Bag-ong mga Tinuga nga Ginpanganak!
ANG maalam nga si Hari Solomon nagsiling anay: “Wala sing bag-o nga butang sa idalom sang adlaw.” (Manugwali 1:9) Matuod ina sa pisikal nga kalibutan nga ginapuy-an naton, apang kumusta ang malapad nga ginharian sang espirituwal nga tinuga ni Jehova? Sa sina nga ginharian, ang isa nga daku pa kay Solomon, sa pagkamatuod, ang pinakabantog nga tawo nga nagkabuhi, nangin isa ka pinasahi nga bag-ong tinuga. Paano ini natabo?
Sang tuig 29 sang aton Kumon nga Dag-on, ang himpit nga tawo, nga si Jesus, nagkadto kay Juan agod bawtismuhan niya sa Suba sang Jordan. “Kag sang nabawtismuhan na si Jesus, sa gilayon nagtakas sia sa tubig; kag, yari karon! nabuksan sa iya ang mga langit, kag iya nakita ang espiritu sang Dios nga nagapanaug subong sang salampati, kag nagakunsad sa ibabaw niya. Yari karon! May isa man ka tingog gikan sa langit nga nagsiling: ‘Ini ang akon hinigugma nga Anak, nga akon nahamut-an.’ ” (Mateo 3:16, 17) Sa amo, ang tawo nga si Cristo Jesus amo ang una sa bag-ong tinuga, nga hinaplas sa paghimo sang kabubut-on sang Dios. Sang ulihi, pasad sa iya mahalaron nga kamatayon, si Jesus nangin ang Manugpatunga sang isa ka bag-ong katipan sa ulot sang Dios kag sang isa ka pinili nga grupo sang mga tawo. Ang tagsatagsa sini sa ila nangin isa ka “bag-ong tinuga,” ginpanganak sang espiritu sang Dios para sa langit, kag may paglaum nga maggahom upod kay Jesus sa iya langitnon nga Ginharian.—2 Corinto 5:17; 1 Timoteo 2:5, 6; Hebreo 9:15.
Sa sulod sang mga siglo, ining hinaplas, ginpanganak sang espiritu nga mga Cristiano natipon sa paghiusa kay Cristo subong ang matuod nga Cristianong kongregasyon, nga sa iya kaugalingon isa ka bag-ong tinuga. Gintawag ini sang Dios gikan sa sining kalibutan para sa isa ka katuyuan, subong sang ginasiling ni apostol Pedro: “Kamo ‘pinili nga kaliwatan, harianon nga pagkasaserdote, balaan nga pungsod, katawhan para sa pinasahi nga pagpanag-iya, agod nga mabantala ninyo ang gamhanan nga mga buhat’ sang isa nga nagtawag sa inyo gikan sa kadudulman pakadto sa iya kalatingalahan nga kapawa.” (1 Pedro 2:9) Kaangay ni Cristo Jesus, ang una nga bag-ong tinuga sang Dios, ining ikaduha nga bag-ong tinuga may una nga obligasyon nga ibantala ang maayong balita. (Lucas 4:18, 19) Sing indibiduwal, ang mga katapo sini, nga 144,000 sa kadamuon, dapat “magsuklob sing bag-ong personalidad nga gintuga suno sa kabubut-on sang Dios sa matuod nga pagkamatarong kag pagkatutom.” (Efeso 4:24; Bugna 14:1, 3) Kinahanglan nga palambuon nila ang “mga bunga sang espiritu,” nga nalaragway sa Galacia 5:22, 23, kag matutom nga tumanon ang ila pagkatulugyanan.—1 Corinto 4:2; 9:16.
Kumusta ining bag-ong tinuga sa modernong mga tion? Sang tuig 1914, subong ginapakita sang orasan sang Biblia, ang mga pulong sang Bugna 11:15 natuman: “Ang ginharian sang kalibutan nangin ginharian sang aton Ginuo [si Jehova] kag sang iya Cristo, kag magahari sia tubtob sa walay katubtuban.” Ang una nga ginbuhat ni Cristo subong bag-o matangdo nga Hari amo ang pagtagbong kay Satanas kag sa iya demonyo nga mga anghel gikan sa langit paubos sa palibot sang duta. Nagdala ini sing “kailo para sa duta,” sa dagway sang unang inaway kalibutanon kag sang kaupod sini nga mga kasisit-an.—Bugna 12:9, 12, 17.
