Ang Semana nga Nagbalhin sang Kalibutan

“Bulahan sia nga nagakari sa ngalan ni Jehova!”—MATEO 21:9.

1. Anong duha ka magkatuhay nga grupo ang naapektuhan sang mga natabo sang nagligad nga Agosto?

“TATLO KA MAKABALAKA NGA ADLAW NGA NAGTAY-UG SANG KALIBUTAN.” Sang Agosto 1991, ang mga ulong-dinalan sa media subong sini nagpadaku sang kamatuoran nga ang kalibutan mahimo maggamo sa sulod lamang sang pila ka adlaw. Sa pagkamatuod, ang nagahingapos nga mga adlaw sang Agosto nangin labing talalupangdon indi lamang para sa kalibutan kundi para man sa isa ka grupo nga tuhoy sa ila si Jesus nagsiling: “Indi sila bahin sang kalibutan.” Ining grupo nakilala karon subong mga Saksi ni Jehova.—Juan 17:14.

2, 3. (a) Paano ang kahilwayan ginpadaku sa Zagreb walay sapayan sang gal-um sang inaway? (b) Paano ginpadyaan ang malig-on nga pagtuo sa Odessa?

² Ang una nga internasyonal nga kombension sang mga Saksi ni Jehova nga ginplano para sa Yugoslavia gin-iskedyul sang Agosto 16 tubtob 18. Subong resulta, amo man ini ang una nga dakung kombension sang katawhan ni Jehova sa sulod sang isa ka pungsod nga yara sa bibi sang inaway sibil. Ang lokal nga mga Saksi, upod sa mga boluntaryo gikan sa kaingod nga mga pungsod, nagpangabudlay sing duha ka bulan sa pagpatahom sa HAŠK Gradanski nga isa ka istadyum para sa soccer sa Zagreb. Nagtinlo gid ini, isa ka matahom nga lokasyon para sa “Mga Mahigugmaon sang Diosnon nga Kahilwayan” nga Kombension. Linibolibo sang internasyonal nga mga delegado ang nagplano sa pagtambong, lakip ang 600 gikan sa Estados Unidos. Samtang nagaporma ang mga gal-um sang inaway sibil, ang balita naglapta: “Ang mga Amerikano indi gid mag-abot.” Apang nag-abot gid sila, upod sa mga delegado gikan sa madamo pa nga mga pungsod. Dies mil ang ginlauman nga matambong, apang 14,684 ang nag-abot sa istadyum sang hingapusan nga adlaw! Ang tanan bugana nga ginpakamaayo bangod wala nila ‘ginbiyaan ang pagtilipon sing tingob.’—Hebreo 10:25.

³ Sa sulod sang tatlo ka adlaw pagkatapos sang kombension sa Zagreb, ang wala magmadinalag-on nga coup ginhimo sa Unyon Sobyet. Sadto, ang mga mahigugmaon sang diosnon nga kahilwayan nagahimo sang hingapusan nga mga paghanda para sa ila kombension sa Odessa sa Ukraine. Madayon ayhan ini nga kombension? Upod ang malig-on nga pagtuo ginhimo sang kauturan ang hingapusan nga mga detalye agod mahuman ang pagkay-o sa istadyum, kag ang mga delegado nag-inabot. Subong nga daw isa ka milagro, ang coup natapos. Ang isa ka makalilipay nga kombension ginhiwat sang Agosto 24, 25, nga gintambungan sang 12,115 kag 1,943—16 porsiento sang pinakamataas nga tumalambong—ang ginbawtismuhan! Ining bag-o nga mga Saksi, upod sa madugay na nga mga manughupot sing integridad, nagkalipay nga sila nagkadto sa sadto nga kombension upod ang pagsalig kay Jehova.—Hulubaton 3:5, 6.

