Nagsangkad nga mga Hilikuton sa Panahon sang Presensia ni Cristo
“Nian ang hari magasiling sa mga natuo niya, ‘Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.’ ”—MATEO 25:34.
1. Sa anong paagi ang pa·rou·siʹa ni Cristo subong sang “mga adlaw ni Noe”?
PRESENSIA ni Cristo—ang madugay na ginahulat nga hitabo! Ang panahon kaangay sang “mga adlaw ni Noe,” nga ginsambit ni Jesus may kaangtanan sa “katapusan sang sistema sang mga butang,” nag-abot sang tuig 1914. (Mateo 24:3, 37) Apang ano ang mangin kahulugan sang presensia, ukon pa·rou·siʹa ni Cristo, para sa hinaplas nga nagkalabilin sang “matutom kag mainandamon nga ulipon”? (Mateo 24:45) Dugang pa sila nga mangin aktibo subong mga manugdala sing kapawa! Dalayawon nga mga butang ang mahanabo! Ang walay tupong nga hilikuton sa pagtipon magasugod na.
2. Anong pagpaninlo ang natabo sa katumanan sang Malaquias 3:1-5?
2 Apang, una anay, ining hinaplas nga mga Cristiano dapat tinluan. Subong gintagna sang Malaquias 3:1-5, si Jehova nga Dios kag ang iya “mensahero sang katipan,” nga si Jesucristo, nagkari sa pag-usisa sang espirituwal nga templo sang tigpamulak sang 1918. Ang paghukom magasugod sa “panimalay sang Dios.” (1 Pedro 4:17) Ang Malaquias 3:3 nagtagna: “Magalingkod sia [Jehova] subong sang manugtunaw kag manug-ulay sang pilak kag putlion niya ang mga anak ni Levi; kag ulayon sila subong sang bulawan kag pilak.” Isa yadto ka panahon sang pag-ulay kag pagtinlo.
3. Ngaa kinahanglanon nga matabo ang espirituwal nga pagpaninlo?
3 Paagi sa sini nga paghukom, nga nagdangat sa talipuspusan sang 1918, ang nagkalabilin sang ulipon nga klase gintinluan gikan sa kalibutanon kag relihioso nga kadagtaan. Ngaa gintinluan sila ni Jehova? Bangod nadalahig ang iya espirituwal nga templo. Amo ini ang tulad-templo nga kahimusan para sa pagsimba kay Jehova pasad sa nagatumbas nga halad ni Jesucristo. Luyag ni Jehova nga ang iya templo mangin matinlo agod nga kon tipunon didto ang kadam-an sang mga sumilimba nga may dutan-on nga paglaum, masapwan nila ang isa ka duog diin ang iya bug-os uniberso nga pagkasoberano ginatahod, diin ang iya balaan nga ngalan ginapakabalaan, kag diin ang iya matarong nga mga kasuguan ginatuman. Sa amo, apresyahon nila si Jehova kag magabuylog sila sa pagpahibalo sang iya dakung mga katuyuan.
Dugang Pa nga mga Pribilehiyo
4, 5. (a) Paano ang pamangkot ni Jesucristo nagahangkat sa tagsatagsa sang ulipon nga klase karon? (b) Sa anong mga paagi hangpon ang mga ekspresyon nga “matutom kag mainandamon nga ulipon” kag “iya panimalay?” (c) Ano ang ginsugo ni Jesus sa ulipon?
4 Sang 1919 ginpaabot sang natinluan nga ulipon nga klase ang nagasangkad nga mga hilikuton. Sadto sang 1914, si Jesucristo, nga ila Agalon, nakabaton sing langitnon nga Ginharian. Sang magbalik sia agod usisaon ang “iya panimalay,” napanaptan sia sing harianon nga kadungganan, nga wala pa niya mapanag-iyahi sang yari sia sa duta. Ano ang nasapwan niya? Masako bala ang ulipon nga klase sa pag-atipan sang mga interes sang Agalon? Subong narekord sa Mateo 24:45-47, namangkot si Jesus sing isa ka pakiana nga naghangkat sa tagsa ka hinaplas nga disipulo nga usisaon ang iya personal nga debosyon sa Mesias ni Jehova: “Sin-o bala nian ang ulipon nga matutom kag mainandamon, nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion? Malipayon yadtong ulipon nga kon mag-abot ang iya agalon masapwan sia nga nagahimo sing subong. Sa pagkamatuod, nagasiling ako sa inyo, nga padumalahon Sia niya sa tanan niya nga pagkabutang.”
