Pagpalambo sang Bunga sang Pagpugong sa Kaugalingon

“Ang bunga sang espiritu amo ang gugma, kalipay, paghidait, pagbatas, pagkalulo, pagkaayo, pagtuo, pagkalum-ok, pagpugong sang kaugalingon. Batok sa amo wala sing kasuguan.”​—⁠GALACIA 5:22, 23.

1. Sin-o ang naghatag sa aton sing pinakamaayo nga halimbawa sang pagpugong sa kaugalingon, subong sang ginapakita sang anong mga kasulatan?

SI Jehova nga Dios kag si Jesucristo naghatag sing pinakamaayo nga halimbawa sang pagpugong sa kaugalingon. Kutob sang pagkadimatinumanon sang tawo sa katamnan sang Eden, si Jehova padayon nga nagpakita sini nga kinaiya. (Ipaanggid ang Isaias 42:⁠14.) Aton mabasa sing siam ka beses sa Hebreong Kasulatan nga sia “makuli sa pagpangakig.” (Exodo 34:6) Nagakinahanglan ini sing pagpugong sa kaugalingon. Kag pat-od gid nga ang Anak sang Dios nagpakita sing daku nga pagpugong sa kaugalingon, kay “sang ginpasipalahan sia, wala sia magbalus sa pagpasipala.” (1 Pedro 2:23) Apang, mahimo kuntani nga ginpangayo ni Jesus sa langitnon nga Amay ang pagsakdag sang “kapin sa napulog duha ka legion nga mga anghel.”​—⁠Mateo 26:⁠53.

2. Ano ang aton maayong Makasulatanhon nga halimbawa sang pagpakita sing pagpugong sa kaugalingon sang dihimpit nga mga tawo?

² May yara man kita pila ka maayong Makasulatanhon nga mga halimbawa sang pagpugong sa kaugalingon nga ginpakita sang dihimpit nga mga tawo. Halimbawa, ini nga kinaiya ginpakita sadto sa isa ka talalupangdon nga hitabo sa kabuhi ni Jose, ang anak ni patriarka Jacob. Daw ano nga pagpugong sa kaugalingon ang ginpakita ni Jose sang gintinguhaan sang asawa ni Potifar nga sulayon sia! (Genesis 39:​7-9) Yara man ang maayo nga halimbawa sang apat ka Hebreo nga mga pamatan-on nga nagpakita sing pagpugong sa kaugalingon paagi sa indi pagkaon sang manamit nga pagkaon sang hari sang Babilonia bangod sang mga pagdumili sang Mosaikong Kasuguan.​—⁠Daniel 1:​8-17.

3. Sin-o ang kilala bangod sang ila maayo nga batasan, subong sang makita sa anong pamatuod?

³ Para sa modernong-adlaw nga mga halimbawa sang pagpugong sa kaugalingon, matudlo naton ang mga Saksi ni Jehova subong kabilugan. Nagakaigo sila sang kumendasyon nga ginhatag sa ila sang New Catholic Encyclopedia​—⁠nga sila amo ang “isa sang mabuot nga mga grupo sa kalibutan.” Isa ka instruktor sa unibersidad sa Pilipinas ang nagsiling nga “ang mga Saksi nagabuhat sing tudok sang kon ano ang natun-an nila gikan sa Kasulatan.” Nahanungod sa kombension sang mga Saksi sa Warsaw sadtong 1989, ang isa ka Polaco nga reporter nagsulat: “55,000 ka tawo ang wala nanigarilyo sing isa ka sigarilyo sa tatlo ka adlaw! . . . Ining pagpakita sing labaw sa tawo nga disiplina nagpukaw sa akon sa pagdayaw nga ginpaupdan sang kahayanghag.”

