Magtindog sing Malig-on Para sa Hinatag-sang-Dios nga Kahilwayan!
“Tungod sa kahilwayan ginhilway kita ni Cristo. Busa magtindog kamo sing malig-on, kag dili magpagota liwat sa kahiolipnan.”—GALACIA 5:1.
1, 2. Paano nadula ang hinatag-sang-Dios nga kahilwayan?
ANG katawhan ni Jehova hilway. Apang wala nila ginatinguhaan ang kahilwayan gikan sa Dios, kay magakahulugan ina sang pagkaulipon kay Satanas. Ginahamili nila ang ila suod nga kaangtanan kay Jehova kag nagakalipay sa kahilwayan nga ginahatag niya sa ila.
2 Nawasi sang aton unang mga ginikanan, nga sanday Adan kag Eva, ang hinatag-sang-Dios nga kahilwayan paagi sa pagpakasala kag nangin mga ulipon sang sala, kamatayon, kag sang Yawa. (Genesis 3:1-19; Roma 5:12) Ti, gindala ni Satanas ang bug-os nga kalibutan sa makasasala nga dalan padulong sa kalaglagan! Apang ang nagatindog sing malig-on para sa hinatag-sang-Dios nga kahilwayan nagalakat sa dalan padulong sa kabuhi nga dayon.—Mateo 7:13, 14; 1 Juan 5:19.
Kahilwayan Gikan sa Pagkabihag
3. Anong paglaum ang ginhatag sang Dios sa Eden?
3 Tuyo ni Jehova nga ang katawhan nga nagapadungog sang iya ngalan mahilway gikan sa pagkabihag kay Satanas, sa sala, kag kamatayon. Ginhatag ina nga paglaum sang ginsilingan sang Dios ang man-ug nga gingamit ni Satanas sa Eden: “Butangan ko sing kaawayon sa tunga mo kag sang babayi kag sa tunga sang imo kaliwat kag sang iya kaliwat. Sia magadugmok sang imo ulo kag dugmukon mo ang iya tikod.” (Genesis 3:14, 15) Si Jesucristo, ang Binhi gikan sa langitnon nga organisasyon ni Jehova, gindugmok sa tikod sang napatay sia sa usok, apang ang Dios nag-aman sing halad gawad agod mahilway ang matinuuhon nga katawhan gikan sa sala kag kamatayon. (Mateo 20:28; Juan 3:16) Sa ulihi, dugmukon ni Jesus ang ulo ni Satanas, ang orihinal nga Man-ug.—Bugna 12:9.
4. Anong kahilwayan ang gin-agom ni Abraham, kag ano ang ginsaad ni Jehova sa iya?
4 Mga 2,000 ka tuig pagkatapos ginhatag ang saad sa Eden, ang “abyan ni Jehova” nga si Abraham nagtuman sa Dios kag nagbiya sang siudad sang Ur para magkadto sa iban nga lugar. (Santiago 2:23; Hebreo 11:8) Busa nabaton niya ang hinatag-sang-Dios nga kahilwayan kag wala na nagkabuhi subong ulipon sang butig nga relihion, dunot nga politika, kag makagud nga komersio sang kalibutan ni Satanas. Sa tagna sa Eden, gindugang sang Dios ang mga saad nga ang tanan nga panimalay kag mga pungsod pakamaayuhon paagi kay Abraham kag sa iya Binhi. (Genesis 12:3; 22:17, 18) Si Abraham hilway sa katagudilian bangod ‘nagtuo sia kay Jehova, nga nag-isip sa iya nga sa pagkamatarong.’ (Genesis 15:6) Karon, ang suod nga kaangtanan kay Jehova nagadala man sing hinatag-sang-Dios nga kahilwayan gikan sa katagudilian kag gikan sa kahiolipnan sa kalibutan nga yara sa gahom ni Satanas.
Isa ka Makawiwili nga Malaragwayon nga Drama
5. Sa anong kahimtangan gin-angot ang pagkabun-ag ni Isaac?
5 Agod may binhi si Abraham, ang iya baw-as nga asawa, si Sara, nagtanyag sa iya sang iya ulipon nga babayi, si Agar, agod manganak sing bata. Paagi sa iya, si Abraham nangin amay ni Ismael, apang wala sia pagpilia sang Dios subong ang ginsaad nga Binhi. Sa baylo, sang si Abraham 100 anyos kag si Sara 90, ginpaposible ni Jehova nga mag-anak sila sing bata nga lalaki nga nagahingalan kay Isaac. Sang gintiawtiawan ni Ismael si Isaac, si Agar kag ang iya anak ginpalakat, nagbilin sang anak ni Abraham sa hilway nga babayi nga si Sara subong ang dimapangduhaduhaan nga binhi. Kaangay ni Abraham, si Isaac nagtuo man kag nag-agom sing hinatag-sang-Dios nga kahilwayan.—Genesis 16:1-16; 21:1-21; 25:5-11.