4. Ano nga sulundan ni Jesus ang ginsunod sang mga Saksi sa Sidlangan nga Europa?

⁴ Ginsunod sining matutom nga mga Saksi ang aton Huwaran, nga si Jesucristo. Wala gid niya ginpatumbayaan ang pagtambong sa mga piesta nga ginsugo ni Jehova, bisan sang gintinguhaan sang mga Judiyo nga patyon sia. Sang nagapakadto sia sa Jerusalem para sa iya katapusan nga Paskuwa, nagatindog ini sila sa palibot sang templo, nga nagapamangkot: “Ano bala sa hunahuna ninyo? Nga indi sia magkari sa piesta?” (Juan 11:56) Apang nag-abot gid sia! Amo ini ang nagbukas sang dalan para sa isa ka semana nga nagdul-ong sa pagbaliskad sang lakat sang panahon sa maragtas sang tawo. Repasuhon na bala naton karon ang pila sang dalagku nga butang nga natabo sadto nga semana—Nisan 8 tubtob 14 sa Judiyong kalendaryo?

Nisan 8

5. Ano ang nahibal-an ni Jesus samtang nagalakbay sia padulong sa Betania sang Nisan 8, 33 C.⁠E.?

⁵ Sini nga adlaw si Jesus kag ang iya mga disipulo nag-abot sa Betania. Diri, ihinguyang ni Jesus ang anum ka gab-i sa puluy-an sang iya hinigugma nga abyan nga si Lazaro, nga bag-o lang niya ginbanhaw gikan sa minatay. Ang Betania malapit sa Jerusalem. Sing pahain, ginpahibalo na ni Jesus ang iya mga disipulo: “Yari karon! Nagataklad kita sa Jerusalem, kag ang Anak sang tawo itugyan sa mga puno nga saserdote kag mga escriba, kag sila magatagudili sa iya sa kamatayon, kag magatugyan sa iya sa mga tawo sang mga pungsod agod uligyaton kag bunalon kag ilansang, kag sa ikatlo nga adlaw banhawon sia.” (Mateo 20:18, 19) Nahibaluan gid ni Jesus nga sia karon magaatubang sing masakit nga mga pagtilaw. Apang, samtang nagahilapit yadto nga tion sang daku gid nga pagtilaw, ginhimo niya ang tanan sa pag-alagad sing mahigugmaon sa iya kauturan. Kabay nga kita man pirme maghupot “sining panimuot sang panghunahuna . . . nga yara man kay Cristo Jesus.”—Filipos 2:1-5; 1 Juan 3:16.

Nisan 9

6. Sang gab-i sang Nisan 9, ano ang ginhimo ni Maria, kag ano ang ginsiling ni Jesus kay Judas?

⁶ Pagtunod sang adlaw, sang nagasugod na ang Nisan 9, si Jesus nagakaon sa puluy-an sang isa anay ka aruon nga si Simon. Diri sini nga ginhaplas sang utod ni Lazaro nga si Maria ang malahalon nga pahumot nga lana sa ulo kag mga tiil ni Jesus kag mapainubuson nga ginpahiran niya ang iya mga tiil sang iya buhok. Sang mamatok si Judas, si Jesus nagsiling: “Pabay-i sia, kay gintigana niya ini para sa adlaw sang akon lubong.” Sang mabatian nga madamo sang mga Judiyo ang magakadto sa Betania kag nagatuo kay Jesus, ang puno nga mga saserdote nagplano sa pagpatay sa iya kag kay Lazaro.—Juan 12:1-7.

7. Sang aga sang Nisan 9, paano napadunggan ang ngalan ni Jehova, kag ano ang gintagna ni Jesus?

⁷ Sang kaagahon pa, si Jesus nagsugod sa paglakbay padulong sa Jerusalem. Ginsugata sia sang kadam-an, nga nagabayaw sing paklang sang palma kag nagasinggit: “Ginapangamuyo namon nga luwason ikaw! Bulahan sia nga nagakari sa ngalan ni Jehova, ang hari sang Israel!” Nian gintuman ni Jesus ang tagna sa Zacarias 9:9 paagi sa pagsakay sa isa ka asno pasulod sa siudad. Sang nagahilapit sia sa Jerusalem, naghibi sia bangod sini, kag nagtagna nga palibutan ini sang mga Romano sing mga bugsok kag laglagon ini sing bug-os—isa ka tagna nga matuman sing talalupangdon pagligad sang 37 ka tuig. (Nagapatimaan man ini sing malain para sa Cristiandad, nga nag-apostata subong sang ginhimo sang dumaan nga Jerusalem.) Indi luyag sang Judiyong mga manuggahom nga mangin hari nila si Jesus. Sa kaakig sila nagtuaw: “Tan-awa! Ang kalibutan nagsunod sa iya.”—Juan 12:13,19.