Pagkahadlok sa Dios kag Pagdumot sa Malaut

4. Ano ang isa sang labing daku nga bulig sa pagpakita sing pagpugong sa kaugalingon?

⁴ Ang isa sang labing daku nga bulig sa pagpalambo sing pagpugong sa kaugalingon amo ang pagkahadlok sa Dios, ang kahadlok nga indi pagpahamut-an ang aton mahigugmaon nga langitnon nga Amay. Kon daw ano ka importante sa aton ang matinahuron nga pagtahod sa Dios makita sa katunayan nga ang Kasulatan nagasambit sini sa madamong beses. Sang buot na ihalad ni Abraham ang iya anak nga si Isaac, ang Dios nagsiling: “Dili pagpatup-i sang imo kamot ang bata ukon pag-anha sia, kay karon nakilala ko nga ikaw nagakahadlok sa Dios sa ginatan-aw nga wala mo pag-idumili sa akon ang imo anak nga bugtong.” (Genesis 22:12) Walay duhaduha nga may daku nga pagsanting sang emosyon sadto nga okasyon, gani nagkinahanglan gid sing daku nga pagpugong sang kaugalingon sa bahin ni Abraham ang tumanon ang sugo sang Dios tubtob sa punto nga ginbayaw niya ang iya kutsilyo agod patyon ang iya hinigugmang anak nga si Isaac. Huo, ang pagkahadlok sa Dios nagabulig sa aton sa pagpakita sing pagpugong sa kaugalingon.

5. Ano ang papel sang pagdumot sang malaut sa paghimo naton sing pagpugong sa kaugalingon?

⁵ Naangot sing suod sa pagkahadlok kay Jehova amo ang pagdumot sang malaut. Aton mabasa sa Hulubaton 8:​13: “Ang kahadlok kay Jehova amo ang pagdumot sang malaut.” Busa, ang pagdumot sang malaut nagabulig man sa aton sa pagpakita sing pagpugong sa kaugalingon. Sa liwat kag liwat, ang Kasulatan nagasugo sa aton nga dumtan​—⁠huo, kangil-aran⁠—​ang malaut. (Salmo 97:​10; Amos 5:​14, 15; Roma 12:9) Ang malaut masunson nga makalilipay, makasululay, makagalanyat gid sa bagay nga dapat naton ini dumtan agod palig-unon ang aton kaugalingon batok sini. Inang pagdumot sa malaut may epekto nga nagapabakod sang aton determinasyon nga ipakita ang pagpugong sa kaugalingon kag busa isa ka proteksion sa aton.

Pagpugong sa Kaugalingon, ang Dalanon sang Kaalam

6. Ngaa dalanon sang kaalam nga punggan ang aton makagod nga mga huyog paagi sa paghimo sing pagpugong sa kaugalingon?

⁶ Ang isa pa ka dakung bulig sa pagpakita naton sing pagpugong sa kaugalingon amo ang pag-apresyar sa kaalam sang pagpakita sini nga kinaiya. Si Jehova nagapangabay sa aton nga ipakita ang pagpugong sang kaugalingon para sa aton kaugalingon nga kaayuhan. (Ipaanggid ang Isaias 48:​17, 18.) Ang iya Pulong nagaunod sing madamong laygay nga nagapakita kon daw ano ka maalamon nga tapnaon ang aton makagod nga mga huyog paagi sa pagpakita sing pagpugong sa kaugalingon. Indi gid naton malikawan ang wala nagabag-o nga mga sugo sang Dios. Ang iya Pulong nagasugo sa aton: “Bisan ano ang ginasab-ug sang tawo, ina man ang iya anihon; kay ang nagsab-ug sa iya kaugalingon nga unod magaani sing kaduluntan gikan sa unod, apang ang nagasab-ug sa unod magaani sing kabuhi nga dayon gikan sa espiritu.” (Galacia 6:​7, 8) Ang maathag nga halimbawa amo ang pagkaon kag pag-inom. Madamong balatian ang nagaresulta bangod sang sobra nga pagkaon ukon pag-inom sang mga tawo. Nadula sang isa ang pagtahod sa kaugalingon bangod sang kakagod. Kapin pa sa sina, ang indibiduwal indi mahimo mangin makagod nga wala man nagahalit sang iya kaangtanan sa iban. Sing serioso pa sa tanan, ang kakulang sing pagpugong sa kaugalingon nagahalit sang aton kaangtanan upod sa aton langitnon nga Amay.

