Pagpadayon sang Tulumuron nga Ginpahamtang sa Edad nga Anum ka Tuig

PANUGIRON NI SANDRA COWAN

Madamo nga ginikanan ang nagapili sing karera para sa ila mga anak, subong sang musika ukon ballet, kag nagasugod sa paghanas sa ila sing bata pa. Amo gid sini ang ginhimo sa akon sang akon iloy. Sang duha ka semana pa lang ang akon edad, ginadala na niya ako sa tanan nga Cristianong mga miting kag sa pag-alagad sa latagon.

SANG kuwatro anyos ako, nagdumdom si Nanay nga mahimo na ako makabantala sing isahanon. Indi ko gid malipatan ang akon una nga pagbantala. Nagkadto kami sa isa ka daku nga balay sa uma, kag samtang si Nanay kag ang iban pa nagahulat sa awto, nanaug ako kag nagkadto sa ganhaan. Namati ang isa ka mabuot nga babayi samtang gintanyagan ko sia sing napulo ka bukleta. Bilang bayad sa sini, ginhatagan niya ako sing isa ka daku nga bareta sang habon. Kinahanglan nga uyatan ko ini sang duha ko gid ka kamot. Nalipay gid ako!

Sadto gihapon nga tuig, 1943, ang Watchtower Bible School of Gilead nagbukas sang iya mga ganhaan sa paghanas sing bug-os tion nga payunir nga mga ministro para sa pagmisyonero nga hilikuton. Ginpalig-on ako ni Nanay nga himuon ang pag-alagad subong misyonero nga mangin akon tulumuron sa kabuhi. Ang Inaway Kalibutanon II nagadabdab sadto sa Europa, kag ginsugiran ako ni Nanay nga ang mga anak sang mga Saksi sa Europa ginpalayo sa ila mga ginikanan. Luyag niya nga mangin malig-on ako sa pagbatas sang bisan ano nga sahi sang pagtilaw.

Sang tig-ilinit sang 1946, ginbawtismuhan ako sa internasyonal nga kombension sa Cleveland, Ohio. Bisan pa anum ka tuig lamang ang edad ko, determinado ako nga tumanon ang akon dedikasyon kay Jehova. Sadtong tig-ilinit nag-alagad ako subong payunir sa una nga tion. Madumduman ko nga isa ka aga nakapahamtang ako sing 40 ka magasin sa mga tawo nga nagapulungko sa The Plaza sa San Diego, California. Napat-od ko nga may daku nga nahimo sa sini ang akon kadiutayon kag pagkapalahambal.

Sa masami nagabantala kami malapit sa Beth-Sarim, ang duog nga sa diin ginhinguyang sang nagabalatian sadto nga presidente sang Watch Tower Society, nga si Utod Rutherford, ang iya tigtulugnaw antes sia mapatay sang 1942. Regular kami nga nagaduaw kag nagakaon upod sa bug-os tion nga mga alagad didto. Yadtong makalilipay nga mga pagduaw nagpadesisyon sa akon nga amo gid ini ang sahi sang kabuhi nga luyag ko. Nian ginhimo ko ang Gilead School kag ang pag-alagad subong misyonero nga akon tulumuron sa kabuhi.

Sang tuig nga nagsunod ang akon mga ginikanan nagdiborsio, apang ang nagbalhin nga kahimtangan sa pamilya wala magpaluya sang amon espirituwalidad. Si Nanay isa ka payunir sadto kag nabalaka gid nahanungod sa paghanas nga nabaton ko kag sang akon utod. Ang amon diutay nga trailer masadya bangod sang mga pagduaw sang Cristianong kauturan nga mga lalaki kag mga babayi. Naghimo si Nanay sing pinasahi nga panikasog agod makilala ko ang mga gradwado sang Gilead. Ang duha sang naggradwar sa sina amo sanday Lloyd kag Melba Barry, nga nagaduaw sa paglakbay nga hilikuton samtang nagahulat sa pagkado sa ila asaynment sa Hapon. Ginpalig-on nila ako—isa ka diutay nga bata nga babayi nga nagahandum nga mangin isa ka misyonero—kag natandog gid ako sadto.

