Sin-o ang mga Nagasunod sa Kapawa sang Kalibutan?

“Nagasiga kamo subong nga mga sulo sa kalibutan.”​—⁠FILIPOS 2:⁠15.

1. Ano ang ginasiling sang Biblia nahanungod sa huwad nga relihioso nga mga kapawa?

MAATHAG nga ginapakilala sang Biblia si Jesus subong “daku nga kapawa,” “ang kapawa sang kalibutan.” (Isaias 9:2; Juan 8:12) Apang, pila lamang ang nagsunod sa iya sang yari sia sa duta. Ginpili sang kalabanan nga sundon ang huwad nga mga kapawa nga, sa kamatuoran, mga manugdala sing kadudulman. Tuhoy sa ila ang Pulong sang Dios nagasiling: “Ang amo nga mga tawo dimatuod nga mga apostoles, madaya nga mga manugpangabudlay, nga mga nagapakaapostol ni Cristo. Kag indi katingalahan, kay bisan si Satanas nagapakaanghel sang kapawa. Gani indi katingalahan kon ang iya mga ministro man nagapakaministro sang pagkamatarong. Apang ang ila katapusan mangin suno sa ila mga buhat.”​—⁠2 Corinto 11:​13-15.

2. Ano ang ginsiling ni Jesus nga mangin sadsaran sa paghukom sa katawhan?

² Sa amo, indi tanan nga katawhan maluyag sa kapawa, bisan pa makatilingala ini. Si Jesus nagsiling: “Karon amo ini ang sadsaran sang paghukom, nga ang kapawa nagkari sa kalibutan apang ginhigugma sang mga tawo ang kadudulman sa baylo sang kapawa, kay ang ila mga buhat malaut. Kay ang nagabuhat sing malaut nagadumot sa kapawa kag wala nagapalapit sa kapawa, agod nga ang iya mga buhat indi pagsabdungon.”​—⁠Juan 3:​19, 20.

Mga Mahigugmaon sa Kadudulman

3, 4. Paano ginpakita sang relihioso nga mga lider sang adlaw ni Jesus nga indi nila luyag magsunod sa kapawa?

³ Binagbinaga kon paano ini natabo kay Jesus sang yari sia sa duta. Ginhatagan sang Dios si Jesus sing gahom sa paghimo sing makakulunyag nga mga milagro agod magpamatuod nga sia ang Mesias. Halimbawa, sang isa ka adlaw nga Inugpahuway, ginpasag-uli niya ang panan-aw sang isa ka tawo nga bulag halin sa pagkatawo. Daw ano ka dalayawon nga buhat sang kaluoy! Daku gid ang pag-apresyar sadto nga tawo! Sa una nga tion sa iya kabuhi makakita na sia! Apang, ano ang reaksion sang relihioso nga mga lider? Ang Juan 9:16 nagasaysay: “Ang iban sang mga Fariseo nagsugod sa pagsiling [nahanungod kay Jesus]: ‘Ining tawo indi gikan sa Dios, bangod nga wala sia nagabantay sang adlaw nga Inugpahuway.’ ” Daw ano ka tiko ang ila tagipusuon! Isa ka makatilingala nga pagpaayo ang natabo, apang sa baylo nga magkalipay para sa isa anay ka bulag nga tawo kag apresyahon ang nagpaayo, ginpakamalaut pa nila si Jesus! Bangod sini, walay duhaduha nga nakasala sila batok sa pagpahayag sang balaan nga espiritu sang Dios, isa ka dimapatawad nga sala.​—⁠Mateo 12:​31, 32.

⁴ Sang ulihi, sang ginpamangkot sadtong mga salimpapaw ang anay bulag nga tawo tuhoy kay Jesus, ini nga tawo nagsiling: “Kalatingalahan gid ini, nga wala ninyo mahibalui kon tagadiin sia [Jesus], apang ginpamuklat niya ang akon mga mata. Nahibaluan naton nga ang Dios wala nagapamati sa mga makasasala, apang kon ang bisan sin-o mahinadlukon sa Dios kag nagahimo sang iya kabubut-on, sia ginapamatian sang Dios. Halin sang una wala pa gid mabatii nga may isa nga nagpamuklat sang mga mata sang tawo nga natawo nga bulag. Kon ining tawo [Jesus] indi gikan sa Dios, indi sia makahimo sing bisan ano.” Ano ang sabat sang relihioso nga mga lider? “Nagsabat sila sa iya: ‘Ikaw natawo sing bug-os sa sala, kag tudluan mo bala kami?’ Kag ginsubol nila sia!” Daw ano ka kulang sing kaluoy! Matig-a gid ang ila tagipusuon. Gani ginsilingan sila ni Jesus nga bisan pa makakita sila paagi sa ila pisikal nga mga mata, bulag sila sa espirituwal.​—⁠Juan 9:​30-41.