7. Ano ang pangunang tema sang tulun-an sang Mga Hulubaton, subong sang ginapakita sang anong teksto sa Biblia?

⁷ Busa, dapat naton pirme pahanumdumon ang aton kaugalingon nga ang kakagod nagapaslaw sang kaugalingon. Ang tumalagsahon nga tema sang tulun-an sang Mga Hulubaton, nga nagapadaku sang pagpugong sa kaugalingon, amo nga ang kakagod indi makabayad kag may kaalam sa pagpakita sing pagpugong sa kaugalingon. (Hulubaton 14:​29; 16:32) Kag dapat tandaan nga ang pagdisiplina sa kaugalingon nagalakip sing labi pa sa paglikaw lamang sa malaut. Ang pagdisiplina sa kaugalingon, ukon pagpugong sa kaugalingon, kinahanglan man sa paghimo sing matarong, nga mahimo mabudlay bangod supak ini sa aton makasasala nga mga huyog.

8. Anong eksperiensia ang nagapatalupangod sang kaalam sang pagpakita sing pagpugong sa kaugalingon?

⁸ Nagailustrar sang kaalam sang pagpakita sing pagpugong sa kaugalingon amo ang natabo sa isa ka Saksi ni Jehova nga nagalinya sa isa ka banko sang nagsal-ot ang isa ka tawo agod makauna sa iya. Bisan pa naugot diutay ang Saksi, ginpakita niya ang pagpugong sa kaugalingon. Sadto man nga adlaw dapat sia makigkita sa isa ka enhinyero agod papirmahan ang mga plano sa Kingdom Hall. Kag sin-o gali ang enhinyero? Ti, ang tawo mismo nga nagsal-ot sa iya kaina sa bangko! Indi lamang nga nangin tuman ka mainabyanon ang enhinyero kundi ginbuhinan niya sing ikapulo nga bahin sang regular nga bayad ang ginsukot niya sa Saksi. Malipayon gid ang Saksi nga ginpakita niya ang pagpugong sa kaugalingon sadto nga adlaw, nga wala nagtugot sang iya kaugalingon nga maakig!

9. Ano ang dalanon sang kaalam kon makabati kita sing malaw-ay nga mga tinaga sa ministeryo?

⁹ Sa liwat kag liwat kon nagapamalaybalay kita nga nagabantala sang maayong balita sang Ginharian sang Dios ukon nagatindog sa hilit sang dalan sa pagpakigsugilanon sa mga nagalabay nahanungod sa aton mensahe, makabati kita sing malaw-ay nga mga tinaga. Ano ang dalanon sang kaalam? Ginhatag ining maalamon nga laygay sa Hulubaton 15:​1: “Ang mahumok nga panalabton nagapalugpay sang kasingkal.” Sa iban nga hambal, dapat kita magpakita sing pagpugong sa kaugalingon. Kag indi lamang mga Saksi ni Jehova ang nakasapo nga matuod ini kundi ang iban man. Ang nagabulong nga kabilihanan sang pagpugong sa kaugalingon ginaapresyar sing labi pa sang mga doktor.

Ang Dimakagod nga Gugma Nagabulig

10, 11. Ngaa isa gid ka daku nga bulig ang gugma sa pagpakita sing pagpugong sa kaugalingon?

¹⁰ Ang paglaragway ni Pablo sang gugma sa 1 Corinto 13:​4-8 nagapakita nga ang gahom sini sarang makabulig sa aton sa pagpakita sing pagpugong sa kaugalingon. “Ang gugma mabinatason.” Ang pagkamabinatason nagakinahanglan sing pagpugong sa kaugalingon. “Ang gugma wala nagakahisa, wala ini nagapahabok.” Ang kinaugali nga gugma nagabulig sa aton sa pagkontrol sang aton hunahuna kag emosyon, sa pagtapna sang huyog nga magkahisa, magpabugal, ukon maghabok. Ang gugma nagapahulag sa aton nga mangin kabaliskaran sini, nagahimo sa aton nga mapainubuson, mapailubon, kaangay ni Jesus.​—⁠Mateo 11:​28-30.

