Magpabulig sa mga Gulang

1. Paano ginpakita ni Jehova nga hamili sa iya ang iya mga karnero?

HAMILI kay Jehova ang iya mga karnero. Ginbakal niya sila paagi sa dugo ni Jesus kag gintangdo niya ang mga gulang nga mag-atipan sa Iya panong. (Binu. 20:28) Gani, gusto sang Dios nga pakitaan sing kaayo sang mga gulang ang iya mga karnero. Ginasunod sang mga gulang ang paggiya ni Jesus paagi sa pagpaumpaw sa ila mga kauturan kag pagbulig sa ila nga magpabilin nga matutom kay Jehova.​—Isa. 32:1, 2.

2. Sin-o ang gusto gid buligan ni Jehova? (Ezequiel 34:15, 16)

² Palangga gid ni Jehova ang tanan niya nga karnero, pero nabalaka gid sia sa mga maluya sa espirituwal. Posible naluyahan sila bangod sa nahimo nila nga mga sala, gani ginabuligan sila ni Jehova paagi sa mga gulang. (Basaha ang Ezequiel 34:15, 16.) Pero, gusto niya nga mangayo kita sang bulig kon kinahanglan naton ini. Magluwas nga gusto niya nga mangamuyo kita sa iya para mangayo sang bulig, gusto man niya nga magpabulig kita sa “mga manugbantay kag mga manunudlo” sang kongregasyon.​—Efe. 4:11, 12.

3. Paano kita tanan makabenepisyo sa pagbinagbinag sa ginahimo sang mga gulang?

³ Sa sini nga artikulo, binagbinagon naton kon paano ginagamit ni Jehova ang mga gulang para buligan ang mga maluya sa espirituwal. Sabton naton ini nga mga pamangkot: San-o kita dapat mangayo sang bulig sa mga gulang? Ngaa dapat kita mangayo sang bulig sa ila? Kag paano nila kita ginabuligan? Bisan pa wala kita sang kabudlayan subong, makabenepisyo gihapon kita sa sabat sa sini nga mga pamangkot. Buligan kita sini nga pasalamatan pa gid si Jehova sa pag-aman niya sang mga gulang kag posible nga makaluwas ini sang aton kabuhi sa ulihi.

SAN-O KITA DAPAT MANGAYO SANG BULIG SA MGA GULANG?

4. Ngaa makasiling kita nga parte sa nagamasakit sa espirituwal ang ginapatuhuyan sang Santiago 5:14-16, 19, 20? (Tan-awa man ang mga piktyur.)

⁴ Ginpaathag ni disipulo Santiago kon paano ginagamit ni Jehova ang mga gulang para buligan kita. Nagsiling sia: “May nagamasakit bala sa inyo? Magtawag sia sang mga gulang sang kongregasyon.” (Basaha ang Santiago 5:14-16, 19, 20.) Ngaa makasiling kita nga parte sa nagamasakit sa espirituwal ang ginapatuhuyan ni Santiago? Kay man, wala sia nagsiling nga dapat magtawag sang doktor ang nagamasakit. Sa baylo, dapat magtawag sia sang mga gulang. Kag nagsiling man sia nga magaayo ang nagamasakit kon mapatawad na ang iya mga sala. Pero, may pagkaanggid ang pagbulong sa nagamasakit sa espirituwal kag sa nagamasakit sa pisikal. Kon nagamasakit kita, nagapadoktor kita, ginasugid naton sa iya ang aton ginabatyag, kag ginasunod naton ang iya mga ginasiling nga dapat naton himuon para mag-ayo kita. Sing kaanggid, kon nagamasakit kita sa espirituwal, dapat kita mag-istorya sa mga gulang, isugid naton sa ila ang aton problema, kag sundon naton ang ila laygay nga nabase sa Biblia.

