Mangin Handa Para sa Adlaw ni Jehova!
Mga Pangunang Punto Gikan sa Nahaunang Tesalonica
ADLAW ni Jehova! Abi sang mga Cristiano sadto anay sa Tesalonica ini malapit na. Husto bala sila? San-o ini magaabot? Isa ina ka importante nga butang nga ginhambalan ni apostol Pablo sa iya nahaunang sulat sa mga taga-Tesalonica, nga ginpadala halin sa Corinto sang mga tuig 50 sang aton Kumon nga Dag-on.
Gintukod nanday Pablo kag Silas ang kongregasyon sa Tesalonica, ang administratibo nga lugar sang probinsia sang Macedonia sa Roma. (Binuhatan 17:1-4) Sang ulihi, sa iya nahaunang sulat sa mga taga-Tesalonica, si Pablo naghatag sing komendasyon, naglaygay, kag naghinun-anon sang adlaw ni Jehova. Makabenepisyo man kita gikan sa sining sulat, labi na nga ang adlaw ni Jehova tuman na kalapit karon.
Maghatag sing Komendasyon kag Magpalig-on
Ginhatagan anay sing komendasyon ni Pablo ang mga taga-Tesalonica. (1:1-10) Bangod ini sang ila matutom nga buhat kag pagbatas. Dalayawon man nga ila ‘ginbaton ang pulong sa dakung kapipit-an nga may kalipay sa balaan nga espiritu.’ Ginakumendahan mo bala ang iban, subong sang ginhimo ni Pablo?
Ang apostol nagpahamtang sing maayo nga halimbawa. (2:1-12) Walay sapayan nga ginpakahuy-an sa Filipos, ‘nagmasidla sia sa aton Dios sa pagpahayag sa inyo sang maayong balita sang Dios’ sa mga taga-Tesalonica. Ginlikawan niya ang pag-ulog-ulog, pagkadaluk, kag pagpangita sing himaya. Indi sia nangin pabug-at kundi nagmalulo sa ila subong sang iloy nga nagabatiti sa iya anak. Maayo gid nga halimbawa para sa mga gulang karon!
Ang masunod nga pinamulong ni Pablo nagpalig-on sa mga taga-Tesalonica nga magpabilin nga malig-on kon ginahingabot. (2:13–3:13) Nagbatas sila sing paghingabot gikan sa ila mga kasimanwa, kag si Timoteo nagdala sing maayo nga report kay Pablo nahanungod sa ila espirituwal nga kahimtangan. Ang apostol nagpangamuyo nga magbugana sila sa gugma kag nga ang ila mga tagipusuon maglig-on. Sa kaanggid, ang mga Saksi ni Jehova karon nagapangamuyo tungod sa ginahingabot nga mga masigkatumuluo, nagapalig-on sa ila kon posible, kag nagakalipay sa mga report nahanungod sa ila katutom.
Magpabilin nga Nagabugtaw sa Espirituwal!
Ang mga taga-Tesalonica masunod nga ginlaygayan. (4:1-18) Dapat sila maglakat sa banas nga kalahamut-an sa Dios, nagapakita sing labi pa nga utudnon nga gugma kag magpangabudlay agod mapun-an ang ila mga kinahanglanon. Dugang pa, dapat sila maglugpay sa isa kag isa sa paglaum nga sa presensia ni Jesus ang ginpanganak sa espiritu nga mga tumuluo nga napatay pagabanhawon una kag mahiusa kaupod niya. Pagkatapos sina, sa kamatayon kag pagkabanhaw, ang nakalampuwas nga mga hinaplas magabuylog kay Cristo kag sa mga ginbanhaw na pa langitnon nga kabuhi.
Masunod nga ginhambalan ni Pablo ang adlaw ni Jehova kag naghatag sing dugang nga laygay. (5:1-28) Ang adlaw ni Jehova magaabot subong sang makawat, kag ang hinali nga kalaglagan pat-od gid pagkatapos sang singgit: “Paghidait kag kalig-onan!” Gani ang mga taga-Tesalonica dapat magpabilin nga nagabugtaw sa espirituwal, protektado sang limbutong sang pagtuo kag paghigugma kag sang pandung sang paglaum sang kaluwasan. Dapat sila magtahod sing tudok sang mga nagapanguna sa kongregasyon kag maglihi sa kalautan, subong nga kita man.
Ang nahaunang sulat ni Pablo sa mga taga-Tesalonica dapat magpahulag sa aton nga kumendahan kag palig-unon ang mga masigkatumuluo. Dapat man ini magpahulag sa aton nga mangin huwaran sa pagginawi kag panimuot. Kag ang laygay pat-od gid nga magabulig sa aton nga mangin handa para sa adlaw ni Jehova.
[Kahon/Laragway sa pahina 22]
Limbutong kag Pandung: Nagalaygay sing pagbugtaw sa espirituwal, si Pablo nagsulat: “Magbut-anan kita kag magsul-ob sang limbutong sang pagtuo kag paghigugma kag sang pandung sang paglaum kag kaluwasan.” (1 Tesalonica 5:8) Ang limbutong amo ang pangamlig sang mangangaway sa iya dughan, nagalakip sang daw himbis, kadena, ukon solido nga metal. Sa kaanggid, ang limbutong sang pagtuo nagaamlig sa aton sa espirituwal. Kag kamusta ang pandung sadto anay? Masunson ginahuman sang metal, isa ini ka militar nga kalo nga gindesinyo sa pag-amlig sa mangangaway sa tion sang inaway. Subong nga ang pandung nagaamlig sa ulo sang mangangaway, ang paglaum sang kaluwasan nagaamlig man sa ikasarang sa hunahuna, busa nagapaposible sa Cristiano nga mahuptan ang integridad. Importante gid nga isul-ob sang katawhan ni Jehova ang espirituwal nga hinganib!—Efeso 6:11-17.