Sang napulo ka tuig ang edad ko, namana si Nanay sing isa ka mabuot nga Saksi nga isa man ka payunir nga ministro. Gin-adoptar niya ako kag ang akon utod indi lamang sa papeles kundi sa iya tagipusuon man. Ang iya gugma kay Jehova kag kakugi sa pag-alagad makalalaton gid.

Si Nanay kag si Tatay nagpangabudlay subong isa ka team sa pagtuytoy sa amon nga kabataan sa mabudlay nga tinuig sang pagkatin-edyer. Ang amon puluy-an isa ka espirituwal nga dalangpan nga akon ginakahidlawan. Para sa ila, ang pagpayunir nga may diutay nga kinitaan samtang nagapadaku sing duha ka kabataan indi mahapos, nagkinahanglan ini sing pagsakripisyo sang kaugalingon. Apang si Nanay kag si Tatay nagsandig kay Jehova kag gin-una nila ang mga interes sang Ginharian.

Indi ko gid malipatan ang internasyonal nga kombension sa Siudad sang Nueva York sang 1950! Nanghulam si Tatay sa banko, kag nagpasakay kami sing tatlo pa ka pasahero sa awto agod makabulig sa galastuhon. Si Nanay, si Tatay, ang akon utod, kag ako nagpungko sa unahan halin sa San Diego tubtob sa Nueva York, samtang ang iban pa nagpungko sa likod. Bangod wala ginhatagan si Tatay sang iya amo sing duha ka semana nga bakasyon gikan sa trabaho, nadula niya ang iya trabaho bangod sang iya pagtambong sa sadto nga kombension. Apang subong sang ginpasalig sa amon ni Tatay, si Jehova magaaman para sa amon mga kinahanglanon, kag nag-aman Sia matuod. Ginbaligya ni Tatay ang awto agod may ibayad sa iya gin-utang sa banko, kag dayon nakakita sia sing mas maayo nga trabaho. Ini kag ang kaanggid nga mga eksperiensia nangin mapuslanon gid sa akon sang tinuig sang ulihi sang ang akon bana kag ako nag-atubang sing mabudlay nga mga kahimtangan.

Sa amon pagpauli gikan sa Nueva York, nagduaw kami sa Kingdom Farm, nga sa diin nakita ko ang Gilead School sa una nga tion. Madumduman ko nga nagtindog ako sa tunga sang isa sang mga hulot-klasehan kag nagsiling ako sa akon kaugalingon, ‘Halos 11 anyos pa lang ako. Indi na ako makakadto diri. Maabot sing una ang Armagedon.’ Apang yadto nga pagduaw naghimo sa akon nga mangin kapin pa ka determinado sa paghimo sang Gilead nga akon tulumuron.

Pagpanghikot sa Paglab-ot sang Akon Tulumuron

Sa tagsa ka bakasyon gikan sa eskwelahan kon tig-ilinit, halin sa una nga grado padayon, nagpayunir ako. Nian, duha ka semana sa tapos ako makagradwar sa hayskul sang Hunyo 1957, nagregular payunir ako.

Ang miting sa distrito nga kombension para sa mga interesado sa Gilead nga ginhiwat sa kombension sa Los Angeles sang 1957 nangin pinasahi gid para sa akon. Samtang nagapadulong ako sa tolda para sa sadto nga miting, nasugata ko si Bill, isa ka pamatan-on nga utod nga lalaki nga kilala ko na sugod sang anum ka tuig pa lang ako. Sang nagligad nga tuig, nag-alagad sia sa Louisiana nga kon diin mas daku ang kinahanglanon. Nakibot kami nga duha nga pareho gali kami nga interesado sa pag-alagad subong misyonero. Anum ka bulan sang ulihi namat-od kami nga himuon ini nga proyekto namon nga duha. Nagsulat kami sa Sosiedad nga nagapangayo sing asaynment kag isa ka bulan antes sang amon kasal, nabaton namon ang amon asaynment nga amo ang Romney, sa West Virginia.