5 Sing maathag, ang paglaragway ni Jesus sa sining matutom nga ulipon wala nagabagay sa bisan sin-o nga indibiduwal nga tawo. Wala, apang ginalaragway sini ang matutom nga hinaplas nga kongregasyon ni Cristo sa kabilugan, subong isa ka grupo. Ang panimalay amo ang hinaplas nga mga sumulunod ni Cristo subong mga indibiduwal. Nahibaluan ni Jesus nga baklon niya ining mga hinaplas paagi sa iya dugo, gani nagakaigo nga gintawag niya sila sa kabilugan subong iya ulipon. Ang 1 Corinto 7:23 nagasiling tuhoy sa ila: “Sa kabilyanan ginbakal kamo [nagapatuhoy sa kabilugan]; dili kamo magmangin-ulipon sang mga tawo.” Ginsugo ni Jesus ang iya ulipon nga klase nga pasigahon ang ila kapawa sa pagganyat kag sa paghimo sing iban pa nga mga disipulo kag sa pagpakaon sa iya panimalay sing dalayon paagi sa paghatag sa ila sing espirituwal nga pagkaon sa nagakaigo nga tion.
6. Paano ginpadyaan ang ulipon subong resulta sang pag-usisa ni Jesus?
6 Kutob sang tion nga nagsugod ang presensia ni Cristo kag tubtob sang 1918, ang ulipon nga klase, walay sapayan sang pagkadikilala, paghingabot, kag sang kagumon, nagtinguha sa paghatag sing nagakaigo nga pagkaon sa panimalay. Amo sini ang nasapwan sang Agalon sang magsugod sia sa pag-usisa. Nahamuot si Ginuong Jesus, kag sang 1919 ginpahayag niya nga malipayon yadtong matutom kag nahamut-an nga ulipon nga klase. Ano ang makalilipay nga padya sang ulipon bangod ginhimo niya ang ginpahimo sa iya sang iya Agalon? Isa ka promosyon! Huo, daku pa nga mga salabton ang ginhatag sa pagpauswag sang mga interes sang iya Agalon. Sanglit ang Agalon isa na karon ka langitnon nga Hari, ti, ang iya dutan-on nga mga pagkabutang nangin kapin pa ka hamili.
7, 8. (a) Ano ang ‘tanan nga pagkabutang’ sang Agalon? (b) Ano ang ginkinahanglan sa ulipon sa pagdumala sining mga pagkabutang?
7 Gani, ano ang “tanan niya nga pagkabutang”? Amo ini ang tanan nga espirituwal nga pagkabutang sa duta nga nangin pagkabutang ni Cristo may kaangtanan sa iya awtoridad subong langitnon nga Hari. Pat-od ini nga naglakip sa sugo nga maghimo sing mga disipulo ni Cristo, nga may dungganon nga pribilehiyo sa pagtiglawas sa natukod na nga Ginharian sang Dios sa tanan nga mga pungsod sang kalibutan.
8 Ina nga promosyon sa pagdumala sa tanan nga mga pagkabutang sang Agalon nagkinahanglan sa ulipon nga klase sa paghatag sing kapin nga tion kag igtalupangod sa pagtapos sang hilikuton sang Ginharian kag, huo, sa pagpadaku sang mga pasilidad para sa sina nga hilikuton. Mas daku karon ang uma nga palangabudlayan—ang bug-os napuy-an nga duta.