5. Paano naton mahibaluan kon bala mabakod ang aton espirituwalidad ukon indi?

⁵ Ginapalig-on kita sang Santiago kapitulo 5 nga mag-istorya sa mga gulang kon pamatyag naton nagaluya kita sa espirituwal. Pero, importante gid nga mangayo kita sang bulig sa ila antes pa maguba ang aton kaangtanan kay Jehova. Gani, dapat naton batunon nga kinahanglan naton ang bulig. Kay man, ginapaandaman kita sang Biblia nga posible papatihon naton ang aton kaugalingon nga mabakod ang aton espirituwalidad. (Sant. 1:22) Amo ini ang natabo sa pila ka Cristiano sa Sardis sang una, kag ginpaandaman sila ni Jesus nga wala nalipay sa ila si Jehova. (Bug. 3:1, 2) Paano naton mahibaluan kon bala mabakod ang aton espirituwalidad ukon indi? Ipaanggid naton ang aton kakugi sa pag-alagad sang nabawtismuhan kita sa kakugi naton subong. (Bug. 2:4, 5) Puede naton pamangkuton ang aton kaugalingon: ‘Daw wala na bala ako gana magbasa sang Biblia kag magpamalandong? Wala na bala ako nagahanda para sa miting ukon indi na bala regular ang akon pagtambong sa sini? Daw wala na bala ako gana magbantala? Pirme ko bala ginapamensar ang parte sa kalingawan kag materyal nga mga butang?’ Kon huo ang aton sabat bisan sa isa lang sa sini nga mga pamangkot, posible ginapakita sini nga nagaluya na ang aton espirituwalidad. Kag kon wala kita sing himuon nga pagbag-o, posible nga maguba ang aton kaangtanan kay Jehova. Kon indi naton masarangan pabakuron liwat ang aton espirituwalidad ukon nakahimo na kita sang sala, dapat mangayo kita sang bulig sa mga gulang.

6. Ano ang dapat himuon sang mga nakahimo sang serioso nga sala?

⁶ Kon nakahimo sang serioso nga sala ang isa ka utod, posible sikwayon sia sa kongregasyon kon indi sia maghinulsol. Gani, dapat mag-istorya sia sa mga gulang. (1 Cor. 5:11-13) Kay man, kinahanglan niya ang bulig para makay-o liwat ang iya kaangtanan kay Jehova. Para mapatawad kita ni Jehova paagi sa gawad, dapat ‘maghimo kita sing mga buhat nga takus sa paghinulsol.’ (Binu. 26:20) Kag ang isa sa sini nga mga buhat amo ang pag-istorya sa mga gulang kon nakahimo kita sang serioso nga sala.

7. Sin-o pa ang dapat mangayo sang bulig sa mga gulang?

⁷ Magluwas sa mga nakahimo sang serioso nga sala, ginabuligan man sang mga gulang ang mga maluya sa espirituwal. (Binu. 20:35) Halimbawa, posible nabalaka ka kay basi indi mo masarangan pakigbatuan ang imo sala nga mga handum. Kag kon nagadroga ka, nagatan-aw sang pornograpiya, ukon imoral ang imo pagkabuhi antes ka nabawtismuhan, posible nga mas nabudlayan ka pa gid nga pakigbatuan ini. Pero, indi ka dapat matahap nga mangayo sang bulig sa isa ka gulang. Pamatian ka niya sing maayo, magahatag sia sing laygay nga makabulig sa imo, kag ipahanumdom niya sa imo nga malipay sa imo si Jehova kon indi ka magpadala sa pagsulay. (Man. 4:12) Kon nagaluya ang imo buot bangod indi mo madula sa imo hunahuna ang sala nga mga handum, ipahanumdom sa imo sang mga gulang nga nalipay sa imo si Jehova kay nangayo ka sang bulig. Ginapakita man sini nga mapainubuson ka kag importante gid sa imo ang imo kaangtanan kay Jehova.​—1 Cor. 10:12.

