Ang Putli nga Hambal Nagahiusa sang Dakung Kadam-an sang mga Sumilimba

ANG hatag-Dios nga putli nga pagsimba isa ka puwersa para sa Cristianong paghiusa. Makita ina nga pamatuod sa tanan nga nagtambong sa kombension sang mga Saksi ni Jehova nga ginhiwat sa West Berlin halin Martes tubtob Biernes, sang Hulyo 24 tubtob 27, 1990, kay nagtambong ang mga Saksi halin sa 64 ka lainlain nga mga pungsod.

Sang ginhiwat ang “Diosnon nga Debosyon” Distrito nga mga Kombension sa Poland sadtong tig-ilinit sang 1989, linibo ka delegado ang naghalin sa Rusya kag Czechoslo­vakia, apang pila lamang ka gatos ang nagtambong halin sa Nasidlangan nga Alemanya. Daku gid ang ginbalhin sang kahimtangan sang kalibutan sa politika kutob sadto! Sini nga tion, ginabulubanta nga 30,000 ka delegado halin sa Nasidlangan nga Alemanya ang nakigtipon upod sa mga Saksi sa Olympia Sta­dium sa West Berlin. Ang kombension tipiko sa ginatos nga ginhiwat sa iban nga mga bahin sang kalibutan, ang kalabanan halin Huebes tubtob Domingo.

Sa iya nagabukas nga pamulongpulong sa pag-abiabi sang Martes, ginsaysay sang tsirman ang papel sang kombension kutob sang 1919 sa pagbulig sa mga Saksi ni Jehova nga mag-uswag sa paghambal sang putli nga hambal. Magabulig man ini nga kombension sa tanan nga nagtambong sa pagpauswag sang ila ikasarang sa paghambal sang putli nga hambal kag sa pagkabuhi nahisuno sa sini. Ginpahanumdom niya sa mga delegado nga paagi sa ila pagpamustora kag paggawi, ang katawhan ni Jehova nagapadayag sang pag-uswag nga nahimo nila sa paghambal sang putli nga hambal.

“Putli nga Hambal Para sa Tanan nga mga Pungsod”

Sing nagakaigo, ang key­note nga pamulongpulong sang kombension naghinun-anon sang nasambit nga tema. Pasad ini sa Sofonias 3:​9, diin ang Dios nagsaad: “Palisuon ko sa mga katawhan ang putli nga hambal, agod nga sila tanan magtawag sa ngalan ni Jehova, sa pag-alagad sa iya sa isa ka paghilisugot.” Ang putli nga hambal nagalakip sang nagakaigo nga paghangop kag apresasyon sa kamatuoran nahanungod sa Dios kag sa iya mga katuyuan. Si Jehova lamang ang makaaman sini paagi sa iya balaan nga espiritu. Ang gugma sa kamatuoran dapat magpahulag para tun-an ang putli nga hambal, nga hilway gikan sa tanan nga kahigkuan sa moral.

Sing dugang, ang paghambal sang putli nga hambal indi lamang paggamit sa isa ka bokabularyo. Sa baylo, ang aton dalanon sang kabuhi dapat nga nahisanto sa kon ano ang nagaguwa gikan sa aton mga bibig. Sa katunayan, ang aton tono sang boses, ekspresyon sang guya, kag kumpas importante man, kay nagapakita ini sa kon ano kita sa sulod. Agod makadungan sa nagasangkad nga putli nga hambal, dapat nga may mapinadayunon kita nga programa sa pagtuon kag tayuyon nga nagatambong sa tanan nga mga miting sa kongregasyon.

Pagtuon sang Putli nga Hambal

Subong sang ginpadaku sang isa ka pamulongpulong sang Martes sang hapon, ang pagtuon sang putli nga hambal nagakahulugan sang “Pag-uswag Halin sa Sadsaran Padulong sa Pagkahamtong.” Kinahanglan ang pagtubo agod padayon kita nga magatubo sa espirituwal. Nagakahulugan ina sang paghimulos sa tanan nga mga aman para sa espirituwal nga pag-uswag kag pag-aplikar sa mga prinsipio sang Biblia adlaw-adlaw.

