Gintudluan Kami sang Amon mga Ginikanan nga Higugmaon ang Dios

PANUGIRON NI ELIZABETH TRACY

Ang armado nga mga tawo, nga sang maaga nga bahin sadto nga adlaw namuno sa isa ka akig nga guban batok sa amon, nagpilit kay Tatay kag Nanay nga magguwa sa salakyan. Nabilin kami sang akon magulang nga babayi sa pulungkuan sa likod, nagapalibog kon bala makita pa namon liwat ang amon mga ginikanan. Ano ang nagdul-ong sa sining makahaladlok nga eksperiensia malapit sa Selma, Alabama, E.U.A., sang 1941? Kag ano ang kaangtanan sang mga panudlo nga amon nabaton gikan sa amon mga ginikanan sa sining hitabo?

ANG akon amay, si Dewey Fountain, ginpadaku sang isa ka himata sa isa ka uma sa Texas sang mapatay ang iya mga ginikanan samtang lapsag pa sia. Sang ulihi nagtrabaho sia sa isa ka minahan sang petrolyo. Sang 1922, sang sia 23 anyos, napangasawa niya si Winnie, isa ka matahom nga taga-Texas nga lin-ay, kag nagplano nga magpuyo sa isa ka lugar kag magsagod sing isa ka pamilya.

Nagpatindog sia sing balay sa madamo sing kahoy nga lugar sa nasidlangan sang Texas malapit sa diutay nga banwa sang Garrison. Didto nagtanom sia sing nanarisari nga mga talamnunon, lakip ang algodon kag mais. Nagsagod man sia sing tanan nga sahi sang kasapatan sa uma. Sang ulihi, natawo kami nga kabataan—si Dewey dyunyor sang Mayo 1924, si Edwena sang Disiembre 1925, kag sang Hunyo 1929, natawo ako.

Pagtuon sa Kamatuoran sang Biblia

Naghunahuna sanday Tatay kag Nanay nga nahangpan na nila ang Biblia, bangod katapo na sila sang Church of Christ. Apang sang 1932, si G.W. Cook nagbilin sing mga libro nga Deliverance kag Government, nga ginbalhag sang Watch Tower Society, sa magulang ni Tatay nga si Monroe Fountain. Sa kalangkag nga ipaambit ang iya natun-an sa akon mga ginikanan, si Monroe masunson nga nagakadto sa amon sa tigpalamahaw, ginabasa ang isa ka artikulo gikan sa Ang Lalantawan, kag dayon “aksidente” nga ginabilin ang magasin. Pagkatapos sina, ginabasa ini nanday Nanay kag Tatay.

Isa ka aga sang Domingo gin-imbitar ni Tiyoy Monroe si Tatay sa balay sang kaingod para sa isa ka pagtuon sa Biblia. Ginpasalig niya sia nga masabat ni G. Cook ang tanan niya nga pamangkot sa Biblia. Sang magpauli si Tatay gikan sa pagtuon, malipayon niya nga ginsugiran ang pamilya: “Nasabat tanan ang akon pamangkot kag may dugang pa ako nga nahibaluan! Naghunahuna ako nga nahibaluan ko na ang tanan, apang sang nagsugod sa pagpaathag sa akon si G. Cook tuhoy sa impierno, kalag, katuyuan sang Dios sa duta, kag kon paano pahanabuon ini sang Ginharian sang Dios, nabatyagan ko nga wala gid ako sing nahibaluan sa Biblia!”

Ang amon balay isa ka lugar nga pirme ginasayuhan. Ang mga himata kag mga abyan nagakari kag nagaduaw, nagaluto sing dulse nga fudge kag matam-is nga popcorn balls, kag nagadungan sa pagkanta samtang nagatokar sing piano si Nanay. Ini nga mga okasyon amat-amat nga ginbuslan sang mga paghambalanay sa mga topiko sa Biblia. Bisan wala namon mahangpan nga mga kabataan ang tanan nga butang nga ginhambalan, ang mabakod nga gugma sang amon mga ginikanan sa Dios kag sa Biblia makita gid amo kon ngaa napalambo sang kada isa sa amon nga kabataan ang kaanggid nga gugma sa Dios kag sa iya Pulong.