8. Kinahanglan bala nga mag-istorya gid kita sa mga gulang sa kada tion nga makahimo kita sang sala? Ipaathag.

⁸ Indi kinahanglan nga mag-istorya gid kita sa mga gulang sa kada tion nga makahimo kita sang sala. Halimbawa, ibutang ta nga nakahambal ka sing masakit sa isa ka utod ukon wala mo mapunggan ang imo kaakig. Sa baylo nga mag-istorya dayon sa isa ka gulang, mas maayo nga sundon mo ang laygay ni Jesus nga istoryahon anay ang utod para mangayo sing pasaylo sa iya. (Mat. 5:23, 24) Puede mo i-research kon ano ang puede mo himuon para mas mapakita mo pa gid ang kalulo, pagkamapinasensiahon, kag pagpugong sa kaugalingon. Pero kon kinahanglan mo gihapon sang bulig, puede ka gid magpabulig sa mga gulang. Sa sulat ni apostol Pablo sa mga taga-Filipos, ginpangabay niya ang isa ka utod nga lalaki nga buligan si Eudias kag si Sintique para masolbar ang ila indi pag-intiendihanay. Mabuligan ka man sang mga gulang sa inyo kongregasyon.​—Fil. 4:2, 3.

NGAA DAPAT KITA MANGAYO SANG BULIG SA MGA GULANG?

9. Bisan pa nahuya kita bangod sa nahimo naton nga sala, ngaa dapat kita mag-istorya sa mga gulang? (Hulubaton 28:13)

⁹ Kon nakahimo kita sang serioso nga sala ukon daw indi na naton masarangan pakigbatuan ang sala nga mga handum, kinahanglan naton ang kaisog kag pagtuo para magpangayo sang bulig. Bisan pa nahuya kita bangod sa nahimo naton nga sala, dapat kita mag-istorya sa mga gulang. Ngaa? Bangod gin-aman ni Jehova ang mga gulang para buligan kita nga magpabilin nga matutom sa iya. Gani kon mag-istorya kita sa mga gulang, ginapakita naton nga nagasalig kita kay Jehova kag matinumanon kita sa iya. Ginabaton naton nga kinahanglan naton ang iya bulig para padayon naton nga mahimo ang husto. (Sal. 94:18) Kag kon makasala kita, patawaron kita sang Dios kon magtu-ad kita sa mga gulang kag untatan naton ang ginahimo naton nga malain.​—Basaha ang Hulubaton 28:13.

10. Ano ang posible nga matabo kon taguon naton ang aton mga sala?

¹⁰ Kon itu-ad naton sa mga gulang ang aton mga sala, pakamaayuhon kita ni Jehova. Pero kon taguon naton ini, magalala lang ang aton sitwasyon. Halimbawa, sang gintago ni Hari David ang iya mga sala, nag-antos sia sa espirituwal, emosyonal, kag sa pisikal. (Sal. 32:3-5) Kon may ginabatyag kita sa aton lawas kag indi kita magpadoktor dayon, posible nga magalala ini. Sing kaanggid, kon padugayan naton ang pagtu-ad sa mga gulang parte sa nahimo naton nga serioso nga sala, mas mahalitan pa gid kita. Indi gusto ni Jehova nga matabo ini sa aton, gani ginapangabay niya kita nga ‘tadlungon ang aton kaangtanan’ sa iya paagi sa pag-istorya sa mga gulang.​—Isa. 1:5, 6, 18.

11. Kon taguon naton ang parte sa serioso nga mga sala, paano posible mahalitan ang iban?

¹¹ Kon taguon naton ang aton serioso nga sala, posible mahalitan naton ang iban. Posible maupangan sini ang paghatag ni Jehova sang iya balaan nga espiritu para sa bilog nga kongregasyon, kag posible magresulta ini sa problema sa mga kauturan. (Efe. 4:30) Kag kon nabal-an naton nga nakahimo sang serioso nga sala ang isa ka utod, dapat naton sia palig-unon nga mag-istorya sa mga gulang.a Kon taguon naton ang nahimo niya nga serioso nga sala, makasala man kita kay Jehova. (Lev. 5:1) Pero bangod palangga naton si Jehova, dapat naton ini isugid sa mga gulang. Paagi sini, nagabulig kita para mangin matinlo pirme ang kongregasyon kag para mangin maayo liwat ang kaangtanan sang utod kay Jehova.