6, 7. Sa ano ginkumbinse sang butig nga mga manunudlo ang iban nga taga-Galacia nga mga manunudlo, apang ano ang ginpaathag ni Pablo?
6 Ining mga hitabo naglandong sang mga butang nga importante katama sa mga mahigugmaon sang hinatag-sang-Dios nga kahilwayan. Mabasa ini sa sulat nga ginsulat ni apostol Pablo sa mga kongregasyon sa Galacia sang mga 50 tubtob 52 C.E. Sadto anay ang nagadumala nga hubon nagpamat-od nga ang sirkunsisyon wala ginapatuman sa mga Cristiano. Apang ginhaylo sang butig nga mga manunudlo ang iban nga mga taga-Galacia nga isa ini ka importante nga bahin sang Cristianismo.
7 Siling ni Pablo sa mga taga-Galacia: Ang isa ka tawo ginapahayag nga matarong paagi sa pagtuo kay Cristo, indi paagi sa mga buhat sang Mosaikong Kasuguan. (1:1–3:14) Ang Kasuguan wala nagapawalay pulos sang saad nga naangot sa katipan kay Abraham kundi ginapadayag ang mga paglapas kag nangin manugtuytoy padulong kay Cristo. (3:15-25) Bangod sang kamatayon niya, ginhilway niya ang mga sa idalom sang Kasuguan, nagahimo sa ila nga mangin mga anak sang Dios. Busa, ang pagbalik sa kahimusan sang pagsaulog sang mga adlaw, mga bulan, mga panag-on, kag mga tuig magakahulugan sang pagbalik sa pagkaulipon. (4:1-20) Nian si Pablo nagsulat:
8, 9. (a) Sa inyo kaugalingon nga hambal, ipaathag sing malip-ot kon ano ang ginsiling ni Pablo sa Galacia 4:21-26. (b) Sa sining malaragwayon nga drama, sin-o ukon ano ang ginalaragway ni Abraham kag ni Sara, kag sin-o ang ginsaad nga Binhi?
8 “Sugiri ako, kamo nga buot magpaidalom sa kasuguan, Wala bala kamo makabati sang Kasuguan? Kay nasulat na nga si Abraham may duha ka anak nga lalaki, ang isa [si Ismael] sa ulipon nga babayi [si Agar] kag ang isa [si Isaac] sa hilway nga babayi [si Sara]; apang ang anak sa ulipon natawo suno sa unod, ang anak sa hilway nga babayi paagi sa saad. Karon ini isa ka palaanggiran; ining mga babayi amo ang duha ka katipan, ang isa [ang Katipan nga kasuguan] gikan sa Bukid nga Sinai [diin ginsugdan sang Dios ina nga katipan upod sa mga Israelinhon], nga nagapanganak nga sa kahiolipnan, sia si Agar. [Ang isa pa ka katipan amo ang isa nga ginhimo kay Abraham nahanungod sa Binhi.] Karon si Agar amo ang Bukid nga Sinai sa Arabia, ang naigoan niya Jerusalem nga amo karon, kay yara sia sa kahiolipnan kaupod sang iya mga anak [mga kaliwat nanday Abraham, Isaac, kag Jacob]. Apang ang Jerusalem nga sa ibabaw hilway, kag sia aton iloy.”—Galacia 4:21-26.
9 Sa sining malaragwayon nga drama, si Abraham nagatiglawas kay Jehova. Ang “hilway nga babayi,” si Sara, nagalaragway sa “babayi,” ukon sa balaan nga bug-os uniberso nga organisasyon sang Dios. Nagpanganak ini kay Cristo, ang Binhi sinang malaragwayon nga babayi kag sang Daku Pa nga Abraham. (Galacia 3:16) Agod ipakita sa mga tawo ang paagi nga mahilway sa dimatinlo nga pagsimba, sa sala, kag kay Satanas, gintudlo ni Jesus ang kamatuoran kag ginbuyagyag ang butig nga relihion, apang ang Jerusalem kag ang iya mga anak nagpabilin nga naulipon sa relihion bangod ginsikway nila sia. (Mateo 23:37,38) Ang Judiyong mga sumulunod ni Jesus nangin hilway sa Kasuguan, nga nagpakita sang pagkaulipon nila sa pagkadihimpit, sa sala, kag sa kamatayon. Hilway matuod ang tanan nga katawhan nga nagabaton kay Jesus subong ang Isa nga gin-anak sang “babayi” sang Dios nga mangin Mesianikong Hari kag Manughilway nga ‘nagabantala sing kahilwayan sa mga bihag’!—Isaias 61:1, 2; Lucas 4:18, 19.
