Bugana nga mga Pagpakamaayo sa “Mga Manugdala sing Kapawa” nga Distrito nga mga Kombension

SANG nagligad nga mga 2,700 ka tuig, si manalagna Isaias nagsulat: “Yari karon! ang kadudulman magatabon sang duta, kag ang pitipit nga kadudulman sang pungsudnon nga mga grupo.” (Isaias 60:⁠2) Matuod gid ina nga mga pulong! Apang, may paglaum, kay ginapaiwag ni Jehova ang iya kapawa. Sang nagligad nga tuig, ang mga nagahigugma sa kapawa sang Dios mainit nga gin-abiabi sa pagtambong sa “Mga Manugdala sing Kapawa” nga Distrito nga Kombension.

Ang programa sang kombension ginhatag primero sang Hunyo sa Aminhan nga Amerika. Sa mga binulan nga nagsunod, ginhatag man ini sa Sidlangan kag Katundan nga Europa, Sentral kag Bagatnan nga Amerika, Aprika, Asia, kag sa mga kapuluan sang dagat. Minilyon ang nagtambong. Kag nakabenepisyo gid sila sa buganang espirituwal nga pandot!

“Ginaabiabi Kamo Tanan nga mga Manugdala sing Kapawa”

Sa kalabanan nga mga lugar ang kombension nagsugod sang Biernes kag natapos sang Domin­go sang hapon. Sang ang mga kombensionista nakalingkod na sa ila mga pulungkuan sang Biernes sang aga, nalipay sila sa pagpamati sa malip-ot nga sumaryo sa kon paano ang kapawa ni Jehova nag-iwag sing mas masanag pa sa sining katapusan nga mga adlaw. Nian ang tsirman sang kombension namulongpulong. Ginpadaku niya nga ang matuod nga mga Cristiano dapat mangin mga manugdala sing kapawa kag mainit nga nagsiling: “Ginaabiabi kamo tanan nga mga manugdala sing kapawa!” Ang programa sang kombension magabulig sa mga delegado nga padayon nga ipaiwag ang kapawa ni Jehova.

Ginpasad sang key­note address ang kabilugan nga tema sang bug-os nga kombension. Ginpahanumdom sang humalambal sa mga kombensionista nga ang mga kapawa para sa katawhan napalong sadto pa sa katamnan sang Eden. Kutob sadto, ginbulag ni Satanas ang katawhan sa kapawa sang kamatuoran. (2 Corinto 4:⁠4) Apang, si Jesus nagkari subong “kapawa sang mga pungsod.” (Isaias 42:​1-6) Ginbuyagyag niya ang relihiosong mga kabutigan, ginpakilala ang sayop nga mga buhat sang kadudulman, ginsakdag ang pagkasoberano ni Jehova, kag ginwali ang maayong balita sang Ginharian. Amo man sini ang ginhimo sang mga sumulunod ni Jesus​—⁠kag sa gihapon ginahimo nila! (Mateo 28:​19, 20) Ang humalambal makapulukaw nga nagsiling: ‘Kita, kaangay ni Jesus, mahimo mangin mga manugdala sing kapawa. Wala na sing hilikuton nga mas importante sa aton adlaw. Kag wala na sing mas daku nga pribilehiyo.’

Sang manugtapos na ang nahaunang sesyon sa kombension, may isa ka sopresa. Nagbalik sa plataporma ang tsirman sang kombension kag ginpahibalo ang isa ka serye sang apat ka bag-ong ­tract. Ginpalakpakan ini sing mabaskog, kag isa ka kopya sang tagsa ka ­tract ang ginhatag sa kada delegado nga nagtambong.

Sang Biernes sang hapon, ginbinagbinag sang programa sang kombension ang sadsaran nga laygay para sa nagadala-sing-kapawa nga mga Cristiano. Ang nahaunang duha ka pamulongpulong naghatag sing maayong laygay sa kon paano likawan nga malatnan sang kadudulman sang kalibutan. Sanglit si Satanas nagapakaanghel sang kapawa, importante huptan ang espirituwal nga pagtamod agod indi kita masulay sang dimatinlo nga mga butang sang kalibutan. (2 Corinto 11:14) Si Pablo naglaygay: “Dili kamo magpauyon sa sining sistema sang mga butang, kundi magbalhin kamo paagi sa pagbag-o sang inyo painuino, agod nga inyo matilawan kon ano ang maayo kag kalahamut-an kag himpit nga kabubut-on sang Dios.” (Roma 12:⁠2) Ang mga delegado sang kombension nakabati nga ang pagbalhin sang isa ka Cristiano isa ka nagapadayon nga proseso. Ang aton mga hunahuna padayon nga ginaputli kag ginadihon samtang ginatun-an naton ang Pulong sang Dios kag ginaaplikar ang aton natun-an. Busa, labi kag labi nga mangin kaangay kita ni Jesus, nga “puno sang dibagay nga kaluoy kag kamatuoran.”​—⁠Juan 1:⁠14.