Nangin pahibalo man ini sa mga nagkalabilin sang bag-ong tinuga sa duta nga dapat sila makigbahin sa pagtuman sang tagna ni Jesus: “Iwali ining maayong balita sang [natukod] nga ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Ano ina nga “katapusan”? Si Jesus nagpadayon sa pagpaathag: “Nian magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo. Sa kamatuoran, kon wala mapalip-ot yadtong mga adlaw, wala kuntani sing tawo nga maluwas; apang bangod sa mga pinili palip-uton yadtong mga adlaw.”—Mateo 24:3-14, 21, 22.
Ginpahulag sang espiritu ni Jehova ang mga hinaplas sang iya bag-ong tinuga nga magmasako sa labing masangkad nga kampanya sa pagbantala nga natabo sa sini nga duta. Gikan sa pila ka libo lamang sang 1919, ang kadamuon sining makugi nga mga manugwali sang Ginharian nangin 50,000 sang tunga-tunga sang katuigan 1930. Subong gintagna, “ang ila tingog naglapnag sa bug-os nga duta, kag ang ila mga pulong tubtob sa mga ukbong sang napuy-an nga duta.”—Roma 10:18.
Ang nagkalabilin lamang bala sang bag-ong tinuga ang tinipon para sa kaluwasan? Indi, kay ang tagna nagsiling nga punggan sang mga anghel sang Dios ang mga unos sang dakung kapipit-an tubtob matapos ang pagtipon indi lamang sa sining mapalangit nga espirituwal nga mga Israelinhon kundi sa iban man, ang “dakung kadam-an, nga walay tawo nga makaisip, gikan sa tanan nga mga pungsod kag mga tribo kag mga katawhan kag mga hambal.” Ano ang ila destinasyon? Ti, magaguwa sila nga walay halit “gikan sa dakung kapipit-an” agod mag-agom sing kabuhi nga walay katapusan sa isa ka paraiso nga duta!—Bugna 7:1-4; 9, 14.
Sing makalilipay, ining dakung kadam-an, nga natipon gikan sa mga 229 ka kadutaan, madasig nga nangin halos 4,500,000 ka aktibo nga mga Saksi. Madamo pa ang nagasululod, subong ginpakita sang 11,431,171 nga nagtambong sa Memoryal sang kamatayon ni Jesus sang Abril 17 sang nagligad nga tuig. Sa sining tanan nga minilyon, 8,683 lamang, nga nagapakilala subong nagkalabilin sa duta sang bag-ong tinuga, ang nag-ambit sa mga emblema sang Memoryal. Indi gid mahimo sining diutay nga grupo ang masangkad nga hilikuton sa pagbantala karon kon sa ila lamang kaugalingon. Ang minilyon nga nagahuman sa dakung kadam-an karon nagapakighiusa nga nagabulig sa ila sa pagtapos sining hilikuton. (Sofonias 3:9) Dugang pa, ang nahanas sing maayo nga mga katapo sang dakung kadam-an nagahimo karon sing administratibo kag iban pa nga importante nga hilikuton upod sa hinaplas nga Nagadumala nga Hubon sang espirituwal nga Israel, subong nga ang di-Israelinhon nga mga Netinim anay nagpanghikot upod sa mga saserdote sa pagkay-o sang mga pader sang Jerusalem.—Nehemias 3:22-26.
Pagtuga sa “Bag-ong mga Langit kag Bag-ong Duta”
Daw ano nga kalipay ang ginabatyag sa sining pagtipon! Subong gid ini sang ginsiling ni Jehova: “Yari karon ako nagatuga sing bag-ong mga langit kag bag-ong duta; kag ang una nga mga butang indi na pagdumdumon, ukon mag-abot sa painuino. Apang magkasadya, kamo nga katawhan, kag magkalipay sing dayon sa akon ginatuga. Kay yari karon akon ginatuga ang Jerusalem nga pagkasadya kag ang iya katawhan nga kalipay. Kag magakalipay ako sa Jerusalem kag magakasadya sa akon katawhan; kag indi na gid mabatian sa iya ang tingog sang paghibi kag ang tingog sang pagtangis.” (Isaias 65:17-19) Ang bag-ong mga langit nga tugahon ni Jehova pagatapuan sa ulihi ni Cristo Jesus kag sang 144,000 ka binanhaw nga mga katapo sang bag-ong tinuga nga ginbakal gikan sa katawhan sa sulod sang nagligad nga 19 ka siglo. Labaw ini ka mahimayaon sa bisan anong dutan-on nga gobierno nga naggahom sa literal nga Jerusalem, bisan sang adlaw ni Solomon. Nagahuman ini sa Bag-ong Jerusalem, isa ka langitnon nga siudad, nga ginlaragway sa iya nagainggat nga katahom sa Bugna kapitulo 21.