Likawi ang Nagaulipon nga Gota
10, 11. Gikan sa anong gota sang pagkaulipon ginhilway ni Cristo ang iya mga sumulunod, kag anong mga paanggid ang makuha naton karon?
10 Sa mga nagahuman sang binhi ni Abraham kaupod ni Cristo, ang Daku Pa nga Isaac, si Pablo nagasiling: “Ang Jerusalem nga sa ibabaw hilway, kag sia aton iloy. . . . Karon kita, mga kauturan, subong kay Isaac, mga anak sang saad. Apang subong sadtong tion nga natawo sia suno sa unod [si Ismael] naghingabot sa iya nga natawo suno sa espiritu [si Isaac], amo man ini karon. . . . Indi kita mga anak sang ulipon nga babayi, kundi sang hilway nga babayi. Tungod sa kahilwayan [gikan sa Kasuguan] ginhilway kita ni Cristo. Busa magtindog kamo sing malig-on, kag dili magpagota liwat sa kahiolipnan.”—Galacia 4:26–5:1.
11 Ang bisan sin-o sa mga sumulunod ni Jesus mahimo kuntani nagota sa kahiolipnan kon nagpaidalom sila sa Kasuguan. Ang butig nga relihion amo karon ang nagaulipon nga gota, kag ang Cristiandad nagaanggid sa dumaan nga Jerusalem kag sa iya mga anak. Apang ang mga hinaplas amo ang mga anak sang Jerusalem nga sa ibabaw, ang hilway nga langitnon nga organisasyon sang Dios. Sila kag ang kaupod nila nga mga tumuluo nga may dutan-on nga paglaum indi bahin sining kalibutan kag wala naulipon kay Satanas. (Juan 14:30; 15:19; 17:14, 16) Ginhilway sang kamatuoran kag sang halad ni Jesus, magtindog kita sing malig-on para sa aton hinatag-sang-Dios nga kahilwayan.
Paghimo sing Tindog Para sa Hinatag-sang-Dios nga Kahilwayan
12. Anong tikang ang ginhimo sang mga sumulunod, kag ano karon ang pagahambalan?
12 Minilyon karon ang nagaagom sing matuod nga kahilwayan subong mga Saksi ni Jehova. Ang mga pagtuon sa Biblia ginadumalahan upod sa minilyon pa, madamo sa ila “kapid-an nga gintangdoan sa kabuhing walay katapusan.” Sang nangin mga tumuluo, nagahimo sila sing tindog para sa hinatag-sang-Dios nga kahilwayan paagi sa pagpabawtismo. (Binuhatan 13:48; 18:8) Apang anong mga tikang ang nagauna sa Cristianong bawtismo?
13. Ano ang kaangtanan sa tunga sang ihibalo kag bawtismo?
13 Sa wala pa magpabawtismo, ang isa dapat magkuha kag magpanghikot sa sibu nga ihibalo sang Kasulatan. (Efeso 4:13) Busa, ginsilingan ni Jesus ang iya mga sumulunod: “Lakat kamo kag himuon nga mga disipulo ang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo.”—Mateo 28:19, 20.
