Sunda ang Labing Maayo nga Paagi sang Gugma
SI Jehova nga Dios gugma. (1 Juan 4:8) Ang iya Anak, si Jesucristo, nagsiling nga dapat naton higugmaon ang Dios kag ang aton isigkatawo. (Mateo 22:37-40) Ti, ginapalakat sang Dios ang bug-os nga uniberso pasad sa sining kinaiya! Gani para sa dayon nga kabuhi bisan diin, dapat naton sundon ang paagi sang gugma.
Ang Dios nagpakita sing gugma sa pungsod sang Israel apang nagsikway sang ulihi sina nga organisasyon tungod sang pagkadimatutom. Nian ginpakilala niya ang kongregasyon sang mga disipulo ni Jesus subong ang Iya bag-ong organisasyon. Paano? Paagi sa pinasahi nga mga pagpadayag sang balaan nga espiritu nga naghatag sing gahom sa ila sa pagpamulong sing mga hambal kag sa pagpanagna. Busa, sang Pentecostes 33 C.E., 3,000 ka Judiyo kag proselita ang nangin tumuluo kag nagbiya sang daan nga organisasyon para sa bag-o nga organisasyon sang Dios. (Binuhatan 2:1-41) Sanglit pagkatapos sadto ang mga dulot sang espiritu ginhatag sa mga apostoles ni Jesus, inang mga pagpadayag nauntat sang napatay sila. (Binuhatan 8:5-18; 19:1-6) Apang ang mga dulot nagpamatuod sadto nga ang kahamuot sang Dios yara sa espirituwal nga Israel.—Galacia 6:16.
Ang mga milagro nga resulta sang mga dulot sang espiritu mapuslanon. Apang, ang pagpakita sing gugma ukon dimakagod nga pag-ulikid sa iban mas importante pa sang sa pagtigayon sang mga dulot sang espiritu. Ginpakita ini ni Pablo sa iya nahaunang sulat sa mga taga-Corinto (c. 55 C.E.). Ginpatuhuyan niya diri ang gugma subong “ang labing maayo nga paagi.” (1 Corinto 12:31) Ina nga paagi ginhambalan sa 1 Corinto kapitulo 13.
Kon Walay Gugma, Wala Kita sing Kapuslanan
Si Pablo nangatarungan: “Kon nagapamulong ako sang mga hambal sang mga tawo kag sang mga manugtunda apang walay gugma, subong ako sang saway nga nagatunog ukon apiping nga nagatagsing.” (1 Corinto 13:1) Kon wala sing gugma, wala sing pulos ang magpamulong sa ginapaambit sang espiritu nga tawhanon nga pamulong ukon langitnon nga angheliko nga pamulong. Ginpakamaayo ni Pablo ang magpamulong sang lima ka makapabakud nga pulong sa baylo sang napulo ka libo sa pamulong nga wala mahangpan sang tawo. (1 Corinto 14:19) Ang tawo nga walay gugma kaangay sang “saway nga nagatunog”—magahod, makaulugot nga bagting—ukon wala sing tono nga “apiping nga nagatagsing.” Ang walay gugma nga pagpamulong sa mga hambal indi isa ka makapapagsik, makapalig-on sa espirituwal nga paagi sa paghimaya sa Dios kag sa pagbulig sa iya katawhan. Karon, ginapakita naton ang gugma paagi sa paggamit sing mahangpan nga pamulong sa Cristianong ministeryo.
Ang apostol masunod nga nagsiling: “Kon may pagkamanalagna ako kag makahibalo sang tanan nga balaan nga tinago kag tanan nga ihibalo, kag kon may akon ako sang bug-os nga pagtuo sa bagay nga makahalin sang mga bukid, apang walay gugma, wala ako sing kapuslanan.” (1 Corinto 13:2) Ang milagruso nga pagpanagna, pinasahi nga paghantop sang balaan nga mga tinago, kag ginpaambit sang espiritu nga ihibalo mahimo makabenepisyo sa iban apang indi sa mga nagapanag-iya sina nga mga dulot kon ang mga may dulot dimahigugmaon. Gingamit ni Pablo ang pinasahi nga paghangop sang balaan nga mga tinago sa pagbulig sa iban, kag ang dulot sang ihibalo naghimo sa ila nga matagna ang kaluwasan sang mga biktima sang nalunod nga barko. (Binuhatan 27:20-44; 1 Corinto 4:1, 2) Apang, kon may yara sia sang ‘tanan nga ihibalo kag tanan nga pagtuo’ apang dimahigugmaon, wala sia sing kapuslanan sa itololok ni Jehova.
