Mga Gulang—Ipasag-uli ang Iban sa Espiritu nga Malulo

ANG tagipusuon sang isa ka matuod nga Cristiano mahimo mapaanggid sa isa ka espirituwal nga hardin nga nagapamunga sing maayo. Ang gugma, kalipay, paghidait, pagbatas, pagkalulo, pagkaayo, pagkatutom, pagkamapainubuson, kag pagpugong sang kaugalingon kinaandan nga nagatubo didto. Kag ngaa indi? Ti, amo ini ang mga bunga sang balaan nga espiritu nga ginhatag ni Jehova nga Dios sa iya dedikado nga mga alagad. (Galacia 5:22, 23) Apang, ang tagsa ka Cristiano nga maluyag sa paghupot sang katamnan sang iya tagipusuon subong isa ka duog nga kalahamut-an sa iya langitnon nga Amay dapat makig-away sing lakas kag sing padayon batok sa mga hilamon sang napanubli nga sala.—Roma 5:5, 12.

Kon kaisa, nagasugod sa pagtubo ang dimaayo nga butang sa dihimpit nga tagipusuon sang diosnon nga tawo. Ayhan may ekselente sia nga rekord sa espirituwal. Apang nian may problema nga nag-utwas, ayhan gikan sa dimaayo nga pagpakig-upod ukon dimaalamon nga desisyon. Paano mabuligan sang mga gulang sang kongregasyon ina nga tawo sa espirituwal?

Laygay sang Apostol

Sa pagbulig sa isa ka Cristiano nga nakasala, kinahanglan sundon sang mga gulang ang laygay ni apostol Pablo: “Mga kauturan, kon ang isa ka tawo masapwan sa bisan anong paglapas, kamo nga mga espirituhanon magpasag-uli sa iya sa espiritu nga malulo. Mag-andam sa imo kaugalingon, basi kon ikaw man pagsulayon.” (Galacia 6:1) Kon ang isa ka isigkatumuluo “masapwan sa bisan anong paglapas,” ang mga gulang may salabton sa pagbulig sa gilayon.

Ginapatuhuyan ni Jesus ang “isa ka tawo” nga nasapwan sa bisan anong paglapas. Apang, ang Griegong tinaga (anʹthro·pos) nga gingamit diri mahimo maaplikar sa lalaki ukon babayi. Kag ano ang kahulugan sang ‘pagpasag-uli’ sa isa ka tawo? Ining Griegong tinaga (ka·tar·tiʹzo) nagakahulugan sing “pagtadlong sing nagakaigo.” Ini man nga tinaga ang gingamit sa pagpuna sang mga pukot. (Mateo 4:21) Naaplikar man ini sa pag-uli sa bali nga tiil ukon butkon sang isa ka tawo. Ginahimo ini sing mahalungon sang doktor agod indi makatuga sing dikinahanglanon nga kasakit sa iya pasyente. Sa kaanggid, ang pagbulig sa utod nga lalaki ukon babayi nga makadangat sa nagakaigo nga espirituwal nga pagtadlong nagakinahanglan sing paghalong, taktika, kag kaawa.

Ang mga gulang nagapamatuod sang ila kaugalingon nga espirituwalidad paagi sa pagpadayag sing espiritu nga malulo kon nagapanikasog nga ipasag-uli ang isa ka tawo. Sa pagkamatuod, ang malum-ok sing hunahuna nga si Jesus magauyat sinang mga butang nga may kalulo. (Mateo 11:29) Ang mga gulang dapat magpakita sini nga kinaiya sa alagad ni Jehova nga nakahimo sing paglapas bangod sila mismo indi mahimo nga indi madaug sang sala, kabaliskaran sa mga tinutuyo sang ila mga tagipusuon. Mahimo ini matabo sa palaabuton kon wala pa ini natabo sa nagligad.

Ining kalipikado sa espirituwal nga mga lalaki dapat mahigugmaon nga ‘magadala sang lulan’ sang ila mga masigkasumilimba. Sa pagkamatuod, yara sa tagipusuon sang mga gulang nga buligan ang isa ka utod nga lalaki ukon babayi sa pagpakig-away batok kay Satanas, sa mga pagsulay, sa mga kaluyahon sang unod, kag sa mga kasisit-an sang sala. Amo gid ini ang isa ka paagi para sa Cristianong mga manugtatap nga “matuman ang kasuguan ni Cristo.”—Galacia 6:2.

Ang mga lalaki nga may matuod nga espirituwal nga mga kalipikasyon mapainubuson, nakahibalo nga “kon ang bisan sin-ong tawo nagapakasin-o nga indi sia si sin-o, nagadaya sia sang iya kaugalingon.” (Galacia 6:3) Bisan daw ano man ka daku ang panikasog sang mga gulang nga himuon ang matarong kag mabuligon, kulang gihapon sila sa himpit kag mahigugmaon nga kaawa sang Anak sang Dios, si Jesucristo. Apang wala sing rason para sa ila nga indi paghimuon ang bug-os nila nga masarangan.

