Madumduman Mo Bala?

May mapuslanon nga balor bala para sa imo ang ulihi nga mga guwa sang Ang Lalantawan? Nian ngaa indi pagtilawan ang imo memorya paagi sa masunod?

◻ Ano ang dapat naton himuon agod makita naton ang paghiusa kag paghidait sang mga tawo sang tanan nga rasa nga ginlaragway sa Isaias 2:​4?

Una, dapat naton kilalahon nga ang aton Manunuga, si Jehova, may kinamatarong sa pagtudlo sa aton “nahanungod sang iya mga dalanon.” Ikaduha, dapat nga may hanuot kita nga handum sa pagtuman sang kasuguan sang Dios paagi sa pagsiling: “Magalakat kita sa iya mga banas.” (Isaias 2:​2, 3)​—⁠12/15, pahina 5, 6.

◻ Ngaa ang mga Saksi ni Jehova wala nagaluya ang buot kag nagakasubo bangod sa bug-os kalibutan nga dumot kag pagpamatok?

Gintagna ni Jesus nga ang pagpamatok kag dumot mangin nagapakilala nga tanda sang matuod nga mga sumilimba. (Juan 15:​20, 21; 2 Timoteo 3:12) Gani ang mga manugbantala sang maayong balita ginapasalig nga sila may kahamuot sang Dios. Dugang pa, ang mga Saksi ni Jehova nakahibalo nga sila may pagsakdag sang Labing Mataas nga Dios, si Jehova.​—⁠1/1, pahina 12.

◻ Ano ang pila sa sadsaran nga mga kinahanglan himuon naton agod masabat ang aton mga pangamuyo?

Dapat kita magtuo sing hanuot nga ang Dios nagaluntad. Dapat naton “sia pangitaon sing hanuot,” nagasalig nga padyaan niya ang mga nagahimo sini. (Hebreo 11:6) Subong man, dapat kita magpalapit kay Jehova paagi kay Jesucristo kag sa iya lamang. (Juan 14:​6, 14)​—⁠1/15, pahina 4, 6.

◻ Ano ang “diosnon nga debosyon”? (1 Timoteo 3:16)

Ang diosnon nga debosyon amo ang pagtahod, pagsimba, kag pag-alagad sa Dios, upod ang katutom sa iya bug-os uniberso nga pagkasoberano.​—⁠1/15, pahina 11.

◻ Sin-o ang “tawo nga malinapason” nga ginahambal ni Pablo sa 2 Tesalonica 2:​3?

Si Pablo wala nagapatuhoy sa isa ka indibiduwal, kay nagsiling sia nga ini nga “tawo” nakita sang kaadlawan ni Pablo kag padayon nga magaluntad tubtob laglagon sia ni Jehova sa katapusan sining sistema. Gani, ang “tawo nga malinapason” isa ka simbuliko nga ekspresyon. Ginapakita sang ebidensia nga sia ang hubon sang bugalon, ambisyuso nga mga klerigo sang Cristiandad, nga sa sulod sang mga siglo nagpahamtang sang ila kaugalingon subong kasuguan.​—⁠2/1, pahina 11.

◻ Paano madula ang kakagod?

Ang kakagod sa mga tawo sarang lamang madula paagi sa nagakaigo nga edukasyon kag paghanas, nga ginasunod ang estrikto nga kasuguan, ukon sulundan sang pagginawi. Ina nga edukasyon dapat nga maghalin sa isa mismo nga hilway sa kakagod. Ang Dios lamang sa langit ang makahatag sini nga sahi sang edukasyon, kag masapwan ini sa iya nasulat nga tolon-an, ang Balaan nga Biblia.​—⁠2/15, pahina 5.

◻ Agod ang personal nga pagtuon sang Biblia magaresulta sa pagpalambo sing diosnon nga debosyon, ano ang dapat ilakip sa pagtuon?

Ang katuyuan sang personal nga pagtuon indi lamang ang pagtuptop sa mga pahina sang materyal kag busa nagapuno sang hunahuna sing impormasyon. Sa baylo, kon ang isa ka bahin sang Pulong sang Dios ginabasa, dapat maghinguyang sing tion sa pagbinagbinag sa materyal agod hibaluon kon ano ang ginatudlo sini nahanungod sa mga kinaiya kag mga dalanon ni Jehova agod ang estudyante mangin labi nga kaangay ni Jehova sa sining mga bahin.​—⁠3/1, pahina 13.

◻ Ngaa ang personal nga pagtuon sang Biblia dapat maglakip sang regular nga pagbasa sang Ebanghelyo nga kasaysayan kay Jesus?

Ang halimbawa ni Jesus nagabulig sa aton sa pagpalambo sing diosnon nga debosyon. Kilala sing mas maayo ni Jesus ang iya Amay sang sa kay bisan sin-o, gani sarang niya mailog sing suod ang mga dalanon kag mga kinaiya ni Jehova. Gani, nagpahamtang sia para sa aton sing himpit nga halimbawa sang diosnon nga debosyon. (Juan 1:​18; 14:​9; Roma 13:14)​—⁠3/1, pahina 18.

◻ Sa ilustrasyon ni Jesus nahanungod sa mga talanton, ano ang kahulugan sang pagpatikang sa mga talanton? (Mateo 25:​19-23)

Ang pagpatikang sa mga talanton nagakahulugan sang pagpanghikot sing matutom subong mga embahador sang Dios, paghimo sing mga disipulo, kag paghatag sing espirituwal nga mga kamatuoran sa panimalay sang Dios. (Mateo 24:​45; 28:​19, 20; 2 Corinto 5:20)​—⁠3/15, pahina 13.

◻ Sa anong tatlo ka bahin ang Biblia pinasahi kon ipaanggid sa tanan iban pa nga ginhalinan sang laygay?

Una, ang laygay sini pirme nga mapuslanon. (Salmo 93:5) Ikaduha, ang Biblia nakasalbar sa pagtilaw sang tion. (Isaias 40:​8; 1 Pedro 1:25) Ikatlo, ang kasangkaron sang laygay sang Biblia indi matupungan. Bisan ano man kadaku nga problema ukon desisyon ang aton ginaatubang, may kaalam sa Biblia nga makabulig.​—⁠4/1, pahina 13.

◻ Ano ang duha ka pamatuod nga nagapakita nga ang Biblia amo ang Pulong sang Dios, indi sang tawo?

Ang dimapaanggiran nga kaalam sang Biblia kag ang iya ikasarang sa pagbalhin sang mga tawo. (Hulubaton 2:​1, 5, 6; Hebreo 4:12)​—⁠4/1, pahina 21.