Karon, ang espiritu ni Jehova nagahimo sa iya mga Saksi nga mahangpan ang mga tagna sang Biblia kag ang balaan nga mga tinago kag nagatuytoy sa ila sa pagpaambit sina nga ihibalo sa iban. (Joel 2:28, 29) Ang espiritu nagapatubas man sing pagtuo nga kinahanglanon sa paglubad sang daw bukid nga mga problema. (Mateo 17:20) Sanglit ginahimo sang espiritu ining mga butang, sayop ang magtinguha sing personal nga himaya gikan sa sini. Wala kita sing kapuslanan kon indi kita magahimo sang mga butang sa himaya sang Dios kag nga may gugma sa iya kag sa isigkatawo.—Galacia 5:6.
Indi Makapanginpulos sa Walay Gugma nga Halad
Si Pablo nagsiling: “Kon ipanghatag ko ang tanan ko nga pagkabutang, kag kon itugyan ko ang akon lawas nga sunugon, apang wala sing gugma, wala ini sing kapuslanan sa akon.” (1 Corinto 13:3) Kon walay gugma, indi makapanginpulos si Pablo kon ipanghatag niya ang tanan nga ginapanag-iyahan niya sa pagpakaon sa iban. Ang Dios nagapadya sa aton tungod sa gugma sa likod sang aton mga dulot, indi tungod sa materyal nga balor sini ukon bangod luyag naton ang himaya subong mga manughatag, kaangay sang butigon nga sanday Ananias kag Safira. (Binuhatan 5:1-11) Si Pablo nagpahamtang sing maayo nga halimbawa paagi sa mahigugmaon nga paghatag sang iya kaugalingon may kaangtanan sa ministeryo sa paghatag sing bulig para sa mga tumuluo sa Judea.—1 Corinto 16:1-4; 2 Corinto 8:1-24; 9:7.
Bisan ang walay gugma nga pagkamartir subong saksi sang kamatuoran wala sing kapuslanan sa Dios. (Hulubaton 25:27) Si Jesus nagpamulong tuhoy sa iya halad apang wala niya ini ginpadayawdayaw. Sa baylo nga magpadayawdayaw ginhatag niya ang iya kaugalingon sing kinabubut-on tungod sang gugma. (Marcos 10:45; Efeso 5:2; Hebreo 10:5-10) Ang iya espirituwal nga mga kauturan ‘nagdulot sang ila mga lawas subong nga halad nga buhi’ sa pag-alagad sa Dios indi sa nagahimaya sang kaugalingon nga pagkamartir kundi sa ditalalupangdon nga paagi nga nagahimaya kay Jehova kag nagapakita sang ila gugma sa iya.—Roma 12:1, 2.
Mga Pila ka Paagi nga ang Gugma Nagapahulag sa Aton
Si Pablo nagsulat: “Ang gugma mapailubon kag malulo.” (1 Corinto 13:4a) Para sa madamo, ang pagpailob sang Dios kutob sang pagpakasala ni Adan nagkahulugan sing paghinulsol nga nagapadulong sa kaluwasan. (2 Pedro 3:9, 15) Kon kita may gugma, mapailubon naton nga tudluan ang iban sang kamatuoran. Likawan naton ang emosyonal nga silabo kag mangin mapatugsilingon kag mapatawaron. (Mateo 18:21, 22) Ang gugma malulo man, kag nagasuod kita sa Dios bangod sang iya kalulo. Ang bunga sang espiritu nga kalulo nagapugong sa aton nga mangin sobra ka palapangayo sa iban sang sa sia sa aton. (Efeso 4:32) Ang gugma nagahimo gani sa aton nga malulo sa dimapasalamaton nga katawhan.—Lucas 6:35.
Si Pablo nagdugang: “Ang gugma wala nagakahisa, wala ini nagapabugal, wala nagapahabok.” (1 Corinto 13:4b) Ang kahisa buhat sang unod nga wala nagalakip sa isa sa Ginharian sang Dios. (Galacia 5:19-21) Ang gugma nagapugong sa aton sa pagkahisa sa pagkabutang ukon maayo nga kahimtangan sang iban. Kon nagabaton sia sing pinasahi nga pribilehiyo nga naluyagan naton, ang gugma magahimo sa aton nga magkalipay kaupod niya, maghatag sa iya sang aton supurta, kag magpasalamat sa Dios nga magamit sia sa pagbulig sa kongregasyon.