Pagtipon sa mga Karnero
9. Ano ang resulta sang pagsangkad sang mga hilikuton sang ulipon?
9 Gani, sing matinumanon ginpasangkad sang matutom kag mainandamon nga ulipon nga klase ni Cristo ang ila mga hilikuton. Ang resulta? Ang hingapusan nga mga katapo sang hinaplas nga 144,000 natipon na. Nian ang palanan-awon ni Juan nga narekord sa Bugna 7:9-17 nangin isa ka makakulunyag kag makalilipay nga katunayan. Ilabi na sugod sang 1935 ang ulipon nga klase nagkalipay sa pagsaksi sang dalayon nga pagkatuman sining palanan-awon. Gikan sa bug-os nga duta, isa ka “dakung kadam-an” sang minilyon ang nagapanong karon sa palibot sang espirituwal nga templo ni Jehova subong iya mga sumilimba. Ginsugiran sang anghel ni Jehova si Juan nga wala sing tawo nga makaisip sining dakung kadam-an. Nagakahulugan ina nga wala sing limite ang kadamuon sang mga tawo nga dalhon sang ulipon nga klase sa espirituwal nga templo ni Jehova. Tubtob bukas ang dalan, ang hilikuton sa pagtipon sa ila magapadayon.
10. Sa anong mahigugmaon nga hilikuton nadalahig ang ulipon karon?
10 Ang matutom nga ulipon nga klase may mabug-at nga salabton sa pag-atipan sang nagadamo nga “iban nga mga karnero,” kay nahibaluan nila nga ining tulad-karnero nga mga tawo gikan sa tanan nga mga pungsod ginahigugma gid sang Agalon, nga si Jesus. Iya sila panong sa kamatuoran. (Juan 10:16; Binuhatan 20:28; 1 Pedro 5:2-4) Gani subong gugma sa Agalon kag sa mga karnero, malipayon nga ginaatipan sang ulipon nga klase ang espirituwal nga mga kinahanglanon sang dakung kadam-an.
11-13. Ano ang nagakaigo nga ginkomento sang anay presidente sang Watch Tower Society tuhoy sa hilikuton sang ulipon?
11 Huo, ang daku nga bahin sang pagdala sing kapawa nga hilikuton sang ulipon nagalakip sang pagtipon sa sining dutan-on nga mga sakop sang Ginharian sang Dios. Sa pagpaathag sang nagadaku nga mga hilikuton sang matutom nga ulipon, si F. W. Franz, ang anay presidente sang Watch Tower Society, nagsiling antes sang iya kamatayon sang Disiembre 1992:
12 “Gingamit ni Jesucristo ang organisasyon sing kapin kag kapin ka dalayawon sa tanan nga tion, suno sa akon 99 ka tuig nga eksperiensia sa kabuhi. Indi isa ka tawo lamang ang nagatuytoy sa organisasyon, kundi amo gid si Ginuong Jesucristo. Bangod nagpanghikot ini sing kapin ka daku kag dalayawon sangsa ginhunahuna naton. Sa karon, may yara kita isa ka organisasyon nga nagsangkad sa bug-os nga kalibutan. Nagapanghikot ini sa Naaminhan nga Hemisperio kag sa Nabagatnan nga Hemisperio, sa Sidlangan kag sa Katundan. Isa ka persona lamang ang nagpahanabo sining talalupangdon nga pagsangkad—ang Anak sang Dios, nga nagadumala sa matutom kag mainandamon nga ulipon nga klase. Ginatuman niya ang iya mga salabton, kag amo ina kon ngaa nasaksihan naton karon ining daku nga pagsangkad.
13 “Ang bug-os nga butang wala ginhimo sang isa ka tawo. May yara kita isa ka organisasyon nga teokratiko, kag nagapanghikot ini sa isa ka teokratiko nga paagi, sa isa ka paagi nga ginatuytuyan sang Dios. Walay tawo, indi bisan ang tagtukod sang Watch Tower Bible and Tract Society, ang makapangangkon ukon padunggan sa nahimo sa bug-os nga globo. Makadalayaw gid ini.” Wala bala ang tanan sang dakung kadam-an bug-os tagipusuon nga nagaugyon sa sina nga mga sentimiento ni anhing Utod Franz? Huo, sa pagkamatuod, nagapasalamat gid sila sa nagsangkad nga mga hilikuton sang matutom nga ulipon.
