“Dili Kamo Mag-untat sa Paghimo sing Maayo”
Mga Pangunang Punto Gikan sa Ikaduhang Tesalonica
ANG pagkabalaka ni apostol Pablo para sa mga Cristiano sa siudad sang Tesalonica sa Macedonia nagpahulag sa iya nga magsulat sang iya ikaduhang sulat sa ila, sang 51 C.E. Ang iban sa kongregasyon nagasiling sing sayop nga ang presensia ni Jesucristo malapit na. Ayhan ang isa ka sulat nga ginpatungod sing indi husto kay Pablo ginpatpat subong nagapakita nga “ang adlaw ni Jehova” nag-abot.—2 Tesalonica 2:1, 2.
Busa kinahanglan bag-uhon ang panghunahuna sang iban nga mga taga-Tesalonica. Sa iya ikaduhang sulat, ginkumendahan sila ni Pablo bangod sang ila nagauswag nga pagtuon, nagadugang nga gugma, kag matutom nga pagbatas. Apang ginpakita man niya nga magaabot ang apostata antes sang presensia ni Jesus. Gani yara sa unahan ang mabudlay nga mga tion, kag ang sulat sang apostol magabulig sa ila nga tumanon ang iya laygay: “Dili kamo mag-untat sa paghimo sing maayo.” (2 Tesalonia 3:13) Makabulig man sa aton ang pulong ni Pablo.
Ang Pagpahayag kag Presensia ni Cristo
Una nga ginhambalan ni Pablo ang paumpaw gikan sa kapipit-an. (1:1-12) Magaabot ini sa “pagpahayag ni Ginuong Jesus gikan sa langit kaupod sang iya gamhanan nga mga anghel.” Nian ang dayon nga kalaglagan magaabot sa mga wala nagatuman sang maayong balita. Makalilipay ini dumdumon kon nagaantos sing kapipit-an sa kamot sang mga nagahingabot.
Masunod, ginpakita ni Pablo nga “ang tawo sang pagkamalinapason” ipahayag antes sang presensia ni Cristo. (2:1-17) Ang mga taga-Tesalonica indi dapat malangkag sa mensahe nga nagasiling nga “ang adlaw ni Jehova” nag-abot na. Una, ang apostasya mahanabo kag ang tawo sang pagkamalinapason ipahayag. Pagkatapos sina, si Jesus magalaglag sa iya, kag himuon niya ini sa pagpadayag sang Iya presensia. Samtang, si Pablo nagpangamuyo nga ang Dios kag si Cristo magalugpay sa tagipusuon sang mga taga-Tesalonica kag ‘magapalig-on sa ila sa tanan nga maayong buhat kag pulong.’
Pagpakig-angot sa mga Magarot
Ang isa sa dugang nga mga pinamulong ni Pablo amo ang instruksion nahanungod sa pagpakig-angot sa magarot nga mga indibiduwal. (3:1-18) Nagasalig sia nga ang Ginuo magapalig-on sa mga taga-Tesalonica kag magabantay sa ila gikan sa malauton, si Satanas nga Yawa. Apang dapat sila maghulag para sa ila espirituwal nga kaayuhan. Dapat sila magpahilayo sa mga magarot, sa mga nagapasilabot sa mga butang nga wala sila sing labot kag indi luyag mag-obra. “Kon sin-o ang indi magpangabudlay,” siling ni Pablo, “indi sia magkaon.” Dapat sila tandaan, kag indi makig-upod sa ila, bisan pa nga sila pagalaygayan subong mga kauturan. Ang matutom nga mga Cristiano sa Tesalonica indi dapat mag-untat sa paghimo sing maayo, kag luyag ni Pablo nga ang dibagay nga kaluoy ni Ginuong Jesucristo mangin sa ila tanan.
Ang ikaduha nga sulat ni Pablo sa mga taga-Tesalonica nagahatag sa mga Saksi ni Jehova sing pasalig nga ang paumpaw gikan sa ila kapipit-an magaabot kon si Cristo kag ang iya mga anghel magatimalus sa wala nagatuman sang maayong balita. Makapabakud man sang pagtuo ang paghibalo nga “ang tawo sang pagkamalinapason” (ang klero nga klase sang Cristiandad) kag ang tanan nga mga butig nga relihion pagalaglagon sa dili madugay. Samtang, pamatian naton ang laygay ni Pablo nga indi mag-untat sa paghimo sing maayo.
[Kahon/Laragway sa pahina 23]
Ang Pulong ni Jehova Nagadasig: “Padayon kamo nga magpangamuyo tungod sa amon,” sulat ni Pablo, “agod nga ang pulong ni Jehova magdasig [ukon, “magdalagan”] kag mahimaya subong nga sa inyo.” (2 Tesalonica 3:1, Kingdom Interlinear) Ang iban nga mga eskolar nagsiling nga ginapatuhuyan sang apostol ang madasig nga mga manugdalagan sa isa ka palumba. Bisan pa indi ini pat-od, ginpangabay ni Pablo ang pangamuyo sang mga Cristiano sa Tesalonica agod nga sia kag ang iya kaupod nga mga manugpangabudlay magapalapnag sang pulong sang kamatuoran nga may kadagmit kag wala sing sablag. Bangod ginasabat sang Dios ina nga mga pangamuyo, ang iya pulong “nagadasig” samtang ang maayong balita ginabantala nga may kadagmit sa sining katapusan nga mga adlaw. Ang pulong ni Jehova ‘ginahimaya’ man, ginatahod sang mga tumuluo subong “gahom sang Dios para sa kaluwasan,” subong nga amo sini anay sa tunga sang mga taga-Tesalonica nga nagbaton sini. (Roma 1:16; 1 Tesalonica 2:13) Malipayon gid kita nga ang Dios nagapakamaayo sa mga manugbantala sang Ginharian kag madasig nga nagadugang sang ranggo sang iya mga sumilimba!—Isaias 60:22.