Nisan 10

8. Sang Nisan 10, paano si Jesus nagpakita sing hanuot nga pagtahod sa balay sang pangamuyo ni Jehova, kag ano ang nagsunod?

⁸ Nagduaw liwat si Jesus sa templo. Sa ikaduha nga tion, gintabog niya ang makagud nga mga negosyante kag mga manugbaylo sing kuwarta. Ang komersialismo—“ang gugma sa kuwarta”—indi dapat maggahom sa balay sang pangamuyo ni Jehova! (1 Timoteo 6:9, 10) Si Jesus malapit na mapatay. Ginhatag niya ang pagtanum sing binhi sa pag-ilustrar sini. Ang orihinal nga binhi nagakapatay, apang nagapanugdo ini agod magpatubas sing bugana nga uhay. Sing kaanggid, ang kamatayon ni Jesus magaresulta sa kabuhi nga walay katapusan para sa kadam-an nga magapakita sing pagtuo sa iya. Nagakabalaka sa iya nagahilapit sadto nga kamatayon, nangamuyo si Jesus nga ang ngalan sang iya Amay himayaon paagi sa sini. Bilang sabat, ang tingog sang Dios nagdaguob gikan sa langit para sa tanan nga yadto didto kag nabatian ini: “Ginhimaya ko na ini kag himayaon ko ini liwat.”—Juan 12:27, 28.

Nisan 11—Isa ka Adlaw sang Pagpanghikot

9. (a) Sang temprano sang Nisan 11, paano gingamit ni Jesus ang mga ilustrasyon sa pagpakamalaut sa apostata nga mga Judiyo? (b) Nahisanto sa parabola ni Jesus, sin-o ang nakawasi sang matahom nga kahigayunan?

⁹ Si Jesus kag ang iya mga disipulo nagbiya liwat sa Betania para sa isa ka daku nga adlaw sang pagpanghikot. Gingamit ni Jesus ang tatlo ka ilustrasyon agod ipakita kon ngaa ginapakamalaut ang apostata nga pagka-Judiyo. Ginpakamalaut niya ang isa ka dimabungahon nga kahoy sang higuera, kag sa amo ang iya laya karon nga kahimtangan nagalaragway sa wala sing pagtuo, indi mabungahon nga Judiyong pungsod. Pagsulod nila sa templo, ginlaragway niya kon paano ginpatay sang ulihi sang di-takus nga mga mangunguma sang ulubasan sang ila agalon ang anak mismo kag manunubli sang agalon—nga nagalaragway sang pagpaslaw sang mga Judiyo kay Jehova, nga magadangat sa ila pagpatay kay Jesus. Ginlaragway niya ang isa ka punsyon sang kasal nga ginhimos sang isa ka hari​—⁠si Jehova—nga makagud nga ginbalibaran nga tambungan sang dinapit nga mga bisita (ang mga Judiyo). Busa, gin-agda ang mga indi Judiyo—ang mga Gentil—nga ang iban sa ila nagtambong. Apang ang isa ka tawo nga nasapwan nga wala nakapanapot sang panapot para sa kasal gintabog. Nagalaragway sia sa huwad nga mga Cristiano sang Cristiandad. Madamo nga Judiyo sang adlaw ni Jesus ang gin-agda “apang pila lamang ang ginpili” agod malakip sa 144,000 ka pinat-inan nga magapanubli sang langitnon nga Ginharian.—Mateo 22:14; Bugna 7:4.

10-12. (a) Ngaa ginsabdong ni Jesus ang Judiyong klero, kag anong matigdas nga pagpakamalaut ang ginpamulong niya sa sadtong mga salimpapaw? (b) Paano ang paghukom nahimo sang ulihi sa apostata nga pagka-​Judiyo?