Lamharon nga mga Manugdala sing Kapawa

Ang ikaduha nga katunga sang Biernes sang hapon ginpatuhoy sa mga pamatan-on. Gindayaw sang nahaunang pamulongpulong (“Mga Pamatan-on​—⁠Ano Bala ang Inyo Ginahimud-usan?”) ang lamharon nga mga Cristiano nga maayong halimbawa sa katutom. Apang nagpahanumdom ini sa ila nga sila ang partikular nga puntariya ni Satanas. Bisan ang nahanas sing maayo nga atleta nagakinahanglan sing manughanas. Sa sining paagi, ang mga pamatan-on nagakinahanglan sang bulig sang ila mga ginikanan kag sang kongregasyon agod padayon nga magalakat sa kapawa.

Ginpadaku ini sa matahom nga drama nga Paghimo sang Kon Ano ang Matarong sa Mata ni Jehova, nga naghinakop sang programa sang Biernes. Ginpadaku ang halimbawa ni Hari ­Josias. Bisan sang bata pa, determinado sia sa pag-alagad kay Jehova. Ginpalibutan sia sing malain nga mga impluwensia, apang bangod sang panuytoy sang mataas nga saserdote nga si Hilkias kag bangod sang iya kaugalingon nga gugma para sa Kasuguan sang Dios, ginhimo ni Josias kon ano ang matarong sa mata ni Jehova. Kabay nga ang lamharon nga mga Cristiano sa karon magapanghikot sa kaanggid nga paagi.

Paiwaga ang Kapawa

Pagligad sang isa ka gab-i nga pahuway, ang mga delegado nagkadto sa kombension sang Sabado sang aga nga handa para sa dugang pa makapalig-on nga laygay sa Kasulatan. Wala sila mapaslawi. Pagkatapos mahinun-anunan ang teksto sa sina nga adlaw, ang programa nagpadayon paagi sa isa ka simposium nga nagabalay sang lainlain nga mga paagi nga mapaiwag sang isa ka Cristiano ang iya kapawa. (Mateo 5:​14-16) Ang pagbantala isa ka importante nga paagi, kag ang maayo nga paggawi may importante man nga bahin. Subong sang ginsiling sang humalambal, “ang pagbantala nagasugid sa iban kon ano ang aton ginapatihan, apang ang pagbuhat sang gugma nagapasundayag sini.”

Nian ang importante nga bulig sa pagbantala ginpatalupangod sa mga kombensionista​—⁠mga tract. Bangod lab-as pa sa hunahuna ang pahibalo sang nagligad nga adlaw, ang mga delegado nakabati sing mga eksperiensia nga nagapamatuod kon daw ano ka epektibo ining magagmay nga mga instrumento. Ang mga delegado ginpalig-on nga magdala sing suplay sang mga tract sa tanan nga tion, nga handa para sa tanan nga okasyon.

Masunod nga ginhatag ang igtalupangod sa mga payunir, ang bug-os tion nga mga manugbantala sang Ginharian nga nagapangabudlay sing lakas sa pagdala sing kapawa. Daw ano gid ang aton pag-apresyar sa aton mapisan nga mga payunir! Kag ang ila kadamuon nagadugang. Bisan sa mga kadutaan diin bag-o lang ginhatag ang kahilwayan sa pagsimba, ang mga payunir nagadamo. Ang mga payunir ginpalig-on nga pakabahandion ang ila pribilehiyo. Ang mga wala pa nagapayunir ginlaygayan nga binagbinagon ang ila kahimtangan. Ayhan mahimos man nila ang ila hilikuton agod mapaiwag ang ila kapawa sa bug-os tion nga pag-alagad.

