Si Jehova Nagapatawad sing Bugana
“Magbiya ang malauton sang iya dalanon, kag ang dimatarong nga tawo sang iya mga painoino; kag magbalik sia kay Jehova, . . . kay sia magapatawad sing bugana.”—ISAIAS 55:7.
1. Sa ano karon ginapakamaayo ang mga nagabaton sang kapatawaran ni Jehova?
SI Jehova nagapatawad sa mahinulsulon nga mga makasasala kag karon nagapaposible sa ila nga matigayon ang kalinong sang painoino sa espirituwal nga paraiso. Amo ini bangod ginatuman nila ining mga kinahanglanon: “Pangitaa ninyo si Jehova samtang nga makita pa sia. Tawga ninyo sia samtang nga malapit pa sia. Magbiya ang malauton sang iya dalanon, kag ang dimatarong nga tawo sang iya mga painoino; kag magbalik sia kay Jehova, kag sia magakaluoy sa iya, kag sa aton Dios, kay sia magapatawad sing bugana.”—Isaias 55:6, 7.
2. (a) Ano ang kahulugan sang ‘pagpangita kay Jehova’ kag ‘pagbalik sa iya,’ subong sang ginasambit sa Isaias 55:6, 7? (b) Ngaa ang Judyong mga tinapok sa Babilonia kinahanglan magbalik kay Jehova, kag ano ang natabo sa iban sa ila?
2 Agod ‘makita si Jehova’ kag makatawag sa iya sing kalahamut-an, dapat biyaan sang malauton ang iya malain nga dalanon kag ang bisan anong painoino nga halitan ang iban. Ang kinahanglanon nga ‘magbalik kay Jehova’ nagapakita nga ginbiyaan sang nakasala ang Dios, nga sang una may suod sia nga kaangtanan upod sa iya. Amo sina ang natabo sa mga pumuluyo sang Juda, nga ang dikatutom sa Dios nagdul-ong sang ulihi sa pagkatapok sa Babilonia. Ang Judiyong mga tinapok kinahanglan magbalik kay Jehova paagi sa paghinulsol sa malaut nga mga buhat nga nagresulta sa pagbihag sa ila sang Babilonia kag sa gintagna nga 70-ka-tuig nga pagkahapay sang ila tumandok nga duta. Sang 537 B.C.E., ang duta ginpuy-an liwat sang nagakahadlok sa Dios nga nagkalabilin sang mga Judiyo nga ginhilway gikan sa Babilonia paagi sa dekrito sang gobierno. (Esdras 1:1-8; Daniel 9:1-4) Makalilipay gid ang mga epekto sadto nga pagpasag-uli sa bagay nga ang duta sang Juda ginpaanggid sa Paraiso sa Eden.—Ezequiel 36:33-36.
3. Paano ang nagkalabilin sang espirituwal nga Israel nakaeksperiensia sang kaangay sang iya sang nagakahadlok sa Dios nga mga tinapok nga nagbalik sa Juda?
3 Ang espirituwal nga mga Israelinhon may eksperiensia nga kaanggid sa iya sang nagakahadlok sa Dios nga mga Judiyo nga nagbalik sa Juda pagkatapos sang pagkatapok sa Babilonia. (Galacia 6:16) Ang nagkalabilin sang espirituwal nga Israel naghimo sing pila ka pagbalhin sa ila dalanon kag sa ila mga painoino pagkatapos mismo sang Inaway Kalibutanon I. Ang tuig 1919 nagtanda sang katapusan sang pagtapok sa ila gikan sa bug-os nga kahamuot sang Dios sa emperyo sang Babilonia nga Daku, ang bug-os kalibutan nga emperyo sang butig nga relihion. Bangod naghinulsol sila sa mga sala may kaangtanan sa kahadlok sa tawo kag sa pagkawalay hinimuan sa pag-alagad kay Jehova, ginhilway niya sila gikan sa Babilonia nga Daku, gindala sila pabalik sa ila makatarunganon nga espirituwal nga kahimtangan, kag gingamit liwat sila sa pagbantala sang mensahe sang Ginharian. Ang espirituwal nga paraiso nag-uswag sa tunga sang katawhan sang Dios kutob sadto, sa kadungganan sang iya balaan nga ngalan. (Isaias 55:8-13) Nian, sa dumaan nga sulundan kag sa moderno nga antitipo, may maathag kita nga ebidensia nga ang mga pagpakamaayo nagasunod sa balaan nga kapatawaran kag nga si Jehova nagapatawad gid sing bugana sa mga mahinulsulon.