Agod mangin eksperto sa putli nga hambal, dapat nga kita “Natudluan ni Jehova,” ang titulo sang simposium sang Huebes sang aga. Ginpakita sang nahauna nga humalambal kon paano ini ‘Ginhalimbawa ni Jesucristo.’ Paagi sa mga pulong kag buhat ni Jesus, ginpakita niya nga sia natudluan ni Jehova. Gani luyag naton sia ilugon sa kon paano sia gintudluan. Kag bangod si Jesus pirme nagpasakop sa kabubut-on sang iya Amay, dapat nga amo man kita.

Ginpakita sang masunod nga tatlo ka humalambal kon paano si Jehova nagatudlo paagi sa mga miting kag mga asambleya. Nagabenepisyo kita gikan sa lima tanan ka miting sa kongregasyon kag indi naton dapat pagpatumbayaan ang bisan diin sini. Ang tagsa ka miting importante sa aton espirituwal nga pag-uswag. Si Jehova nagatudlo man sa aton paagi sa aton mga programa sa sirkito nga asambleya, distrito nga kombension, kag pinasahi nga adlaw sang asambleya. Agod makabenepisyo gikan sini tanan, dapat kita magpamati sing maayo kag nian iaplikar ang aton natun-an.

Ining simposium ginsundan sang pamulongpulong nga “Pagsakripisyo Para sa Personal nga Pagtuon.” Agod may tion para sa sini, dapat naton sundon ang laygay sa Efeso 5:​15, 16 nga himuslan ang tion gikan sa indi tama ka importante nga mga butang.

Ang makatarunganon nga tulumuron sang pagtuon naton sang putli nga hambal amo ang dedikasyon kag bawtismo. Ining kamatuoran ginpadaku sang pamulongpulong nga “Bawtismo Sadtong Nagatuon sang Putli nga Hambal.” Ini nga hambal nagadul-ong sa madamo sa dedikasyon kag bawtismo. Apang, pagkatapos sina ang isa dapat magpadayon sa pagsunod sa sulundan ni Jehova paagi sa makugi nga pagbantala sang maayong balita, pagsuklob sang bag-ong personalidad, kag pagpadayon nga nahamulag gikan sa kalibutan.

Matig-a nga Espirituwal nga Pagkaon

Nalipay man ang mga kombensionista sa pagbaton sang matig-a nga espirituwal nga pagkaon pasad sa katumanan sang duha ka matagnaon nga mga drama. Sang Huebes sang hapon, ang duha ka pamulongpulong ginpasad sa mga tema nga ginkuha gikan sa tagna ni Ezequiel. Ang nahauna, “Ang Langitnon nga Kangga ni Jehova nga Nagapanghikot,” naglaragway sa daku katama, mahimayaon, kag makahaladlok nga langitnon nga kangga nga nagadalagan sa daw kilat nga kadasigon. Nagalaragway ini sa langitnon nga organisasyon ni Jehova, nga ginasakyan sang Dios sa bagay nga mahigugmaon niya nga ginatuytuyan ang hulag sini kag ginagamit sa pagtuman sang iya mga katuyuan. Si Ezequiel nagalaragway sa ginhaplas sang espiritu nga nagkalabilin, labi na kutob sang 1919. Ginbuylugan sila sang “dakung kadam-an” labi na kutob sang 1935.​—⁠Bugna 7:⁠9.

Ang masunod nga pamulongpulong gintig-uluhan nga “Magdungan sa Kitaon nga Organisasyon.” Wala sing pangduhaduha nga ang kitaon nga organisasyon sang Dios nagadungan upod sa iya langitnon katulad-kangga nga organisasyon. Kaangay kay Ezequiel, ang mga alagad ni Jehova karon matutom nga nagatuman sang ila matagnaon nga komisyon walay sapayan sang dipagsapak, yaguta, ukon pagpamatok. Ang pagdungan nagadul-ong sa madamong pagpakamaayo karon kag kabuhi nga walay katapusan sa madasig nagahilapit nga bag-ong kalibutan sang Dios.