Ang Bag-ong Jerusalem amo ang espirituwal nga nobya ni Cristo, ang iya 144,000 ka hinaplas nga mga sumulunod, nga nagabuylog sa ila Nobyo sa langit sa tapos sang ila kamatayon kag espirituwal nga pagkabanhaw. Ginalaragway sila sa Bugna 21:1-4 subong “nagapanaug halin sa langit gikan sa Dios,” kon sayuron, ginagamit niya sa paghatag sing mga pagpakamaayo sa katawhan diri sa duta. Sa sining paagi ang tagna nagakatuman: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa iya. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”
Daw ano ka daku ang aton pagpasalamat nga nagtuga ang Dios sinang bag-ong mga langit! Indi kaangay sang nagataliwan, malaut nga mga paggahom nga madugay na nagpaantos sa katawhan, ining panguluhan nga kahimusan sang Dios mangin permanente. Ang bag-ong tinuga kag ang ila espirituwal nga mga anak, ang dakung kadam-an, nagahugyaw sa dugang pa nga saad sang Dios: “ ‘Kay subong nga ang bag-ong kalangitan kag ang bag-ong duta nga himuon ko magapabilin sa atubangan nakon,’ siling ni Jehova, ‘sa amo magapabilin ang inyo mga kaliwatan kag ang inyo ngalan.’ ”—Isaias 66:22.
Ang “bag-ong duta” nagsugod sa sining mga anak sang mga hinaplas sang bag-ong tinuga. Amo ini ang bag-o, mahinadlukon sa Dios nga katilingban sang katawhan sa duta. Ginapakita gid sang dumtanay, krimen, kasingki, kagarukan, kag imoralidad sa katilingban sang katawhan karon nga kinahanglan ang isa ka bug-os nga pagbag-o padulong sa isa ka bag-ong katilingban sa duta, nga nagapanghikot sa idalom sang pagtuytoy sang maalwan nga bag-ong mga langit. Amo sina ang katuyuan ni Jehova. Subong nga nagtuga sia sing bag-ong mga langit, nagatuga man sia sing bag-ong duta paagi sa pagtipon sa dakung kadam-an subong amo ang sentro sang isa ka mahidaiton nga bag-ong katilingban sa kalibutan. Ini lamang nga katilingban ang maluwas “gikan sa dakung kapipit-an.”—Bugna 7:14.
Ano ang mapaabot naton sa tapos sang dakung kapipit-an? Nagapakighambal sa iya mga apostoles, ang una nga magahuman sa bag-ong mga langit nga magagahom sa bag-ong duta, si Jesus nanaad: “Sa pagkamatuod nagasiling ako sa inyo, Sa pagtuga-liwat, kon ang Anak sang tawo maglingkod sa iya trono nga mahimayaon, kamo nga nagasunod sa akon magalingkod man sa napulog-duha ka trono.” (Mateo 19:28) Ang tanan nga 144,000 sa sining Bag-ong Jerusalem magapakigbahin upod kay Jesus sa paghukom sa katawhan. Nian buslan sang gugma ang kakagod kag dumot subong sadsaran sang tawhanon nga katilingban. Ang mga problema sa tunga sang mga tribo, mga kaliwatan, kag mga pungsod pagadulaon. Inanay nga ibalik sang pagkabanhaw ang mga hinigugma. Ang binilyon sang matutom nga katawhan mangin isa ka daku, nahiusa nga pamilya, nga nabayaw sa kabuhi nga walay katapusan sa isa ka duta nga nahimo nga paraiso.
Indi ini Utopia (halandumon nga duog) ukon Shangri-la (handurawan nga paraiso). Mangin isa ini ka permanente nga tinuga—“bag-ong mga langit kag bag-ong duta nga ginahulat naton suno sa iya saad, kag sa sini magapuyo ang pagkamatarong”! (2 Pedro 3:13) Sa pagkamatuod, isa ini ka matahom nga paglaum, isa ka dalayawon nga saad niya nga nagsiling, “Yari karon! Ginabag-o ko ang tanan nga butang,” kag nga nagdugang sang makapalig-on sing pagtuo nga mga pulong: “Ining mga pulong masaligan kag matuod.”—Bugna 21:5.