Mga Sakop sang Ginharian
14, 15. (a) Ano ang gin-ilustrar ni Jesus sa parabola sang mga talanton (Mateo 25:14-30)? (b) Sing nagakaigo, ano ang masunod nga ginsambit sa Mateo kapitulo 25?
14 Sa Mateo kapitulo 25, ginalaragway sang ilustrasyon ni Jesus tuhoy sa mga karnero kag mga kanding ining dakung hilikuton sang pagtipon sa dutan-on nga mga sakop sang Ginharian sang Dios. Sa parabola nga nauna sa sini, ang tuhoy sa mga talanton, gin-ilustrar ni Jesus nga ang hinaplas nga mga disipulo nga nagalaum sa paghari kaupod niya sa iya langitnon nga Ginharian dapat magpangabudlay sa pagpauswag sang iya mga pagkabutang sa duta. Sing nagakaigo, nian, sa masunod nga parabola, ginlaragway ni Jesus kon ano ang ginakinahanglan niya sa mga maluyag mangin mga sakop sang iya langitnon nga Ginharian.
15 Talupangda ang ginsiling niya sa Mateo 25:31-33: “Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod, kag painpainon nila sila subong sang manugbantay nga nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa wala.”
16. Paano ginatipon ang mga pungsod kag ginapain ang katawhan?
16 Si Jesus nagkari sa iya himaya sang 1914. Subong umpisa sang iya paghikot, ginsalakay niya upod sa iya tanan nga anghel kag gintabog sa langit ang iya demonyo nga mga kaaway. Ang masunod nga ginsambit sa iya parabola nagabulig sa aton sa paghangop nga ang paglingkod ni Jesus sa iya mahimayaon nga trono nagalaragway sang isa ka posisyon sang paghukom sa panahon sang iya presensia. Ang pagtipon sa tanan nga pungsod sa atubangan niya nagakahulugan nga si Jesus nagapanghikot sa mga pungsod subong iya palaabuton nga panong, sa malaragwayon nga paghambal. Isa ini ka panong nga nahuman sang mga karnero kag mga kanding. Samtang kinahanglan ang isa ka bahin sang bug-os nga adlaw sa pagpain sang mga karnero gikan sa mga kanding sa isa ka literal nga panong, ang bug-os duta nga pagpain sa katawhan nga may kahilwayan sa pagpili kon ano ang husto kag sayop mas madugay. Amo sini bangod ang pagpain napasad sa buhat sang tagsa ka indibiduwal.
17. Ngaa serioso karon ang kahimtangan para sa tanan nga katawhan?
17 Sa parabola, ginapahamtang sang Manugbantay nga Hari ang mga tulad-karnero sa iya tuo kag ang mga tulad-kanding sa iya wala. Ang sa tuo isa ka paghukom nga may maayong resulta—walay katapusan nga kabuhi. Ang sa wala nagalaragway sang malain nga paghukom—walay katapusan nga kalaglagan. Ang desisyon sang Hari may mabug-at nga mga resulta.
18. Ngaa ang pagkadikitaon sang Hari wala nagapasaylo kay bisan sin-o?
18 Ang pagkadikitaon sang nagahari nga Anak sang tawo sa panahon sang iya presensia, ukon pa·rou·siʹa, wala nagapasaylo kay bisan sin-o. Dugang kag dugang pa nga mga tulad-karnero ang nagabuylog karon sa ulipon nga klase sa pagbantala sing maayong balita sang Ginharian sang Dios sa bug-os nga kalibutan, nagapasiga sang ila kapawa. Sa pagkamatuod, ang ila pagpanaksi nakalab-ot sa tanan nga bahin sang duta.—Mateo 24:14.