Nakahibalo ang mga gulang nga sayop pakamalauton ang isigkatawo sa matinaastaason, bugalon nga paagi! Indi gid ina paghimuon ni Jesus. Ti, ginhatag niya ang iya kabuhi indi lamang para sa iya mga abyan kundi para man sa iya mga kaaway! Ang mga gulang nagapanikasog sa pagpakita sing kaanggid nga gugma kon nagatinguha sa pagbulig sa mga kauturan nga lalaki ukon babayi sa problema kag nagapasuod sa ila sa ila langitnon nga Amay kag sa iya matarong nga mga talaksan. Ano ang pila ka tikang nga makabulig sa mga gulang sa pagpasag-uli sa mga masigkasumilimba?

Ang Pila ka Mabuligon nga mga Tikang

Mapinangamuyuon nga nagasalig kay Jehova samtang nagapamulong kag nagapanghikot sa malulo sing hunahuna nga paagi. Si Jesus malulo sing hunahuna, nagpangamuyo sing hanuot sa iya langitnon nga Amay para sa panuytoy, kag pirme naghimo sing mga butang nga kalahamut-an sa Iya. (Mateo 21:5; Juan 8:29) Dapat man ini himuon sang mga gulang kon nagatinguha sa pagpasag-uli sa isa ka tawo nga nakahimo sing paglapas. Subong malulo sing hunahuna nga kabulig nga manugbantay, ang gulang mangin makapalig-on kag makapabakod sa hambal, wala nagapamahog. Sa tion sang paghambalanay, tinguhaan niya nga paluntaron ang palibot diin ang Cristiano nga nagakinahanglan sing bulig magabatyag nga komportable sa pagpabutyag sang iya mga panghunahuna. Bangod sina, ang tinagipusuon nga nagabukas nga pangamuyo daku nga bulig. Ang isa nga nagabaton sing laygay nga ginhatag sing malulo mas madali nga magabukas sang iya tagipusuon sa sini kon nahibaluan niya nga, kaangay kay Jesus, ang manuglaygay maluyag sa paghimo sang mga butang nga kalahamut-an sa Dios. Ang nagatakop nga pangamuyo dapat magpatudok sa indibiduwal sang kinahanglanon nga iaplikar ang laygay nga ginhatag niya sa mahigugmaon kag malulo sing hunahuna nga paagi.

Pagkatapos sang pangamuyo, maghatag sing hanuot nga komendasyon. Mahimo ini may kaangtanan sa maayo nga mga kinaiya sang indibiduwal, subong sang kalulo, pagkamasaligan ukon pagkapisan. Mahimo masambit ang iya rekord sang matutom nga pag-alagad kay Jehova, ayhan sa sulod sang madamo nga mga tinuig. Sa sining paagi, ginapakita naton nga nagaulikid kita kag may katulad-Cristo nga pagkabalaka para sa iya. Ginsugdan ni Jesus ang iya mensahe sa kongregasyon sang Tiatira sing komendasyon, nga nagasiling: “Nakilala ko ang imo mga buhat, ang imo gugma kag pagtuo kag pag-alagad kag mapailubon nga pagbatas, kag ang imo katapusan nga mga buhat labi pa sa mga nahauna.” (Bugna 2:19) Inang mga pulong nagpasalig sa mga katapo sang kongregasyon nga si Jesus nakahibalo sang maayo nga buhat nga ila ginhimo. Bisan ang kongregasyon may mga sala—ang impluwensia “ni Jesebel” gintugutan—maayo ini sa iban nga bahin, kag luyag ni Jesus mahibaluan sadtong mga kauturan nga lalaki kag babayi nga ang ila makugi nga hilikuton indi nagligad nga wala matalupangdan. (Bugna 2:20) Sa kaanggid nga paagi ang mga gulang dapat maghatag sing komendasyon kon diin nagakaigo.

Indi pagtamda ang paglapas sing labi ka serioso sang sa ginakinahanglan sang mga sirkunstansia. Dapat amligan sang mga gulang ang panong sang Dios kag huptan ang iya organisasyon nga matinlo. Apang ang pila ka espirituwal nga paglapas nga nagakinahanglan sing makusog nga laygay mahimo mahatag sa paghantop sang isa ukon duha ka gulang nga wala sing hudisyal nga kasaba. Sa madamo nga mga kaso, ang tawhanon nga kaluyahon sa baylo sang hungod nga kalautan amo ang sa likod sang paglapas sang isa ka Cristiano. Dapat pakig-angutan sing mahigugmaon sang mga gulang ang panong kag dumdumon ini: “Ang paghukom walay kaluoy sa wala magpakita sing kaluoy; walay sapayan ang kaluoy nagadaug sa paghukom.” (Santiago 2:13; Binuhatan 20:28-30) Sa baylo nga padakuon ang mga butang, nian, ang mga gulang dapat makig-angot sa mahinulsulon nga mga masigkatumuluo sa malulo nga paagi, kaangay sang aton maawaon kag maluluy-on nga Dios, si Jehova.—Efeso 4:32.