Ang pagkamangin manugdala sing kapawa masami nagalakip sing sakripisyo, kag ginpatalupangod ini sa masunod nga pamulongpulong, “Pag-alagad kay Jehova nga May Masinakripisyuhon sa Kaugalingon nga Espiritu.” Si Pablo nagpakiluoy: “Idulot ang inyo mga lawas subong nga halad nga buhi, balaan, kalahamut-an sa Dios.” (Roma 12:⁠1) Ang masinakripisyuhon sa kaugalingon nga espiritu ginpakita sadtong nagabatas sing paghingabot. Ang mga payunir nagahimo sing mga sakripisyo kada adlaw agod makapabilin sa bug-os tion nga pag-alagad. Huo, ang tanan nga matuod nga mga Cristiano nagahimo sing mga sakripisyo, nagasako sang ila kaugalingon sa pag-alagad kay Jehova sa baylo nga sa makagod, materyalistiko nga mga paghimud-os sining kalibutan. Ina nga dalanon nagaresulta sa bugana nga mga pagpakamaayo halin kay Jehova.

Ina nga diskurso isa gid ka nagakaigo nga introduksion sa nagsunod​—⁠ang pamulongpulong sa bawtismo. Yadtong ginbawtismuhan sa “Mga Manugdala sing Kapawa” nga Distrito nga Kombension pat-od nga indi gid malipat sining pamulongpulong. Ang ila bawtismo pirme mangin isa ka talalupangdon nga bahin sang ila kabuhi. Ginpahanumdom sa ila nga ginasunod nila ang halimbawa ni Jesucristo, nga nabawtismuhan sa edad nga 30 anyos. Dugang pa, ang mga kandidato sa bawtismo nalipay sa pagdumdom nga ila “gin-uba ang mga buhat sang kadudulman” kag namat-od sa “pagpaulipon kay Jehova.” (Roma 12:11; 13:12) Nagtindog sila sing malipayon sa atubangan sang mga tumalambong sa kombension kag naghimo sing mabaskog nga dayag nga deklarasyon antes maglakat sa pagpabawtismo. (Roma 10:10) Ginapangamuyo namon ang pagpakamaayo ni Jehova sa tanan nga nagsimbulo sang ila dedikasyon sa iya paagi sa pagpabawtismo sa tubig sa “Mga Manugdala sing Kapawa” nga Distrito nga mga Kombension.

Ang Sabado sang hapon isa ka tion para sa prangka nga mga paandam. Ginhatag ini sa dagway sang mga pamulongpulong nga natig-uluhan “Likawi ang mga Siod sang Kakagod,” “May Nagadunot Bala sang Imo Mapuslanon nga mga Batasan”? kag “Mag-andam Batok sa Tanan nga Sahi sang Idolatriya.” Ginpakilala sining tatlo ka pamulongpulong ang pila ka taktika nga ginagamit ni Satanas sa pagpaluya sa isa ka Cristiano. Si Judas Iscariote isa ka apostol, apang ginluiban niya si Jesus tungod sa kuwarta. Ang bata nga si Samuel nagdaku sa pungsudnon nga sentro gid sang pagsimba kay Jehova, apang dimalikawan nga nadayag sia sa tuman kalain nga mga kaupod. (1 Samuel 2:​12, 18-20) Ang idolatriya nagalakip sang mga butang kaangay sang seksuwal nga imoralidad kag kahamkon. (Efeso 5:5; Colosas 3:⁠5) Huo, ang kakagod, malain nga mga pagpakig-upod, kag idolatriya makatalagam kag dapat likawan.

Nian ang programa sang kombension nagbag-o sing tema. Ang masunod nga pamulongpulong nagpautwas sing madamong makawiwili nga mga pamangkot sa Biblia kag ginsabat ini. Halimbawa, mapaathag mo bala kon ang mga tawo nga wala magbaton sing kamatuoran kag mapatay sa dakung kapipit-an banhawon? Ano ang himuon sang isa ka Cristiano kon indi sia makakita sing nagakaigo nga tiayon? Agod padalumon ang ila ihibalo sa Biblia, ang mga delegado ginlaygayan nga gamiton sing maayo ang Watch Tower Publications Index, labi na sa ubos sang tig-ulo nga “Mga Pamangkot Gikan sa mga Bumalasa.”

