Si Jehova—Imo Kakilala ukon Imo Abyan?
“JOHN, mahimo ko bala ikaw ipakilala sa akon abyan? Sia si—labay man ang akon, ano gani ang imo ngalan?”
Nakabati ka na bala sining daku nga sala sa paghambalanay? Nagahatag ini sing halimbawa sa kon paano ginagamit sing sayop sang iban nga mga tawo ang tinaga nga “abyan.” Sa katunayan ang buot nila silingon amo ang “kakilala” lamang ukon kon kaisa indi pa amo sina. Ang makilala si Mr. de la Cruz nga nagapuyo sa pihak-dalan isa ka butang; ang mangin abyan niya lain man nga butang.
Ang isa ka diksionaryo nagahatag sing kahulugan sa “kakilala” subong “isa ka tawo nga ang isa may sosyal nga pagpakig-angot apang wala sing makusog nga personal nga kaangtanan sa iya.” Nagakahulugan ini sang “kubos nga pagkapamilyar, pagkasuod, pagpakig-upod, kag maayong pagbuot sang sa ABYAN.”
Ining kakulang sing makusog nga personal nga kaangtanan nagabulig sa pagpaathag kon ngaa sa masami diutay lamang nga igtalupangod ang aton ginahatag sa kon ano ang nagakatabo sa aton mga kakilala, samtang malipayon kita nga nadalahig sa pagkabuhi sang aton mga abyan. Nagapakig-ambit kita sa ila mga kalipay kag sa ila mga kasubo, nagatugot sini nga magtandog gid sa aton. Sa pagkamatuod, dapat kita maghalong nga indi pagtugutan ang emosyonal nga pagkanadalahig nga magpatalang sa aton nga hilabtan ang ila pribado nga pagkabuhi.—1 Pedro 4:15.
Ang makusog nga personal nga kaangtanan sa aton mga abyan nagapaathag man kon ngaa kinaandan nga ginatinguhaan naton nga pahamut-an sila. Kon indi maluyagan sang aton kakilala ang aton paggawi, mahimo nga wala ini nagapahulag sa aton nga magbag-o. Apang ang isa ka abyan makaimpluwensia gid sing daku, sa pamayo, paggawi, ukon panimuot.
Nahanungod sa pagsalig, pagpalangga, pagtahod, kag katutom, ang pag-abyanay nagakinahanglan sing daku nga responsabilidad sang sa pagkilalahay lamang. Sia nga nagapangabay sing pagpakig-abyan, kon hambalon pa, nga wala sing responsabilidad nga nadalahig, sa katunayan maluyag lamang sing kakilala, indi sing abyan. Ang suod nga mga mag-abyan nalipay sa paghimo sang mga responsabilidad nga nalakip bangod sang makusog nga personal nga kaangtanan, nakahibalo nga nagahatag ini sa ila sing kahigayunan nga mapamatud-an ang ila pag-abyanay.
Pagpakig-abyan sa Dios
Subong Manunuga, si Jehova amo ang langitnon nga Amay sang katawhan kag nagakabagay higugmaon, tumanon, kag tahuron. Apang luyag niya nga himuon ini sang katawhan bangod sang makusog nga personal nga kaangtanan, indi bangod lamang sang pagbatyag sing katungdanan. (Mateo 22:37) Luyag man niya nga higugmaon nila sia subong isa ka Abyan. (Salmo 18:1) Sanglit “sia naghigugma sa aton sing una,” sia mismo ang nagpasad sing himpit nga sadsaran para sa sinang pag-abyanay.—1 Juan 4:19.
Ang aton unang mga ginikanan, sanday Adan kag Eva, nakakilala kay Jehova. Ang pamangkot amo: Batunon bala nila ang iya tanyag nga pagpakig-abyan? Sing masubo, wala nila ini pagbatuna. Ang ila makagod nga pagtinguha sing kahilwayan gikan sa Dios nagpakita sing pagkawalay balatyagon sang makusog nga personal nga kaangtanan. Handa magbaton sang mga pagpakamaayo sang pag-abyanay nga ginatanyag niya, indi sila handa sa pagtuman sang mga responsabilidad sini. Daw subong bala nga luyag nila ang kasulhay kag kalig-unan sang ila matawhay nga puluy-an sa Paraiso apang indi nila luyag magbayad sing arkila.