Sang Biernes sang aga, gin-aman man ang matig-a nga espirituwal nga pagkaon paagi sa tatlo ka pamulongpulong pasad sa Isaias kapitulo 28. Ginpakita sang nahauna sini sa matigdas nga mga tinaga nga ang espirituwal nga mga palahubog sang dumaan nga Israel kag Juda naglaragway sa espirituwal nga mga palahubog sang Cristiandad. Subong nga ang nagligad nakaagom sang paghukom ni Jehova, amo man ang sa Cristiandad.

Ang pamulongpulong nga nagsunod, nga natig-uluhan “Ang Ila Dalangpan​—⁠Isa ka Kabutigan!,” naghatag sang matigdas nga paandam: Subong nga ang pagsalig sang Juda sa Egipto napamatud-an nga walay pulos nga dalangpan, amo man ang pag-alyansa sang Cristiandad sa politikal nga mga kagamhanan sang aton adlaw. Ang ikatlo nga pamulongpulong sa Isaias kapitulo 28, “Padayon nga Magpaandam Nahanungod sa Dikinaandan nga Hilikuton ni Jehova,” ginpatuhoy sa katawhan ni Jehova. Ang himuon ni Jehova sa Cristiandad makatarunganon nga matawag nga dikinaandan, kay magaabot ini nga isa gid ka daku nga kakibot sa iya. Sa karon, si Jehova amo ang purungpurung sang himaya sa diutay nga hubon sang hinaplas nga mga Cristiano kag sa kapin sa apat ka milyon nga “iban nga mga karnero.” (Juan 10:16) Ang humalambal naghinakop paagi sa makapulukaw nga hambal: “Kabay nga ang aton kakugi, determinasyon, kag katutom nagaamot sa walay katapusan nga kadayawan sang aton Dios, si Jehova.”

Ang Paghambal sang Putli nga Hambal Nagakahulugan sang Pagpakita sing Utudnon nga Gugma

Sang Mierkoles sang hapon ginpatalupangod sa mga kombensionista nga ang paghambal sang putli nga hambal nagakahulugan man sang “Pagpatugsiling sa mga Ilo kag mga Balo sa Ila Kapipit-an.” Ang ilo nga mga bata nga lalaki sarang mabuligan paagi sa pagbaton sing personal nga paghanas. Mapakita naton ang konsiderasyon para sa mga balo paagi sa malulo nga mga pulong sang pagpalig-on, paagi sa paglakip sa ila sa aton Cristianong mga hilikuton kag sosyal nga pagtililipon, kag paagi sa paghatag sa ila sing materyal nga bulig kon sila nagakaigo kag nagakinahanglan gid. Ginpakita sang mga interbyu kon paano ini ginhimo.

Sang Huebes sang hapon, ginpakita sang isa pa ka makalilipay nga pamulongpulong “Kon Paano ang mga Cristiano Nagaulikid sa Isa kag Isa.” Ang mga Saksi ni Jehova may maayong rekord nahanungod sa pag-ulikid sa isa kag isa, labi na kon may mga kapahamakan kaangay sang mga bagyo kag mga linog, kon diin kinahanglan ang magsulat sa mga opisyal, ukon kon diin may lokal nga mga kinahanglanon. Apang kon may nagautwas nga mga problema bangod sang tawhanon nga pagkadihimpit, dapat naton iaplikar ang mga prinsipio nga nadalahig sa laygay ni Jesus sa Mateo 5:​23, 24 kag 18:​15-17. Kinahanglan ang pagtahod kag paghalong labi na kon nahanungod sa mga kahimusan sa negosyo sa ulot sang mga kauturan agod ang manug-empleo ukon ang empleyado indi maghingalit sa espirituwal nga kaangtanan.

Ang Paghambal sang Putli nga Hambal Nagakahulugan sang Pagbantay sa Aton Paggawi

Ang kinahanglanon nga bantayan ang aton paggawi liwat kag liwat nga ginpadaku. Busa, ang nahaunang humalambal sang Martes sang hapon nagpamulongpulong sa tema nga “Pagpamati kag Pagsunod sa Pulong sang Dios.” Ginpakita niya nga may yara duha ka pangunang mga rason sa pagkadto naton sa mga kombension: sa pagkuha sang sibu nga ihibalo kag mapahulag sa pagpanghikot sa sina nga ihibalo.

