag ang iya asawa kag ang ila tatlo ka anak nga lalaki kag mga umagad naluwas. Busa, ginluwas ni Jehova si Noe kag ang iya panimalay gikan sa pagtilaw nga ginbatas nila sing matutom sa sulod sang madamong tinuig.

²³ Himuon man bala ina ni Jehova sa mga tawo nga may diosnon nga debosyon karon? Wala gid sing duhaduha sa sina. Ginsaad niya ina, kag indi sia mahimo magbutig.​—⁠Tito 1:​2; 2 Pedro 3:​5-7.

[Footnote]

Madumduman Mo Bala?

◻ Paano ginapakita ni Pedro nga si Jehova nakahibalo magluwas sang mga tawo nga may diosnon nga debosyon sa pagsulay?

◻ Ano nga mga butang ang nag-amot sa kasingki sang kaadlawan ni Noe?

◻ Bangod sang nagapakari nga tugob-globo nga Anaw, ano ang responsabilidad ni Noe?

◻ Anong kaanggid sang kaadlawan ni Noe ang makita naton sa aton tion?

[Piktyur sa pahina 12]

Ang pagpatindog sing arka nagkinahanglan sing tinuig nga lakas nga pangabudlay

[Piktyur sa pahina 13]

Si Noe naghinguyang sing tion sa pagpabakud sa espirituwalidad sang iya panimalay