Nagsaylo kami didto sang maglakbay kami padulong sa kombension sa Nueva York sang 1958. Samtang didto sa sadto nga kombension, nagtambong kami sa miting para sa mga interesado sa Gilead. Ginatos ang nagtambong. Sang makita namon ang kadam-an, ginbatyag namon nga diutay gid ang amon tsansa nga tawgon kami sa Gilead. Walay sapayan, ginsumiter namon ang amon una nga aplikasyon, bisan pa 11 ka semana pa lang kami nga kasal. Sang tuig nga nagsunod sa distrito nga kombension sa Philadelphia, nagsumiter kami sing ikaduha nga aplikasyon.

Sang didto kami sa Romney, natun-an namon ni Bill nga magsandig kay Jehova sa pagbulig sa amon sa mabudlay nga mga kahimtangan. Ang Romney isa ka banwa nga may mga 2,000 ka pumuluyo. Imposible nga makakita sing trabaho didto. Nagpuyo kami sa 5 metros nga homemade trailer nga gindesinyo para sa paniempo sang California. Wala kami sing gripo, wala sing heater, kag wala sing repridyetor. Nagatugnaw gid sa sulod amo kon ngaa dapat namon buk-on ang yelo sa balde agod makakuha sing tubig. Ginbuligan kami sang mga utod tubtob sa masarangan nila, ginapaambitan nila kami sang pagkaon nga napangayaman nila. Nagkaon kami sing usa, raccoon, kag squirrel. Indi lamang makaisa nga nagdumdom kami nga wala kami sing makaon sa sulod sang adlaw, apang pagpauli namon halin sa pag-alagad, may maabtan kami sa atubangan sang amon ganhaan nga pila ka mansanas ukon keso.

Nagbatas kami sing siam ka bulan nga nagakabuhi sa kapigaduhon nga kon kaisa halos wala na gid. Sang ulihi, namat-od kami nga maalamon nga magsaylo kami sa Baltimore, Maryland, nga sa diin mahimo nga makatrabaho si Bill. Sang ginsugiran namon ang kauturan sang amon desisyon, naghibi sila kag naghibi man kami. Gani namat-od kami nga mag-uluagwanta pa diutay.

Sa tapos gid sadto gintanyagan si Bill sing isa ka part-time nga trabaho sang isa ka Saksi nga manedyer sang isa ka supermarket sa Western­port, Maryland, nga mga 60 kilometros ang kalayuon. Sang amo man nga bulan gintanyag sa amon sang isa sang amon estudyante sang Biblia ang isa ka diutay nga balay nga may gamit na kag may daku nga pugon nga ginagatungan sing karbon. Amo sadto nga ang Malaquias 3:10 nangin paborito ko nga teksto. Ginbubo sa amon ni Jehova ang pagpakamaayo nga wala gid namon ginpaabot.

Gilead sa Katapusan!

Ang isa sang labing makalilipay nga mga adlaw sang amon kabuhi amo ang Nobiembre 1959, sang mabaton namon ang amon imbitasyon pa Gilead. Gin-agda kami sa ika-35 nga klase, ang katapusan nga ginhiwat sa Kingdom Farm. Sang magtindog ako sa amo gihapon nga hulot-klasehan nga ginduaw ko anay sang bata pa ako, nagbatyag ako sing kalipay nga indi malaragway sang mga pulong.