Kita tanan, ang iban sa mas daku nga kasangkaron sang sa iban, nakapanubli sining dimapasalamaton kag independiente nga espiritu. (Genesis 8:21) Ang iban nga mga pamatan-on, halimbawa, nagtugot sang ila kinaugali nga handum para sa kahilwayan nga mangin dimapasalamaton sa ila mga ginikanan. Nagresulta ini sa pagkabungkag sang labing hamili nga pag-abyanay nga dapat kuntani magaluntad sa tunga nila kag sang ila mga ginikanan sa bug-os nga kabuhi. Apang, sing masubo subong sini, ang pagkabungkag sang aton pagpakig-abyan sa aton langitnon nga Amay mas serioso. Sa katunayan, mahimo ini makamamatay!
Mga Kinahanglanon Para sa Pag-abyanay
Kon wala sing pagsalig, wala sing kaangtanan, sa mga tawo ukon sa Dios, ang magalawig. Nahangpan ini ni patriarka Abraham, kag amo sina kon ngaa pirme sia nagpakita sing bug-os nga pagsalig sa Dios. Basaha ang Genesis 12:1-5 kag 22:1-18, kag tan-awa ang duha ka tumalagsahon nga halimbawa sang pagsalig niya kay Jehova. Huo, “si Abraham nagtuo kay Jehova, kag ginkabig ini sa iya nga sa pagkamatarong.” Amo ina kon ngaa “gintawag sia nga ‘abyan ni Jehova.’”—Santiago 2:23.
Ang dugang nga kinahanglanon para sa pagpakig-abyan sa Dios amo ang pagtuman sang mga obligasyon nga ginakinahanglan sining pag-abyanay. Bangod sang aton manubo nga posisyon may kaangtanan kay Jehova, ining mga obligasyon lohiko nga daku pa sang sa tawhanon nga pag-abyanay. Labaw ini sa luyag naton nga pahamut-an sia sa pila ka butang—subong sang himuon naton sa isa ka tawhanon nga abyan. Nagalakip ini sang kaluyag naton nga pahamut-an sia sa tanan nga butang. Si Jesus, ang Anak sang Dios kag labing suod nga abyan, nagpakita sini sang nagsiling sia tuhoy kay Jehova: “Kay nagahimo ako pirme sang kalahamut-an sa iya.”—Juan 8:29.
Busa, ang pagpakig-abyan kay Jehova, ukon sa iya Anak, indi matigayon sa wala-sing-obligasyon nga sadsaran; nasandig ini sa aton pagsunod sa pangunang kinahanglanon para sa pag-abyanay nga ginpahamtang nila. (Salmo 15:1-5.) Maathag ini nga ginpakita ni Jesus sang nagasugilanon sa iya mga disipulo. “Kamo akon mga abyan,” siling niya sa ila, “kon nagahimo kamo sang ginsugo ko sa inyo.”—Juan 15:14.
Ang isa pa ka kinahanglanon sa pag-abyanay amo ang bukas kag prangka nga komunikasyon. Sang adlaw nga napatay sia, ginsilingan ni Jesus ang iya matutom nga mga apostoles: “Indi na ako magtawag sa inyo nga mga ulipon, kay ang ulipon wala makahibalo sang ginahimo sang iya agalon. Apang ako nagtawag sa inyo nga mga abyan, kay ang tanan nga akon nabatian sa akon Amay napakilala ko sa inyo.” (Juan 15:15) Sang nagapaambit sang iya mga panghunahuna sa iya mga abyan, si Jesus nagasunod sang huwaran sang iya langitnon nga Amay, nga sa iya ang Amos 3:7 nagasiling: “Ang Soberanong Ginuo nga si Jehova indi maghimo sing bisan ano nga butang kon indi niya anay mapahayag ang iya tinago sa iya mga alagad nga mga manalagna.”
Indi bala amo ini ang kinaandan nga butang sa tunga sang mga mag-abyan? Indi naton luyag isugid ang aton mga eksperiensia kay Mr. de la Cruz sa pihak-dalan. Kag labi pa gid nga indi naton luyag isugid sa iya ang aton nasulod nga mga panghunahuna kag mga balatyagon. Ti, isa lamang sia ka kakilala. Apang sa aton mga abyan, aba, masami nga daw indi kita makahulat nga isugid sa ila inang mga butang!