Ang nahaunang pamulongpulong sang Mierkoles sang hapon nagpanugda sang duha ka nagapahunahuna nga pamangkot “Si Cristo ‘Nagdumot sang Pagkamalinapason’​—⁠Kamo Bala?” Indi bastante nga higugmaon ang pagkamatarong. Dapat naton dumtan ang pagkamalinapason agod matigayon ang maayo nga konsiensia, mahuptan ang maayong kaangtanan upod kay Jehova, malikawan ang pagdala sing pasipala sa iya ngalan, kag malikawan ang pag-ani sa mga bunga sang pagkamalinapason​—⁠kagarukan kag kamatayon.

Naangot sing suod sa sina nga tema amo ang masunod nga pamulongpulong, nga natig-uluhan “Isikway ang Kalibutanon nga mga Pantasya, Himud-usi ang mga Katunayan sang Ginharian.” Sanday Satanas, Eva, kag mga anghel nga nakasala naghimud-os sang mga pantasya nga nagdul-ong sa ila kapahamakan. Ang kalibutanon nga mga pantasya, nagalakip sang materyalistiko nga mga damgo ukon sang nagahimo sing malaw-ay nga mga buhat, nagaresulta sa kabang-awan kon indi man sa daku nga sala. Agod mabatuan ining mga pantasya, dapat naton himud-usan ang mga katunayan sang Ginharian paagi sa pagtuon, pangamuyo, pagtambong sa miting, kag publiko nga ministeryo.

Agod magkabuhi sing matadlong nga Cristianong kabuhi, dapat man naton pamatian ang laygay nga ginhatag sang Mierkoles sang hapon sa pamulongpulong nga “Mga Cristiano​—⁠Magkabuhi Suno sa Inyo Masarangan sa Pinansial.” Kon indi ini masunod, may makahalalit nga epekto ini sa pisikal kag espirituwal. Ang dalanon sang kaalam amo ang pagpugong sa makagod nga handum paagi sa indi pagpangutang sa walay pulos kag paagi sa pagplano sing realistiko nga badyet kag nian sa pagsunod sini. Sa tanan nga tion dapat naton palambuon ang diosnon nga debosyon. Upod sa pagkakontento sa kaugalingon, isa ini ka paagi sang daku nga kaayuhan.​—⁠1 Timoteo 6:6-8.

Ang importansia sang pagbantay sa aton mga kaupdanan ginpadaku sa pamulongpulong sang Martes nga “Ang Imo Bala mga Abyan mga Abyan ni Jehova?” Ang aton mga abyan dapat mga Cristiano nga nagsuklob sang katulad-Cristo nga personalidad kag mapisan sa pagbantala nga hilikuton. Ang kalibutanon nga mga abyan indi mga abyan ni Jehova, kag indi kita mahimo nga makig-upod sa ila nga wala sing halit sa aton kaugalingon. Bisan sa sulod sang kongregasyon, dapat kita mangin mapili agod ang aton mga kaupdanan tunay nga makapalig-on.

Ang nasambit na nga laygay nahanungod sa paggawi maathag nga ginpadaku sang modernong-adlaw nga drama. Ginatig-uluhan ini nga “Paglandas sa Malimbungon nga mga Buhat sang Yawa.”

Ang Laygay sang Putli nga Hambal Para sa mga Pamilya

Kinahanglan gid sing daku amo ang pamulongpulong sang Mierkoles nga “Mga Ginikanan​—⁠Tumana ang Inyo mga Obligasyon!” Dapat mismo mahibaluan sang mga ginikanan ang kabubut-on sang Dios kag himuon ini tubtob sa bug-os nila nga masarangan. Dapat man nila ipatudok sa ila mga kabataan ang Pulong sang Dios. Dugang pa, indi lamang bastante nga paupdon ang mga kabataan sa Cristianong mga miting kag sa pag-alagad sa latagon. Dapat sila tudluan nga higugmaon si Jehova kag makita ang praktikal nga kaalam sang paghimo sang diosnon nga mga butang.

