Maghulag Dayon sa “Tanda”!

“Padayon kamo nga magmata, kay wala kamo makahibalo sang adlaw ukon sang —25:13, Byington.

1. Ngaa indi maalamon nga mangin kaangay sang buangbuang nga mga ulay sa parabola ni Jesus?

SA KAPAWA sang nagapakari nga bulawanon nga dag-on para sa kalibutan sang gingawad nga katawhan, daw ano ka dimaalamon nga mangin kaangay sang lima ka buangbuang nga mga ulay sa parabola ni Jesus! Naghulag sila sing tuman na kaulihi kag wala makasulod sa “ginharian sang mga langit.” Yadtong mga buangbuang wala maghulag subong mga manugsuga sa kinahanglanon nga tion. (Mateo 25:1-12) Sang “ining maayong balita sang ginharian” ginbantala sa “bug-os napuy-an nga duta subong nga panaksi” kag ang “katapusan” nag-abot, nawasi nila ang ila kahigayunan nga makigbahin sa sinang indi na maliwat pa nga pribilehiyo sang pag-alagad.—Mateo 24:14.

2, 3. (a) Paagi sa anong laygay ginhinakpan ni Jesus ang parabola tuhoy sa napulo ka mga ulay? (b) Ngaa ina nga laygay suno sa panahon gihapon, kag busa ano ang dapat pirme nga isuplay sa ‘mainandamon nga ulay’ nga klase?

² Amo ina kon ngaa ginhinakpan ni Jesucristo ang iya parabola paagi sa sining laygay: “Busa, padayon sa pagbantay, kay wala kamo makahibalo sang adlaw ukon sang takna.”—Mateo 25:1-13.

³ Yadtong mga pinamulong sang Nobyo nga si Jesucristo tuman ka suno sa panahon, labi na karon, 71 ka tuig pasulod sa sining “konklusion sang sistema sang mga butang.” Bisan sa sining talipusposan nga petsa ang nagkalabilin sang ‘mainandamon nga ulay’ nga klase wala makahibalo sang adlaw ukon sang takna nga ang “ganhaan” pagatakpan agod ipadayon ang kahigayunan nga makasulod sa langitnon nga Ginharian sang Nobyo nga sa iya nakagon sila. Nagakaigo pirme sa mga nagatinguha nga pamatod-an ang ila kaugalingon nga mainandamon nga mga ulay nga suplayan pirme sing espirituwal nga lana. Sa paghimu sina, ila ginapaiwag ang kapawa paagi sa pagpalapnag ‘sining maayong balita sang ginharian’ para sa bug-os duta, internasyonal nga panaksi tubtob magaabot ang “katapusan.”—Mateo 24:14; Marcos 13:10; Bugna 14:6, 7.

“Mga Karnero” kag “mga Kanding” Ginapainpain Karon

4. Suno sa kasaysayan ni Mateo, anong katapusan nga parabola ni Jesus ang dapat pagatumanon subong bahin sang “tanda” sang Iya “presensia”?

⁴ Antes magaabot ang “katapusan” sa “konklusion sang sistema sang mga butang,” ang isa pa ka hilikuton sang pagpainpain sa mga tawo dapat mahanabo kag magaalagad subong bahin sang “tanda” nga nagapakita nga yari na kita sa “panag-on sang katapusan.” (Daniel 12:4) Amo ini ang katumanan sang parabola ni Jesus tuhoy sa mga karnero kag mga kanding, nga sa diin ginhinakpan ni Mateo ang iya kasaysayan tuhoy sa dakung tagna ni Cristo nahanungod sa “tanda” sang Iya dimakita nga “presensia” kag sang “konklusion sang sistema sang mga butang.”