5, 6. Ano ang ginhimo sang unang-siglo nga relihiosong mga lider nga nagpakita nga ginhigugma nila ang kadudulman?

⁵ Nga ining relihioso nga mga salimpapaw nagapakasala batok sa espiritu sang Dios makita naton sa isa pa ka okasyon, sang ginbanhaw ni Jesus si Lazaro. Bangod sadtong milagro, madamo sang kinaandan nga mga tawo ang nagtuo kay Jesus. Apang, talupangda ang ginhimo sang relihioso nga mga lider: “Gintipon sang puno nga mga saserdote kag sang mga Fariseo ang Sanhedrin kag nagsiling: ‘Ano bala ang aton himuon, kay ining tawo nagahimo sing madamo nga tanda? Kon aton pabayaan sia, ang tanan magatuo sa iya, kag ang mga Romanhon magakari kag magalaglag sang aton duog kag aton pungsod.’ ” (Juan 11:​47, 48) Ginkabalak-an nila ang ila mga posisyon kag kabantugan. Bisan ano man ang matabo, luyag nila pahamut-an ang mga Romano, indi ang Dios. Gani, ano ang ila ginhimo? “Busa kutob sadtong adlaw nagsinapol sila sa pagpatay [kay Jesus].”​—⁠Juan 11:⁠53.

⁶ Amo lamang bala sina tanan? Indi. Ang ila masunod nga ginhimo nagapakita kon daw ano kadaku nga ginahigugma nila ang kadudulman. “Ang puno nga mga saserdote nagsinapol karon nga patyon man si Lazaro, kay bangod sa iya madamo sang mga Judiyo ang nagabiya kag nagatuo kay Jesus.” (Juan 12:​10, 11) Daw ano ka dimapatihan nga kalautan! Bisan pa ginhimo nila ini tanan agod amligan ang ila mga posisyon, ano ang natabo? Sa sadto gid nga kaliwatan, nag-alsa sila batok sa mga Romano, nga nagsalakay sa ila sang 70 C.E. kag ginbihag ang ila duog, ang ila pungsod, kag ang ila man kabuhi!​—⁠Isaias 5:20; Lucas 19:​41-44.

Ang Kaluoy ni Jesus

7. Ngaa nagapanong kay Jesus ang mga nagahigugma sang kamatuoran?

⁷ Amo man sa aton tion, indi tanan maluyag sang espirituwal nga kasanagan. Apang ang mga nagahigugma sang kamatuoran nagapalapit sa kapawa. Luyag nila nga ang Dios amo ang mangin Soberano nila, kag sila malangkagon nga nagaliso kay Jesus, ang isa nga ginpadala sang Dios agod magpaathag kon ano ang kapawa, kag sundon sia. Amo sina ang ginhimo sang mapainubuson nga katawhan sang si Jesus yari sa duta. Nagpanong sila sa iya. Bisan ang mga Fariseo nagbaton sina. Sila nagreklamo: “Ang kalibutan nagsunod sa iya.” (Juan 12:19) Ginhigugma sang tulad-karnero nga katawhan si Jesus bangod kabaliskaran sia sang makagod, matinaastaason, gutom sa gahom nga relihiosong mga lider nga tuhoy sa ila si Jesus nagsiling: “Sila nagabugkos sing mga lulan nga mabug-at kag ginabutang nila ini sa abaga sang mga tawo, apang indi sila buot magpahulag sini sa ila tudlo. Sila nagahimo sang tanan nila nga buluhaton agod tan-awon sang mga tawo.”​—⁠Mateo 23:​4, 5.

