Ang Kabuhi kag Ministeryo ni Jesus

Kon Magkari si Cristo nga May Gahom sa Ginharian

KAUPOD gihapon ni Jesus ang iya mga apostoles sa Bukid sang Olivo. Bilang sabat sa ila pangabay para sa tanda sang iya presensia kag sang konklusion sang sistema sang mga butang, ginasugid niya karon sa ila ang katapusan sa serye sang tatlo ka ilustrasyon. “Kon magkari ang Anak sang tawo sa iya himaya, kag ang tanan nga anghel kaupod niya,” umpisa ni Jesus, “nian magalingkod sia sa iya mahimayaon nga trono.”

Indi makita sang mga tawo ang mga anghel sa ila langitnon nga himaya. Gani ang pagkari sang Anak sang tawo, nga si Jesucristo, kaupod sang mga anghel dikitaon sa tawhanon nga mga mata. Ang pagkari nag-abot sang tuig 1914. Apang para sa anong katuyuan? Si Jesus nagapaathag: “Kag tipunon sa atubangan niya ang tanan nga pungsod, kag painpainon siya sila subong sang manugbantay nga nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa wala.”

Nagalaragway sa kon ano ang matabo sa mga ginpain pakadto sa kalahamut-an nga bahin, si Jesus nagsiling: “Nian ang hari magasiling sa mga natuo niya, ‘Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.’ ” Ang mga karnero indi magagahom kaupod ni Cristo sa langit kundi magapanubli sang Ginharian sa kahulugan nga mangin mga sakop niya sa duta. Ang “pagtukod sang kalibutan” natabo sang si Adan kag si Eva una nga nagpanganak sing mga anak nga mahimo makabenepisyo gikan sa aman sang Dios nga tubson ang katawhan.

Apang ngaa ang mga karnero ginpain pakadto sa kalahamut-an natuo nga kamot sang Hari? “Kay gingutom ako,” sabat sang hari, “kag ginpakaon ako ninyo; gin-uhaw ako kag ginpainum ako ninyo. Nagdumuluong ako kag ginsagup ako ninyo; hubo ako, kag ginpapanaptan ako ­ninyo. Nagmasakit ako kag ginduaw ako ninyo. Nabilanggo ako kag nagkari kamo sa akon.”

Bangod ang mga karnero yari sa duta, luyag nila mahibaluan kon paano nila nahimo inang maayo nga mga buhat para sa ila langitnon nga Hari. “Ginuo, san-o ka bala namon makita nga gutom kag ginpakaon ka namon,” pamangkot nila, “ukon nauhaw, kag ginpainum ka namon? San-o ka bala namon makita nga dumuluong kag ginsagup ka namon, ukon hubo, kag ginpapanaptan ka namon? San-o ka bala namon makita nga nagmasakit ukon sa bilanggoan kag nagkadto kami sa inyo?”

“Sa pagkamatuod nagasiling ako sa inyo,” sabat sang Hari, “sa bagay nga ginhimo ninyo ini sa isa sang labing kubos sining akon mga utod, ginhimo ini ninyo sa akon.” Ang mga kauturan ni Cristo amo ang nagkalabilin sa duta sang 144,000 nga magagahom kaupod niya sa langit. Kag ang paghimo sing maayo sa ila, siling ni Jesus, pareho sang paghimo sing maayo sa iya.

Masunod, ginsilingan sang Hari ang mga kanding. “Palayo kamo sa akon, mga ginpakamalaut, pa kalayo nga walay katapusan nga gin-aman sa Yawa kag sa iya mga anghel. Kay gingutom ako kag wala ninyo ako pagpakan-a, gin-uhaw ako, kag wala ninyo ako pagpaimna. Kag nagdumuluong ako, kag wala ninyo ako pagsagupa; hubo, kag wala ninyo ako pagpapanaputi; nagmasakit kag sa bilanggoan, kag wala ninyo ako pagduawa.”

Apang, ang mga kanding nagreklamo: “Ginuo, san-o ka bala namon makita nga gutom ukon nauhaw ukon dumuluong ukon hubo ukon nagmasakit ukon sa bilanggoan kag wala kami mag-alagad sa imo?” Ang mga kanding ginhukman sing malain sa sadsaran man nga ang mga karnero ginhukman sing kalahamut-an. “Sa bagay nga wala ninyo paghimua ini sa isa sang labing kubos sini [sang akon mga kauturan],” sabat ni Jesus, “wala man ninyo paghimua ini sa akon.”

Gani ang presensia ni Cristo nga may gahom sa Ginharian, antes gid sang katapusan sining malaut nga sistema sang mga butang sa dakung kapipit-an, mangin tion sang paghukom. Ang mga kanding “magakadto sa silot nga walay katapusan, apang ang mga matarong [mga karnero] sa kabuhi nga walay katapusan.” Mateo 25:​31-46; Bugna 14:​1-3.

◆ Ngaa ang presensia ni Cristo mangin dikitaon, kag ano nga hilikuton ang ginahimo niya sina nga tion?

◆ Sa anong kahulugan ang mga karnero magapanubli sang Ginharian?

◆ San-o natabo ang “pagtukod sang kalibutan,” kag ngaa sadto?

◆ Sa anong sadsaran ginahukman ang mga tawo nga mga karnero ukon mga kanding?