Ang masunod amo ang simposium nahanungod sa “Ang Pamilya sa Aton Adlaw.” Ginpakita sang nahaunang humalambal nga ang pamilya naghalin sa Dios. Ang mga amay dapat magpaalinton sing maayo sang espirituwal nga mga butang. Ang mga iloy dapat mangin maayong mga manug-atipan sang balay, kag ang mga kabataan dapat magpakita sing pagtahod kay Jehova paagi sa pagkooper sa ila mga ginikanan.

Ginpakita sang masunod nga humalambal nga ang pamilya “Napaidalom sa Pagsalakay sang mga Kaaway.” Daku ang pag-ipit sa palangabuhian. Madamo ang mga pagsulay nga makahimo sing sala sa mga ulubrahan, kag ang mga presentasyon sang media nagaalisngaw sang kasingki, malaw-ay nga sekso, kag nagaganyat sang materyalismo. Ang pagtudlo dapat mag-umpisa sing temprano, kag ang daku nga kakugi kinahanglanon agod malandas ang kalibutanon nga mga impluensia. Dapat gamiton sing maayo ang ­teokratikong mga kagamitan nga ginaaman sang Watch Tow­er Socie­ty.

Ang masunod nga pamulongpulong, nagahinun-anon nahanungod sa ‘Kaluwasan [sang Pamilya] Pasulod sa Bag-ong Kalibutan,’ dugang nga nagpakita sang mabug-at nga responsabilidad sang mga ginikanan. Ang paghanas sa mga kabataan dapat himuon sing hanuot katama. Ang maayong laygay ginhatag nahanungod sa pamilya nga pagtuon sa Biblia kag kon ano ang tun-an, ang tanan sa tuyo nga malab-ot ang mga tagipusuon sang kabataan. Dira lamang nga makalaum ang mga ginikanan kag mga kabataan nga matipigan pasulod sa bag-ong kalibutan subong isa ka pamilya.

Ang pamulongpulong nga “Pagpanikasog sa Sulod sang Nabahinbahin nga Panimalay” nagahatag sing maayong laygay para sa kahimtangan sang pamilya nga madamong mga Saksi ang yari sa sini. Ang mga yara sa sina nga kahimtangan ginlaygayan nga indi gid mag-untat sa paglaum nga ang ditumuluo sa pila ka adlaw mangin tumuluo. Maghinguyang sing tion upod sa ditumuluo nga tiayon kag siguruha nga ginahimo mo ang tanan nga ginakinahanglan sa isa ka Cristianong tiayon. Makatigayon ka sing bulig gikan sa mga gulang ukon ayhan gikan sa iban sa nabahinbahin nga mga panimalay.

Paghambal sang Putli nga Hambal sa Iban

Sing labi ka nagakaigo, ginhatag ang daku nga igtalupangod sa paghimulos naton sa mga kahigayunan nga matudlo sa iban ang putli nga hambal. Gani, sang Mierkoles sang aga nabatian sang mga kombensionista ang pamulongpulong nga “Gamita sing Maalamon ang Inyo Hamili nga Tion.” Agod mahimo ina dapat naton pat-uron ang mga prioridad, nahisanto sa Mateo 6:​33, nga nagasiling: “Padayon, nian, nga pangitaa anay ang ginharian kag ang iya pagkamatarong.” Nagalakip ina sang pagpain sing tion para sa personal nga pagtuon sa Biblia, pagtambong sa tanan nga mga miting, kag pagkatayuyon sa pag-alagad sa latagon. Nagakinahanglan ini nga himuslan naton ang tion gikan sa indi importante katama apang makalilipay nga mga aktibidad. Ginpakita sang madamong mga interbyu kon paano ini ginhimo sang iban.