Ang Presensia kag Pagpahayag ni Cristo

Ang katapusan nga bahin sang programa sang Sabado nagliso sa tagna paagi sa simposium nga natig-uluhan “Paghatag sing Kapawa sa Presensia kag Bugna ni Cristo.” Ang mga bahin sang “tanda” nga nagapamatuod sang presensia ni Jesucristo ginrepaso. (Mateo 24:⁠3) Sa ikaduha nga bahin, ang modernong-adlaw nga mga hilikuton sang “matutom kag mainandamon nga ulipon” ginhambalan. (Mateo 24:​45-47) Ginpakita nga sugod sang 1919 ang ulipon nga klase matutom nga nanguna sa hilikuton nga pagbantala sang maayong balita sang Ginharian. Nian ang dakung kadam-an gintipon gikan sa tanan nga pungsod sa pagbuylog sa hinaplas nga mga Cristiano sa pag-iwag sang kapawa ni Jehova. Ang humalambal naghinakop: “Magpadayon ang tanan sa makugi nga pagsakdag sa matutom kag mainandamon nga ulipon. Paagi lamang sa paghimo sini sa pila ka adlaw nga tuman na kalapit nga ang tanan nga mga katulad-karnero magapamati sa makalilipay nga mga pulong: ‘Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.’ ”​—⁠Mateo 25:⁠34.

Ang katapusan nga humalambal naghinun-anon sang kahulugan kag mga panugda sang pagpahayag ni Jesucristo. (1 Corinto 1:⁠7) Daw ano gid nga eksperiensia ina nga pagpahayag! Ang Babilonia nga Daku pagalaglagon. Ang dakung inaway sa ulot sang kalibutan ni Satanas kag ni Jesus kag sang iya mga anghel magatapos sa kalaglagan sining sistema. Sa katapusan, si Satanas gid itagbong kag gapuson. Apang may paumpaw para sa katawhan sang Dios, paagi sa pagpakasal sang Kordero sa langit kag sa pagpaluntad sing bag-ong duta. Ang humalambal nagpahalipay sa iya tumalambong paagi sa pagpaguwa sang bag-ong brosyur nga Nagaulikid Gid Bala ang Dios sa Aton? Daw ano kaayo ina nga bulig para sa mapainubuson nga mga indibiduwal nga nagakinahanglan makahibalo nahanungod sa aton mainulikdon nga Manunuga kag sa iya mga katuyuan para sa aton!

Cristianong mga Panimalay

Nag-abot na karon ang Domingo, ang katapusan nga adlaw sang kombension. Apang, madamo pa ang ihatag. Pagkatapos mahinun-anunan ang teksto sa sina nga adlaw, ginhatag ang igtalupangod sa Cristianong panimalay paagi sa simposium nga “Pag-atipan sa Isa kag Isa sa Cristianong Panimalay.” Ang unang bahin nagbulig sa mga kombensionista sa paghibalo sang sekreto sang pagtigayon sing isa ka madinalag-on nga Cristianong panimalay: pag-una sa espirituwal nga mga butang. Ang ikaduhang bahin nagpalig-on sa mga panimalay nga magpanghikot sing tingob, nagalakip man ina sang pagtambong sa mga miting, pag-alagad sa latagon, pangpamilya nga pagtuon, ukon paglingawlingaw. Kag ang ikatlo nga bahin sang simposium nagpahanumdom sa mga delegado sang ila pribilehiyo kag responsabilidad nga atipanon ang mga tigulang. “Ang aton tigulang nga mga kauturan nga lalaki kag babayi importante sa kongregasyon,” siling sang humalambal. Pakabahandion naton ang ila eksperiensia kag ilugon ang ila integridad.

Ang kahulugan sang ekspresyon nga “kaligdong sa hunahuna” amo ang masunod nga gin-usisa. (1 Pedro 4:⁠7) Ang isa nga maligdong sing hunahuna timbang, maalamon, rasonable, mapainubuson, kag makatarunganon. Sarang niya makilala ang husto kag sala, matuod kag butig. Dugang pa, ginapanikasugan niya nga huptan ang maayong espirituwal nga kapagros.