¹¹ Si Pablo padayon sa pagsiling nga ang gugma “wala nagagawi sing dinagakaigo.” Nagakinahanglan man sing pagpugong sa kaugalingon ang maggawi sing nagakaigo sa tanan nga tion. Ang kinaiya nga gugma nagapahilayo sa aton sa kakagod, ‘sa pagpangita sang aton kaugalingon nga kaayuhan.’ Ang gugma “indi mainakigon.” Daw ano kahapos ang maakig sa kon ano ang ginasiling ukon ginahimo sang iban! Apang ang gugma magabulig sa aton sa pagpakita sing pagpugong sa kaugalingon kag indi magasiling ukon magahimo sang mga butang nga sa ulihi pagahinulsulan naton. Ang gugma “wala nagasapak sang kalautan.” Ang kinaugali sang tawo nahuyog sa pagtanum sing kaugot ukon pagpalambo sing kaakig. Apang ang gugma nagabulig sa aton sa pagdula sinang panghunahuna sa aton painoino. Ang gugma “wala nagakalipay sa katikuan.” Nagakinahanglan sing pagpugong sa kaugalingon ang indi magkalipay sa kon ano ang dimatarong, subong sang pornograpiya ukon malaw-ay nga mga drama sa TV. Ang gugma “nagabatas [man] sang tanan nga butang” kag “nagaantos sang tanan nga butang.” Nagakinahanglan sing pagpugong sa kaugalingon ang pasensiahan ang mga problema, batason ang mabudlay ukon mabug-at nga mga problema kag indi ini pagtugutan nga magpaluya sa aton, magtiklod sa aton nga magbalus man, ukon maghimo sa aton nga mag-untat sa pag-alagad kay Jehova.

12. Ano ang isa ka paagi sa pagpakita sang aton apresasyon para sa tanan nga ginhimo sa aton ni Jehova nga Dios kag ni Jesucristo?

¹² Kon ginahigugma gid naton ang aton langitnon nga Amay kag ginaapresyar ang iya matahom nga mga kinaiya kag ang tanan nga ginhimo niya para sa aton, luyag naton sia pahamut-an paagi sa pagpakita sing pagpugong sang kaugalingon sa tanan nga tion. Subong man, kon ginahigugma gid naton ang aton Ginuo kag Agalon, si Jesucristo, kag ginaapresyar ang tanan nga ginhimo niya para sa aton, pamatian naton ang iya laygay nga ‘pas-anon ang aton usok kag sundon sia.’ (Marcos 8:34) Nagakinahanglan gid ina nga ipakita naton ang pagpugong sa kaugalingon. Ang aton gugma sa aton Cristianong mga kauturan nga lalaki kag babayi magapugong man sa aton nga saklawon sila paagi sa aton makagod nga dalanon.

Ang Pagtuo kag Pagpaubos Subong mga Bulig

13. Ngaa makabulig sa aton ang pagtuo sa pagpakita sing pagpugong sa kaugalingon?

¹³ Ang isa pa ka dakung bulig sa pagpakita sing pagpugong sa kaugalingon amo ang pagtuo sa Dios kag sa iya mga saad. Ang pagtuo nagahimo sa aton nga magsalig kay Jehova kag maghulat sa iya gintalana nga tion sa pagtadlong sang mga butang. Amo man sini ang punto ni apostol Pablo sang nagsiling sia sa Roma 12:​19: “Dili kamo magtimalus, mga hinigugma, . . . kay nasulat na, ‘Akon ang pagtimalus; ako ang magatumbas, nagasiling si Jehova.’ ” Nahanungod sini, ang pagpaubos makabulig man sa aton. Kon mapainubuson kita, indi kita mangin maabtik sa paghimo sing malain bangod sang ginahunahuna ukon matuod nga mga halit. Indi kita padasudaso nga magabutang sang kasuguan sa aton mga kamot, kon hambalon pa, kundi magapakita sing pagpugong sa kaugalingon kag mangin handa sa paghulat kay Jehova.​—⁠Ipaanggid sang Salmo 37:​1, 8.

14. Anong eksperiensia ang nagapakita nga ang pagpugong sa kaugalingon sarang matigayon bisan sadtong nakulangan gid sini?

¹⁴ Ang eksperiensia sang isa ka tawo nga may masingki nga kaakig nagahatag sa aton sing leksion nahanungod sa pagpakita sing pagpugong sa kaugalingon. Ti, daku gid ang iya kaakig sa bagay nga sang nag-abot ang mga pulis bangod sang kinagual nga ginhimo niya kag sang iya amay, gintapungol niya ang tatlo ka pulis sa wala pa sia mapunggi sang iban! Apang, sang ulihi, nakapakig-angot sia sa mga Saksi ni Jehova kag nakatuon sa pagpakita sing pagpugong sa kaugalingon, isa sang mga bunga sang espiritu sang Dios. (Galacia 5:​22, 23) Karon, 30 ka tuig sang ulihi, nagaalagad sia gihapon sing matutom kay Jehova.