4. Ano ang kahadlok sang iban nga mga alagad ni Jehova?
4 Busa, ang mga alagad ni Jehova karon nga adlaw makasalig sa iya kapatawaran. Apang, ang iban sa ila nadulaan sing paglaum bangod sang nagligad nga mga sala, kag ang balatyagon sang sala halos nagdaug sa ila. Wala nila pagkabiga ang ila kaugalingon nga takus magpuyo sa espirituwal nga paraiso. Sa katunayan, ang iban nahadlok nga basi nakahimo sila sang dimapatawad nga sala kag indi na gid makabaton sing kapatawaran ni Jehova. Mahimo bala ina matabo?
Ang Iban nga mga Sala Indi Mapatawad
5. Ngaa masiling nga ang iban nga mga sala dimapatawad?
5 Ang iban nga mga sala indi mapatawad. Si Jesucristo nagsiling: “Ang tagsa ka sala kag pasipala mapatawad sa mga tawo, apang ang pasipala batok sa espiritu indi mapatawad.” (Mateo 12:31) Kon amo, nian, ang pasipala batok sa balaan nga espiritu, ukon aktibo nga kusog, sang Dios indi mapatawad. Ginpatuhuyan ni apostol Pablo ina nga sala sang nagsulat sia: “Indi mahimo ang pagbag-o liwat sa paghinulsol sa ila nga naiwagan anay, . . . apang sila nian nagbiya, sanglit ginalansang nila sa usok sa ila kaugalingon ang Anak sang Dios kag ginapakahuy-an sia sing dayag.”—Hebreo 6:4-6.
6. Ano ang nagapat-od kon bala ang isa ka sala mapatawad ukon indi?
6 Ang Dios lamang ang nakahibalo kon ang isa ka tawo nakahimo sing dimapatawad nga sala. Walay sapayan, ginpaathag ni Pablo ini nga butang sang nagsulat sia: “Kon magpakasala kita sing kinabubut-on sa tapos nga aton nabaton ang sibu nga ihibalo sang kamatuoran, wala na sing halad tungod sa mga sala, kundi ang makahaladlok nga paghulat sang paghukom.” (Hebreo 10:26, 27) Ang sutil nga tawo nagapanghikot sing hungod, ukon “sing batinggilan kag sing masami matig-a sing ulo.” (Webster’s New Collegiate Dictionary) Ang bisan sin-o nga hungod kag matig-a sing ulo nga nagapadayon sa paghimo sing sala sa tapos niya nahibaluan ang kamatuoran wala ginapatawad. Gani, indi gid man ang sala mismo kundi ang kahimtangan sang tagipusuon, ang kasangkaron sang pagkatig-a sang ulo nga nadalahig, ang nagaapektar kon bala ang sala mapatawad ukon indi. Sa pihak nga bahin, kamusta kon ang isa ka nakasala nga Cristiano ginatublag sing daku nahanungod sang iya sala? Ang iya daku nga pagkabalaka ayhan nagapakita nga wala sia, sa katunayan, makahimo sing dimapatawad nga sala.
Ang Ila mga Sala Dimapatawad
7. Ngaa masiling naton nga ang iban nga relihioso nga mga nagpamatok kay Jesus nakahimo sing dimapatawad nga sala?
7 Ang iban nga Judiyong relihiosong mga lider nga nagpamatok kay Jesus nakahimo sing hungod, kag busa dimapatawad, nga sala. Bisan nakita nila nga nagapanghikot ang balaan nga espiritu sang Dios paagi kay Jesus samtang nagahimo sia sing maayo kag sing mga milagro, ginpatungod sadtong mga klerigo ang iya gahom kay Beelzebub, ukon kay Satanas nga Yawa. Nakasala sila nga nakahibalo sing bug-os sang dimapanghiwala nga pagpanghikot sang espiritu sang Dios. Busa, nakahimo sila sing dimapatawad nga sala, kay si Jesus nagsiling: “Ang bisan sin-o nga magpamulong batok sa balaan nga espiritu indi mapatawad ini sa iya, bisan karon nga sistema sang mga butang ukon sa palaabuton.”—Mateo 12:22-32.
