Mga Saksi ni Jehova—Ang Organisasyon sa Likod sang Ngalan

SANG Oktubre 6, 1990, ang halos 5,000 nga kadam-an nagtipon sa Assembly Hall of Jehovah’s Witnesses sa Jersey City, New Jersey, E.U.A., para sa tuigan nga miting sang Watch Tower Bible and Tract Society magabaton sing sorpresa. Ang tsirman, si John E. Barr, nagpahibalo sa tumalambong nahanungod sang pagpaguwa sa 55-minutos nga video nga natig-uluhan Jehovah’s Witnesses—The Organization Behind the Name. Amo ini ang unang video nga ginhimo sang Sosiedad, apang pat-od nga indi ang katapusan.

Ginapakita sang video kon paano ang katawhan ni Jehova gin-organisar sa pagpanaksi sa balaan nga ngalan kag sa pagbantala sang “maayong balita sang ginharian.” (Mateo 24:14) Ang ulong-talatapan sa Brooklyn, New York, kag ang mga pasilidad sa Watchtower Farms ginpakita. Kapin sa 500,000 ka kopya sa Ingles ang ginhimo, kag matigayon na ini karon (ukon sa dili madugay) sa 26 ka iban nga hambal.a

Ano ang Nangin Reaksion?

Ano ang reaksion sang mga tawo nga indi mga Saksi ni Jehova sa video? Ang isa ka negosyante nga lalaki nagsulat:

“Nakita ko ang tape nga maayo sing kalidad. Ginadayaw ko labi na ang masanag kag maayo nga pag-edit sang video. Nagakalipat ako nga isa gali ini ka tape kag ginahunahuna ko nga isa ini ka sine. Ining tape mahimo gid nga daku ang mabulig sa pagpaathag sang katuyuan sang inyo ulong-talatapan sa New York. Panginbulahan tungod sining tumalagsahon nga buhat.”—J.J.

Yadtong nagatuon sang Biblia upod sa mga Saksi ni Jehova nakabenepisyo paagi sa pagtan-aw sa video. Ang masunod nagapaathag kon ngaa:

“Nagatuon ako sang Biblia upod sa isa ka pamatan-on nga lalaki nga 20 anyos ang edad kag nagaeskwela sa lokal nga unibersidad. Nabalaka sia nahanungod sa nagalain nga kahimtangan sa kalibutan. Apang sa tapos matan-aw ang tape kag makita yadtong tanan nga maayong lamharon nga mga kauturan sa Bethel nga may matuod nga katuyuan sa kabuhi, ang iya bug-os nga panimuot nagbalhin. Nagtambong sia sa amon Pinasahi nga Adlaw sang Asambleya kag nangabay nga magtuon sa Biblia sing makaduha sa isa ka semana. Ang isa pa ka estudyante sang Biblia, nga isa ka maestra sa hayskul, naghulam sang video agod ipatan-aw ini sa iya mga paryente. Pagdumdom nila ang mga Saksi ni Jehova isa lamang ka maluya, indi kilala, diutay nga organisasyon. Nakibot sila sa tugob-globo nga kinaugali sang aton hilikuton kag sang kadalag-an nga natigayon naton, salamat kay Jehova.”—J.B.

“Indi mapabutyag sang mga pulong ang kalipay nga nabatyagan ko sang ang isa ka babayi nga ginatun-an ko sang Biblia naghibi sa kalipay kag sa pagpasalamat sa tapos matan-aw ining video. Nagahibi sia nga nagsiling: ‘Paano nga indi makita ni bisan sin-o nga amo ini ang organisasyon sang matuod nga Dios, nga si Jehova? Wala gid ako makahibalo nga nagaluntad gali ang amo sina nga katawhan.’ Kag ugaling nagsiling sia: ‘Luyag ko magpabawtismo.’”—C.D.