Ginbuksan man sang iban nga mga pamilya ang ila mga puluy-an para sa semanal nga paghambalanay sa Biblia, nga masami nga nasentro sa isa ka topiko sa pinakabag-o nga guwa sang magasin nga Lalantawan. Kon ang tagbalay sang mga miting amo ang mga pamilya sa kaingod nga mga banwa sang Appleby kag Nacogdoches, nagaginutok kami sa amon Model A Ford nga salakyan kag nagabiyahe pakadto didto, bisan ano man ang panahon.

Pag-aplikar sang Ila Natun-an

Wala magdugay kag nakita sang amon mga ginikanan ang kinahanglanon nga maghulag. Ginapatuman sang gugma sa Dios nga ipaambit sa iban kon ano ang natun-an. (Binuhatan 20:35) Apang ining tikang nga ipahayag sing hayag sang isa ang iya pagtuo makahalangkat, ilabi na kay ang amon mga ginikanan kinaugali na nga mahuluy-on kag kubos sing kahimtangan nga mga tawo. Apang, ang ila gugma sa Dios nagpahulag sa ila, kag ini ang nagbulig sa ila nga tudluan kami nga magsalig gid kay Jehova. Ginpabutyag ini ni Tatay sa sini nga paagi: “Ginahimo ni Jehova nga mga manugbantala bisan ang mga manugtanom sing patani!” Sang 1933, ginsimbuluhan nanday Nanay kag Tatay ang ila dedikasyon kay Jehova paagi sa pagpabawtismo sa tubig sa isa ka punong malapit sa Henderson, Texas.

Sang temprano sang 1935, nagsulat si Tatay sa Watch Tower Society kag madamo sing ginpamangkot tuhoy sa Cristianong paglaum nga kabuhi nga walay katapusan. (Juan 14:2; 2 Timoteo 2:11, 12; Bugna 14:1,3; 20:6) Nakabaton sia sing sabat gikan mismo kay Joseph F. Rutherford, nga presidente anay sang Sosiedad. Sa baylo nga sabton ang iya mga pamangkot, gin-agda ni Utod Rutherford si Tatay nga magtambong sa kombension sang mga Saksi ni Jehova sa Washington, D.C., sang Mayo.

‘Imposible!’ hunahuna ni Tatay. ‘Mga mangunguma kami nga may 26 ektaryas nga ulutanan. Anihon ini tanan kag ibaligya sa sina nga tion.’ Apang, sang ulihi nagbaha kag gin-anod ang iya mga balibad—mga pananom, mga kudal, kag mga taytay. Busa nagbuylog kami sa iban pa nga mga Saksi sa gin-arkilahan nga bus sang eskwelahan nga nagbiyahe sing 1,600 ka kilometro sa naaminhan-sidlangan pakadto sa kombension.

Sa kombension nalipay sanday Tatay kag Nanay sa pagpamati sa klaro nga paathag tuhoy sa pagkilala sa “dakung kadam-an” nga makalampuwas sa “dakung kapipit-an.” (Bugna 7:9,14, King James Version) Sa nabilin nga bahin sang ila kabuhi, ang paglaum tuhoy sa dayon nga kabuhi sa paraiso nga duta nagpahulag kanday Nanay kag Tatay, kag ginpalig-on nila kami nga mga kabataan nga ‘manguyapot sing hugot sa matuod nga kabuhi,’ nga magakahulugan para sa amon sing walay katapusan nga kabuhi sa duta nga ginatanyag ni Jehova. (1 Timoteo 6:19; Salmo 37:29; Bugna 21:3,4) Bisan lima ka tuig pa lang ako sadto, nalipay gid ako mag-upod sa akon pamilya sa sining makalilipay nga hitabo.