14. Ang pagpabawtismo sa ngalan sang Amay, sang Anak, kag sang balaan nga espiritu nagakinahanglan sing anong ihibalo?
14 Ang mabawtismuhan sa ngalan sang Amay nagakahulugan sang pagkilala sa katungdanan kag awtoridad ni Jehova subong Dios, Manunuga, kag Soberano sa Bug-os nga Uniberso. (Genesis 17:1; 2 Hari 19:15; Bugna 4:11) Ang pagpabawtismo sa ngalan sang Anak nagakahulugan sang pagkilala sa katungdanan kag awtoridad ni Cristo subong ginbayaw nga espiritu nga tinuga, ang Mesianikong Hari, kag ang isa nga paagi sa iya ang Dios nag-aman sing “katumbas nga gawad.” (1 Timoteo 2:5, 6; Daniel 7:13, 14; Filipos 2:9-11) Ang isa nga ginbawtismuhan sa ngalan sang balaan nga espiritu nagakilala nga ini aktibo nga kusog sang Dios nga gingamit ni Jehova sa pagtuga kag sa pagbugna sa mga manunulat sang Biblia, subong man sa iban nga mga paagi. (Genesis 1:2; 2 Pedro 1:21) Sa pagkamatuod, madamo pa kita sing matun-an nahanungod sa Dios, kay Cristo, kag sa balaan nga espiritu.
15. Ngaa ang isa dapat magtuo antes bawtismuhan?
15 Sa wala pa ang bawtismo, ang isa dapat magtuo pasad sa sibu nga ihibalo. “Sa walay pagtuo indi mahimo ang pagpahamuot [kay Jehova].” (Hebreo 11:6) Ang isa nga nagatuo sa Dios, kay Cristo, kag sa balaan nga katuyuan maluyag nga mangin isa sang mga Saksi ni Jehova, nagakabuhi nahisuno sa Pulong sang Dios kag may importante nga pagpakigbahin sa pagbantala sang maayong balita. Magapamulong sia nahanungod sa himaya sang pagkahari ni Jehova.—Salmo 145:10-13; Mateo 24:14.
16. Ano ang paghinulsol, kag ano ang kaangtanan sini sa Cristianong bawtismo?
16 Ang paghinulsol amo ang isa pa ka kinahanglanon para sa bawtismo. Ang paghinulsol nagakahulugan sang “pagbaylo sang hunahuna sang isa may kaangtanan sa nagligad (ukon hungod) nga buhat, ukon paggawi, bangod sang paghinulsol ukon pagkadinaayawan,” ukon “pagbatyag sing kasubo, ukon paghinulsol sa kon ano ang ginhimo ukon wala nahimo sang isa.” Ang unang-siglo nga mga Judiyo kinahanglan maghinulsol sa ila mga sala batok kay Jesucristo. (Binuhatan 3:11-26) Ang iban nga mga tumuluo sa Corinto naghinulsol sa panghilawas, pagsimba sa mga diosdios, panghilahi, homoseksuwalidad, pagpangawat, kakagud, pagpahubog, pagkagansal, kag paghiphip. Subong resulta, “ginhugasan” sila sa dugo ni Jesus, “ginpakabalaan” subong ginpain para sa pag-alagad kay Jehova, kag “ginpakamatarong” sa ngalan ni Jesucristo kag sa espiritu sang Dios. (1 Corinto 6:9-11) Gani ang paghinulsol isa ka tikang agod matigayon ang matinlo nga konsiensia kag ang hinatag-sang-Dios nga kahilwayan gikan sa ginatublag nga balatyagon tungod sa sala.—1 Pedro 3:21.
17. Ano ang kahulugan sang pagkanahaylo, kag ano ang ginakinahanglan sini sa isa nga nagaplano sa pagpabawtismo?
17 Dapat anay mahanabo ang paghaylo antes ang isa sarang mabawtismuhan subong isa sang mga Saksi ni Jehova. Ang paghaylo sa isa ka nagahinulsol nga indibiduwal mahanabo sa tapos niya ginsikway ang iya sayop nga dalanon kag ginpat-od nga himuon kon ano ang husto. Ang Hebreo kag Griego nga mga berbo nga may kaangtanan sa paghaylo nagakahulugan sang “pagtalikod, pagliso, ukon pagbalik.” Kon ginagamit sa maayong espirituwal nga kahulugan, nagapatuhoy ini sa pagliso sa Dios gikan sa sayop nga dalanon. (1 Hari 8:33, 34) Ang paghaylo nagakinahanglan sang “mga buhat nga takus sa paghinulsol,” nga himuon naton ang ginasugo sang Dios, bayaan ang butig nga relihion, kag ipatuhoy ang aton tagipusuon sing dimationg kay Jehova agod alagaron sia lamang. (Binuhatan 26:20; Deuteronomio 30:2, 8,10; 1 Samuel 7:3) Nagakinahanglan ini sing “bag-ong tagipusuon kag bag-ong espiritu,” nagbalhin nga panghunahuna, disposisyon, kag tulumuron sa kabuhi. (Ezequiel 18:31) Ang resulta nga bag-ong personalidad nagailis sa didiosnon nga mga batasan sing diosnon nga mga kinaiya. (Colosas 3:5-14) Huo, ang matuod nga paghinulsol nagahimo gid sa isa sa ‘pagliso.’—Binuhatan 3:19.