Pagpugong sa Kaugalingon sa Sulod sang Pamilya

15, 16. (a) Ano ang magabulig sa bana sa pagpakita sing pagpugong sa kaugalingon? (b) Sa anong kahimtangan labi na nga kinahanglan ang pagpugong sa kaugalingon, subong sang makita gikan sa anong eksperiensia? (c) Ngaa kinahanglan sang isa ka asawa ang pagpugong sa kaugalingon?

¹⁵ Ang pagpugong sa kaugalingon kinahanglanon gid sa sulod sang pamilya. Agod mahigugma sang bana ang iya asawa subong sang paghigugma niya sa iya kaugalingon nagakinahanglan nga magpakita sia sing daku nga pagpugong sa iya mga painoino, mga tinaga, kag mga buhat. (Efeso 5:​28, 29) Huo, nagakinahanglan sing pagpugong sa kaugalingon agod pamatian sang mga bana ang mga pulong ni apostol Pedro sa 1 Pedro 3:​7: “Kamo nga mga bana, padayon kamo nga magkabuhi sa kaanggid nga paagi kaupod sang inyo mga asawa suno sa ihibalo.” Ang tumuluo nga bana dapat magpakita sing pagpugong sa kaugalingon labi na kon ang asawa indi tumuluo.

¹⁶ Sa pag-ilustrar: May isa ka gulang nga may maakigon katama nga ditumuluo nga asawa. Apang, nagpakita sia sing pagpugong sa kaugalingon, kag nakabulig gid ini sa iya sing daku sa bagay nga ginsingganan sia sang iya doktor: “John, ayhan sa kinaugali isa gid ikaw ka pasensioso nga tawo ukon indi gani may yara ikaw mabakod nga relihion.” May yara gid kita sa pagkamatuod mabakod nga relihion, kay “ang Dios wala maghatag sa aton sang espiritu sang katalaw, kundi sang gahom kag gugma kag kaligdong sang hunahuna,” nagahimo sa aton sa pagpakita sing pagpugong sa kaugalingon. (2 Timoteo 1:7) Dugang pa, kinahanglan ang pagpugong sa kaugalingon sa bahin sang asawa nga magpasakop, labi na kon ang iya bana ditumuluo.​—⁠1 Pedro 3:​1-4.

17. Ngaa importante ang pagpugong sa kaugalingon sa ginikanan-bata nga kaangtanan?

¹⁷ Kinahanglan man ang pagpugong sa kaugalingon sa ginikanan-bata nga kaangtanan. Agod may mga kabataan nga mapinugungon sa kaugalingon, ang mga ginikanan mismo dapat anay magpakita sing maayo nga halimbawa. Kag kon ang kabataan kinahanglan disiplinahon, dapat ini pirme ipadapat upod ang kakalma kag gugma, nga nagakinahanglan sing tunay nga pagpugong sa kaugalingon. (Efeso 6:​4; Colosas 3:21) Nian sa liwat, agod mapakita sang mga kabataan nga ginahigugma gid nila ang ila mga ginikanan nagakinahanglan ini sing pagkamatinumanon, kag ang pagtuman nagakinahanglan sing pagpugong sa kaugalingon.​—⁠Efeso 6:​1-3; ipaanggid ang 1 Juan 5:⁠3.

Paghimulos sa Bulig nga Ginahatag sang Dios

18-20. Anong tatlo ka aman ang dapat naton himuslan agod mapalambo ang mga kinaiya nga magabulig sa aton sa pagpakita sing pagpugong sa kaugalingon?