¹⁰ Ang salimpapaw nga Judiyong klero nangita sing paagi sa pagdakop kay Jesus, apang ginsabat niya ang pila sang ila nagapaniod nga mga pamangkot kag ginpakahuy-an sila sa atubangan sang mga tawo. O, maluib nga relihiosong mga Judiyo! Daw ano ka prangka nga ginsabdong sila ni Jesus! Gintinguhaan nila ang kabantugan, ang pinasahi nga mga panapton, kag ang mataas nga mga titulo, subong sang “Rabbi” kag “Amay,” kaangay sang madamo nga klerigo sa aton adlaw. Ginpamulong ni Jesus ang talaksan: “Ang bisan sin-o nga magpakataas sang iya kaugalingon paubson, kag ang bisan sin-o nga magpaubos sang iya kaugalingon pataason.”—Mateo 23:12.

¹¹ Matigdas nga ginpakamalaut ni Jesus yadtong relihioso nga mga lider. Makapito nga sia nagtuaw: “Kailo sa inyo!” nga ginatawag sila nga bulag nga mga tuytoy kag mga salimpapaw. Kag sa tagsa ka tion nga gintuaw niya ini naghatag sia sing maathag nga rason sa iya pagpakamalaut. Ginabalabagan nila ang pagsulod sa Ginharian sang mga langit. Kon masiod nila ang isa ka proselita, doble pa nga takus sila sa Gehenna, kay natigana na sila nga daan para sa kalaglagan bangod sang ila nauna nga daku nga sala ukon pagkapanatiko. “Mga buangbuang kag mga bulag!” siling ni Jesus, kay ang gin-interesahan sang mga Fariseo amo ang bulawan sa templo sa baylo nga huptan ang putli nga pagsimba didto. Ginsikway nila ang katarungan, kaluoy, kag pagkamatutom kay nagabayad sila sang ikapulo sang ginahamkon nga hierbabuena, anis, kag comino, apang ginasikway nila ang mabug-at nga mga butang sang Kasuguan. Ang ritwal nga pagpanghugas indi gid magadula sang ila nasulod nga pagkahigko—mahimo lamang ini sang isa ka tagipusuon nga natinluan paagi sa pagtuo sa nagahilapit sadto nga halad ni Jesus. Ang ila nasulod nga pagkasalimpapaw kag pagkamalinapason nagahimutig sang ila “ginpaputi” nga dagway sa guwa.—Mateo 23:13-29.

¹² Huo, kailo gid sa mga Fariseo, “mga anak [sa pagkamatuod] sang mga nagpatay sang mga manalagna” sang dumaan nga panahon! Mga man-ug, kaliwat sang mga man-ug sila, nga natagudilian sa Gehenna, kay patyon nila indi lamang si Jesus kundi ang mga ginpadala man niya. Isa ini ka paghukom nga himuon sa “sa sini nga kaliwatan.” Bilang katumanan, ang Jerusalem ginlaglag sing bug-os pagligad sang 37 ka tuig.—Mateo 23:30-36.

13. Ang ginsiling ni Jesus tuhoy sa pag-amot sa templo ginapakita sa anong mga kahimtangan karon?

¹³ Sa wala pa magbiya sa templo, gindayaw ni Jesus ang isa ka imol nga babaying balo nga naghulog sa bahandian sing duha ka diutay nga sensilyo—“ang tanan nga inugpangabuhi niya.” Tuhay sa pagkamatuod sa makagud nga manggaranon, nga nagahulog lamang sang pakulahaw nga mga amot! Kaangay sadtong babaying balo, ang mga Saksi ni Jehova karon kinabubut-on nga nagasakripisyo sing tion, kusog, kag kuwarta agod sakdagon kag pasangkaron ang bug-os kalibutan nga hilikuton sa Ginharian. Daw ano sila ka tuhay sa imoral nga mga ebanghelisador sa TV nga nagadaya sa ila mga panong kag nagapamanggad sang ila kaugalingon!—Lucas 20:45–21:4.