8. Ngaa ang sala ni Judas Iscariote dimapatawad?
8 Ang kasal-anan ni Judas Iscariote indi man mapatawad. Ang pagluib niya kay Jesus isa ka kinabubut-on kag hungod nga talipuspusan sang isa ka dalanon sang pagkasalimpapaw kag pagkadibunayag. Halimbawa, sang nakita ni Judas nga ginhaplasan ni Maria si Jesus sing malahalon nga lana, namangkot sia: “Ngaa bala wala pag-ibaligya ining ihalaplas sing tatlo ka gatos ka denario kag ihatag sa mga imol?” Si apostol Juan nagdugang: “Nagsiling [si Judas] sini, indi kay nabalaka sia sa mga imol kundi kay makawat sia, kag subong nga yara sa iya ang puyo sang kuwarta ginkuha niya ang ginsulod sini.” Wala magdugay pagkatapos sadto, ginluiban ni Judas si Jesus sa 30 ka bilog nga pilak. (Juan 12:1-6; Mateo 26:6-16) Matuod, naghinulsol si Judas kag naghikog. (Mateo 27:1-5) Apang wala sia pagpatawara, kay ang iya hungod, dalayon nga makagod nga dalanon kag ang iya malimbungon nga buhat nagpakita sang iya pagpakasala batok sa balaan nga espiritu. Daw ano ka nagakaigo nga dapat tawgon ni Jesus si Judas nga “anak sang kalaglagan.”—Juan 17:12; Marcos 3:29; 14:21.
Ang Ila mga Kasal-anan Ginpatawad
9. Ngaa ginpatawad sang Dios ang mga kasal-anan ni David may kaangtanan kay Bat-seba?
9 Ang hungod nga mga kasal-anan kabaliskaran gid sa mga sala sadtong ginpatawad sang Dios. Kuhaa subong halimbawa si Hari David sang Israel. Nakahimo sia sing panglahi upod kay Bat-seba, ang asawa ni Urias, kag sang ulihi ginpamaniobra niya kay Joab nga mapatay si Urias sa inaway. (2 Samuel 11:1-27) Ngaa ginpakitaan sang Dios sing kaluoy si David? Una bangod sang katipan sa Ginharian kag bangod man sang pagkamaluluy-on mismo ni David kag sang iya matuodtuod nga paghinulsol.—1 Samuel 24:4-7; 2 Samuel 7:12; 12:13.
10. Bisan pa nakasala sing daku si Pedro, ngaa ginpatawad sia sang Dios?
10 Binagbinaga, man, si apostol Pedro. Nakasala sia sing mabug-at paagi sa sulitsulit nga pagpanghiwala kay Jesus. Ngaa ginpatawad sang Dios si Pedro? Indi kaangay ni Judas Iscariote, si Pedro bunayag sa pag-alagad sa Dios kag kay Cristo. Ang kasal-anan sining apostol tuga sang undanon nga kaluyahon, kag tunay sia nga naghinulsol kag “naghibi sing mapait.”—Mateo 26:69-75.
11. Paano mo isaysay ang “paghinulsol,” kag ano ang dapat himuon sang isa ka tawo kon tunay nga nagahinulsol sia?
11 Ang nasambit nga mga halimbawa nagapakita nga bisan ang isa ka tawo nga nakasala sing mabug-at sarang makatigayon sang kapatawaran ni Jehova nga Dios. Apang anong panimuot ang kinahanglanon agod patawaron? Ang matuod nga paghinulsol kinahanglanon agod ang isa ka nakasala nga Cristiano patawaron sang Dios. Ang paghinulsol nagakahulugan sang “pagtalikod sa sala bangod sang paghinulsol sa nagligad nga mga sala” ukon “pagbatyag sing paghinulsol bangod sang kon ano ang ginhimo ukon ginpatumbayaan sang isa.” (Webster’s Third New International Dictionary) Ang mahinulsulon sing tunay nga tawo magapakita sing paghinulsol bangod sang pasipala, kasubo, ukon mga problema nga gindala sang iya sala sa ngalan kag organisasyon ni Jehova. Ang mahinulsulon nga makasasala magapakita man sing katumbas nga bunga, nagahimo sing mga binuhatan nga nagakaigo sa paghinulsol. (Mateo 3:8; Binuhatan 26:20) Halimbawa, kon may gintiplang sia, magahimo sia sing rasonable nga mga tikang agod mabayaran ang nadula. (Lucas 19:8) Inang mahinulsulon nga Cristiano may nagakaigo nga Makasulatanhon nga mga rason sa pagsalig nga si Jehova magapatawad sing bugana. Ano ang mga ini?