Ang katapusan nga pamulongpulong sa programa sang Domingo sang aga naghinun-anon sang aton pagpasakop sa Dios kag kay Cristo. “Ang importansia sang matutom nga pagpasakop kay Jehova nga Dios kag sa iya Anak, si Jesucristo, kinahanglanon gid,” siling sang humalambal. Padayon niya nga ginpakita kon paano ini nagaapektar sa tagsa ka bahin sang aton kabuhi. Ano ang magabulig sa aton sa pagpabilin nga nagapasakop? Apat ka kinaiya: gugma, diosnon nga kahadlok, pagtuo, kag pagkamapainubuson.

Domingo sang Hapon

Sa hinali, Domingo na sang hapon kag tion na para sa katapusan nga sesyon sang kombension. Para sa madamo, daw bag-o lang nagsugod ang kombension, kag karon manugtapos na ini.

Ang pamulongpulong publiko gintig-uluhan “Sunda ang Kapawa sang Kalibutan.” Ang mga nagtambong ginhatagan sing makawiwili nga paathag tuhoy sa papel sang pisikal nga kapawa sa paghupot sing kabuhi. Nian ginpakita sang humalambal ang daku pa nga importansia sang espirituwal nga kapawa. Ang pisikal nga kapawa nagahupot sa aton nga buhi sa mga pila ka dekada, apang ang espirituwal nga kapawa sarang makahupot sa aton nga buhi sa walay katubtuban. Ang talalupangdon nga bahin sang pamulongpulong amo ang bersikulo-por-bersikulo nga paghinun-anon sang Juan 1:​1-16, diin ginpakilala si Jesus subong ang kapawa sang kalibutan. Karon, sa katapusan nga tinuig sining malaut nga sistema, mas hilingagawon sang sa nagligad nga sundon si Jesus sa sining papel.

Pagkatapos sang sumaryo sang materyal sa Pagtinuon sa Lalantawan nga gintalana para sa sina nga semana, tion na para sa nagahinakop nga pamulongpulong. Sing makalilipay, ginpakita sang humalambal nga madamong butang ang mapaabot sing malangkagon sa mga adlaw sa unahan. Halimbawa, ginpahibalo niya ang bag-ong audio­cassette, ang drama nga Doing God’s Will With Zeal. Kag indi lang ina. May bag-ong mga serye sang mga video­cassette nga natig-uluhan The Bible​—⁠A Book of Fact and Prophecy, ang una sa tema nga The Bible​—⁠Accurate History, Reliable Prophecy.

Sa katapusan, ginpahibalo sang humalambal nga sa 1993 may apat-ka-adlaw nga distrito nga kombension, lakip ang pinasahi nga internasyonal nga mga pagtilipon sa Aprika, Asia, Europa, kag Bagatnan nga Amerika. Bisan pa ang “Mga Manugdala sing Kapawa” nga Distrito nga Kombension natapos na, ang mga delegado makasugod na sa pagplano para sa masunod nga tuig.

Nian tion na para magpauli ang mga delegado sa kombension. Sa pagkamatuod, mas determinado sila sang sa nagligad nga padayon nga ipaiwag ang kapawa sa sining madulom nga kalibutan. Pagligad sang tatlo ka adlaw nga puno sing espirituwal nga maayong mga butang, ang mga pinamulong sang katapusan nga kasulatan nga ginbalikwat sa katapusan nga pamulongpulong nakatigayon sing daku nga kahulugan: “Si Jehova amo ang Isa nga Balaan, kag sia nagahatag sa aton sing kapawa. . . . Pasalamat kay Jehova, kamo nga katawhan, kay maayo sia; kay ang iya mahigugmaon nga kalulo nagapadayon sa walay katubtuban.”​—⁠Salmo 118:​27, 29.

[Piktyur sa pahina 15]

Programa sang kombension sa Ruso

[Mga piktyur sa pahina 16, 17]

Ang mga katapo sang Nagadumala nga Hubon namulongpulong sa madamong kombension

Ang Hapones nga mga delegado amo ang pila sadtong nagtipon sa St. Petersburg, Rusya

Ang makapulukaw nga drama sa Biblia nagpadaku sang kinahanglanon nga himuon kon ano ang matarong sa mata ni Jehova

Ang bag-ong mga manugdala sing kapawa nagsimbulo sang ila dedikasyon kay Jehova paagi sa pagpabawtismo

Ang mga kombensionista namati sing maayo sa programa sa St. Petersburg

[Piktyur sa pahina 18]

Mga delegado nalipay sa pagbaton sing bag-ong brosyur, “Nagaulikid Gid Bala ang Dios sa Aton? ”