5. San-o natabo ang pagpainpain sa mga tawo kaangay sang mga karnero kag mga kanding?

⁵ Talupangda karon kon ano ang gintagna ni Jesus nahanungod sini, subong nga narekord sa Mateo 25:31-46. Ginsugdan niya ang parabola paagi sa pagsiling: “Kon magkari ang Anak sang tawo sa iya himaya, kag ang tanan nga mga manugtonda kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod, kag painpainon niya, subong sang manugbantay nga nagapainpain sang mga karnero sa mga kanding. Kag ipahamtang niya ang mga karnero sa iya tuo, kag ang mga kanding sa wala.” Ano ang masunod? Si Jesus nagpadayon:

6. Ano ang ginasiling sang Manugbantay-Hari sa mga tawo sa iya tuo?

⁶ “Nian ang hari magasiling sa mga natuo, ‘Kari kamo, mga ginpakamaayo sang akon Amay, panublia ninyo ang ginharian nga ginaaman sa inyo kutob pa sa pagtukod sang kalibutan. Kay gingutom ako kag ginpakaon ninyo ako; gin-uhaw ako kag ginpainum ako ninyo. Nagdumuluong ako kag ginsagop ninyo ako; hubo ako kag ginpapanaptan ako ninyo. Nagmasakit ako kag ginduaw ako ninyo. Nabilanggo ako kag nagkari kamo sa akon.’

7. Ano nga pamangkot ang ipakiana sang matarong, katulad-karnero nga mga tawo, kag paano magasabat ang Hari?

⁷ “Nian ang mga matarong magasabat sa iya, ‘Ginuo, san-o ka bala namon nakita nga gutom kag ginpakaon ka namon, ukon nauhaw, kag ginpainum ka namon? Kag san-o ka bala namon nakita nga dumuluong kag ginsagop ka namon, ukon hubo, kag ginpapanaptan ka namon? Kag san-o ka bala namon nakita nga nagmasakit ukon sa bilanggoan kag nagkadto kami sa imo?’ Kag ang hari magasabat sa ila, ‘Sa pagkamatuod nagasiling ako sa inyo, Sa bagay nga ginhimu ninyo ini sa isa sang akon labing kubos sang akon mga utod, ginhimu ninyo sa akon.’”

8. (a) Ang katulad-kanding nga mga tawo wala gilayon maghulag sa paghimu sing ano? (b) Gani diin sila dalhon sang Hari kabaliskaran sa matarong, katulad-karnero?

⁸ Ang “mga kanding” wala maghulag dayon sa “tanda.” Wala nila paghimua ang mga butang nga ginbutang sang “mga karnero” nga klase. Busa aton mabasa: “Nian magasiling sia sa mga nawala, ‘Palayo kamo sa akon, mga ginpakamalaut, pa kalayo nga walay katapusan nga gin-aman sa Yawa kag sa iya mga manugtonda. Kag gingutom ako kag wala ninyo ako pagpakan-a, gin-uhaw ako kag wala ninyo ako pagpaimna. Nagdumuluong ako, kag wala ninyo ako pagsagupa; hubo, kag wala ninyo ako pagpapanaputi; masakiton sa bilanggoan, kag wala ninyo ako pagduawa.’ Nian magasabat man sila, ‘Ginuo, san-o ka bala namon makita nga gutom ukon nauhaw ukon dumuluong ukon hubo ukon nagmasakit ukon sa bilanggoan kag wala kami mag-alagad sa imo?’ Nian magasabat sia sa ila, ‘Sa pagkamatuod nagasiling ako sa inyo, Sa bagay nga wala ninyo ini paghimua sa isa sang labing kubos sini sa ila, wala man ninyo paghimua ini sa akon.’ Kag ini sila magakadto sa silot nga walay katapusan, apang ang mga matarong sa kabuhi nga walay katapusan.”

9. Bangod sang paghimu sang ano sa karon nga katumanan sang parabola ni Jesus nahanungod sa “mga karnero” kag “mga kanding” nga ikaw magmalipayon?

⁹ Mahimu nga nagapakigbahin ikaw sa katumanan sining matagnaon nga ilustrasyon. Natalupangdan mo bala ang maayong mga butang nga ginsambit ni Jesus? Nahimu mo bala ina nga mga butang sa iya “mga kautoran”? Malipayon ikaw kon naghulag ka subong sang ginhimu sang “mga karnero” sa ila!

10. Paano ginpatuhay ni Jesus ang iya “mga kautoran” kag yadtong ginalaragway sang “mga karnero” kag “mga kanding,” kag ano nga sadsaran ang yari sa Biblia para sa sini?

