Tubtob San-o ang Pagpailob sang Dios?
MGA 3,000 ka tuig na ang nagligad, ang isa ka maalam nga tawo nagsulat: “Ang tawo nagagahom sa iya isigkatawo sa iya kasamaran.” (Manugwali 8:9) Halin sadtong iya obserbasyon, ang mga kahimtangan wala gid mag-uswag. Sa bug-os nga maragtas, ang mga indibiduwal kag mga grupo bulos-bulos nga nag-uyat sing gahom, nagapigos kag nagahingalit sa iban nga mga tawo. Si Jehova nga Dios mapailubon nga nagbatas sini.
Si Jehova nagpailob man samtang ang mga panguluhan nagpadala sang minilyon nga katawhan nga nagkalamatay sa inaway kag nagtugot sang dalagku nga inhustisya sa ekonomiya. Sa karon nagapailob gihapon sia samtang ginaguba sang tawo ang ozone layer kag ginahigkuan ang atmospera kag ang dagat. Daw ano kasakit para sa iya ang pagtulok sa pagkaguba sang mabungahon kaayo nga duta kag ang pagkapapas sang kagubatan kag sang mga ilahas nga kabuhi sa sini!
Ngaa Mapailubon Gid ang Dios?
Ang isa ka simple nga ilustrasyon mahimo makabulig sa aton sa pagsabat sini nga pamangkot. Binagbinaga ang mangin epekto sa negosyo kon ang empleyado masami nga ulihi nagaabot. Ano ang dapat nga himuon sang tag-iya? Ang sadsaran nga katarungan amo nga mahimo nga iya pahalinon sa gilayon ang empleyado. Apang mahimo madumduman niya ang isa ka hulubaton sa Biblia: “Ang makuli sa pagpangakig daku sang paghangop, apang ang madalas sing espiritu nagapataas sang kabuangan.” (Hulubaton 14:29) Ang paghangop mahimo makatiklod sa iya nga maghulat antes maghimo sing tikang. Mahimo nga magdesisyon sia sa paghatag sing tion sa paghanas sang isa nga magabulos agod nga indi matublag ang negosyo.
Ang kahanuklog mahimo nga magpahulag man sa iya sa paghulat. Ano kon paandaman ining uyaya nga empleyado agod tan-awon kon magabag-o sia sang iya pagginawi? Ngaa indi sia hambalon kag tan-awon kon bala ang iya batasan nga pagkauyaya tuga sang isa ka problema nga sarang malubad ukon sang di-mabag-o malain nga pamatasan? Samtang ang tag-iya sang negosyo mahimo magapakita sing pagpailob, wala ini nagapakita nga ini wala sang limitasyon. Ang empleyado mahimo nga magreporma ukon dapat nga pahalinon. Makatarunganon lamang ina sa negosyo mismo kag sa empleyado nga nagatuman sa mga palatukuran.
Sa katulad nga paagi, si Jehova nga Dios nagapailob sa mga kalautan agud maghatag sing tion sa paghimo sing mga makatarunganon nga mga solusyon sa mga problema. Dugang pa, ang iya pagpailob nagahatag sa mga malauton sing kahigayunan sa pagbag-o sang ila dalanon kag makatigayon sang mapinadayunon nga mga benepisyo. Sa amo, ang Biblia nagapabakod sa aton nga indi magkalisod sa pagpailob sang Dios. Sa baylo, ini nagasiling: “Kabiga ninyo ang pagpailob sang aton Dios subong kaluwasan.”—2 Pedro 3:15.
Isa ka Halimbawa sang Pagpailob sang Dios
Si Jehova nga Dios nagpailob antes sang dakung Anaw sang adlaw ni Noe. Ang kalibutan sadto puno sing kasingki kag tuman kalaut. Aton mabasa: “Nakita ni Jehova nga ang kalautan sang tawo daku sa duta . . . Gani si Jehova nagsiling: ‘Laglagon ko gikan sa kadaygan sang duta ang tawo nga akon gintuga.’” (Genesis 6:5, 7) Huo, ginhunahuna ni Jehova ang katapusan nga solusyon sa problema sang kalautan sadto: ang pagdula sa malauton nga katawhan. Apang wala sia maghikot sa gilayon. Ngaa?
Bangod indi tanan malaut. Si Noe kag ang iya pamilya matarong sa panulok ni Jehova. Gani para sa ila, si Jehova mapailubon nga naghulat agod sa pagtugot sa pila ka matarong nga mga indibiduwal nga makahanda para sa ila kaluwasan. Dugang pa, yadtong malawig nga paghulat naghatag kay Noe sing kahigayunan nga mangin “manugbantala sang pagkamatarong,” nga naghatag sa mga malauton sadto sing kahigayunan nga magbag-o sang ila dalanon. Ang Biblia nagasiling: “Ang pailob sang Dios naghulat sang mga adlaw ni Noe, sang gin-aman ang arka, diin pila lamang ka tawo, kon sayuron, walo ka tawo, ang naluwas sa tubig.”—2 Pedro 2:5; 1 Pedro 3:20.