Samtang Nagahingapos ang Nisan 11

14. Anong kasubo ang ginpabutyag ni Jesus, kag paano niya ginsabat ang dugang pa nga pamangkot sang iya mga disipulo?

¹⁴ Naghibi si Jesus bangod sa Jerusalem kag sa katawhan sini kag nagsiling: “Kutob karon indi ninyo ako makita tubtob nga magsiling kamo, ‘Pagdayawon ang nagakari sa ngalan ni Jehova!’” (Mateo 23:37-39) Sang ulihi, sang nagalingkod sila sa Bukid sang Olibo, ang suod nga mga disipulo ni Jesus nagpamangkot nahanungod sini, kag bilang sabat ginlaragway ni Jesus ang tanda nga magatanda sang iya presensia sa paggahom sa Ginharian kag sang katapusan sang malaut nga sistema sang mga butang ni Satanas.—Mateo 24:1–25:46; Marcos 13:1-37; Lucas 21:5-36.

15. Ano nga tanda ang ginhatag ni Jesus tuhoy sa iya presensia para sa paghukom, kag kutob san-o ini natuman?

¹⁵ Nagapatuhoy sa paghukom ni Jehova nga himuon sa indi madugay sa templo, ginpakita ni Jesus nga nagalaragway ini sa malaglagon nga mga hitabo sa katapusan sang bug-os nga sistema sang mga butang. Ina nga tion sang iya presensia pagatandaan sang pagdabdab sang inaway sa walay tupong nga kasangkaron, subong man sang mga tiggulutom, mga linog, kag mga pesti, upod sa pagbugnaw sang gugma kag pagkamalinapason. Daw ano ini ka matuod sa aton ika-20 nga siglo nga kalibutan sugod sang 1914!

16, 17. Ano nga mga hitabo sa kalibutan ang ginlaragway ni Jesus, kag ano dapat ang mangin reaksion sang mga Cristiano sa tagna?

¹⁶ Ang putukputukan magadangat sa “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” Sanglit mangin makahalapay ini subong sang Anaw sang adlaw ni Noe, nagapaandam si Jesus batok sa pagkawili sa kalibutanon nga mga paghimud-os. “Busa bantay kamo, kay wala kamo makahibalo kon sa ano nga adlaw magakari ang inyo Ginuo.” Daw ano ka malipayon kita nga ang Agalon nagtangdo sing hinaplas nga “matutom kag mainandamon nga ulipon” sa pagpalanog sing paandam kag sa pag-aman sing bugana nga espirituwal nga pagkaon para sa sining adlaw sang iya presensia!—Mateo 24:21, 42, 45-47.

¹⁷ Sa aton ika-20 nga siglo, nakita naton “sa duta ang kalisang sang kapungsuran, nga wala makahibalo sang dalan paguwa . . . samtang ang mga tawo nagakapunaw sa kahadlok kag sa kalangkag sa magaabot sa napuy-an nga duta.” Apang ginasugiran kita ni Jesus: “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagapalapit.” Kag ginapaandaman niya kita: “Bantayi ang inyo kaugalingon nga ang inyo tagipusuon indi mabug-atan sang sobra nga pagkaon kag lakas nga pag-inum kag sang mga kabalaka sa kabuhi, kag sa hinali yadto nga adlaw magaabot sa inyo nga isa ka siod.” Paagi lamang sa pagpabilin nga nagamata nga makatindog kita nga nahamut-an sa atubangan ni Jesus, “ang Anak sang tawo,” sa iya presensia.—Lucas 21:25-28, 34-36.

18. Ano nga pagpalig-on ang makuha naton gikan sa mga ilustrasyon ni Jesus tuhoy sa napulo ka ulay kag mga talanton?

¹⁸ Sa paghinakop sang iya abanse nga pagtan-aw sang mga matabo sa modernong adlaw, naghatag si Jesus sing tatlo ka ilustrasyon. Una, sa parabola sang napulo ka ulay nga dalaga, ginpadaku niya liwat ang kinahanglanon nga “magpadayon sa pagbantay.” Nian, sa ilustrasyon sang mga ulipon kag mga talanton, ginpakita niya kon paano ang pagkapisan ginpadyaan sang imbitasyon nga ‘magsulod sa kalipay sang Agalon.’ Ang hinaplas nga mga Cristiano, nga ginlaragway sa sining mga parabola, subong man ang iban nga mga karnero makakuha sing daku nga pagpalig-on gikan sa sining maathag nga mga paglaragway.—Mateo 25:1-30.