Ang Gilead isa ka espirituwal nga dalangpan. Daw subong yadto sang pagpuyo sa bag-ong kalibutan sa lima ka bulan. Malaka lang sa kabuhi nga kita tinuig nga nagahulat sang isa ka butang kag dayon masapwan ini nga mas maayo sang ginapaabot naton. Apang subong gid sina ang Gilead.

Gin-asayn kami sa India, apang sang ulihi wala kami ginhatagi sing visa. Gani, pagligad sang isa ka tuig nga paghulat sa Siudad sang Nueva York, gin-asayn kami liwat sang Watch Tower Society sa Morocco, Aminhan nga Aprika.

Mga Misyonero sa Morocco

Naghinguyang kami sing 24 ka makalilipay nga tinuig sa Morocco, kag sa gilayon naluyagan namon ang mga tawo pag-abot namon. Nakatuon kami sing Pranses kag Espanyol, mga hambal nga nakabulig sa amon sa pagkomunikar sa madamo nga nasyonalidad nga nagapuyo didto. Kalabanan sang nagbaton sang mensahe sang Ginharian amo ang naghalin sa iban nga mga pungsod.

Ang isa ka babayi nga akon ginatudluan sing Biblia isa ka Espanyol nga manugsaot sing flamenco nga nagatrabaho sa isa ka kabaret sa Casablanca. Sa tapos matun-an ang mga prinsipio sang Biblia, ginbiyaan niya ang tag-iya sang kabaret nga iya ginapuyopuyo kag nagbalik sa Espanya. Didto nagpanaksi sia sa tanan niya nga pamilya, kag ang iban sa ila nagbaton sang kamatuoran sang Biblia nga ginpaambit niya sa ila. Pagkatapos sadto nagbalik sia sa Casablanca, nga sa diin nagpabilin sia nga matutom sa Dios tubtob sang mapatay sia sang 1990.

Ang amon pila ka tuig sa Morocco nakasaksi sing mga pag-uswag sa kadamuon sang mga manugbantala sang Ginharian. Apang, sang mabudlay na para sa mga taga-luwas nga mangita sing trabaho kag sing permiso sa pagpuyo didto, madamo nga mga Saksi ang nagbiya padulong sa Europa. Ang iban sang amon gintudluan didto na karon sa New Zealand, Canada, Estados Unidos, Bulgaria, Rusya, kag Pransya, kag ang iban sa ila nagapakigbahin sa bug-os tion nga ministeryo.

Sa hinali, sang Abril 1973 ang amon pagbantala nga hilikuton sa Morocco gindumilian. Daw ano yadto nga tuk-ap! Sang isa ka gab-i sang Huebes, isa kami ka malipayon nga kadam-an sa Kingdom Hall, nga nagasugilanunay tubtob ginpalong ang mga suga agod pahibaluon kami nga dapat magpauli na kami. Wala gid kami sing pangalibutan nga indi na namon makita liwat ang pagsiga sadtong mga suga sa sadtong dayag nga Cristianong pag-inupdanay. Sa idalom sang ginadumilian nga mga kahimtangan, ang amon mga miting kag sirkito nga mga asambleya nalatiran sa diutay nga mga grupo sa pribado nga mga puluy-an. Agod makatambong sa distrito nga mga kombension, ang mga Saksi naglakbay sa Pransya ukon sa Espanya.

Samtang nagabuhin ang amon kadamuon, ang pila ka Saksi nga nabilin sa Morocco nangin suod sa isa kag isa. Gani sang mamat-od sang ulihi ang Watch Tower Society nga isira ang sanga kag iasayn kami sa lain nga duog, naghibi kami tanan.

Padulong sa Sentral Aprika

Ang amon bag-o nga asaynment amo ang Republika sang Sentral nga Aprika. Daw ano ka daku nga pagbalhin gikan sa Aminhan nga Aprika! Samtang ang klima sa Morocco halos pareho sa bagatnan nga California, nasapwan namon karon ang amon kaugalingon sa mainit, magin-ot nga tropiko.