Kon Ngaa Mapailubon ang Dios sa Karon
Amo man ang kahimtangan karon. Sa liwat ang kalibutan napuno sing kasingki. Kasubong sing adlaw ni Noe, ginhukman sang Dios ang kalibutan, nga siling sang Biblia, “ginaaman sa adlaw sang paghukom kag sa kalaglagan sang mga tawo nga didiosnon.” (2 Pedro 3:7) Kon matuman ini, wala na sing magalaglag sa aton palibot, wala na sing may magapigos sa mga maluya, kag sing makagod nga pag-abuso sa gahom.
Ngaa nian wala dayon ginlaglag sang Dios ang mga malauton sadto? Bangod may yara mga isyu nga dapat husayon kag importante nga mga butang nga pagahimuson. Sa pagkamatuod, si Jehova nagapanghikot na para sa isa ka permanente nga solusyon sa problema sang kalautan nga nagalakip sang madamo nga mga butang lakip ang pagluwas sa katawhan nga may matarong sing tagipusuon gikan sa kahiulipnan sang balatian kag kamatayon.
Nagahunahuna sining mga butang, gintuyo ni Jehova nga magpadala sang isa ka manunubos nga magaaman sing halad nga gawad para sa aton mga sala. Tuhoy sa iya, ang Biblia nagasiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Naglawig sing linibo ka tuig ang paghanda sing dalan sa pagkari ni Jesus kag paghalad sang iya kabuhi para sa katawhan. Sa sulod sadtong mga tinuig, ang Dios mahigugmaon nga nagpailob. Indi bala takus sang paghulat ang amo nga aman?
Ginhatag ni Jesus ang aman mga duha ka libo ka tuig na ang nagligad. Ngaa nian, nga si Jehova padayon pa nga nagapailob? Sa isa ka rason, ang kamatayon ni Jesus nagpahibalo sang pagsugod sang isa ka kampanya sang pagtuon. Ang katawhan dapat makatuon sining mahigugmaon nga aman kag hatagan sing kahigayunan nga batunon ukon sikwayon ini. Magakinahanglan ini sing tion, apang isa ini ka maayo nga paghinguyang sang tion. Ang Biblia nagasiling: “Si Jehova wala nagapalantang nahanungod sa iya saad suno sa pagbanta sang iban sa pagpalantang kondi mabinatason sia ayon sa inyo, nga wala nagahandum nga ang bisan sin-o mawala, kundi nga ang tanan makadangat sa paghinulsol.”—2 Pedro 3:9.
Ang Hulusayon Tuhoy sa Panguluhan
May isa pa ka importante nga butang nga nagkinahanglan man sing tion. May yara pagkinahanglan nga lubaron ang palaligban sang katawhan tuhoy sa panguluhan. Sa ginsuguran ang tawo yara sa idalom sang diosnon nga paggahom. Apang, gintalikdan ini sing una nga mag-asawa sa hardin sang Eden. Ginpili nila nga mangin hilway sa Dios, kay luyag nila nga maggahom sa ila kaugalingon. (Genesis 3:1-5) Apang ang matuod, ang tawo wala gintuga nga maggahom sa iya kaugalingon. Ang manalagna nga si Jeremias nagsulat: “O Jehova, nahibaluan ko nga ang dalanon sang tawo wala sa iya kaugalingon, wala sa tawo nga nagalakat ang pagmando sa iya mga tikang.”—Jeremias 10:23; Hulubaton 20:24.
Walay sapayan, sugod sang ginpautwas ang hulusayon tuhoy sa panguluhan, mapailubon nga naghatag si Jehova sing tion agod lubaron ini. Sa pagkamatuod, maalwan sia nga naghatag sing linibo ka tuig agod nga matilawan sang tawo ang tagsa ka sahi sang porma sang panguluhan. Ano ang resulta? Nangin maathag nga wala sing tawhanon nga panguluhan ang makadula sang pagpamigos, pagkamaypinasulabi, ukon iban nga kabangdanan sang kasubo.
Sa pagkamatuod, sa pagtamod sa maragtas sang tawo, may yara bala isa nga sing matuod makasiling nga ang Dios di-matarong kon sia magapahibalo sang iya tuyo nga dulaon ang tanan tawhanon nga panguluhan kag buslan sila sang iya kaugalingon nga panguluhan? Sing pat-od wala! Sing positibo aton nga abiabihon ang katumanan sang tagna sang Biblia: “Sa adlaw sadtong mga hari ang Dios sang mga langit magapatindog sang isa ka ginharian nga dili na gid mapukan. Kag ining ginharian indi pag-ihatag sa iban nga mga katawhan. Ini magadugmok kag magatapos sining tanan nga ginharian, kag ini magatindog sa walay katubtuban.”—Daniel 2:44.