Sang makapauli halin sa kombension, nagtanom liwat ang pamilya sing talamnunon, kag sang ulihi nag-ani sang amon pinakadagaya gid nga patubas. Nagkumbinsi gid ini kanday Nanay kag Tatay nga ang pagsalig sing bug-os kay Jehova indi gid malugaw-an. Nakigbahin sila sa isa ka pinasahi nga porma sang pagbantala nga hilikuton diin nagsugot sila nga maghinguyang sing 52 ka oras kada bulan sa ministeryo. Kag pagkatapos sadto, sang mag-abot ang masunod nga tigtalanom, ginbaligya nila ang tanan nga pagkabutang! Nagpahimu si Tatay sing 6 x 2.4 metros nga treyler para puy-an namon nga lima, kag nagbakal sia sing bag-ong duha-sing-puwertahan nga Ford sedan agod magguyod sini. Amo man ang ginhimo ni Tiyoy Monroe, kag nagpuyo man sila sang iya pamilya sa treyler.

Pagtudlo sa Amon sang Kamatuoran

Nagsugod sa pagpayunir sanday Tatay kag Nanay, subong nga amo ang pagtawag sa bug-os tion nga ministeryo, sang Oktubre 1936. Subong isa ka pamilya, nagsugod kami sa pagbantala sa mga banwa sa sidlangan sang Texas nga talagsa lang malab-utan sang mensahe sang Ginharian. Sa halos isa ka tuig, nagsulusaylo kami sa lainlain nga mga lugar, apang sa kabilugan, nalipay gid kami sa sini nga kabuhi. Gintudluan kami nanday Nanay kag Tatay paagi sa ila hambal kag halimbawa nga mangin kaangay sang unang mga Cristiano nga naghugod sang ila kaugalingon sa pagpaalinton sang kamatuoran sang Biblia sa iban.

Nagdayaw gid kami nga mga kabataan sa amon iloy tungod sa mga sakripisyo nga iya ginhimo paagi sa pagbiya sang iya puluy-an. Apang, may isa ka butang nga indi gid niya luyag madula, kag ini amo ang iya makina. Maalamon man ini nga desisyon. Bangod sang iya ikasarang subong mananahi, pirme niya kami ginapabayuan sing maayo. Sa kada kombension, may matahom kag bag-o kami nga mga bayo nga ginasuksok.

Madumduman ko pa sang gin-upod ni Herman G.Henschel ang iya pamilya sa amon lugar sa isa ka sound truck sang Watch Tower Society. Ginapadulog nila ang salakyan sa lugar nga madamo sing pumuluyo, ginapatokar ang isa ka malip-ot narekord na nga pamulongpulong, kag nian ginaduaw sing personal ang mga tawo sa paghatag sing dugang nga impormasyon. Nalipay gid si Dewey dyunyor sa pagpakig-upod sa anak ni Herman nga si Milton, nga isa pa ka tin-edyer sadto. Sa karon si Milton amo ang presidente sang Watch Tower Society.

Sadtong 1937 nga kombension sa Columbus, Ohio, ginbawtismuhan si Edwena, kag gintanyagan sing pribilehiyo nga mag-alagad subong espesyal payunir sanday Nanay kag Tatay. Sadto nga tion, yadto nga hilikuton nagalakip sang paghinguyang sing di-magkubos 200 ka oras sa isa ka bulan sa pagbantala nga hilikuton. Sa paghinumdom sang nagliligad, nahangpan ko kon paano ang maayo nga halimbawa ni Nanay nakabulig sa akon sa pagsakdag sa akon bana sa Cristianong mga asaynment.