PAANO KITA GINABULIGAN SANG MGA GULANG?

12. Paano ginabuligan sang mga gulang ang mga maluya sa espirituwal?

¹² Ginasilingan sang Biblia ang mga gulang nga sakdagon ang mga maluya sa espirituwal. (1 Tes. 5:14) Kon nakasala ka, posible pamangkuton ka nila para ‘matungkad’ nila ang imo mga ginahunahuna kag ginabatyag. (Hulu. 20:5) Bisan pa daw nahuya ka nga isugid sa ila ang parte sa imo sala, mas mabuligan ka nila kon isugid mo sa ila ang tanan mo nga ginabatyag. Indi ka dapat mabalaka nga basi ‘makahambal ka nga wala nagahunahuna sing maayo.’ (Job 6:3) Indi ka paghukman sang mga gulang base sa imo mga ginasiling. Sa baylo, pamatian ka anay nila sing maayo para mahangpan nila ang imo sitwasyon antes sila maghatag sing laygay. (Hulu. 18:13) Kabalo sila nga nagakinahanglan sang tion ang pagbulig sa isa ka utod, gani wala nila ginahunahuna nga mabuligan ka dayon nila sa isa lang ka pag-istoryahanay.

13. Paano kita ginabuligan sang mga gulang paagi sa ila mga pangamuyo kag mga laygay nga nabase sa Biblia? (Tan-awa man ang mga piktyur.)

¹³ Kon mag-istorya ka sa mga gulang, indi ka nila pagpakonsiensiahon. Sa baylo, mangamuyo sila para sa imo. Maumpawan ka gid sa “gamhanan nga epekto” sang ila mga pangamuyo. Buligan ka man nila paagi sa ‘paghaplas sa imo sang lana sa ngalan ni Jehova.’ (Sant. 5:14-16) Ini nga “lana” nagapatuhoy sa kamatuoran sa Pulong sang Dios. Gamiton sang mga gulang ang Biblia para paumpawan ka kag buligan nga mangin maayo liwat ang imo kaangtanan kay Jehova. (Isa. 57:18) Paagi sa ila mga laygay nga nabase sa Biblia, mapabakod ka nga padayon nga himuon ang husto. Gani paagi sa mga gulang, daw pareho lang nga ginasilingan ka ni Jehova: “Amo ini ang dalan. Lakat [ka] sa sini.”​—Isa. 30:21.

14. Suno sa Galacia 6:1, paano ginabuligan sang mga gulang ang mga ‘nakahimo sang sayop nga tikang’? (Tan-awa man ang mga piktyur.)

¹⁴ Basaha ang Galacia 6:1. Kon ‘nakahimo sang sayop nga tikang’ ang isa ka utod, wala niya matuman ang matarong nga mga kasuguan ni Jehova. Posible nakahimo sia sang indi maayo nga desisyon ukon sang isa ka serioso nga sala. Bangod palangga sang mga gulang ang ila utod, ‘tinguhaan nila nga tadlungon sia sa espiritu sang kalulo.’ Ang Griego nga tinaga nga gin-translate “tadlungon” puede man magpatuhoy sa ginahimo sang isa ka doktor para ibalik ang nagliw-as nga tul-an sang iya pasyente. Tinguhaan gid sang isa ka sagad nga doktor nga indi masyado masakitan ang iya pasyente samtang ginabalik niya ang tul-an. Sing kaanggid, samtang ginabuligan sang mga gulang ang utod nga nakahimo sang sayop nga tikang, ginatinguhaan gid nila nga indi na pagdugangan ang kasakit nga nabatyagan sang utod. Ginasilingan man sang Biblia ang mga gulang nga ‘bantayan nila ang ila kaugalingon.’ Gani samtang ginabuligan nila kita nga himuon ang husto, ginadumdom nila nga indi man sila perpekto kag makahimo man sila sang sala. Gani, indi nila pag-ipabatyag sa aton nga mas maayo sila sangsa aton. Sa baylo, tinguhaan gid nila nga mangin mapainubuson kag pakitaan nila kita sang kaluoy.​—1 Ped. 3:8.