Sanglit ang gugma “wala nagapabugal,” wala ini nagapahulag sa aton nga magpadayawdayaw nahanungod sa ginatugot sang Dios nga himuon naton sa pag-alagad sa iya. Ang iban nga mga taga-Corinto nagpabugal subong nga daw naghalin sa ila ang mga dulot sang espiritu, apang naghalin ini sa Dios, subong man ang mga pribilehiyo sa iya modernong-adlaw nga organisasyon. Sa baylo nga magpabugal nahanungod sa aton tindog sa organisasyon sang Dios, nian, mag-andam kita nga indi mapukan. (1 Corinto 1:31; 4:7; 10:12) Ang gugma “wala nagapahabok,” apang ang hunahuna sang dimahigugmaon nga tawo mahimo maghabok bangod sang pagpaimportante sa kaugalingon. Ang mahigugmaon nga mga tawo wala nagabatyag nga labaw sa iban.—1 Corinto 4:18, 19; Galacia 6:3.
Indi Dinagakaigo, Makagod, Mainakigon
Ang gugma “wala nagagawi sing dinagakaigo, wala nagapangita sang iya kaugalingon, indi ini mainakigon.” (1 Corinto 13:5a) Nagapauswag ini sang maayong pamatasan, diosnon nga paggawi, pagtahod sa awtoridad, kag nagakaigo nga paggawi sa Cristianong mga miting. (Efeso 5:3-5; 1 Corinto 11:17-34; 14:40; ipaanggid ang Judas 4, 8-10.) Sanglit ang gugma nagapabatyag sa tanan nga kinahanglanon, kaangay sang tanan nga bahin sang tawhanon nga lawas, ang mahigugmaon nga kongregasyon isa ka duog sang paghidait kag dalangpan. (1 Corinto 12:22-25) Sa baylo sang makagod nga ‘pagpangita sang iya kaugalingon,’ ang gugma nagapahulag sa aton nga isakripisyo ang aton mga kinamatarong kon kaisa kag ipakita ang interes sa iban kag sa ila kaayuhan. (Filipos 2:1-4) Ang gugma nagahimo sa aton nga ‘mangin tanan nga butang sa tanan nga tawo, agod nga maluwas naton ang iban’ paagi sa aton ministeryo.—1 Corinto 9:22, 23.
Ang gugma “indi mainakigon.” Ang silabo sang kaakig mga buhat sang makasasala nga unod, apang ang gugma nagahimo sa aton nga “magmakuli sa pagpangakig.” (Santiago 1:19; Galacia 5:19, 20) Bisan pa makatarunganon kita nga maakig, ang gugma wala nagabilin sa aton nga akig, busa nagahatag sing duog sa Yawa. (Efeso 4:26, 27) Labi na nga dapat likawan sang mga gulang ang maakig kon indi masunod sang mga masigkatumuluo ang pila ka panugda.
Si Pablo nagsiling man tuhoy sa gugma: “Wala ini nagasapak sang kalautan.” (1 Corinto 13:5b) Ang gugma wala nagahupot sing listahan sang mga sala, kaangay sang mga entrada sa ledyer. Ginatan-aw sini ang maayo sa mga masigkatumuluo kag wala nagabalus sa matuod ukon nahunahuna lamang nga mga sala. (Hulubaton 20:22; 24:29; 25:21, 22) Ang gugma nagabulig sa aton ‘nga sundon ang nagahimo nga sa paghidait.’ (Roma 14:19) Sanday Pablo kag Bernabe nagbaisay kag nagbulagay sa pag-alagad sa Dios, apang ang gugma nag-ayo sang pagdipaghangpanay kag nagbulig sa ila nga indi magdumot.—Levitico 19:17, 18; Binuhatan 15:36-41.
Nahuyog sa Pagkamatarong kag Kamatuoran
Nahanungod sa gugma, si Pablo nagpadayon sa pagsiling: “Wala ini nagakalipay sa katikuan, kundi nagakalipay sa katarungan.” (1 Corinto 13:6) Ang iban nalipay sa dimatarong sa bagay nga “wala sila nagatulog kon indi sila makahimo sing malaut.” (Hulubaton 4:16) Apang sa organisasyon sang Dios wala kita nagainaway ukon nagakalipay kon ang isa masiod sang sala. (Hulubaton 17:5; 24:17, 18) Kon may nagakaigo nga gugma para sa Dios kag sa pagkamatarong sa kongregasyon sang Corinto, kuntani ang imoralidad wala gintugutan didto. (1 Corinto 5:1-13) Lakip sa iban nga mga butang, ang gugma sa pagkamatarong magapugong sa aton gikan sa pagkalipay sa mga palaguwaon sang telebisyon, sine, ukon teatro tuhoy sa pagkadimatarong.