Mga Rason sa Pagsalig sa Kapatawaran sang Dios
12. Sa sadsaran sang ano ginapakita sang Salmo 25:11 nga ang mahinulsulon nga tawo makapangamuyo sing kapatawaran?
12 Ang mahinulsulon nga makasasala masinaligon nga makapangamuyo sing kapatawaran sa sadsaran sang ngalan ni Jehova. Si David nagpakiluoy: “Tungod sa imo ngalan, O Jehova, patawara ang akon kalautan, kay daku ini.” (Salmo 25:11) Ina nga pangamuyo, ginaupdan sang paghinulsol sa bisan anong pasipala nga ginhatag sang nakasala sa ngalan sang Dios, dapat man magpanghikot subong pagpugong sa grabe nga sala sa palaabuton.
13. Ano ang papel sang pangamuyo sa balaan nga kapatawaran?
13 Si Jehova nga Dios nagasabat sang tinagipusuon nga mga pangamuyo sang iya nakasala apang mahinulsulon nga mga alagad. Halimbawa, si Jehova wala magpabungol kay David, nga nangamuyo gikan sa tagipusuon sa tapos makamarasmas sa pagkadaku sang iya mga sala may kaangtanan kay Bat-seba. Sa katunayan, ang mga pinamulong ni David sa Salmo 51 nagapabutyag sang balatyagon sang madamong nagapakiluoy. Sia nagpakitluoy: “Kaluoyi ako, O Dios, suno sa imo mahigugmaon nga kalulo. Suno sa kadamuon sang imo bugana nga kaluoy panasa ang akon mga paglalis. Hugasi ako sing himpit gid sang akon kalautan, kag tinlui ako gikan sa akon sala. Ang mga halad sang Dios amo ang espiritu nga buong; ang buong kag mahinulsulon nga tagipusuon, O Dios, dili mo pagtamayon.”—Salmo 51:1, 2, 17.
14. Paano ang mga Kasulatan nagahatag sing pasalig nga ang Dios nagapatawad sadtong nagapakita sing pagtuo sa halad-gawad ni Jesus?
14 Ang Dios nagapatawad sadtong nagapakita sing pagtuo sa halad-gawad ni Jesus. Si Pablo nagsulat: “Sa iya may pagtubos kita paagi sa iya dugo, nga amo ang kapatawaran sang aton mga paglapas.” (Efeso 1:7) Sa kaanggid nga kahulugan, si apostol Juan nagsulat: “Mga anak ko, nagasulat ako sa inyo sini agod nga indi kamo makasala. Apang, kon ang bisan sin-o makasala, may mananabang kita upod sa Amay, si Jesucristo, nga matarong. Kag sia amo ang katumbasan tungod sa aton mga sala, kag indi lamang tungod sa aton kundi tungod man sa mga sala sang bug-os nga kalibutan.”—1 Juan 2:1, 2.