Ang langitnon nga Hari sa sinang Ginharian amo si Jesus nga ginbanhaw. Ang paghanda sa iya sa amo nga posisyon—subong man ang pagpili sing mga tawo nga mangin kaupod nga manuggahom sa iya—nagkinahanglan sang tion. Sa sulod sinang bug-os nga tion, ang Dios nagpailob.
Magbenepisyo Karon Gikan sa Pagpailob sang Dios
Sa karon, minilyon ka mga indibiduwal sa di-magkubos sa 212 ka mga kadutaan ang nagabenepisyo gikan sa pagpailob sang Dios. Nagahiliusa sila sa ila handum nga tumanon ang Dios kag alagdon ang iya langitnon nga panguluhan. Kon magtililipon sila sa ila mga Kingdom Hall, natun-an nila kon daw ano ka maayo ang pag-aplikar sang mga prinsipyo sang Biblia sa ila kabuhi. Wala sila nagapakigbahin sa nabahinbahin nga politika sining kalibutan, apang ginapaidalom nila ang ila kaugalingon sa mga panguluhan sang tawo samtang ang Dios mapailubon nga nagapahanugot sini nga magpanghikot.—Mateo 22:21; Roma 13:1-5.
Ining sahi sang paghilisugot sa tunga sining katawhan nagabindikar kay Jehova subong ang Isa nga makadala sing paghilisugot sa katawhan nga may kahilwayan sa pagtuon sa paghigugma sa iya kag maluyag sa pag-alagad sa iya. Walay duhaduha nga kamo nakasugata na sining mahigugmaon sa Dios nga mga katawhan samtang nagapadayon sila nga nagahimo sang katulad nga hilikuton nga ginsugdan ni Jesus, nga amo ang pagbantala sang maayong balita sing ginharian sang Dios. Gintagna ni Jesus ang hingapusan sini nga hilikuton sang sia magsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; ugaling magaabot ang katapusan.”—Mateo 24:14.
Indi Na Magadugay Pa!
Ang kitaon nga mga ebidensia nagapamatuod nga ang mga kahimusan para sa matarong nga panguluhan sang Dios sa pagkuha sang matag-adlaw nga paggahom sa duta madali na lang matapos. Pagkatapos malaragway ang terible nga resulta sang kapaslawan sang panguluhan sang tawo nga aton nakita sa sining siglo, si Jesus nagsiling: “Kon makita ninyo nga ining mga butang nagakahanabo, hibalua nga ang ginharian sang Dios malapit na.”—Lucas 21:10, 11, 31.
Sa dili madugay, ang Dios magadula sang malauton gikan sa nawong sang duta. Kag ang mga pulong sang salmista literal nga maaplikar: “Pagautdon ang manughimo sang malaut . . . Dili madugay na lang, kag ang malauton wala na; kag talupangdon nimo ang iya duog kag wala na sia didto.” (Salmo 37:9, 10) Mahanduraw mo bala ang isa ka kalibutan nga wala sing kalautan? Sin-o nian ang magadumala sa mga butang? Ang Biblia nagasiling: “Ang isa ka hari [si Cristo Jesus ginpapungko nga hari sa langit] magahari sa pagkamatarong; kag tuhoy sa mga prinsipe, [ang iya matutom nga mga tinangduan sa duta], magagahom sila subong mga prinsipe sa pagkamatarong. Kag ang buhat sang matuod nga pagkamatarong mangin paghidait; kag ang pag-alagad sang matuod nga pagkamatarong, kag kasiguruhan sa tion nga dimapat-od. Ang akon katawhan magapabilin sa puluy-an nga makidaiton, sa mga puluy-an nga malig-on, kag sa mga palahuwayan nga malinong.”—Isaias 32:1, 17 18.
Sa amo, dulaon sang langitnon nga panguluhan sang Dios ang malain nga epekto sang kalautan sang tawo kag iya organisahon yadtong mga nagalaum sa Iya sa isa ka nagahilisugot nga katililingban sang tawo. Nagalaragway sini nga paghilisugot, ang Biblia nagasiling: “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila . . . Indi sila maghalit ukon maglaglag sa bug-os ko nga bukid nga balaan, kay ang duta matugob sang pagkilala kay Jehova subong nga ang tubig nagatabon sa dagat.”—Isaias 11:6-9.
Daw ano ka makadalayaw nga resulta sang pagpailob sang Dios! Gani, sa baylo nga magreklamo nga ang Dios naghulat sing madugay, ngaa indi paghimuslan ang pagpailob sang Dios paagi sa pagpasakop sang imo kaugalingon sa iya nga Ginharian? Tun-i gikan sa Biblia kon ano ang iya mga talaksan kag magpahisuno sa sini. Makig-angot sa iban nga nagapasakop sa iya. Nian, ang pagpailob sang Dios magaresulta sa walay katapusan nga pagpakamaayo sa imo.