Ipakita ang paghangop sa mga rason nga mahimo nagdul-ong sa paglapas. Ang mga gulang kinahanglan mamati sing maayo samtang ginapabutyag sing hilway sang ila masigkatumuluo kon ano ang yara sa iya tagipusuon. Sanglit ‘ang Dios wala nagatamay sa buong kag mahinulsulon nga tagipusuon,’ sila man indi dapat. (Salmo 51:17) Ayhan ang kakulang sing emosyonal nga pagsakdag sang tiayon amo ang gamot sang problema. Ang grabe kag malawig nga kapung-aw sa hunahuna mahimo nga nagdugmok sang kinaandan nga mabakod nga emosyonal nga kusog sang isa ukon nagpabudlay sing daku sang paghimo sing maalamon nga mga desisyon. Binagbinagon sang mahigugmaon nga mga gulang ina nga mga rason, kay bisan ginlaygayan ni Pablo ang iya mga kauturan nga “laygayan ang mga matamad,” naglaygay man sia: “Palig-unon ang mga mahuyang sing tagipusuon, sakdagon ang mga maluya, magmabinatason kamo ayon sa tanan.” (1 Tesalonica 5:14) Bisan indi dapat pagpaluyahon sang mga gulang ang puwersa sang matarong nga mga talaksan sang Dios, dapat nila binagbinagon ang nagapamag-an nga mga rason, subong sang ginahimo sang Dios.—Salmo 103:10-14; 130:3.

Likawi ang pagpaluya sa pagtahod sa kaugalingon sang imo masigka-Cristiano. Indi gid naton luyag kuhaon ang dignidad sa bisan sin-o nga utod nga lalaki ukon babayi ukon ipahangop nga sia walay pulos. Sa baylo, ang mga pasalig nga may kompiansia kita sa Cristianong mga kinaiya kag gugma sa Dios sang isa magapalig-on sa iya sa pagtadlong sang sayop. Ang mga taga-Corinto mahimo man nga ginpalig-on nga mangin maalwan sang ginsugiran sila ni Pablo nga ginpabugal niya sa iban ang nahanungod sa ila “pagkahanda” kag “kakugi” sa sini nga bahin.—2 Corinto 9:1-3.

Ipakita nga ang problema sarang malandas paagi sa pagsalig kay Jehova. Huo, hanuot nga tinguhaan nga buligan ang indibiduwal sa paghangop nga ang pagsalig sa Dios kag pag-aplikar sang laygay sang Iya Pulong magabulig sa pagpatubas sing kinahanglanon nga pagpasag-uli. Busa, ang aton mga pinamulong dapat ipasad sa mga Kasulatan kag sa pasad-sa-Biblia nga mga publikasyon. Duha ang aton tulumuron: (1) agod buligan ang isa nga nagakinahanglan sing bulig nga makita kag mahangpan ang punto-de-vista ni Jehova kag (2) agod ipakita sa iya nga sa pila ka kasangkaron nalimtan ukon napaslawan sia sa pagsunod sining balaan nga mga panuytoy.

Itingob ang Makasulatanhon nga laygay sa malulo apang prangka nga mga pamangkot. Tuman ini ka epektibo sa paglab-ot sa tagipusuon. Paagi sa iya manalagna nga si Malaquias, si Jehova naggamit sing pamangkot sa pagpahangop sa Iya katawhan kon paano sila nagtalang. “Magapangawat bala ang tawo sa Dios?” pamangkot niya, nga nagadugang: “Apang nagapangawat kamo sa akon.” (Malaquias 3:8) Ang indi pag-amot sang Israel sing ikapulo sang ila mga patubas subong ginpatuman sang Mosaikong Kasuguan katumbas sa pagpangawat kay Jehova. Agod maremedyuhan ini nga sitwasyon, ang mga Israelinhon kinahanglan magtuman sang ila mga obligasyon sa putli nga pagsimba upod ang pagtuo nga ang Dios magapakamaayo sa ila sing bugana. Paagi sa nagapahunahuna kag mapatugsilingon nga mga pamangkot, sarang man mapadaku sang mga gulang nga ang paghimo sing matarong nga butang sa karon nagalakip sang pagsalig sa aton langitnon nga Amay kag pagtuman sa iya. (Malaquias 3:10) Ang pagpaalinton sina nga panghunahuna sa tagipusuon nagaamot sing daku sa pagbulig sa aton utod sa paghimo sing ‘mga banas nga matadlong sa iya mga tiil.’—Hebreo 12:13.