May bag-o nga mga problema nga alatubangon. Halimbawa, dapat ko karon kontrolon ang akon kahadlok sa nagakamang nga mga sapat-sapat. Sa tatlo ka okasyon ang tiki nahulog sa akon ulo samtang nagasulod ako sa puwertahan. Kon kaisa, samtang ginadumalahan ko ang isa ka pagtuon sa Biblia, ang ilaga mamat-od sa pagbuylog sa amon! Bisan pa luyag ko maglumpat kag magdalagan, natun-an ko nga kontrolon ang akon kaugalingon, nga wala gid ginahalin ang akon mata kay G. Ilaga kag ginaalsa ko ang akon bag kag tiil sa salog tubtob nga mamat-od sia sa paghalin. Nasapwan ko nga mahimo ka maanad sa bisan ano kon indi ka lamang mag-ampo.

Sang anum ka bulan na kami didto, ginpahibalo sa radyo nga ang amon hilikuton ginadumilian. Gani ginsira ang amon mga Kingdom Hall, kag ang mga misyonero ginpangabay sa paghalin. Kami lamang kag ang isa pa ka mag-asawa ang nakapabilin sa sanga sing tatlo ka tuig pa. Nian isa ka aga sang Domingo sa tion sang amon Pagtinuon sa Lalantawan, nag-abot ang naarmasan nga mga pulis kag gindala kami sa hedkwarter sang pulisiya. Ginbuhian nila ang mga babayi kag mga kabataan, apang ginbilanggo nila ang 23 ka utod nga lalaki, lakip ang akon bana, nga si Bill. Pagligad sang anum ka adlaw ginbuhian nila sia agod magpauli kag mamutos; tatlo ka adlaw sang ulihi, suno sa mando sang gobierno, nagbiya kami sa pungsod, sang Mayo 1989. Isa pa yadto ka nakapahibi nga pagtaliwan sa erport, nga sa diin madamo sang amon mahigugmaon nga kauturan ang nagpaalam sa amon.

Sang Ulihi, sa Sierra Leone

Ang amon asaynment karon amo ang Sierra Leone, Nakatundan nga Aprika, isa ka matahom nga pungsod nga may magayon, puti-sing-balas nga mga baybay. Ang mga tawo tuman ka mainabyanon, kag makalilipay ang pag-alagad sa latagon. Ginaagda kami nga magpungko sa tagsa ka balay, sa masami sa idalom sang handong sang kahoy nga paho ukon lubi. Ang mga tawo maluyag makighambal nahanungod sa Dios kag ginakuha nila ang ila kaugalingon nga kopya sang Biblia agod sundan ang ginahambalan.

Si Bill kag ako nagapangabudlay sa Freetown Bethel Home. Nagaalagad ako subong receptionist kag nagatrabaho man sa mga suskripsion kag mga kwenta sang mga kongregasyon. Sa tapos sang 16 ka tuig nga pag-alagad sa mga pungsod nga sa diin gindumilian ang amon pagbantala nga hilikuton, kanami gid nga mangin sa isa ka pungsod nga sa diin ang hilikuton hilway kag nagabugana.

Nakatapos ako sing 30 ka tuig sang pag-alagad subong misyonero sang Hunyo 1991. Sa pagkamatuod, ang tulumuron nga ginpahamtang ni Nanay sa atubangan ko amo ang mapuslanon! Kon buhi pa sia, luyag ko isiling sa iya liwat, “Salamat sa imo, Nay!” Sing malipayon, sarang pa ako makasiling sing, “Salamat, Tay!”

[Retrato ni Sandra Cowan sa pahina 26]

[Retrato ni Sandra Cowan sang bata pa sia sa pahina 27]

[Retrato sa pahina 28]

Kombension sa Nueva York, 1958

[Laragway sa pahina 29]

35th class—July, 1960

[Laragway sa pahina 30]

Sanday Bill kag Sandra Cowan, 1991