19. Anong mga kinaiya sang mga karnero nga klase ang ginailustrar sa parabola sang mga karnero kag mga kanding?
19 Ngaa ginapadyaan sang Manugbantay nga Hari ang mga sa karnero nga klase sing makalilipay nga palaabuton? Bangod sang ila bug-os tagipusuon nga pagsakdag sa pagbantala sang Ginharian nga hilikuton kag sang kalulo nga ila ginpakita sa iya hinaplas nga kauturan, nga ginakabig ni Jesus nga subong nga ginhimo sa iya mismo. Busa, ang harianon nga Anak sang tawo magasiling sa ila: “Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.”—Mateo 25:34; 28:19, 20.
Pagbulig sa Hari
20, 21. Anong ebidensia ang ginahatag sang mga karnero nga sila dampig sa Ginharian?
20 Talupangda nga sang agdahon sang Hari ining mga karnero nga panublion ang dutan-on nga bahin sang Ginharian sang Dios, nakibot sila. Namangkot sila sa iya: ‘Ginuo, san-o bala namon ginhimo ining tanan nga butang sa imo?’ Sia magasabat: “Sa pagkamatuod nagasiling ako sa inyo, Sa kasangkaron nga ginhimo ninyo ini sa isa sang labing kubos sining akon mga utod, ginhimo ini ninyo sa akon.” (Mateo 25:40) Sang magpakita si Jesus kay Maria Magdalena sang adlaw nga ginbanhaw sia, naghambal sia tuhoy sa iya espirituwal nga mga kauturan sang magsiling sia sa iya: “Kadto ka sa akon mga kauturan.” (Juan 20:17) Sa panahon sang iya dikitaon nga presensia, isa ka diutay na lamang nga nagkalabilin sang 144,000 ka espirituwal nga kauturan ni Jesus ang buhi pa sa duta.
21 Sanglit si Jesus dikitaon sa mga langit, ginahimo sining tulad-karnero nga katawhan ining mahigugmaon nga mga butang sa iya sa indi direkta nga paagi. Ginatan-aw nila sia sa iya trono paagi lamang sa ila mga mata sang pagtuo. Ginaapresyar ni Jesus ang tanan nga panikasog nga ginhimo nila sa pagbulig sa iya espirituwal nga mga kauturan, nga mangin kaupod niya nga mga manunubli sa langit. Ang ginahimo sa iya kauturan ginakabig niya nga ginahimo sa iya sing personal. Ang mga tulad-karnero hungod nga nagahimo sing maayo sa mga kauturan ni Cristo bangod ginakilala nila nga amo sila matuod. Nahangpan nila nga ang espirituwal nga mga kauturan ni Jesus amo ang mga embahador sang Ginharian ni Jehova, kag luyag nila maghatag sing espisipiko nga ebidensia nga sila nagadampig upod sa ila sa Ginharian.
22. Paano padyaan ang mga karnero nga klase? (Ipaanggid ang Bugna 7:14-17.)
22 Napanan-aw na ni Jehova nga ining mga tulad-karnero nga klase magalutaw sa sining panahon sang presensia sang iya Anak, kag dalayawon nga padya ang ginatigana niya para sa ila! Ang dakung kadam-an magapanubli sing mga pagpakamaayo sang paghidait diri sa duta sa tion sang makalilipay nga Paghari sa Isa ka Libo ka Tuig sang Hari ni Jehova, nga si Jesucristo.
23. Sa anong mga paagi ang mga karnero hungod nga nagabulig sa mga kauturan sang Hari?
23 Kon ginabinagbinag naton ang mga tagna sang Biblia nga naaplikar sa panahon sang presensia ni Cristo, upod sa parabola ni Jesus tuhoy sa mga karnero kag mga kanding, ano ang makita naton? Amo ini: Indi ini isa ka butang sang dihungod kag natabuan lamang nga paghimo sing maayo sa isa sang espirituwal nga kauturan sang Hari nga nagahimo sa isa ka tawo nga isa ka karnero nga may matarong nga tindog sa atubangan sang Dios kag sang iya Hari. Ang mga sa karnero nga klase nakahibalo kon ano ang ila ginahimo, bisan pa indi makita sang ila literal nga mga mata ang nagagahom nga Hari. Nagatinguha sila sa pagbulig sa kauturan sang Hari indi lamang sa materyal nga paagi kundi sa espirituwal nga paagi man. Paano? Paagi sa pagbulig sa ila sa pagbantala sing maayong balita sang Ginharian sang Dios kag sa pagdumala sing mga pagtuon sa Biblia agod maghimo sing mga disipulo para kay Cristo. Sa amo, kapin sa apat ka milyon karon ang manugdala sing kapawa nga mga manugwali sang Ginharian sang Dios.