15. Agod padayon nga matigayon ang kaluoy sang Dios, ano ang dapat nga himuon sang isa ka mahinulsulon nga makasasala?
15 Ang kaluoy ni Jehova nagahatag sa mahinulsulon nga makasasala sing sadsaran para sa pagsalig nga sarang sia patawaron. Si Nehemias nagsiling: “Ikaw Dios nga handa sa pagpatawad, mainayuhon kag maluluy-on, makuli sa pagpangakig kag bugana sa mahigugmaon nga kalulo.” (Nehemias 9:17; ipaanggid ang Exodo 34:6, 7.) Sa pagkamatuod, agod padayon nga maagom ang balaan nga kaluoy, ang makasasala dapat manikasog sa pagtuman sa kasuguan sang Dios. Subong sang ginsiling sang salmista, “palambuta sa akon ang imo mahinuklugon nga kaluoy, agod nga mabuhi ako; kay ang imo kasuguan amo ang akon kalipay. Dalagku ang imo mahinuklugon nga kaluoy, O Jehova. Buhia ako suno sa imo mga pagsulundan.”—Salmo 119:77, 156,
16. Ano ang paumpaw sa katunayan nga si Jehova nagapatugsiling sa aton makasasala nga kahimtangan?
16 Ang katunayan nga si Jehova nagapatugsiling sa aton makasasala nga kahimtangan nagahatag man sa mahinulsulon nga nakasala sing paumpaw kag rason sa pagpangamuyo nga may pagsalig nga ang Dios magapatawad sa iya. (Salmo 51:5; Roma 5:12) Si salmista David naghatag sing makapaumpaw nga pasalig sang nagsiling sia: “Wala sia [si Jehova nga Dios] maghisayo sa aton suno sa aton mga sala; ukon nagbalus sa aton suno sa aton mga kalautan. Kay subong nga ang mga langit mataas labaw sa duta, amo kadaku ang iya mahigugmaon nga kaluoy ayon sa mga nagakahadlok sa iya. Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis. Kaangay sang amay nga nagakaawa sa iya mga anak, sa amo si Jehova nagakaawa sa mga nagakahadlok sa iya. Kay nakilala niya ang aton kahimtangan, nagadumdom sia nga kita yab-ok.” (Salmo 103:10-14) Huo, ang aton langitnon nga Amay labaw pa ka maluluy-on kag mainawaon sang sa tawhanon nga ginikanan.
17. Ano ang kaangtanan sa kapatawaran sang nagligad nga rekord sang matutom nga pag-alagad sang isa sa Dios?
17 Ang mahinulsulon nga makasasala sarang makapangamuyo sing kapatawaran nga may pagsalig nga indi pagkalimtan ni Jehova ang iya nagligad nga rekord sang matutom nga pag-alagad. Si Nehemias wala magpakiluoy sing kapatawaran sang iya sala, apang nagsiling sia: “Dumduma ako, O Dios ko, nga sa kaayuhan.” (Nehemias 13:31) Ang mahinulsulon nga Cristiano sarang makasapo sing paumpaw sa mga pulong: “Ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan.”—Hebreo 6:10.
Bulig Gikan sa mga Gulang
18. Ano ang dapat himuon kon ang kasal-anan sang isa ka Cristiano naghimo sa iya nga nagamasakit sa espirituwal?
18 Ano kon ang isa ka Cristiano nagabatyag nga dinagakaigo sa pagpabilin sa espirituwal nga paraiso ukon indi makapangamuyo bangod ang iya sala naghimo sa iya nga nagamasakit sa espirituwal? “Magpatawag sia sang mga tigulang sang kongregasyon, kag pangamuyuan nila sia, nga ginahaplas sia sing lana sa ngalan ni Jehova,” sulat ni disipulo Santiago. “Kag ang pangamuyo sang pagtuo magaayo sang nagamasakit, kag si Jehova magabangon sa iya. Kag kon nakasala sia, patawaron ini sa iya.” Huo, ang mga gulang sa kongregasyon sarang makapangamuyo sing epektibo kaupod sang kag tungod sa mahinulsulon nga masigkatumuluo sa paglaum nga mapasag-uli sia sa maayo nga kahimtangan sa espirituwal.—Santiago 5:14-16.
19. Kon ang isa ka tawo gin-disfellowship, ano ang dapat niya himuon agod mapatawad kag mapasag-uli liwat?
19 Bisan kon ang isa ka hudisyal nga komite naga-disfellowship sa dimahinulsulon nga makasasala, wala ini nagakahulugan nga nakahimo sia sing dimapatawad nga sala. Agod mapatawad kag mapasag-uli liwat, walay sapayan, dapat sia mapainubuson nga magtuman sang mga kasuguan sang Dios, magpatubas sang mga bunga nga nagakaigo sa paghinulsol, kag magpangabay sa mga gulang para makapasag-uli liwat. Sa tapos ang isa ka makihilawason gin-disfellowship gikan sa kongregasyon anay sang Corinto, si Pablo nagsulat: “Tuman na sa iya ini nga silot nga ginhatag sang kalabanan, gani sa baylo pagpatawaron ninyo sia kag paglipayon, basi kon malumos sia sa iya lakas nga kasubo. Gani ginapakiluoy ko sa inyo nga lig-unon ninyo liwat ang inyo gugma sa iya.”—2 Corinto 2:6-8; 1 Corinto 5:1-13.