Indi gid naton dapat pagkalimtan nga kita mga Saksi ni Jehova. Sang Huebes sang hapon, madamong mga demonstrasyon ang nagpaathag sina gid nga punto sa idalom sang tema nga “Padayon nga Ihambal ang Putli nga Hambal sa Tanan nga Okasyon.” Ginpakita sining mga demonstrasyon kon paano ini himuon sa pagpanaksi sa kalye, sa dipormal nga pagpanaksi, kag paagi sa paggamit sang telepono. Ang dimakagod nga gugma kay Jehova nga Dios kag sa aton isigkatawo magapahulag sa aton nga isugid ang putli nga hambal sa tanan nga kahigayunan.

Naangot sing suod sa sining tema amo ang masunod nga presentasyon, “Mga Pagpakamaayo Sadtong Wala Nagauntat.” Kabaliskaran gid sa Cristiandad amo ang nagatudlo nga organisasyon sang mga Saksi ni Jehova sa bug-os nga kalibutan. Sing indibiduwal, dapat naton batuan ang tanan nga mga pag-ipit, subong sang opisyal nga pagpamatok, lapnag nga dipagsapak, kag mga problema sa pangabuhi. Ang mga demonstrasyon pasad sa libro nga Reasoning From the Scriptures nagpakita kon paano sarang malandas ining mga pag-ipit.

Nagapalig-on man sang makugi nga pagbantala amo ang drama sa Biblia nga Paghimo sang Kabubut-on sang Dios nga May Kakugi. Ginpakita sini kon daw ano ka kakugi si Jehu para sa ngalan ni Jehova kag kon daw ano ka importante para sa aton nga ipakita ang kaanggid nga kaisog kag kakugi para sa hilikuton sang Dios.

Mga Release sa Kombension

May yara duha ka talalupangdon nga mga re­lease sa Ingles kag sa Aleman sa tion sang kombension. Ang nahauna sining mga publikasyon amo ang ginpakilala may kaangtanan sa pamulongpulong nga natig-uluhan “Pagluwas sang Imo Kabuhi Paagi sa Dugo​—⁠Paano?” Ginsugid una sang humalambal ang mga risgo nga ginabuylog sa pagtayhon sing dugo. Ginpakita niya nga may yara madamong mga tal-us sa dugo nga magailis sa nawasi nga dugo. Apang ang mga Saksi ni Jehova nagalihi sa dugo indi bangod kay indi ini maayo kundi bangod kay ang pagbaton sini indi balaan. Nagalihi sila, indi bangod kay ang dugo mahimo nga mahigko, kundi bangod kay ini hamili sa Dios. Ang dugo nga nagaluwas gid sang kabuhi amo ang nagagawad nga dugo ni Jesucristo. Sa paghinakop ang humalambal nagpahalipay sa tanan nga tumalambong paagi sa pagpakita sang 32-pahina nga brosyur nga How Can Blood Save Your Life?

Ang ikaduhang hamili nga release ginpaguwa may kaangtanan sa pamulongpulong nga “Pangitaa Ninyo si Jehova.” Sa kabilugan, ang katawhan wala nagapangita sa Dios. Ang pagluntad sang madamong lainlain nga mga relihion nagapakita kon daw ano ka natuytuyan sing sayop ang pagpangita sang tawo sa Dios bangod wala niya ginsapak ang Pulong sang Dios. Subong sang makita sa aton report sa Memoryal kada tuig, minilyon ang kinahanglan nga buligan sa pagtindog nga malig-on para kay Jehova. Ginapakita sang Isaias 55:​6, 7 nga si Jehova tunay gid nga mahigugmaon kag maluluy-on nga Dios, handa sa “pagpatawad sing bugana.” Subong mga Saksi niya, ginhatagan kita sang putli nga hambal agod mabuligan naton ang iban nga magbuylog sa aton sa pagsimba kay Jehova sa paghilisugot.

Sa karon, ang katawhan ni Jehova nagaatubang sing hangkat bangod sang pagsulusaylo sang mga tawo. Subong resulta, ang tanan nga sahi sang relihion mahimo nga ginaangkon sang mga tawo sa aton teritoryo. Agod mabuligan naton ang mga Hindu, mga Budhista, mga Shintoista, kag ang mga sa iban nga relihion, ang Sosiedad nag-aman sang matahom nga 384 ka pahina nga libro nga Mankind’s Search for God. May awtoridad nga ginpresentar sini ang sadsaran nga mga panudlo sang pangunang mga relihion sa guwa sang Cristiandad. Apang ginaasoy man sini ang rekord sang dimatuod nga relihion sa sulod sang Cristiandad. Ini nga libro nagabukas sang dalan para masugdan ang mga pagtuon sa Biblia sa mga tawo nga naangkon sang madamong lainlain nga relihion.