¹⁰ Ginpatuhay ni Jesus ang iya espirituwal nga “mga kautoran” kag yadtong napamatod-an nga mangin kaangay sang mga karnero ukon mga kanding. Sa panahon sang katumanan sining parabola, ang iya “mga kautoran” amo yadtong nagailog sa iya paagi sa bug-os nga pagtugyan sang ila kaugalingon sa Dios. Kaangay ni Jesus, naghatag sila sing dayag nga pamatuod sini paagi sa pagpabawtismo sa tubig. Dugang pa, si Jehova, ang Amay sang Hari nga si Jesucristo, nangin ang ila langitnon nga Amay paagi sa pag-anak sa ila paagi sa iya balaan nga espiritu kag busa nagahimu sa ila nga espirituwal nga “mga kautoran” sang iya Anak. Ginbutang sila sini sa isa ka duog sa langitnon nga Ginharian upod sa ila Magulang nga Utod, nga si Jesucristo, ang “Hari sang mga hari kag Ginuo sang mga ginuo.” (Bugna 19:16) May kahilabtanan sa sini amo sini ang ginsulat nahanungod sa iya: “Kay sia nga nagapakabalaan kag sila nga mga ginpakabalaan tanan naggikan sa isa, kag sa sining kabangdanan wala sia mahuya sa pagtawag sa ila nga ‘mga kautoran,’ nga nagasiling: ‘Ibantala ko ang imo ngalan sa akon mga kautoran; sa tunga sang katilingban dayawon ko ikaw.’” (Hebreo 2:11, 12) Diri ang Salmo 22:22 gin-aplikar sa ginhimaya nga Anak sang Dios, si Jesucristo.

11. Madamu pa bala sang espirituwal nga “mga kautoran” ni Jesus sa duta karon, kag ano nga klase, ukon “kongregasyon,” ang ila ginahuman?

¹¹ May yara pa nagkalabilin sadtong espirituwal nga “mga kautoran” sang nagagahom nga si Hari Jesucristo sa duta. Subong isa ka klase, ukon “kongregasyon,” ginahuman nila ang “matutom kag mainandamon nga ulipon nga klase” nga gintagna ni Jesus sa iya tagna sa “konklusion sang sistema sang mga butang.” Nagsiling sia: “Sin-o bala nian ang matutom kag mainamdamon nga ulipon nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion? Malipayon yadtong ulipon nga kon mag-abot ang iya agalon masapwan sia nga nagahimu sing subong. Sa pagkamatuod nagasiling ako sa inyo, Padumalahon sia niya sa tanan niya nga pagkabutang.”—Mateo 24:45-47.

12. (a) Kutob sang 1919 ang “ulipon” nga klase talalupangdon sa paghimu sing ano? (b) Sa ano nga “pagkabutang” gintugyanan ang “ulipon”? (c) Ang “ulipon” nga nagapanghikot karon bahin sang ano?

¹² Ang maragtason nga mga katunayan nagasabat sa pamangkot ni Jesus nahanungod sa pagkilala sa sining “ulipon.” Ang “kongregasyon” nga nagaalagad subong ang “ulipon” ginahuman sang iya hatag-Dios nga “mga kautoran” nga yari pa sa duta. Amo man ini ang ‘mainandamon nga ulay’ nga klase. Kutob sang 1919 ining “ulipon” talalupangdon sa paghatag sing preska espirituwal nga pagkaon gikan sa Biblia sa “mga panimalay” sang panimalay sang Dios, nagahimu sini sa panahon nga labi nga “nagakaigo” para sa sini. Busa, gintangdoan sang dimakita nga Agalon ining masaligan nga “ulipon” nga klase sang “tanan niya nga pagkabutang” nga espirituwal nga sahi. Labi na gid nga amo sini may kahilabtanan sa pagbantala ‘sining maayong balita sang ginharian’ sa bug-os nga duta, nga sa sini sia nagagahom. Tubtob karon ining pagpanaksi sa Ginharian nag-uswag! Ang “matutom kag mainamdamon nga ulipon” nga nagapanghikot amo ang isa ka kilala nga bahin sang “tanda” nga nagapakita kon sa ano na kita nga tion.

13. Kutob san-o ang “tanan nga pungsod” gintipon sa atubangan sang Hari, kag san-o ang “ulipon” nagsugod sa pagtipon sa “mga karnero” sa Iya natuo?