Ang Dios Nagahatag sing Kusog
20, 21. Ano ang mahimo makabulig sa isa ka tawo nga nagaeksperiensia sing pagkabalaka nahanungod sa ayhan paghimo sing dimapatawad nga sala?
20 Kon ang mga kabangdanan subong sang mapigaw nga panglawas ukon kahuol nagatuga sing kabalaka nga nakahimo sing dimapatawad nga sala, ang pagtigayon sing bastante nga pahuway kag tulog mahimo nga makabulig. Walay sapayan, dapat nga dumdumon mo labi na ang pinamulong ni Pedro: “Magtugyan sang inyo tanan nga paghimud-os sa [Dios], kay sia nagakabalaka sa inyo.” Kag indi gid pagtuguti si Satanas nga magpaluya sang imo buot, kay si Pedro nagdugang: “Magbut-anan kamo, magpulaw. Ang inyo kaaway, nga Yawa, subong sang nagangurob nga leon nagaluyong, nagapangita sang iya tulukbon. Sumpunga sia, nga nagpangalig-on sa inyo pagtuo, nga nakahibalo nga ang amo man nga pag-antos ginakinahanglan sa inyo paghiliutod sa bug-os nga kalibutan. Kag ang Dios sang bug-os nga dibagay nga kaluoy, . . . sa tapos nga nakaantos kamo sa diutay nga tion, sia gid magahimpit, magapalig-on, kag magapabakud sa inyo.”—1 Pedro 5:6-10.
21 Gani kon ikaw nagahinulsol apang nagkahadlok nga basi nakahimo ka sing dimapatawad nga sala, dumduma nga ang mga dalanon sang Dios maalamon, makatarunganon, kag mahigugmaon. Busa, mangamuyo sa iya sa pagtuo. Magpadayon sa pagkuha sing espirituwal nga pagkaon nga ginaaman niya paagi sa “matutom kag mainandamon nga ulipon.” (Mateo 24:45-47) Makig-upod sa mga masigkatumuluo kag makigbahin sa Cristianong ministeryo sing tayuyon. Magapabakud ini sang imo pagtuo kag magahilway sa imo gikan sa kahadlok nga basi wala ginpatawad sang Dios ang imo sala.
22. Ano ang aton masunod nga pagabinagbinagon?
22 Ang mga pumuluyo sang espirituwal nga paraiso makakuha sing paumpaw sa ihibalo nga si Jehova nagapatawad sing bugana. Apang, ang ila kabuhi indi nga walay pagtilaw sa karon. Ayhan ginapung-aw sila bangod ang isa ka hinigugma napatay ukon ang isa ka mahal nga abyan nagamasakit sing grabe. Subong sang makita naton, sa sini kag sa iban nga mga sirkunstansia, si Jehova nagabulig kag nagatuytoy sang iya katawhan paagi sa iya balaan nga espiritu.
Ano ang Imo mga Sabat?
◻ Ano ang pamatuod nga si Jehova ‘nagapatawad sing bugana’?
◻ Ano nga sala ang wala sing kapatawaran?
◻ Sa idalom sang anong mga sirkunstansia ginapatawad ang mga kasal-anan sang isa?
◻ Ngaa ang mahinulsulon nga mga nakasala makasalig sang kapatawaran sang Dios?
◻ Ano nga bulig ang matigayon sang mahinulsulon nga mga nakasala?
[Laragway sa pahina 10]
Nakahibalo ka bala kon ngaa sanday David kag Pedro ginpatawad apang si Judas Iscariote wala?
[Laragway sa pahina 12]
Ang bulig sang mga gulang sang kongregasyon daku ang mahimo agod buligan ang isa ka Cristiano sa espirituwal