Kon makasugod si Tatay sing isa ka pagtuon sa Biblia upod sa isa ka pamilya, ginaupod niya kami nga mga kabataan sa paghatag sing positibo nga halimbawa sa ila kabataan. Ginapapangita niya kag ginapabasa sa amon ang mga teksto sa Biblia kag ginapasabat ang pila sang sadsaran nga mga pamangkot. Subong resulta, madamo sang mga pamatan-on nga amon natun-an ang nagaalagad kay Jehova sing matutom tubtob karon. Sa pagkamatuod, ang isa ka malig-on nga sadsaran napahamtang man sa amon agod padayon nga higugmaon ang Dios.

Samtang nagahamtong si Dewey dyunyor, nabudlayan sia nga magpuyo sa gutok nga ilistaran upod sa iya duha ka manghod nga babayi. Busa sang 1940 namat-od sia nga maghalin kag magpayunir upod sa isa pa ka Saksi. Sang ulihi, napangasawa niya si Audrey Barron. Busa natudluan man si Audrey sing madamo nga butang sang amon mga ginikanan, kag ginpalangga gid niya sanday Nanay kag Tatay. Sang mabilanggo si Dewey dyunyor sang 1944 bangod sang iya Cristianong neutralidad, nagpuyo sia upod sa amon sa isa ka tion sa amon gutok nga treyler.

Sa daku nga kombension sa St.Louis, Missouri, sang 1941, nagpamulongpulong sing direkta si Utod Rutherford sa mga kabataan nga nagapangidaron sing 5 tubtob 18, nga ginpapungko sa isa ka espesyal nga bahin sa atubangan. Namati kami ni Edwena sa iya matawhay, maathag nga tingog; kaangay sia sang isa ka mahigugmaon nga amay nga nagatudlo sa iya kaugalingon nga mga kabataan sa puluy-an. Ginpalig-on niya ang mga ginikanan: “Gintipon karon ni Cristo Jesus ang iya nakigkatipan nga katawhan sa atubangan niya, kag sa labing mabaskog nga paagi ginsugo niya sila nga tudluan ang ila mga kabataan sa dalanon sang pagkamatarong.” Sia nagdugang: “Atipana sila sa puluy-an kag tudlui sila sang kamatuoran!” Sing makalilipay, ginhimo ini sang amon mga ginikanan!

Sa sadto nga kombension, nabaton namon ang bag-o nga pulyeto nga Jehovah’s Servants Defended, nga nagarepaso sang mga kaso sa korte nga nadaug sang mga Saksi ni Jehova, lakip yadtong sa Korte Suprema sang Estados Unidos. Gintun-an ini ni Tatay upod sa amon subong isa ka pamilya. Wala gid kami hinalung-ong nga ginahanda gali kami para sa kon ano ang matabo mga pila ka semana sang ulihi sa Selma, Alabama.

Ginsalakay sang Akig nga Grupo sa Selma

Sang aga sadtong makahaladlok nga eksperiensia, nagdul-ong si Tatay sing mga kopya sang sulat sa serip, meyor, kag hepe sang pulisiya sa Selma nga nagapaathag sang aton kinamatarong sa konstitusyon sa paghimo sang amon ministeryo nga protektado sang kasuguan. Walay sapayan sini namat-od sila nga tabugon kami gikan sa banwa.

Sang kahapunanon, lima ka armado nga lalaki ang nag-abot sa amon treyler kag ginhimo kami ni Nanay kag ang akon utod nga babayi nga bihag. Ginbaluskay nila ang tanan nga butang sa sulod, nagapangita sang butang nga subersibo. Didto sa guwa si Tatay, kag ginsugo nila sia nga itakod ang treyler sa salakyan, samtang ginatayaan sia sang ila mga pistola. Sadto nga tion, wala ako mahadlok. Daw makahalam-ot gid nga maghunahuna ini nga mga tawo nga peligruso kami amo kon ngaa nakalamho kami sang akon magulang. Apang, nangin serioso kami sang ginpasiplatan kami ni Tatay.