8. Kabaliskaran sang relihioso nga mga salimpapaw, ano nga panimuot ang ginpakita ni Jesus?

⁸ Bilang katuhayan, talupangda ang pagkamaluluy-on ni Jesus: “Sang nakita niya ang kadam-an, naluoy sia sa ila, kay napilasan sila kag nag-aplaag subong sang mga karnero nga wala sing manugbantay.” (Mateo 9:36) Kag ano ang iya ginhimo sa sini? Ginsilingan niya ang mga ginhingalitan sang sistema ni Satanas: “Kari sa akon, tanan kamo nga ginabudlayan kag ginabug-atan, kay papahuwayon ko kamo. Itakod ang akon gota sa inyo kag magtuon kamo sa akon, kay ako malum-ok sing panghunahuna kag malulo sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas kag ang akon lulan mamag-an.” (Mateo 11:​28-30) Ginhimo ni Jesus ang gintagna tuhoy sa iya sa Isaias 61:​1, 2, nga mabasa: “Si Jehova naghaplas sa akon sa pagwali sing maayong balita sa mga mapainubuson. Ginpadala niya ako sa pagbugkos sang buong sing tagipusuon, sa pagbantala sing kahilwayan sa mga bihag kag sa pagpabukas sang bilangguan sa mga bilanggo; sa pagbantala sang tuig sang maayong kabubut-on ni Jehova kag sang adlaw sang pagtimalos sang Dios naton; sa paglipay sa tanan nga nagakasakit.”

Pagtipon sa mga Manugdala sing Kapawa

9. Anong dimalipatan nga mga hitabo ang natabo sang 1914?

⁹ Sa tapos sia makakayab sa langit, magahulat anay si Jesus tubtob mag-abot ang tion nga pagahumon sia sang Dios sa Ginharian. Nian painpainon niya ang “mga karnero” gikan sa “mga kanding.” (Mateo 25:​31-33; Salmo 110:​1, 2) Ina nga tion nag-abot sang magsugod ang “katapusan nga mga adlaw” sang 1914. (2 Timoteo 3:​1-5) Si Jesus, nga ginpagahom subong Hari sa langitnon nga Ginharian sang Dios, nagsugod sa pagtipon sa iya tuuhan sang kahamuot sang tanan nga luyag magsunod sa kapawa. Sa tapos sang Inaway Kalibutanon I, ina nga hilikuton sa pagtipon nagdasig.

10. Ano nga pamangkot ang mahimo ipamangkot nahanungod sa ila nga ginagamit ni Jesus sa hilikuton sa pagtipon?

¹⁰ Sa idalom sang pagpanguna ni Cristo Jesus, ang hilikuton sa pagtipon ginpadyaan sing daku nga kadalag-an. Wala pa gid matabo sa maragtas nga tuman kadamo nga katawhan gikan sa tanan nga kapungsuran ang natipon sa nasanagan nga matuod nga pagsimba. Kag sin-o sa karon ang mga nagasunod sa kapawa nga nagagikan sa Dios kag kay Cristo? Sin-o ang nagahimo sang ginasiling sang Filipos 2:​15, “nagasiga subong nga mga sulo sa kalibutan,” nagaagda sa iban pa nga ‘magkari kag magkuha sing tubig sang kabuhi sa walay bayad’?​—⁠Bugna 22:⁠17.

11. Ano ang kahimtangan sang Cristiandad kon tuhoy sa espirituwal nga kapawa?

¹¹ Ginahimo bala ina sang Cristiandad? Ang Cristiandad, upod ang iya nabahinbahin nga mga relihion, wala sa pagkamatuod nagasiga subong sulo. Sa kamatuoran, ang klero kaangay sang relihioso nga mga lider sang adlaw ni Jesus. Wala sila nagapabanaag sing matuod nga kapawa gikan sa Dios kag kay Cristo. Katluan kag tatlo ka tuig sang una, ang magasin nga Theology Today nagsiling: “Masubo batunon nga ining kapawa wala nagasiga sing masanag sa Iglesia. . . . Ang Iglesia kapin kag kapin nga nangin kaangay sang mga komunidad nga nagapalibot sa sini. Sa baylo nga mangin kapawa sang kalibutan nangin banaag lamang ini sang kapawa nga nagasiga sa kalibutan.” Kag mas malain pa ang kahimtangan sang Cristiandad karon. Ang ginatawag nga kapawa nga iya ginapabanaag gikan sa kalibutan isa ka kadudulman sa kamatuoran bangod amo lamang ini ang matan-ay ni Satanas kag sang iya kalibutan. Wala, wala sing kapawa sang kamatuoran gikan sa nagasumpakilay kag kalibutanon gid nga mga relihion sang Cristiandad.