¹³ Sa mga katapo sang “ulipon” nga klase nga ang matarong nga “mga karnero” naghimu sing maayong mga butang. Ang simbuliko nga mga karnero kag mga kanding amo ang mga tawo sa tanan nga kapungsoran nga sa ila ang pagpanaksi sa Ginharian ginahatag karon. Busa, subong ginarepresentar sadtong mga karnero kag mga kanding, ang “tanan nga mga pungsod” gintipon sa atubangan sang Hari nga nagalingkod sa iya langitnon nga trono kutob sang magtakop ang Panag-on sang mga Gentil sang 1914. Nahisuno sa sining gintagna nga pagtipon, ang talalupangdon amo ang tuig 1935. Ang ­Watch Tow­er Bi­ble and ­Tract So­ci­ety, nga ginagamit sang “ulipon” nga klase, sadto anay may 49 ka sanga talatapan sa bug-os nga duta. Sadtong mga tuig, ang igtalupangod sang “ulipon” espesipiko nga ginpatuhoy sa dutan-on nga mga katulad karnero, upod ang pagtamod nga tipunon sila sa natuo nga bahin sang nagagahom nga si Hari Jesucristo. Sa amo, sila nga naghalin sa tanan nga mga pungsod nakig-upod sing suod sa “ulipon” nga klase.

14. Sa kapawa sang Juan 10:16, anong bag-o nga pagtamod ang ginkuha tuhoy sa matarong, katulad-karnero, kag pila ka sanga talatapan sang ­Watch Tow­er So­ci­ety ang nagaalagad karon sa ila?

¹⁴ Yadtong matarong, mga katulad-karnero indi na kinahanglan nga pagahatagan sing masangkad nga kabilogan nga pagkilala subong “mga tawo nga maayo sing kabubut-on.” (Lucas 2:14, ­Douay Ver­sion) Indi na sila pagatamdon subong indi pat-od, indi organisado nga klase sang mahinadlukon sa Dios nga mga tawo sang tanan nga pungsod—nadula nga mga karnero, kon hambalon pa. Si Jesus nagsiling nga tipunon niya ang “iban nga mga karnero” kag himuon sila nga “isa ka panong” upod sa nagkalabilin sang “ulipon” nga klase. (Juan 10:16) Ang pagtipon sa sinang “iban nga mga karnero” kutob sadto isa ka talalupangdon nga “tanda” nga nagatanda sang “konklusion sang sistema sang mga butang.” Kag agod alagaran sila ang ­Watch Tow­er So­ci­ety may yara na karon 95 ka sanga talatapan.

Suno sa Panahon nga Paghulag sa “Tanda” Ginpadyaan

15. Agod ‘panublion ang ginharian,’ ano nga mga kinahanglanon ang dapat himuon sang “mga karnero”?

¹⁵ Suno sa parabola ni Jesus, ang matarong nga “mga karnero” magahimu sang pila ka mga kinahanglanon sa “konklusion sang sistema sang mga butang.” Dapat nila batunon kag kilalahon ang espirituwal nga “mga kautoran” ni Cristo nga nagahuman sa “matutom kag mainandamon nga ulipon” nga klase. Ang “mga karnero” dapat man maghimu sing maayong mga butang sa “ulipon” nga klase, nagaduaw sa ila kon sila dimakatarunganon nga ginbilanggo. Dapat ini himuon sang “mga karnero” agod agumon ang pagpakamaayo sang langitnon nga Amay kag agod agdahon sila ni Hari Jesucristo nga ‘panublion ang Ginharian nga ginhanda sa [ila] kutob sa pagtukod sang kalibutan.’—Mateo 25:34.

16. Paagi sa pinamulong nga “panublia ang ginharian,” ginaagda sang Hari ang “mga karnero” nga magsulod sa ano, kag makalampuwas sa anong “inaway”?

¹⁶ Sanglit ining “mga karnero” indi espirituwal nga “mga kautoran” sang Hari, wala niya sila pag-agdaha nga maglingkod sa langitnon nga mga trono kag maggahom kaupod niya sa pinasahi nga isa ka libo ka tuig sang iya paggahom. Paagi sa ginsiling nga “panublia ang ginharian,” gin-agda niya sila nga magsulod sa dag-on sang Ginharian sa tapos niya malaglag ang tanan didiosnon nga mga ginharian sining kalibutan sa “inaway sang dakung adlaw sang Dios nga Labing Gamhanan” sa Har-Magedon. (Bugna 16:13-16) Madamu sang mga katulad-karnero nga nagakabuhi karon ang makalampuwas sa sinang inaway sang tanan nga mga inaway kag magasulod sa Isa ka Libo ka Tuig nga Paggahom ni Cristo nga indi na mapatay.

