Hupti ang Pagtuo kag ang Maayong Konsiensia
Mga Pangunang Punto Gikan sa Nahaunang Timoteo
SANG mga tuig 56 C.E., ginpaandaman ni apostol Pablo ang mga gulang sang kongregasyon sang Efeso nga ang “mga lobo nga mapintas” magalutaw sa tunga nila kag “nagapamulong sing mga butang nga balingag sa pagpasunod sa ila sang mga disipulo.” (Binuhatan 20:29, 30) Sa pila ka tuig, ang apostata nga panudlo nangin tuman ka serioso amo kon ngaa si Pablo naglaygay kay Timoteo nga makig-away sa espirituwal sa sulod sang kongregasyon agod matipigan ang kaputli sini kag mabuligan ang mga masigkatumuluo nga magpabilin sa pagtuo. Amo sina ang daku nga rason kon ngaa si Pablo nagsulat sang iya nahaunang sulat kay Timoteo halin sa Macedonia sang 61-64 C.E.
Ginhatagan sing instruksion si Timoteo nahanungod sa mga katungdanan sang mga gulang, gintangdo sang Dios nga duog sang mga babayi, mga kalipikasyon sang mga gulang kag ministeryal nga mga alagad, kag iban pa. Mapuslanon man sa karon ina nga instruksion.
Laygay sa Pagtuo
Si Pablo nag-umpisa paagi sa laygay nga huptan ang pagtuo kag ang maayong konsiensia. (1:1-20) Ginlaygayan niya si Timoteo nga magpabilin sa Efeso kag “matulinan ang pila ka tawo nga dili magpanudlo sing tuhay nga pagtulun-an.” Nagapasalamat si Pablo tungod sa ministeryo nga gintangdo sa iya, nagabaton nga nagpanghikot sia sing walay hinalung-ong kag kulang sing pagtuo sang ginhingabot niya ang mga sumulunod ni Jesus. Ginlaygayan sang apostol si Timoteo nga padayon nga makig-away sa espirituwal, “nagahupot sang pagtuo kag maayong konsiensia” kag indi kaangay sang pila nga “naglunod sang ila pagtuo.”
Laygay Tuhoy sa Pagsimba
Masunod, si Pablo naglaygay subong “manunudlo sang mga pungsod sa pagtuo kag kamatuoran.” (2:1-15) Dapat ipangamuyo ang mga yara sa kagamhanan agod ang mga Cristiano magakabuhi sing mahidaiton. Kabubut-on sang Dios nga ang tanan nga sari sang tawo maluwas, kag ang importante nga panudlo amo nga si Cristo “naghatag sang iya kaugalingon subong katumbas nga gawad tungod sa tanan.” Ginpakita ni Pablo nga ang babayi dapat magpuni sang iya kaugalingon sing maugdang kag indi dapat maggahom sa lalaki.
Ang kongregasyon dapat organisado katama. (3:1-16) Gani ginhatag ni Pablo ang kalipikasyon sang mga manugtatap kag ministeryal nga mga alagad. Gikan sa mga ginsulat sang apostol, mahibaluan ni Timoteo kon paano maggawi sa kongregasyon, “ang haligi kag pamakud sang kamatuoran.”
Ginlaygayan sing personal ni Pablo si Timoteo agod buligan sia nga magbantay batok sa dimatuod nga panudlo. (4:1-16) Sa ulihi ang iban magatalikod sa pagtuo. Apang paagi sa pagtalupangod pirme sa kaugalingon kag sa iya panudlo, si Timoteo ‘magaluwas sang iya kaugalingon kag sang mga nagapamati sa iya.’
Nakabaton man sing laygay si Timoteo nahanungod sa pagpakig-angot sa mga indibiduwal, bata kag tigulang. (5:1-25) Halimbawa, ang tigulang nga mga balo nga may maayong Cristianong reputasyon dapat pagaamanan sing nagakaigo. Sa baylo nga magkutsokutso, ang bataon nga mga balo dapat magminyo kag magpanganak. Ang mga tigulang nga nagadumala sing maayo dapat pag-isipon nga takus sa pilo nga kadungganan.
Diosnon nga Debosyon nga May Pagkakontento
Ang sulat ni Pablo naghingapos sa laygay tuhoy sa diosnon nga debosyon. (6:1-21) Ang “diosnon nga debosyon nga may pagkakontento” isa ka paagi nga may daku nga kaayuhan, apang ang determinasyon nga magmanggaranon nagadul-ong sa kalaglagan kag kagulub-an. Si Pablo naglaygay kay Timoteo nga makig-away sa maayong pagpakig-away sang pagtuo kag ‘manguyapot sing hugot sa kabuhi nga walay katapusan.’ Agod makapanguyapot sa tunay nga kabuhi, ang manggaranon dapat ‘magbutang sang ila paglaum, indi sa dimasaligan nga mga manggad, kundi sa Dios.’
[Kahon/Laragway sa pahina 30]
Ginluwas Paagi sa Pagpanganak: Si Pablo wala nagahinun-anon sang kaluwasan padulong sa kabuhi nga dayon kundi sa nagakaigo nga katungdanan sang diosnon nga babayi sang nagsulat sia: “Maluwas sia paagi sa pagpanganak, kon magpadayon sia sa pagtuo kag paghigugma kag pagkabalaan nga may kaugdang.” (1 Timoteo 2:11-15) Paagi sa pagpanganak, pag-atipan sa iya mga anak, kag pagtatap sa balay, ang babayi “maluwas” gikan sa pagkutsokutso kag pagpasilabot sa kabuhi sang iban. (1 Timoteo 5:11-15) Ang iya mga hilikuton sa balay dapat nga magabuylog sa iya pag-alagad kay Jehova. Sa pagkamatuod, dapat bantayan sang tanan nga mga Cristiano ang ila paggawi kag maggamit sing maalamon sang ila tion.—Efeso 5:15, 16.