“Ang Iya Mahigugmaon nga Kaluoy Napamatud-an nga Daku”

PANUGIRON NI JOSÉ VERGARA OROZCO

Sa banta mo ang imo bala kabuhi mahimo nga mapuno sing bag-ong kapagsik sa edad nga 70 anyos? Amo sina sa akon. Kag kapin sa 35 ka tuig ina sang nagligad.

Paagi sa mahigugmaon nga kaluoy ni Jehova, kutob sang 1962, nagaalagad ako subong regular payunir, kag kutob sang 1972, isa ako ka manugtatap sa Kongregasyon sang mga Saksi ni Jehova sa El Carrizal sa estado sang Jalisco, Mexico. Sugiran ko kamo sang diutay nga bahin sang akon kabuhi.

NATAWO ako sa estado sang Michoacán, sa Mexico, sadtong Agosto 18, 1886. Mason ang akon amay, gani ang amon pamilya wala nagasimba sa Simbahan sang Katoliko, kag wala kami nagapakigbahin sa relihiosong mga selebrasyon sang Katoliko ukon may relihiosong imahen sa amon balay.

Sadtong 16 anyos ako, ang akon amay nagkadto sa Estados Unidos agod magtrabaho, apang gin-areglar niya sa isa ka tawo nga tudluan ako sing trabaho. Apang, pagligad sang duha ka tuig, gindala ako sang tawo sa Siudad sang Mexico agod maghanas sa isa ka militar nga akademiya. Pagkatapos sadto ginsugdan ko ang pagsoldado sa hangaway sang Mexico.

Sa Hangaway kag Pagkatapos

Nakig-away ako sa Rebolusyon sang Mexico nga nagsugod sang 1910. Kami tanan nga mga pamatan-on sa akademiya nagsupurta kay Francisco I. Madero, nga isa ka rebolusyonaryo nga nagapamatok sa pagkadiktador ni Porfirio Díaz. Ginsupurtahan namon si Madero tubtob sang napatay sia sang 1913, kag pagkatapos sina, ginsupurtahan namon si Venustiano Carranza, nga nangin presidente sang Republika kutob sang 1915 tubtob 1920. Gintawag kami nga Carranzistas.

Sa apat ka lainlain nga okasyon, gintinguhaan ko, sa walay kadalag-an, nga makaguwa sa hangaway. Sang ulihi nagpalagyo ako kag nangin pugante. Bangod sina, ang akon amay, nga nagbalik sa Mexico, ginbilanggo. Isa ka adlaw, nagpakunokuno nga hinablos niya, ginduaw ko sia sa bilangguan. Nagsugilanunay kami paagi sa pagsulat sa diutay nga papel agod indi kami mabatian sang guwardia. Agod indi matukiban kon sin-o ako, ginkaon ko ang papel.

Sang ginpaguwa sa bilangguan ang akon amay, ginduaw niya ako kag ginpangabay nga mag-ampo ako sa mga awtoridad. Ginhimo ko ini, kag sa akon kakibot wala ako pagdakpa sang may katungdanan nga heneral. Sa baylo, ginpanugda niya nga magkadto ako sa Estados Unidos. Ginsunod ko ang iya panugda kag nag-istar didto kutob sang 1916 tubtob 1926.

Sang 1923, nangasawa ako sing isa ka Mexicana nga nagaistar man sa Estados Unidos. Nakatuon ako sing obra sa konstruksion, kag nag-adoptar kami sing isa ka bata nga babayi. Sang 17 ka bulan sia, nagbalik kami sa Mexico kag nagpuyo sa Jalpa, Tabasco. Nian nagsugod ang ‘Cristero rebelyon,’ kag naglawig ini halin sang 1926 tubtob 1929.

Luyag sang Cristeros nga magbuylog ako sa ila. Apang, ginpakamaayo namon sang akon pamilya nga magpalagyo sa Estado sang Aguascalientes. Pagkatapos sang pagsulusaylo sa lainlain nga mga duog sa republika sang Mexico, sang 1956 nagpuyo kami sa Matamoros, Tamaulipas, diin ginsugdan ko ang pagdumala sa mga obra sa konstruksion.