¹⁸ Agod magtubo sa kahadlok sa Dios, sa dimakagod nga gugma, sa pagtuo, sa pagdumot sa malaut, kag sa pagpugong sa kaugalingon, dapat naton himuslan ang tanan nga bulig nga ginahatag ni Jehova nga Dios. Binagbinagon naton ang tatlo ka espirituwal nga mga aman nga makabulig sa aton sa pagpakita sing pagpugong sa kaugalingon. Una sa tanan, yara ang hamili nga pribilehiyo sang pangamuyo. Indi gid naton luyag nga magmangin tuman kasako sa pagpangamuyo. Huo, dapat kita maghandum nga “magpangamuyo sa walay langan,” ukon “magpadayon sing malig-on sa pangamuyo.” (1 Tesalonica 5:​17; Roma 12:12) Himuon naton ang pagpalambo sing pagpugong sa kaugalingon nga isa ka butang nga ipangamuyo. Apang kon indi kita makapakita sing pagpugong sa kaugalingon, mahinulsulon kita nga makapangayo sing kapatawaran sa aton langitnon nga Amay paagi sa pangamuyo.

¹⁹ Ang ikaduha nga bulig sa pagpakita sing pagpugong sang kaugalingon amo ang pagkuha sing bulig gikan sa pagbasa sang Pulong sang Dios kag sa literatura nga nagabulig sa aton sa paghangop kag sa pag-aplikar sang Kasulatan. Mahapos katama patumbayaan ini nga bahin sang aton balaan nga pag-alagad! Dapat kita magpakita sing pagpugong sa kaugalingon kag magpadayon sa pagsugid sa aton kaugalingon nga wala na sing mas importante pa nga balasahon sang sa Biblia kag nga gin-aman ini sang “matutom kag mainandamon nga ulipon,” kag busa dapat naton ini unahon. (Mateo 24:​45-47) Ginasiling nga ang kabuhi indi gid ini kag ina kundi ini ukon ina. Kita bala espirituwal gid nga mga lalaki kag mga babayi? Kon mahunahunaon kita sa aton espirituwal nga kinahanglanon, ipakita naton ang pagpugong sa kaugalingon nga ginakinahanglan agod patyon ang TV kag handaan ang aton mga miting ukon basahon Ang Lalantawan nga mahimo bag-o lang mag-abot sa koreo.

²⁰ Ikatlo, yara man ang nahanungod sa pagpakita sing nagakaigo nga apresasyon sa aton mga miting sa kongregasyon kag sa dalagku nga mga asambleya kag mga kombension. Importante gid bala sa aton inang mga miting? Nagatambong bala kita nga handa sa pagpakigbahin kag nian sa pagkomento kon may kahigayunan kita? Kon daw ano ka daku nga apresasyon ang aton ginapakita sa aton mga miting, pabakuron man kita sing daku sa aton determinasyon nga ipakita ang pagpugong sa kaugalingon sa tanan nga mga sirkunstansia.

21. Ano ang pila ka padya nga maagom naton bangod sang pagpalambo sang bunga sang espiritu nga pagpugong sa kaugalingon?

²¹ Anong mga padya ang mapaabot naton bangod sang pagpanikasog sing lakas nga ipakita ang pagpugong sa kaugalingon sa tanan nga tion? Una, indi gid kita magaani sing mapait nga bunga sang kakagod. May yara kita pagtahod sa kaugalingon kag matinlo nga konsiensia. Maluwas naton ang aton kaugalingon sa madamong mga problema kag magapabilin sa dalan padulong sa kabuhi. Dugang pa, mahimo naton ang pinakamaayo nga posible sa tanan. Labaw sa tanan, ginatuman naton ang Hulubaton 27:11: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagapakahuya sa akon.” Kag amo ina ang labing daku nga padya nga posible nga matigayon naton​—⁠ang pribilehiyo nga mapahalipay ang tagipusuon sang aton mahigugmaon nga langitnon nga Amay, si Je­hova!

Madumduman Mo Bala?

◻ Paano ang kahadlok sa Dios nagabulig sa aton sa pagpakita sing pagpugong sa kaugalingon?

◻ Ngaa ang gugma nagabulig sa aton sa pagpakita sing pagpugong sa kaugalingon?

◻ Paano ang pagpugong sa kaugalingon nagabulig sa mga kaangtanan sa pamilya?

◻ Anong mga aman ang dapat naton himuslan agod mapalambo naton ang pagpugong sa kaugalingon?

[Laragway sa pahina 15]

Si Jose nagpakita sing pagpugong sa kaugalingon sang ginsulay sia

[Laragway sa pahina 17]

Ang pagdisiplina sa bata nga ginapadapat upod ang kakalma kag gugma nagakinahanglan sing pagpugong sa kaugalingon