18. Ngaa dapat maghimo sing dedikasyon sa Dios sa pangamuyo, kag ano ang importansia sining tikang?
18 Ang dedikasyon sa Dios sa pangamuyo dapat magauna sa bawtismo. (Ipaanggid ang Lucas 3:21,22.) Ang dedikasyon nagakahulugan sang pagkanahamulag para sa sagrado nga katuyuan. Importante gid ini nga tikang sa bagay nga dapat naton ipabutyag sa Dios sa pangamuyo ang aton desisyon nga hatagan sia sing eksklusibo nga debosyon kag alagaron sia sing dayon. (Deuteronomio 5:8,9; 1 Cronica 29:10-13) Sa pagkamatuod, ang aton dedikasyon indi sa isa ka hilikuton kundi sa Dios mismo. Ina nga punto gin-athag sa lubong sang nahaunang presidente sang Watch Tower Society, nga si Charles Taze Russell. Sadto nga okasyon sang 1916, ang sekretaryo-tresurero sang Sosiedad, si W. E. Van Amburgh, nagsiling: “Ining dakung bug-os kalibutan nga hilikuton indi hilikuton sang isa ka tawo. Daku pa gid ini sa sina. Hilikuton ini sang Dios kag wala ini nagabalhin. Gingamit sang Dios ang madamong alagad sang nagligad kag walay duhaduha nga gamiton niya ang madamo sa palaabuton. Ang aton konsagrasyon [dedikasyon] indi sa isa ka tawo, ukon sa hilikuton sang isa ka tawo, kundi sa paghimo sang kabubut-on sang Dios, subong nga ipakita Niya ini sa aton paagi sa Iya Pulong kag pagtuytoy sang Dios. Ang Dios amo gihapon ang nagakontrol.” Apang ano ang dapat himuon nahanungod sa dedikasyon sa Dios?
19. (a) Paano ang mga indibiduwal nagahatag sing dayag nga pamatuod sang dedikasyon kay Jehova? (b) Sa ano nagasimbulo ang bawtismo sa tubig?
19 Ang dayag nga ebidensia sang dedikasyon kay Jehova ginahatag kon ang isa ginabawtismuhan. Ang bawtismo amo ang simbulo nga nagapakita nga ang isa nga nagapatugmaw sa tubig naghimo sing bug-os nga dedikasyon kay Jehova nga Dios paagi kay Jesucristo. (Ipaanggid ang Mateo 16:24.) Kon ang kandidato sa bawtismo ginatum-oy sa tubig kag nian ginabutwa, napatay sia sing malaragwayon sa iya daan nga dalanon sang pagkabuhi kag ginbanhaw sa isa ka dalanon sang kabuhi, sa paghimo karon sang kabubut-on sang Dios sing walay latid. (Ipaanggid ang Roma 6:4-6.) Sang ginbawtismuhan si Jesus, ginpresentar niya ang iya kaugalingon sa iya langitnon nga Amay sa walay latid nga paagi. (Mateo 3:13-17) Kag sulitsulit nga ginapakita sang Kasulatan nga ang kalipikado nga mga tumuluo ginbawtismuhan. (Binuhatan 8:13; 16:27-34; 18:8) Busa, agod mangin isa sang mga Saksi ni Jehova karon, ang isa dapat mangin tumuluo nga nagatuo gid kag nagapabawtismo.—Ipaanggid ang Binuhatan 8:26-39.
Magtindog sing Malig-on!
20. Ano ang pila ka halimbawa sa Biblia ang nagapakita nga pakamaayuhon kita bangod sang paghimo sing tindog para sa hinatag-sang-Dios nga kahilwayan subong bawtismado nga mga Saksi ni Jehova?