15. Ano ang maayo nga himuon kon may problema kita?

¹⁵ Masaligan naton ang aton mga gulang. Ginhanas sila nga taguon ang kompidensial nga mga butang parte sa aton, ibase sa Biblia ang ila laygay imbes nga sa ila opinyon, kag padayon kita nga buligan sa aton mga problema. (Hulu. 11:13; Gal. 6:2) Lainlain ang personalidad sang mga gulang kag may pila nga madugay na nga nagaalagad kay Jehova, pero indi kita dapat matahap nga mag-istorya sa kay bisan sin-o sa ila parte sa aton problema. Siempre, likawan naton nga mangayo sang laygay sa kada gulang kay nagalaum kita nga may isa sa ila nga maglaygay sang gusto naton mabatian. Kon himuon naton ina, daw pareho kita sa mga tawo nga gusto lang makabati sang ‘makapakalam sang ila mga dulunggan’ imbes sang “maayo nga panudlo” halin sa Pulong sang Dios. (2 Tim. 4:3) Kon mag-istorya kita sa isa ka gulang parte sa aton problema, posible pamangkuton niya kita kon nakaistorya na kita sa iban nga mga gulang kag kon ano ang ginlaygay nila sa aton. Kag bangod maugdang ang isa ka gulang, posible nga mangayo sia anay sang laygay sa iban nga gulang.​—Hulu. 13:10.

MAY PERSONAL KITA NGA RESPONSIBILIDAD

16. Ano ang aton personal nga responsibilidad?

¹⁶ Ginalaygayan kita kag ginabuligan sang mga gulang kon may problema kita, pero wala nila kita ginasilingan kon ano ang dapat naton himuon. Personal nga responsibilidad sang kada isa sa aton nga ipakita sa aton pagkabuhi nga palangga naton si Jehova. Kay man, manabat kita sa iya ano man ang aton mga ginasiling kag ginahimo. Pero buligan niya kita nga makahimo sang maayo nga mga desisyon kag mangin matutom sa iya. (Roma 14:12) Gani imbes nga diktahan kita sang mga gulang kon ano ang dapat naton himuon, ginabuligan nila kita nga maghimo sang aton kaugalingon nga desisyon nga nabase sa mga prinsipio sa Biblia. Kon iaplikar naton ang ila laygay nga nabase sa Biblia, mahanas naton ang aton “ikasarang sa paghangop” sa paghimo sang maayo nga mga desisyon.​—Heb. 5:14.

17. Ano ang gusto ni Jehova nga himuon naton?

¹⁷ Isa gid ka hamili nga pribilehiyo nga atipanon ni Jehova bilang iya mga karnero. Ginpadala ni Jehova ang “maayo nga manugbantay” nga si Jesus nga naghatag sang iya kabuhi para may paglaum kita nga mabuhi sing wala sing katapusan. (Juan 10:11) Kag paagi sa mga gulang, gintuman ni Jehova ang iya ginpromisa: “Hatagan ko kamo sing mga manugbantay nga nahamut-an sang akon tagipusuon, kag hatagan nila kamo sing ihibalo kag paghangop.” (Jer. 3:15) Gani kon nagaluya kita ukon nagamasakit sa espirituwal, indi kita dapat matahap nga mangayo sang bulig sa mga gulang. Kay man, gusto ni Jehova nga panginpuslan naton ang iya gin-aman para buligan kita.