12. Sin-o sa karon ang nagahuman sa matuod nga manugdala sing kapawa nga organisasyon?

¹² Sarang masiling sing masinaligon nga ang bag-ong kalibutan nga katilingban sang mga Saksi ni Jehova amo ang matuod, nagadala sing kapawa nga organisasyon karon. Sing nahiusa, ang tanan nga katapo sini​—⁠mga lalaki, mga babayi, kag mga lamharon​—⁠nagapasilak sang ila kapawa gikan kay Jehova kag kay Cristo sa atubangan sang bug-os nga katawhan. Sang nagligad nga tuig, sa halos 70,000 ka kongregasyon sang mga Saksi ni Jehova sa bug-os nga kalibutan, kapin sa apat ka milyon ka manugdala sing kapawa ang aktibo nga nagbantala sa iban nahanungod sa Dios kag sa iya mga katuyuan. Kag kada tuig karon, makita naton ang nagapadayon nga daku nga pagtipon sa mga tawo nga luyag man masanagan sa espirituwal. Ginatos ka libo ang ginabawtismuhan sa tapos nila matun-an ang Biblia kag makadangat sa sibu nga ihibalo sa kamatuoran. Sa pagkamatuod, “kabubut-on [sang Dios] nga ang tanan nga tawo maluwas kag makadangat sa sibu nga ihibalo sa kamatuoran.”​—⁠1 Timoteo 2:⁠4.

13. Sa ano naton mapaanggid ang kapawa nga nagagikan kay Jehova?

¹³ Mapaanggid naton ang kapawa nga nagaabot karon gikan kay Jehova sa kon ano anay ang natabo sang ang katawhan sang Dios sang dumaan nga mga tion nagbiya sa Egipto: “Si Jehova nag-una sa ila sa adlaw sa isa ka haligi nga panganod sa pagtuytoy sa ila sa dalanon, kag sa gab-i sa isa ka haligi nga kalayo sa paghatag sa ila sing kapawa, agod nga makalakat sila sa adlaw kag sa gab-i. Ang haligi nga panganod sa adlaw kag ang haligi nga kalayo sa gab-i wala maghalin sa una sang katawhan.” (Exodo 13:​21, 22) Ang panganod sa adlaw kag ang kalayo sa gab-i nangin masaligan nga mga tuytoy gikan sa Dios. Nangin masaligan sila subong sang adlaw nga gintuga sang Dios agod maghatag sing kapawa sa aton kon adlaw. Gani, makasalig man kita nga si Jehova padayon nga magaiwag sang espirituwal nga dalanon para sa mga nagapangita sing kamatuoran sa sining malaut nga katapusan nga mga adlaw. Ang Hulubaton 4:18 nagapasalig sa aton: “Ang banas sang matarong subong sang nagapamanagbanag nga kapawa nga nagasilak sing labi kag labi tubtob sa himpit nga adlaw.”

Pagpabanaag sang Kapawa sang Ginharian

14. Ano ang mahimo gid nga pangunang katuyuan sang mga manugdala sing kapawa?

¹⁴ Samtang si Jehova amo ang Tuburan sang kapawa, kag si Cristo amo ang Puno nga Manugpabanaag sina nga kapawa, dapat man ina ipabanaag sang mga sumulunod ni Jesus. Sia nagsiling tuhoy sa ila: “Kamo ang kapawa sang kalibutan. . . . Paiwaga ninyo ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa mga langit.” (Mateo 5:​14, 16) Kag ano ang sadsaran nga tema sining kapawa nga paiwagon sang iya mga sumulunod sa atubangan sang katawhan? Ano ang ila itudlo sa sining talipuspusan sang maragtas sang kalibutan? Wala magsiling si Jesus nga ang iya mga sumulunod magabantala sing demokrasya, diktadura, paghiusa sang Iglesia kag sang Estado, ukon sang bisan anong iban pa nga kalibutanon nga ideolohiya. Sa baylo, sa Mateo 24:​14 nagtagna sia nga walay sapayan sang bug-os kalibutan nga pagpamatok, “ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran, kag ugaling magaabot ang katapusan.” Sa amo, ang mga manugdala sing kapawa karon nagabantala sa iban nahanungod sa Ginharian sang Dios, nga magalaglag sang kalibutan ni Satanas kag magadala sing matarong nga bag-ong kalibutan.​—⁠1 Pedro 2:⁠9.