19, 20. Anong makalilipay nga kaangtanan sa modernong adlaw ang ginalaragway sa ilustrasyon ni Jesus tuhoy sa mga karnero kag mga kanding?

¹⁹ Ang ikatlo nga ilustrasyon nagapatuhoy sa presensia ni Jesus sa paggahom sa Ginharian sa tapos sia mag-abot agod maglingkod sa iya mahimayaon nga trono sa langit. Tion ini sa paghukom sa mga pungsod kag sa pagpainpain sang katawhan sang duta sa duha ka grupo, ang isa amo ang mahagop nga tulad-karnero nga mga tawo kag ang isa pa, amo ang mga batinggilan nga tulad-kanding. Ang mga karnero naghimo sing daku nga panikasog agod ipakita ang ila kaugalingon nga masinakdagon sa kauturan sang Hari—ang nagkalabilin sang mga hinaplas sa duta sa sining tion sang katapusan sang kalibutan. Ining mga karnero padyaan sing kabuhi, samtang ang indi mainapresyahon nga mga kanding magataliwan sa walay katapusan nga kalaglagan.—Mateo 25:31-46.

²⁰ Daw ano katahom nga kaangtanan ang makita naton sa ulot sang iban nga mga karnero kag sang kauturan sang Hari sa sining katapusan sang sistema sang mga butang! Bisan pa ang hinaplas nga nagkalabilin amo ang nagadala sang lulan sang salabton sa hilikuton sa pamuno sang presensia sang Hari, ang minilyon sang makugihon nga iban pa nga mga karnero nagahuman karon sang 99.8 porsiento sang mga alagad sang Dios sa duta. (Juan 10:16) Kag ginpakita man nila ang ila kaugalingon nga handa sa pagbatas sang ‘gutom, kauhaw, pagkahubo, balatian, kag bilangguan’ subong mga kaupod sang nagahupot-sing-integridad nga mga hinaplas.a

Nisan 12

21. Ano ang nagpadayon sang Nisas 12, kag paano?

²¹ Ang plano sa pagpatay kay Jesus nagpadayon. Ginduaw ni Judas ang puno nga mga saserdote sa templo kag nagsugot nga itugyan si Jesus sa baylo sang 30 ka bilog nga pilak. Bisan ini gintagna man.—Zacarias 11:12.

Nisan 13

22. Anong paghanda ang ginhimo sang Nisan 13?

²² Si Jesus, nga nagpabilin sa Betania, ayhan agod mangamuyo kag mamalandong, nagpadala sang iya mga disipulo sa Jerusalem agod pangitaon si “Kwan.” Sa puluy-an sini nga tawo, sa isa ka maligwa nga hulot sa ibabaw, ginhanda nila ang Paskuwa. (Mateo 26:17-19) Sang magtunod ang adlaw sang Nisan 13, nagbuylog si Jesus sa ila didto para sa labing daku nga pagsaulog sa bug-os nga maragtas. Ano karon ang nagahulat sa Nisan 14? Isugid ini sang amon masunod nga artikulo.

[Footnote]

Paano Mo Sumaryuhon?

◻ Anong pagkamaabiabihon kag pagbaton ang ginhatag sang iban kay Jesus sang Nisan 8 tubtob 10?

◻ Paano ginbuyagyag ni Jesus ang salimpapaw nga klero sang Nisan 11?

◻ Anong daku nga tagna ang ginhatag ni Jesus, kag paano ini nagakatuman karon?

◻ Paano ang mga hitabo naghulag padulong sa talipuspusan sang Nisan 12 kag 13?

[Laragway sa pahina 12]

Gindayaw ni Jesus ang babaying balo nga nag-amot sing duha ka diutay nga sensilyo—ang tanan nga yara sa iya