Mga Gamit nga Nagatudlo, Nagapahulag, kag Nagapabakod
1 Epektibo ini para sa pagtudlo sa mga tawo tuhoy sa Biblia kag sa mga Saksi ni Jehova. Nagpahulag ini sa madamo sa pagtindog sing malig-on para sa kamatuoran. Nagpabakod ini sang pagtuo kag apresasyon sang dedikado nga katawhan sang Dios. Ano ini? Ang mga video nga ginhimo sang organisasyon ni Jehova. Natan-aw mo na bala ang tanan nga napulo? Kasan-o lang? Ginagamit mo bala ini sa imo ministeryo? Paano ka labi pa nga makabenepisyo gikan sa sining maayo gid nga mga gamit?
2 Ang Hulyo 1, 1999, nga artikulo sang Lalantawan nga “Tun-i Sing Tayuyon ang Pulong Sang Dios Subong Isa ka Pamilya” nagrekomendar sang ‘pagtigana sing bahin sang inyo tion sa pagtuon agod tan-awon ang isa ka bahin sang isa sang nagatudlo nga mga video sang Sosiedad . . . kag nian hambalan ini.’ Nahisuno sa sinang maayo nga laygay, lain naman nga video ang binagbinagon sa Miting sa Serbisyo kada isa pa ka bulan. Ginapalig-on namon ang tanan nga makasarang nga tan-awon anay ang video sa balay antes ini binagbinagon sa Miting sa Serbisyo.
3 Sini nga bulan magasugod kita paagi sa nahaunang video nga ginhimo namon, ang Jehovah’s Witnesses—The Organization Behind the Name. Tan-awa kag pamatii ang mga sabat sa sining mga pamangkot:
◼ Sa ano labi na nga nakilal-an ang mga Saksi ni Jehova?
◼ Sa ano nga kasulatan naangot ang tanan nga ginahimo sa Bethel?
◼ Ano nga danyag sa Biblia ang nakita mo nga gin-arte, ginretratuhan, kag gindrowing para gamiton sa mga publikasyon?
◼ Ano ang epekto sa imo kon paano ginahanda ang aton literatura?
◼ Kutob 1920 tubtob 1990, pila ka bilog nga literatura ang gin-imprinta sang Sosiedad?
◼ Sin-o ilabi na sa tunga sang katawhan sang Dios ang dapat manikasog nga mangin kalipikado sa pag-alagad sa Bethel?—Hulu. 20:29.
◼ Sa anong mga paagi ang pamilya Bethel isa ka labing maayo nga halimbawa para sa tanan nga Saksi ni Jehova?
◼ Ano ang epekto sa imo sang hilikuton nga ginahimo sa Bethel agod mapalab-utan ang mas madamo nga tawo kon mahimo sing maayong balita?
◼ Paano ginagastuhan ang bug-os kalibutan nga hilikuton?
◼ Ano nga hilikuton ang sarang naton masuportahan sing makugi, kag upod ang anong espiritu?—Juan 4:35; Binu. 1:8.
◼ Ano ang imo balatyagon tuhoy sa organisasyon sa likod sang aton ngalan?
◼ Paano mo gamiton ini nga video sa ministeryo?
Sa Disiembre repasuhon naton ang video nga The Bible—Accurate History, Reliable Prophecy.