Sang malakat na kami, luyag sang mga lalaki nga magsakay kami ni Edwena sa ila salakyan. Wala magpasugot si Tatay. “Sa ibabaw sang akon bangkay!” siling niya. Pagkatapos sang pila ka paghambalanay ginpahanugutan ang amon pamilya nga maglakat sing tingob, kag ginsundan kami sang armado nga mga lalaki sakay sang ila salakyan. Mga 25 ka kilometro gikan sa banwa, nagsenyas sila nga magdulog kami sa higad sang haywey kag gindala sanday Nanay kag Tatay. Nagbulosbulos ang mga lalaki sa pagbuyok sa ila: “Isikway ninyo ina nga relihion. Magbalik kamo sa uma, kag padakua sing nagakaigo ang inyo mga anak nga babayi!” Gintinguhaan ni Tatay nga mangatarungan apang sa wala sing pulos.

Sang ulihi, ang isa ka lalaki nagsiling: “Lakat kamo, kag kon magbalik pa kamo liwat sa Dallas County, patyon namon kamo tanan!”

Naumpawan kag nag-inupdanay liwat, nagbiyahe kami sing pila ka oras kag nian nagdulog sa pagpaligad sing gab-i. Nakuha namon ang numero sang plaka sang ila salakyan. Ginreport dayon ni Tatay ang tanan sa Watch Tower Society, kag pila ka bulan sang ulihi nakilal-an kag gindakop ang mga lalaki.

Sa Eskwelahan sang Pagmisyonero sa Gilead

Nakabaton si Edwena sing imbitasyon nga mag-eskwela sa ika-7 nga klase sang Watchtower Bible School of Gilead sa South Lansing, New York, sang 1946. Nasambit ni Albert Schroeder, nga isa sang mga instruktor, ang iya maayong mga kinaiya sa iya anay kaupod nga payunir nga si Bill Elrod, nga nagaalagad na sadto sa Bethel, sa ulong talatapan sang mga Saksi ni Jehova sa Brooklyn, New York.a Nagkilalahay sanday Edwena kag Bill, kag mga isa ka tuig sa tapos sang iya gradwasyon sa Gilead, ginkasal sila. Sa madamo nga tinuig nagpabilin sila sa bug-os tion nga ministeryo, lakip ang pag-alagad nga magkaupod sing lima ka tuig sa Bethel. Nian sang isa ka adlaw sang 1959, ginpahibalo ni Utod Schroeder sa ika-34 nga klase sang Gilead nga ang iya palangga nga abyan nangin amay sang kapid, isa ka lalaki kag isa ka babayi.

Samtang nagaalagad ako upod sa akon mga ginikanan sa Meridian, Mississippi, sa talipuspusan sang 1947, nakabaton kami nga tatlo sing imbitasyon sa pag-eskwela sa ika-11 nga klase sang Gilead. Nakibot kami bangod suno sa mga kinahanglanon bata pa ako, kag sanday Nanay kag Tatay tigulang na. Apang may eksepsion nga ginhimo, kag nabaton namon ang di-bagay nga pribilehiyo sang abanse nga pagtuon sa Biblia.

Misyonero nga Pag-alagad Upod sa Akon mga Ginikanan

Ang amon misyonero nga asaynment amo ang Colombia, Bagatnan nga Amerika. Apang, sang Disiembre 1949 lang, pagligad sang kapin sa isa ka tuig pagkatapos sang amon gradwasyon, nga nakalab-ot kami sa Bogotá sa puluy-an sang mga misyonero diin tatlo na ang nagapuyo. Sang primero, halos naghinakop si Tatay nga mas mahapos tudluan ang mga tawo sing Ingles sangsa pagtuon niya sing Espanyol! Huo, may mga pagtilaw, apang, daw ano ka daku ang mga pagkamaayo! Wala pa isa ka gatos ang mga Saksi sa Colombia sang 1949, apang karon may kapin na sa 100,000!