20 Kon nakahimo na ikaw sing malig-on nga tindog para sa hinatag-sang-Dios nga kahilwayan subong bawtismado nga Saksi ni Jehova, pakamaayuhon niya ikaw subong sang pagpakamaayo niya anay sa iya mga alagad. Halimbawa, ginpakamaayo ni Jehova ang tigulang nga sanday Abraham kag Sara paagi sa isa ka mahinadlukon sa Dios nga anak nga lalaki, si Isaac. Bangod sang pagtuo si manalagna Moises nagpasulabi sa pag-ambit sang pagpintas kaupod sa katawhan sang Dios “sang sa pag-agom sang umalagi nga mga pagpangalipay sa sala, kay ginkabig niya ang pagtamay nga gin-antos tungod sa [dumaan nga tipo ni] Cristo [subong Hinaplas sang Dios] nga daku pa nga manggad sang sa mga bahandi sa Egipto.” (Hebreo 11:24-26) Pribilehiyo ni Moises nga nagamit sia ni Jehova sa pagpanguna sa mga Israelinhon paguwa sa pagkaulipon sa Egipto. Dugang pa, bangod nag-alagad sia sa Dios sing matutom, pagabanhawon sia kag magaalagad sia subong isa sang “mga prinsipe sa bug-os nga duta” sa idalom sang Daku Pa nga Moises, si Jesucristo.—Salmo 45:16; Deuteronomio 18:17-19.
21. Anong makapalig-on nga mga halimbawa ang ginahatag nahanungod sa diosnon nga mga babayi sang dumaan nga tion?
21 Ang dedikado nga mga Cristiano karon mapalig-on man paagi sa pagbinagbinag sa mga babayi nga nangin hilway gid kag malipayon. Ang isa sa ila amo ang Moabinhon nga si Rut, nga nakaeksperiensia sang kasubo nga mabalo kag sang kalipay sang hinatag-sang-Dios nga kahilwayan gikan sa butig nga relihion. Nagbiya sang iya katawhan kag sang iya mga diosdios, nag-upod sia sa iya balo nga ugangan nga babayi, si Noemi. “Bisan diin ka makadto magakadto ako,” siling ni Rut, “bisan diin ka mapaligad sing gab-i magapaligad ako sing gab-i. Ang imo katawhan mangin akon katawhan, kag ang imo Dios akon Dios.” (Rut 1:16) Subong asawa ni Boaz, si Rut nangin iloy sang lolo ni David nga si Obed. (Rut 4:13-17) Ti, ginhatagan ni Jehova ining mapainubuson nga di-Israelinhon nga babayi sing “tuman nga balus” paagi sa paghimo sa iya nga mangin katigulangan nga babayi ni Jesus nga Mesias! (Rut 2:12) Daw ano ka malipayon si Rut kon banhawon sia kag mahibaluan niya nga may amo sia sina nga pribilehiyo! Walay duhaduha nga amo man nga kalipay ang magaawas sa tagipusuon sang pagabanhawon nga makihilawason anay nga si Rahab, nga ginhilway sa imoralidad kag butig nga pagsimba, subong man ang makasasala apang mahinulsulon nga si Bat-seba, kay mahibaluan man nila nga ginhimo sila ni Jehova nga mga katigulangan nga babayi ni Jesucristo.—Mateo 1:1-6,16.
22. Ano ang pagabinagbinagon sa masunod nga artikulo?
22 Ang pagbinagbinag sang mga nakabaton sang hinatag-sang-Dios nga kahilwayan madamo pa. Halimbawa, ang ila kadamuon nagalakip sa mga lalaki kag mga babayi sang pagtuo nga ginsambit sa Hebreo kapitulo 11. Nag-antos sila sing kapipit-an kag kapintas, “kag ang kalibutan indi takus sa ila.” Idugang sa ila kadamuon ang matutom nga nahaunang-siglo nga mga sumulunod ni Cristo kag ang iban pa nga mga matutom kutob sadto, lakip ang minilyon nga nagaalagad karon kay Jehova subong mga Saksi niya. Subong sang masunod naton nga makita, kon nakahimo na ikaw sing tindog kaupod nila para sa hinatag-sang-Dios nga kahilwayan, madamong rason nga magakalipay ka.
Paano Mo Sabton?
◻ Anong paglaum ang ginhatag sang Dios sang nadula ang hinatag-sang-Dios nga kahilwayan?
◻ Gikan sa anong “gota sang pagkaulipon” ginhilway ni Cristo ang iya mga sumulunod?
◻ Anong mga tikang ang nagauna sa pagpabawtismo subong isa sang mga Saksi ni Jehova?
◻ Anong Makasulatanhon nga halimbawa ang nagapamatuod nga pakamaayuhon kita tungod sang pagtindog para sa hinatag-sang-Dios nga kahilwayan?
[Laragway sa pahina 16]
Nahibaluan mo bala kon anong mga tikang ang nagauna sa pagpabawtismo subong isa sang mga Saksi ni Jehova?