“Madamo kami sing kadalag-an sa paggamit sang video upod sa mga estudyante sang Biblia. Sang nagligad nga gab-i ang bana sang isa sang mga estudyante sa Biblia sang akon asawa nagkari. Nagapamatok gid sia anay. Gintan-aw niya ang video. Pagkatapos sadto nagpamangkot sia kag naghalin diri nga dala ang isa ka Biblia kag isa ka libro sa pagtuon sa Biblia nga Mahimu Ka Mabuhi sing Dayon sa Paraiso sa Duta. Sang nagligad ginsunog niya ang tanan nga literatura sa Biblia sang iya asawa!”—D. H.

Nasapwan man sang mga kabataan ang video nga tuman ka makawiwili, subong sang ginapakita sang masunod nga mga komento:

“Anom ka tuig ako kag tunga. Naluyagan ko ang bahin nahanungod sa mga Biblia kag sang ang mga kahon madasig nga ginpadala.”—K.W.

“Ang amon magagmay nga mga kabataan nagsiling nga mas maayo ini sang sa bisan anong programa nga nakita nila sa TV.”—R.C.

“Sa tapos matan-aw ang vid­eo sa ikaduha nga tion, ang amon singko-anyos nga bata nga lalaki, nga nagpahimunong sa bug-os nga pagtan-aw, namangkot, ‘Mahimo bala naton ini matan-aw kada adlaw?’ Ang amon tres-anyos nga anak nga babayi nagsaligbat sing, ‘Luyag ko magkadto sa Bethel kag maghimo sing mga libro!’”—M.E.

“Ang akon mga kabataan, si Robin kag si Shannan, 12 ka 9 anyos, sulitsulit nga nagatan-aw sining tape. Ang akon kinagot nga babayi nagsiling pagkatapos niya matan-aw ang tape, ‘Luyag ko magguwa sa latagon. Kasadya gid sini.’ Nabatyagan namon nga ining video may direkta nga epekto sa amon pagkabuhi nga pamilya. Daw ano ka makapapagsik nga buksan ang isa ka programa sa telebisyon nga sa pamatyag mo maayo tan-awon!”—N.B.

“Trese anyos ako kag tunga. Ang bag-ong vid­eo nagparealisar sa akon kon daw ano ka daku nga ginpasapayanan ko ang matahom nga mga aman halin kay Jehova. Isa ka pribilehiyo ang mangin isa sang katawhan sang Dios.”—K.W.

“Disiseis anyos ako, kag ining video nagbulig sa akon nga pabakuron sa akon hunahuna nga isa ini ka bug-os globo nga hilikuton nga ginahimo.”A.M.

“Ang amon mga kabataan nagkomento nga ang regular nga mga programa sa telebisyon nangin indi na makagalanyat sa ila subong resulta sang pagtan-aw sang kon ano gid ang matuod nga teokratikong kalingawan. Nagpabakud man ini sang ila handum nga magsulod sa bug-os tion nga pag-alagad.”—L.M.

Bisan yadtong mga Saksi ni Jehova na sa madamong tinuig natandog sang nakita nila.

“Kon ang video nagbilin sing subong sina nga epekto sa amon subong katawhan ni Jehova, daw ano pa gid nga makaapektar ini sa iban? Kon ining sistema tuman kabudlay landason, ginakuha ko ang isa ka oras sa akon panahon kag nagaduaw sa Bethel sa kasulhay sang akon salas!”—K.B.

“Sa tapos ko nakita ang pagtatap kag paghalong nga ginahimo sa tagsa ka hilikuton, daw luyag ko magkadto sa akon hulot kag hakson ang akon mga literatura sa Biblia.”—L.P.

Ginapalig-on man namon kamo nga maghinguyang sing tion agod tan-awon ang video nga Jehovah’s Witnesses—The Organization Behind the Name. Magahatag ini sa inyo sing tuhay nga panan-aw sa kabuhi kag magabulig sa inyo nga makatigayon sing pagsalig sa isa ka malig-on nga palaabuton.

[Footnote]