Amo man sa aton pagpakig-abyan sa Dios. Daw indi kita makahulat nga magpalapit sa iya sa pangamuyo, nagasugid sa iya sang aton mga kinahanglanon, sang aton mga handum, kag sang aton nasulod nga mga balatyagon. Sa pagkamatuod, kon ang komunikasyon bangi-an, ang pag-abyanay madula sa ulihi. Gani dapat man kita mangin handa nga tugutan ang Dios nga makighambal sa aton. Ginahimo naton ini paagi sa pagpamati sing maayo sa iya nasulat nga Pulong, pagpamalandong sa iya laygay, kag nian pag-aplikar sini sa bug-os naton nga masarangan.
Daw Ano ka Importante sa Imo ang Pagpakig-abyan ni Jehova?
Agod buligan ka nga masabat ining pamangkot, binagbinaga ang pinasahi nga sahi sang tawhanon nga pag-abyanay. Kon ikaw isa ka lamharon, ayhan interesado ka sa pag-abyanay nga nagadul-ong sa pag-asawahay. Sa pagkamatuod, narealisar mo nga ang mangin kakilala lamang sang palaabuton nga tiayon indi amo ang nagakaigo nga sadsaran para sa pag-asawahay. Ang pagkakilalahay dapat anay mangin pag-abyanay. Nian ining pag-abyanay magatubo kag magadihon sa isa ka mas suod nga kaangtanan nga magahuman sa ulihi sang nagakaigo nga sadsaran para sa isa ka malipayon nga pag-asawahay.
Binagbinaga karon. Daw ano ka daku nga panikasog ang ginahimo sang kalabanan nga tawo sa pagpalambo sini nga sahi sang pag-abyanay? Daw ano kadamo nga tion kag kuwarta ang ginahinguyang nila sa pagpabakud kag nian sa paghupot sini? Daw ano kadamo nga tion ang ginahinguyang nila sa paghunahuna tuhoy sini? Tubtob diin sila nagahimo sing mga plano—ukon nagapakita sing kahanda sa pagbag-o sang mga plano—sa tuyo nga mapauswag ukon mahuptan ini nga kaangtanan?
Nian pamangkuta ang imo kaugalingon: ‘Paano ini mapaanggid sa akon mga panikasog nga mapalambo ang pagpakig-abyan sa akon Manunuga ukon mapauswag kag mapabakud ini? Daw ano kadamo nga tion ang ginahinguyang ko sa paghmo sini? Tubtob diin ang pagpakig-abyan ni Jehova nagaunod sang akon panghunahuna? Tubtob diin ako nagahimo sing mga plano—ukon nagapakita sing kahanda nga bag-uhon ang mga plano—sa tuyo nga mapauswag kag nian mahuptan ini nga kaangtanan?’
Dapat mahibaluan sing maayo sang lamharon nga mga Cristiano nga ang tanan nga tawhanon nga pagpakig-abyan, lakip ang isa nga nagadul-ong sa ulihi sa pag-asawahay, ikaduha sing importansia sa pag-abyanay nga kinahanglan nila upod sa ila Manunuga. Amo sina kon ngaa ginlaygayan sila sa Manugwali 12:1: “Dumduma man ang imo Dakung Manunuga sa mga adlaw sang imo pagkapamatan-on.” Madamo ang nagahimo sini paagi sa dayag nga pag-alagad subong mga ministro sang Dios, ang nagadamo pa nga kadamuon nila subong bug-os tion nga mga manugbantala, ukon mga payunir.
Walay sapayan sang nagadugang nga pagtiawtiaw kag pagkadirelihioso sa palibot nila, masidla nila nga ginapangapinan si Jehova kon makabati sila sing butig nga mga yaoyao ukon sumbong batok sa iya. Indi bala amo dapat ini ang makatarunganon nga paabuton ni Jehova sa iya mga abyan? Indi bala nga amo ini ang ginapaabot naton sa aton mga abyan? Kag indi bala ini magapahalipay sang aton tagipusuon kon mahibaluan naton nga ginahimo ini sang aton mga abyan sing makugi kag upod ang kombiksion?—Ipaanggid ang Hulubaton 27:11.
Huo, ang pagpakig-abyan sa Dios—subong sa mga tawo—nagadala sing mga responsabilidad nga dapat himuon agod magadugay ang pag-abyanay. Ang tawo nga indi handa sa pagbaton sining mga responsabilidad, ukon indi handa sa paghimo sing dedikasyon sa Dios kag nian tumanon ini, mahimo nga nakakilala kay Jehova. Apang, dapat pa niya maeksperiensiahan ang kalipay nga mangin Abyan Niya.
[Laragway sa pahina 25]
Si Abraham nagsalig sa Dios kag busa gintawag nga abyan ni Jehova