Nagbalhin ang Akon Kabuhi

Diri sini nga nagbalhin ang akon kabuhi. Ang akon anak, nga namana na kag nagapuyo sa pihak sang dulunan sa Brownsville, Texas, E.U.A., nagaduaw pirme sa amon. Isa ka adlaw nagsiling sia: “Dad, madamong pamilya ang nagatipon karon mismo sa union hall. Malakat kita kag tan-awon naton kon tuhoy ini sa ano.” Isa yadto ka asambleya sang mga Saksi ni Jehova. Ang akon anak, umagad, apo nga lalaki, asawa, kag ako nagtambong sa bug-os nga apat ka adlaw nga asambleya.

Kutob sadto nga tuig padayon, nagtambong kami sa Cristianong mga miting sang mga Saksi ni Jehova. Nag-uswag ako sa espirituwal sa Mexico, kag ang akon man anak sa Estados Unidos. Sa dili madugay ginsugiran ko ang akon mga kaupod sa trabaho sang mga kamatuoran sa Biblia nga natun-an ko. Nagabaton ako sing napulo ka magasin sang kada guwa sang Ang Lalantawan kag Magmata!, kag ginpanagtag ko ini sa akon mga kaupod sa trabaho. Lima sa opisina kag tatlo ka enhinyero kag ang iban sang amon mga trabahador ang nangin mga Saksi.

Abaw, tuman gid katugnaw sadto sang Disiembre 19, 1959, sang ginbawtismuhan ako sa suba! Ang tanan nga nabawtismuhan sadto nga adlaw nagmasakit bangod sang sobra katugnaw nga tubig. Nauna sa akon nga nabawtismuhan ang akon anak, kag ang akon asawa, bisan pa wala nabawtismuhan, nakalab-ot sa punto nga natun-an niya ang kamatuoran sang Biblia, kag tuman sa iya ka masinakdagon.

Ang Bug-os Tion nga Ministeryo

May utang nga kabalaslan ako sa Dios tungod sang tanan niya nga mahigugmaon nga kaluoy, gani sang Pebrero 1962, sang 75 anyos ang akon edad, nagsulod ako sa bug-os tion nga ministeryo subong payunir. Pagligad sang mga pila ka tuig, sang 1968, ang akon asawa napatay. Luyag ko sadto mag-alagad sa iban nga pungsod, apang bangod sang akon edad, ang mga kauturan naghunahuna nga indi ina maayo. Apang, sang 1970, gintangdo ako subong isa ka payunir sa Colotlán sa estado sang Jalisco, diin may isa ka diutay nga kongregasyon.

Sang Septiembre 1972, ang manugtatap sa sirkito nagpanugda nga magsaylo ako sa diutay nga banwa sang El Carrizal, nga malapit sa Colotlán. Sang Nobiembre sadto nga tuig, isa ka kongregasyon ang natukod didto, kag gintangdo ako nga isa ka gulang. Bisan pa nabaw-ing gid katama ini nga banwa, tubtob sa 31 ang nagatambong sa mga miting sang kongregasyon.

Walay sapayan sang akon edad, aktibo gihapon ako sa ministeryo, nagapanikasog sing daku nga buligan ang mga tawo sa pagpangatarungan sa ila mga pagtuluuhan. Halimbawa, sa Rosario ang sinsero nga mga Katoliko nagasulitsulit sang Maghimaya Ka Maria: “Maghimaya ka, Maria, napuno ka sing grasya; ang Ginuo yara sa imo.” Ang pangadi nagadugang: ‘Maghimaya ka Maria, Iloy sang Dios.’ Ginpamangkot ko sila: ‘Paano ina natabo? Kon ang Dios amo ang isa nga nagaluwas kay Maria, paano Sia mangin anak man niya?’

Karon 105 anyos na ako kag nagaalagad subong isa ka gulang kag subong isa ka regular payunir sa El Carrizal, Jalisco, sa halos 20 ka tuig. Nagabatyag ako nga kabubut-on ni Jehova nga mabuhi ako sa madamong tuig, kay sa sining paagi matumbasan ko ang tion nga nawasi ko sang wala pa ako nagaalagad sa Iya.

Isa ka butang nga natun-an ko amo nga dapat kita pirme magsalig nga ang aton Supremo nga Hukom nagabantay sa aton gikan sa iya matarong nga trono kag nagaaman sa aton sang aton mga kinahanglanon. Subong sang ginasiling sang Salmo 117:2: “Ang iya mahigugmaon nga kaluoy napamatud-an nga daku sa aton.”