Ang Pamulongpulong Publiko kag Nagatakop nga mga Komento

“Mangin Nahiusa sa Putli nga Pagsimba” amo ang titulo sang pamulongpulong publiko sang Biernes. Ginpakita sang humalambal nga bisan tatlo ka libo ka lainlain nga mga hambal ang nagaupang karon sa paghiusa, ang putli nga hambal isa gid ka gamhanan nga puwersa nga nagahiusa. Nag-amlig ini sa mga Saksi ni Jehova batok sa Babilonianhon nga mga sala, nagtudlo sa ila sang pagtahod sa pagkabalaan sang kabuhi kag dugo, kag nagbulig sa ila nga magkabuhi paagi sa mga prinsipio nga nagabenepisyo sa ila sa espirituwal kag sa pisikal. Ang tanan dapat mabalaka nahanungod sa pagtuon kag sa paghambal sang putli nga hambal, kay ang nagahimo lamang sini ang makalampuwas sa Armagedon. Wala sing tion ang mawasi sa pagpamati sa laygay sa Sofonias 2:​1-3.

Pagkatapos sang maayong Makasulatanhon nga laygay nahanungod sa kinahanglanon nga “Mangin Mabinantayon Kon Tuhoy sa Pangamuyo,” nagsunod ang nagahinakop nga mga komento pasad sa tema nga “Paglakat Nahisuno sa Putli nga Hambal.” Ang kadamuon sang nagalakat karon nahisuno sa putli nga pagsimba nagadugang gid. Kag ang pagpaimportansia sa putli nga hambal ginpakita sang mga nagtambong sa sining kombension paagi sa ila katinlo, kahim-ong, kag organisasyonal nga paghiusa. Ang bag-ong naimprinta nga mga release magabulig sa tanan nga mga Saksi ni Jehova sa pagpalapnag sing labi pa ka epektibo sang putli nga pagsimba.

Ang katapusan nga humalambal sa kombension nagpahanumdom sa tanan sang kinahanglanon nga pagbatas. Ginpakita niya nga subong resulta sini nga kombension, ang tanan dapat mapabakud sa ila determinasyon nga mag-uswag. Nian naghinakop sia paagi sa mga pulong: “Kabay nga magpadayon kita sa paglakat nahisuno sa hatag-Dios nga putli nga pagsimba agod mahimaya naton ang aton mahigugmaon nga langitnon nga Amay, si Jehova nga Dios, karon kag sing dayon!”

[Kahon sa pahina 26]

Ang pinakamataas nga tumalambong sa kombension sa West Berlin amo ang 44,532, kag 1,018 ang ginbawtismuhan. Nagkinahanglan sing 19 minutos para sa mga kandidato sa bawtismo nga maglinya paguwa sa Olym­pia Sta­dium, kag sa sining tion padayon ang palakpak. May yara espesyal nga seksion para sa nagahambal sing Ingles nga mga delegado. Mga 6,000 sa ila ang nakabati sang bug-os nga programa sa ila hambal. Sa sining kombension, 4,500 man ang naghalin sa Poland; sa duha ka takna sa udto, ang mga katapo sang Nagadumala nga Hubon nagpamulongpulong sing malip-ot para sa ila kaayuhan.

[Mga laragway sa pahina 24, 25]

1. Olympia Stadium, West Berlin

2. Ang naimprinta nga programa sa kombension

3. Duha ka gatos ka bus ang nagdala sang mga delegado halin sa Nasidlangan nga Alemanya

4. Ang Polako nga mga kombensionista nalipay sa pagbaton sang naimprinta nga mga release

5. Ang mga dekorasyon nga bulak nagpatahom sang palibot

6. Si A. D. Schroeder, katapo sang Nagadumala nga Hubon sa programa sa West Berlin