Ang gugma “nagakalipay sa kamatuoran.” Diri ang kamatuoran ginapaanggid sa pagkadimatarong. Maathag ini nga nagakahulugan nga ang gugma nagapahulag sa aton nga magkalipay tungod sa impluwensia para sa pagkamatarong nga ginahimo sang kamatuoran sa katawhan. Nagakalipay kita sa mga butang nga nagapalig-on sa katawhan kag nagapauswag sa kausa sang kamatuoran kag pagkamatarong. Ang gugma nagapugong sa aton gikan sa pagbutig, nagahatag sa aton sing kalipay kon ang matarong napamatud-an nga walay sala, kag nagapahalipay sa aton sa kadalag-an sang kamatuoran sang Dios.—Salmo 45:4.
Kon Paano ang Gugma Naangot sa Tanan nga Butang
Nagapadayon sang iya depinasyon sa gugma, si Pablo nagsulat: “Ang gugma nagabatas sang tanan nga butang, nagatuo sang tanan nga butang, nagalaum sang tanan nga butang, nagaantos sang tanan nga butang.” (1 Corinto 13:7) “Nagabatas sang tanan nga butang,” ang gugma wala nagakaakig subong nga ang maayo nga atop nagabatu sa ulan. Kon ang isa nagasaklaw sa aton apang nangayo sing kapatawaran, ang gugma nagahimo sa aton nga mabatas ang halit, nagapatawag sa nakasala sa baylo nga ipamaba ang nahanungod sini. Sa gugma ginatinguhaan naton nga ‘madaug ang aton utod.’—Mateo 18:15-17; Colosas. 3:13.
Ang gugma “nagatuo sang tanan nga butang” sa Pulong sang Dios kag nagahimo sa aton nga mapasalamaton sa espirituwal nga pagkaon nga ginaaman paagi sa “matutom kag mainandamon nga ulipon.” (Mateo 24:45-47) Bisan pa indi kita madali magpati, ang aton tagipusuon nagapugong sa aton gikan sa pagtigayon sing dimapinatihon nga tagipusuon kag nagapugong sa aton sa paghunahuna sing malain nga motibo sa mga masigkatumuluo. (Manugwali 7:21, 22) Ang gugma “nagabatas [man] sang tanan nga butang” nga narekord sa Kasulatan, subong sang mga kamatuoran nahanungod sa Ginharian sang Dios. Ginpahulag sang gugma, ginalauman kag ginapangamuyo naton ang labing maayo nga resulta sa mabudlay nga mga kahimtangan. Ang gugma nagapahulag man sa aton nga isugid sa iban ang rason sang aton paglaum. (1 Pedro 3:15) Dugang pa, ang gugma “nagabatas sang tanan nga butang,” lakip ang mga sala batok sa aton. (Hulubaton 10:12) Ang gugma sa Dios nagabulig man sa aton sa pagbatas sang paghingabot kag sang iban nga mga pagtilaw.
Si Pablo nagdugang: “Ang gugma wala nagakapaslaw.” (1 Corinto 13:8a) Subong nga si Jehova wala nagakapaslaw, ang gugma wala man nagakapaslaw. Sanglit ang aton dayon nga Dios amo ang laragway sang gugma, ini nga kinaiya indi gid magauntat. (1 Timoteo 1:17; 1 Juan 4:16) Ang uniberso pirme pagatuytuyan sang gugma. Busa mangamuyo kita nga ang Dios magabulig sa aton sa paglandas sang makagud nga mga batasan kag sa pagpakita sining wala nagakapaslaw nga bunga sang iya espiritu.—Lucas 11:13.
Mga Butang nga Magataliwan
Nagatudlo sa unahan, si Pablo nagsulat: “Kon nahanungod sa dulot sang pagpanagna, ini mataliwan; kon nahanungod sa mga hambal, magauntat ini; kon nahanungod sa ihibalo, mataliwan ini.” (1 Corinto 13:8b) Ang ‘dulot sang pagpanagna’ nagahimo sa mga nagapanag-iya sini sa pagbungat sing bag-ong mga tagna. Bisan pa inang mga dulot nagtaliwan sa tapos natukod ang Cristianong kongregasyon subong organisasyon sang Dios, ang iya matagnaon nga gahom wala magtaliwan, kag ang iya Pulong nagaunod sang tanan nga tagna nga ginakinahanglan naton karon. Ang ginpaambit sang espiritu nga ikasarang sa pagpamulong sing mga hambal nag-untat man, kag ang pinasahi nga ihibalo ‘nagtaliwan,’ subong sang gintagna. Apang ang bug-os nga Pulong ni Jehova nagahatag sang ginakinahanglan naton mahibaluan para sa kaluwasan. (Roma 10:8-10) Dugang pa, ang katawhan sang Dios napuno sang iya espiritu kag nagapatubas sang bunga sini.