17. Paano nakighambal ang Hari sa “mga karnero,” kag paano sia nakatigayon sing pila ka butang nga itugyan sa ila?

¹⁷ Busa si Hari Jesucristo nagahambal sa sining “mga karnero” subong iya mga anak nga ang tion nagkari na sa pagsulod sa isa ka panublion gikan sa iya. Paagi sa iya kamatayon subong himpit nga tawo nga mag-aman sing halad nga gawad sa tanan nga katawhan, ginbayaan niya ang tanan nga paglaum nga personal nga magkalipay sa dutan-on nga Paraiso. (Lucas 23:39-43) Sa sini nga bahin si Jesus, “ang katapusan nga Adan,” indi kaangay sa “nahauna nga Adan,” nga nagpakasala kag nagdula sang dutan-on nga Paraiso para sa iya mga kaanakan. Busa ang ginbanhaw nga si Jesucristo, nga nangin ang “Dayon nga Amay” sang tanan gingawad nga katawhan may butang nga mahatag sa sining mga katulad karnero sa duta. (1 Corinto 15:45; Isaias 9:6, 7) Ang tawhanon nga panimalay ginpasad sa “nahauna nga Adan,” upod ang tanan niya nga paglaum kag kahigayunan sa Paraiso. Apang inang nadula nga Paraiso ipasag-uli paagi sa Ginharian sang Dios sa mga kamut sang “katapusan nga Adan,” si Jesucristo.

18. Sa ano nga kahulugan ang sakop sang Ginharian “ginhanda sa [mga karnero] kutob sa pagtukod sang kalibutan”?

¹⁸ Pagkatapos lamang nga sila gintabog sa nahauna nga Paraiso, nga sanday Adan kag Eva nanganak. Ang ila ikaduha nga anak, ang matarong nga si Abel, ginpatay sang ila panganay nga anak, si Cain. Gani ang ila anak nga si Set amo ang gintamod nga nagkuha sang lugar ni Abel. Sang matawo ina nga anak, ang kalibutan sang katawhan ginpasad. Apang antes sini, sang ang ginikanan sang bug-os nga katawhan gintabog sa Paraiso, si Jehova nga Dios naghimu sang iya maluluy-on nga saad nahanungod sa “binhi” nga magasamad, ukon magadugmok, sa ulo sang simbuliko nga Man-ug, si Satanas nga Yawa. Ina nga “binhi” amo ang harianon nga Binhi, kag nagadalahig ini sa Ginharian, suno sa katuyoan kag palanan-awon sang Dios. (Genesis 3:15) Busa, kon si Satanas nga Man-ug kag ang iya binhi ginpauntat na sa pagpanghikot, ang gingawad nga katawhan magasulod sa sakop sang Ginharian sa duta, sa idalom sang langitanon nga pangulohan sang madaugon nga Binhi nga nagadugmok sa Man-ug kag sa iya binhi. Sa sining paagi ang “ginharian” nga ‘panublion’ sang mga katulad-karnero gikan sa ila Dayon nga Amay, si Jesucristo, amo ang duog sang Ginharian nga “ginhanda sa [ila] kutob sa pagtukod sang kalibutan.”

19. Ano nga sahi sang pamuno ang iya sang pagkatapos sang Armagedon nga sistema sang mga butang sa duta?

¹⁹ Sanglit ang simbuliko nga mga kanding pagautdon pakadto sa kalaglagan sa Armagedon, ang makalampuwas nga “mga karnero” magahatag sing matarong nga panumo sa pagkatapos sang Armagedon nga sistema sang mga butang sang Paraiso nga duta. Nahanungod sini, si Jesus nagsiling: “Ini sila [ang mga katulad-kanding] magakadto sa silot nga walay katapusan, apang ang mga matarong sa kabuhi nga walay katapusan.”—Mateo 25:46.