Ipadaku ang mga benepisyo sang pagbaton sing laygay. Ang epektibo nga laygay nagalakip sing paandam nahanungod sa mga resulta sang paglakat sa sayop nga dalanon kag sing mga pahanumdom nahanungod sa mga benepisyo nga matigayon gikan sa pagtadlong sang mga butang. Pagkatapos sang husto sa tion nga paandam, ginpasalig ni Jesus ang dimasinapakon sa espirituwal nga kongregasyon sang Laodicea nga kon maghinulsol sila gikan sa ila nagligad nga dalanon kag mangin makugi nga mga disipulo, maagom nila ang tumalagsahon nga mga pribilehiyo, lakip ang paglaum nga maggahom kaupod niya sa mga langit.—Bugna 3:14-21.

Magpakita sing interes kon bala ang laygay ginpamatian. Subong nga ang isa ka maayo nga doktor nagausisa sa tion kag tion agod tan-awon kon ang tul-an nga gin-uli niya tadlong gihapon, ang mga gulang dapat man magtinguha sa paghibalo kon bala ginaaplikar ang Makasulatanhon nga laygay. Mahimo nila pamangkuton ang ila kaugalingon: Kinahanglan bala ang dugang nga bulig? Dapat bala suliton ang laygay, ayhan sa iban nga paagi? Si Jesus dapat maglaygay sing sulit-sulit sa iya mga disipulo nahanungod sa kinahanglanon sang pagpaubos. Sa isa ka panag-on sang tion, mapailubon niya nga gintinguhaan nga ipasag-uli ang ila panghunahuna paagi sa laygay, mga ilustrasyon, kag praktikal nga halimbawa. (Mateo 20:20-28; Marcos 9:33-37; Lucas 22:24-27; Juan 13:5-17) Sa kaanggid, ang mga gulang mahimo makabulig sa pagpat-od sang bug-os nga pagpasag-uli sang isa ka utod nga lalaki ukon babayi paagi sa paghimos sing masunod nga Makasulatanhon nga mga paghinun-anon nga gindesinyo sa pagpapagsik sang pag-uswag sang isa padulong sa bug-os nga espirituwal nga kapagros.

Maghatag sing komendasyon tungod sa pag-uswag nga ginhimo. Kon ang isa nga naghimo sing paglapas hanuot nga nagapanikasog sa pag-aplikar sing Makasulatanhon nga laygay, mainit sia nga hatagi sing komendasyon. Magapabakod ini sa orihinal nga laygay kag mahimo magapalig-on sang dugang nga pag-uswag. Sa nahauna nga sulat ni Pablo sa mga taga-Corinto, obligado sia sa paghatag sa ila sing malig-on nga laygay nahanungod sa pila ka butang. Wala magdugay nga ginpahibalo ni Tito ang apostol nahanungod sa tuman kaayo nga reaksion sa iya sulat, si Pablo nagsulat sa pagdayaw sa ila. “Sa amo, nagakalipay ako,” siling niya, “indi nga ginpasubo kamo, kundi nga ginpasubo kamo nga sa paghinulsol; kay ginpasubo kamo sa diosnon nga bagay.”—2 Corinto 7:9.

Rason sa Pagkalipay

Huo, si Pablo nagkalipay sang nabatian niya nga ang iya laygay nakabulig sa mga taga-Corinto. Sa kaanggid, ang karon nga mga gulang nagakalipay sing daku kon ang isa ka masigkasumilimba nakapanumbalik gikan sa kasaypanan bangod sang maayo nga pagbaton sa ila mahigugmaon nga bulig. Malipay gid sila sa pagbulig sa nagahinulsol nga Cristiano nga magabot ang tunukon nga mga hilamon sang sala gikan sa iya tagipusuon agod ang diosnon nga bunga magatubo didto sing bugana.

Kon ang mga gulang magamadinalag-on sa pagpanumbalik sa isa nga nakahimo sing kasaypanan, mahimo sia magtalikod sa dalanon nga mahimo gid makahalit sing bug-os sa espirituwal. (Ipaanggid ang Santiago 5:19, 20.) Para sina nga bulig, ang nagabaton sang bulig dapat magpabutyag sing pasalamat kay Jehova nga Dios. Ang mga pulong sang tunay nga pagpasalamat tungod sa mahigugmaon nga bulig, kaawa, kag paghangop sang mga gulang nagakaigo man. Kag kon ang espirituwal nga pagpanumbalik bug-os nga nahimo, ang tanan nga nahilabtan mahimo magakalipay nga ang pagpasag-uli ginhimo sa espiritu nga malulo.