Si Pablo nagpadayon: “Kay ang aton ihibalo dihimpit kag ang aton panagna dihimpit; apang kon ang himpit mag-abot, ang dihimpit mataliwan.” (1 Corinto 13:9, 10) Ang dulot sang ihibalo kag tagna dihimpit. Gani, inang tagna wala maghatag sang detalye, kag ang tagsa ka manalagna dihimpit sa paghatag sang palaabuton, kulang sing himpit nga ihibalo nahanungod sa gintagna niya. Apang, karon, ang paghangop sa tagna amat-amat nga nagahimpit. Halimbawa, ang mga katunayan nga nagatuman sang tagna sang Biblia nagapalig-on nga nabaton ni Jesus ang harianon nga awtoridad sa ibabaw sang katawhan sang 1914. Kutob sadto, yara kita sa “tion sang katapusan” kag nagaagom sing padayon nga pagtubo sa espirituwal nga ihibalo kag paghangop sa tagna sang Biblia. (Daniel 12:4) Gani, nagahimpit ang aton ihibalo kag “ang himpit” malapit na.
Ang Labing Daku nga Kinaiya Nagapabilin
Nagapatuhoy sa pag-uswag sang kongregasyon, si Pablo nagsulat: “Sang ako bata pa, naghambal ako subong sang bata, naghunahuna ako subong sang bata, nagbais ako subong sang bata; sang hamtong na ako, ginsikway ko ang binata nga mga butang.” (1 Corinto 13:11) Sanglit ang bata nagahulag pasad sa limitado nga ihibalo kag pisikal nga pagtubo, sarang ini maimpluwensiahan, subong nga daw ginaduyanduyan. Apang ang hamtong nagtubo na sa pisikal, nakatigayon sing madamo pa nga ihibalo, kag masami nga indi madali madala. Gindula niya ang binata nga panghunahuna, panimuot, kag mga paagi. Sa kaanggid, sang ang dutan-on nga organisasyon sang Dios nagtubo gikan sa pagkabata, namat-od Sia nga wala na ini nagakinahanglan sang mga dulot sang espiritu sa pagtagna, sa hambal, kag ihibalo. Bisan pa nga ang karon nga mga katapo sang kongregasyon, tigulang na karon, wala man nagabatyag sing pagkinahanglan sa sinang mga dulot, nalipay sila sa pag-alagad sa Dios sa idalom sang impluwensia sang iya espiritu.
Si Pablo nagdugang: “Kay karon nagatulok kita sing dimaathag sa salaming, apang ugaling sa guya kag guya. Karon nakakilala ako sa bahin, ugaling magahangop ako sing bug-os subong nga ako man nahangop sing bug-os.” (1 Corinto 13:12) Sang bata pa ang kongregasyon, indi anay yadto ang tion sang Dios nga isugid ang pila ka butang. Gani, nakita sila sa dimaathag nga balayan, subong nga ang mga Cristiano nagatan-aw sa salaming nga indi maayo sing klase. (Binuhatan 1:6, 7) Apang indi buron ang makita naton. Ang katumanan sang tagna kag larawan maathag nga makita, kay amo ini ang tion sang Dios sa pagpahayag. (Salmo 97:11; Daniel 2:28) Bisan nakilala mismo ni Pablo ang Dios, ang talipuspusan sang ihibalo tuhoy kay Jehova kag ang labing suod nga kaangtanan sa Iya magaabot kon ang apostol banhawon padulong sa langitnon nga kabuhi, busa magabaton sang bug-os nga padya sang iya Cristianong dalanon.
Nagahinakop sang iya paglaragway sa gugma, si Pablo nagsulat: “Gani, ang pagtuo, ang paglaum, ang gugma nagapadayon, ini sila nga tatlo; apang ang labing daku gid sini sa ila amo ang gugma.” (1 Corinto 13:13) Walay sapayan nga wala na sing milagruso nga mga dulot sang espiritu, ang kongregasyon karon may mas kompleto nga ihibalo kag rason para sa daku pa nga pagtuo, paglaum, kag gugma. May pagtuo ini nga ang tanan nga ginsaad sang Dios subong nga natuman na. (Hebreo 11:1) Ang mga bahin sang pagtuo matapos kon ang mga butang nga gintagna sa Pulong sang Dios matuman. Ang mga bahin sang paglaum magauntat kon makita naton ang ginalauman nga mga butang. Apang ang gugma magapabilin sing dayon. Gani, kabay nga padayon nga sundon sang tanan nga mga Saksi ni Jehova ang labing maayo nga paagi sang gugma.