20. Paano naton malikawan nga mapatpat sing sayop ang mga bahin sang “tanda”?

²⁰ Sa sining “konklusion sang sistema sang mga butang” kutob sang pagtakop sang Panag-on sang mga Gentil sang 1914, ang “mga karnero” kag ang “mga kanding” magkatuhay sa kon paano nila ginpatpat ang “tanda” sang “presensia” ni Jesus. Sanglit walay duhaduha nga yari na kita sa panahon sang paghukom, ining pamangkot importante nga kabalak-an: Ano ang kahulugan sa aton sang “tanda”? Kon itugyan sa aton kaugalingon nga paghukom, mahimu nga patpaton naton sing sayop ang bahin sina nga “tanda.” Gani mas maayo nga mamangkot kita: Ano ang ginasiling ni Jesucristo nga ipakita sa aton sang grupo nga “tanda”? Suno sa iya, magakahulugan ini nga ang karon nga sistema sang mga butang matapos sa dili madugay sa “dakung kapipit-an” nga mas malaglagon sang sa tugob-globo nga Anaw sang adlaw ni Noe.—Mateo 24:21.

21. (a) Bisan pa nga ang “dakung kapipit-an” yara sa unahan, ngaa dapat kita magkalipay? (b) Ano nga kahigayunan kag posibilidad ang yara sa “mga karnero” nga klase karon?

²¹ Apang, magkasadya, kay ining “tanda” nagakahulugan man nga malapit na ang Milenyal nga Paggahom ni Jesucristo, kag handa nga sugdan pagkatapos laglagon ang sistema sang mga butang ni Satanas sa duta. (Lucas 21:28) Busa, sa idalom sang balaan nga pangamlig may yara ikaw hamili nga kahigayunan nga makalampuwas sa sinang “dakung kapipit-an” pasulod sa bag-ong sistema sang mga butang diin ang pagkamatarong magapuyo sing dayon. Sa pagkamatuod, ginabutang sa atubangan mo ang kahigayunan nga indi na mapatay kundi magkabuhi sing dayon kag sing bulahanon sa paraiso nga duta sa idalom sang unibersal nga pagkasoberano ni Jehova nga Dios!

22. (a) Kon maghulag kita dayon kag sing husto sa “tanda,” ano ang aton himuon? (b) May kahilabtanan sa “tanda,” paano pagabindikahon si Jesus?

²² Kon bala kita espirituwal nga “mga kautoran” ni Cristo ukon matarong nga “mga karnero,” nian, maghulag kita dayon kag sing husto sa “tanda.” Dugang kita nga makigbahin sa kadalag-an sa iya panguna nga bahin: “Ining maayong balita sang ginharian pagaibantala sa bug-os napuy-an nga duta nga panaksi sa tanan nga pungsod.” Nian wala na kita sing dapat ikahadlok kon “ang katapusan” magaabot. Sa baylo, ang aton kalipay magaawas! Nian, subong man, si Jesucristo pagabindikahon subong masaligan nga manugpakot sang madamu sing bahin nga “tanda . . . sang konklusion sang sistema sang mga butang.”—Mateo 24:3–25:46.

Masabat Mo Bala?

◻ San-o ang mga tawo pagapainpainon kaangay sang mga karnero kag mga kanding?

◻ Mangin malipayon ka sa paghimu sing ano sa katumanan sang parabola ni Jesus tuhoy sa mga karnero kag mga kanding?

◻ Sin-o ang ginahuman sang “mga kautoran” kag “matutom kag mainandamon nga ulipon” sang Hari?

◻ Agod ‘mapanubli ang Ginharian,’ ano nga mga kinahanglanon ang dapat nga himuon sang mga katulad-karnero?

◻ Ano ang dapat naton himuon kon kita magahulag dayon kag sing husto sa “tanda” sa “presensia” ni Jesus?

[Kapsion sa pahina 23]

Maghulag dayon sa “tanda” sang “presensia” ni Jesus. Ang paghimu sini nagakahulugan sang dayon nga dayon sa Paraiso

[Laragway sa pahina 20]

Subong nga ang isa ka manugbantay nagapainpain sang mga karnero gikan sa mga kanding, si Jesucristo nagapainpain man sa mga tawo. Ikaw bala katulad-karnero nga tawo?