Nagsangkad nga mga Hilikuton
24. Anong mahigugmaon nga mga pagpangabudlay ang naghimo sa ulipon nga klase nga amo ang pinakamalipayon nga katawhan sa duta karon?
24 Isaisahon naton ang pila sang madamo nga maayong hilikuton sang matutom nga ulipon nga klase. Una, ang ulipon nga klase gintangdo sa ibabaw sang tanan nga pagkabutang sang Agalon—ang mga interes sang iya Ginharian sa duta—kag ining mga pagkabutang nagadamo. Ikaduha, ina nga klase nagapakaon indi lamang sa hinaplas nga panimalay kundi sa nagadamo pa nga dakung kadam-an sang iban nga mga karnero sing espirituwal nga pagkaon. Ikatlo, ang ulipon nga klase nagapanguna sa pagpalapnag sang kapawa sang Ginharian. Ikap-at, ang labing daku nga hilikuton sini sa pagpasangkad amo ang pagtipon sa dakung kadam-an sang iban nga mga karnero, ginadala sila sa espirituwal nga templo ni Jehova. Ikalima, ang ulipon nga klase, upod ang bug-os tagipusuon nga pagsakdag sang mga tulad-karnero, nagaaman sing ginpadaku nga mga pasilidad para sa pag-organisar sang mga sanga sa bilog nga globo, subong man sa ulong-talatapan sa Estados Unidos. Inang mahigugmaon nga mga pagpangabudlay naghimo sa ulipon nga klase nga amo ang pinakamalipayon nga katawhan sa duta karon, kag ginhimo man nila nga malipayon ang minilyon ka iban pa nga katawhan. Ini sila tanan nagapasalamat kay Jehova nga Dios kag kay Jesucristo, nga nagatuytoy sa nagsangkad nga mga hilikuton sang mainandamon nga ulipon!
25. Paano ang mga karnero makapadayon sa pagsakdag sa ulipon nga klase, kag ano ang paglaum?
25 Ang ulipon nga klase labi pa nga nagapangabudlay karon sing lakas sa mga katungdanan nga ginhatag sang Dios sa ila. Ang tion nga nabilin antes magdabdab ang “dakung kapipit-an” halos maubos na! (Mateo 24:21) Daw ano ka importante nga ining mga karnero sang Dios magpabilin sa husto nga bahin sang pabor sang iya Manugbantay nga Hari! Gani, nian, kabay nga ang tanan magpadayon sing makugi sa pagsakdag sa matutom kag mainandamon nga ulipon. Paagi lamang sa paghimo sini nga sa pila ka adlaw nga indi na magadugay ang tanan nga mga tulad-karnero makabati sadtong makalilipay nga mga pulong: “Kari kamo, mga ginpakamaayo sang akon Amay, panublia ang ginharian nga gin-aman sa inyo kutob pa sang pagtukod sang kalibutan.”
Masabat Mo Bala?
◻ Anong una nga paghukom ang nagsunod sa tapos makalingkod sa trono ang Hari?
◻ Paano ang Mateo 24:45-47 may modernong-adlaw nga katumanan?
◻ Tuhoy sa nagsangkad nga mga hilikuton, anong mga hilikuton ang labi nga ginapasalamatan sang ulipon nga klase kag sang dakung kadam-an?
◻ Paano ang Mateo 25:34-40 ginatuman sa panahon sang pa·rou·siʹa?
[Piktyur sa pahina 16]
Gintugyan sang agalon ang tanan niya nga pagkabutang sa matutom nga ulipon
[Piktyur sa pahina 18]
Ginbaton ni Jesus ang iya mahimayaon nga trono sa paghukom sa katawhan