Pagkatapos sang lima ka tuig nga pag-alagad sa Bogotá, sanday Nanay kag Tatay ginpadala sa siudad sang Cali. Sa amo man nga tion, sang 1952, napamana ko si Robert Tracy, masigkamisyonero sa Colombia.b Nagpabilin kami sa Colombia tubtob sang 1982, nga sadto nga tion gin-asayn kami sa Mexico, diin nagaalagad kami tubtob karon. Sang ulihi, sang 1968, kinahanglan nga magpauli ang akon mga ginikanan sa Estados Unidos para magpabulong. Sang mag-ayo sila, nagpadayon sila subong mga espesyal payunir malapit sa Mobile, Alabama.

Pag-atipan sa Amon mga Ginikanan

Samtang nagligad ang panahon, nagsugod sa pagluya sanday Nanay kag Tatay kag nagkinahanglan sing pagsakdag kag pag-atipan. Suno sa ila pangabay, gin-asayn sila nga mag-alagad malapit kanday Edwena kag Bill sa Athens, Alabama. Sang ulihi ang amon magulang nga lalaki, si Dewey dyunyor, naghunahuna nga mas maalamon kon ang pamilya magpuyo sing lapitay sa South Carolina. Busa ginsaylo ni Bill ang iya pamilya sa Greenwood, malapit kanday Nanay kag Tatay. Ining mahigugmaon nga pagpasibu nagpaposible sa amon ni Robert nga magpadayon sa amon misyonero nga pag-alagad sa Colombia, nakahibalo nga ang amon mga ginikanan naatipan sing maayo.

Nian, sang 1985, gin-atake si Tatay nga nangin kabangdanan nga indi na sia makahambal kag indi na makabangon. Nagtipon kami para hambalan subong isa ka pamilya kon paano maatipan sing labing maayo ang amon mga ginikanan. Gindesisyunan nga si Audrey amo ang magaatipan kay Tatay kag makabulig kami sing daku ni Robert paagi sa pagpadala sing mga sulat kada semana upod ang makapalig-on nga mga eksperiensia kag paagi sa pagduaw sing masunson kon posible.

Ang akon katapusan nga pagduaw kay Tatay lab-as pa sa akon hunahuna. Indi mahangpan ang iya hambal, apang sang ginsilingan namon sia nga mabalik na kami sa Mexico, sa bisan paano nakahambal sia, upod ang daku nga panikasog kag emosyon, sing isa ka pulong nga “Adios!” Paagi sa sini amon nahibaluan nga, sa iya tagipusuon, ginasakdag niya ang amon desisyon nga padayunon ang amon misyonero nga asaynment. Napatay sia sang Hulyo 1987, kag si Nanay napatay siam ka bulan sang ulihi.

Ang isa ka sulat gikan sa nabalo ko nga utod nga babayi nagasumaryo sing maayo sang ginabatyag namon nga apresasyon sa amon mga ginikanan. “Ginapakabahandi ko ang akon bugana nga Cristianong palanublion kag wala gid magbatyag bisan sa isa ka tion nga mangin mas malipayon kuntani ako kon ginpadaku kami sang amon mga ginikanan sa lain nga paagi. Ang ila halimbawa nga may mabakod nga pagtuo, nagasakripisyo sa kaugalingon, kag bug-os nga pagsalig kay Jehova nakabulig sa akon nga mabatas ang makahalanusbo nga mga tion sa akon kabuhi.” Si Edwena naghinakop: “Ginapasalamatan ko si Jehova tungod sa mga ginikanan nga paagi sa hambal kag halimbawa nagpakita sa aton sing kalipay nga aton matigayon kon isentro naton ang aton kabuhi sa pag-alagad sa aton mahigugmaon nga Dios, si Jehova.”

[Mga footnote]

[Mga laragway sa pahina 22, 23]

Pamilya Fountain: (wala pa tuo) Dewey, Edwena, Winnie, Elizabeth, Dewey dyunyor;

tuo: Sanday Elizabeth kag Dewey dyunyor sa atubangan sang sound truck sang mga Henschel (1937); tuo sa ubos: Si Elizabeth nga nagapanghikot nga nagagamit sing karatula sa edad nga 16