15. Sa diin magaliso ang mga maluyag sa kapawa?

¹⁵ Ang mga nagahigugma sa kapawa indi mabuyok sang mga pangangkon kag mga tulumuron sining kalibutan. Ina tanan nga mga pangangkon kag mga tulumuron madula lamang sa indi madugay, kay malapit na malaglag ining kalibutan. Sa baylo, ang mga nagahigugma sang pagkamatarong magapamati sa maayong balita nga ginabantala sang mga nagapasilak sang kapawa sang Ginharian sang Dios tubtob sa mga ukbong sang duta. Amo ini sila ang gintagna sa Bugna 7:​9, 10, nga nagasiling: “Nagtulok ako, kag, yari karon! isa ka dakung kadam-an, nga walay tawo nga makaisip, gikan sa tanan nga pungsod kag tribo kag katawhan kag hambal, nga nagatindog sa atubangan sang trono [sang Dios] kag sang Kordero [Cristo] . . . Kag nagasinggit sila sa mabaskog nga tingog, nga nagasiling: ‘Ang kaluwasan utang naton sa aton Dios nga nagalingkod sa trono, kag sa Kordero.’ ” Ang bersikulo 14 nagasiling: “Ini amo sila ang nagguwa sa dakung kapipit-an.” Huo, maluwas sila sa kalaglagan sining kalibutan pasulod sa walay katapusan nga bag-ong kalibutan sa idalom sang Ginharian sang Dios.

Ang Nasanagan nga Bag-ong Kalibutan

16. Ano ang matabo sa kalibutan ni Satanas sa dakung kapipit-an?

¹⁶ Ang bag-ong kalibutan pagalikupan sang masanag nga kapawa sang kamatuoran. Sa pagkamatuod, binagbinaga kon ano ang mangin kahimtangan sa isa ka adlaw sa tapos laglagon sang Dios ining sistema sang mga butang. Wala na si Satanas, ang iya mga demonyo, kag ang iya politikanhon, komersial, kag relihioso nga mga sistema​—⁠wala na sila tanan! Wala naman ang bug-os nga sistema ni Satanas sa pagpropaganda. Sa amo, sa tapos sang dakung kapipit-an, wala na sing imprintahon nga pamantalaan, magasin, libro, libreto, ukon polyeto nga nagasakdag sining malaut nga kalibutan. Wala na sing malaut nga impluwensia nga iwaragwag sa mga estasyon sang telebisyon ukon radyo. Ang bug-os makahililo nga palibot sang kalibutan ni Satanas pagalaglagon sa isa ka mabaskog nga bunal!​—⁠Mateo 24:21; Bugna 7:14; 16:​14-16; 19:​11-21.

17, 18. Paano mo ilaragway ang espirituwalidad sa tapos malaglag ang kalibutan ni Satanas?

¹⁷ Daw ano ina ka daku nga paumpaw! Kutob sa amo nga adlaw, ang magaimpluwensia lamang sa katawhan amo ang mapuslanon, makapauswag nga espirituwal nga kapawa gikan kay Jehova kag sa iya Ginharian. Ang Isaias 54:13 nagatagna: “Ang tanan mo nga anak mangin tinudluan ni Jehova, kag mangin daku ang paghidait sang imo mga anak.” Bangod nagagahom ang Dios sa bug-os nga duta, ang iya saad amo nga, suno sa ginasiling sang Isaias 26:​9, “ang pagkamatarong amo ang pat-od nga matun-an sang mga pumuluyo sang mapatubason nga duta.”

¹⁸ Sa madali, ang bug-os nga panghunahuna kag espirituwalidad magaayo. Makapalig-on nga mga butang ang magaluntad sa baylo sang makapulung-aw, imoral nga mga butang nga lapnag sa karon. Ang tanan nga magakabuhi sa amo nga tion pagatudluan sing kamatuoran nahanungod sa Dios kag sa iya mga katuyuan. Sa pinakabug-os nga kahulugan, ang tagna sang Isaias 11:9 matuman, nga nagasiling: “Ang duta matugob gid sang pagkilala kay Jehova subong nga ang mga tubig nagatabon sang dagat.”

Hilingagawon nga Sundon ang Kapawa

19, 20. Ngaa dapat magbantay ang mga maluyag magsunod sa kapawa?

¹⁹ Karon, sa hingapusan nga mga tuig sining malaut nga sistema, hilingagawon nga sundon ang kapawa sang kalibutan. Kag dapat kita magbantay, kay may mabaskog nga pagpakig-away nga ginahimo agod punggan kita sa paglakat sa kapawa. Ining pagpamatok nagagikan sa kagamhanan sang kadudulman​—⁠gikan kay Satanas, sa iya mga demonyo, kag sa iya dutan-on nga organisasyon. Amo kon ngaa si apostol Pedro nagapaandam: “Magmaligdong kamo, magbantay. Ang inyo kaaway nga Yawa nagaluyong subong sang nagangurob nga leon, nga nagapangita sang iya tulukbon.”​—⁠1 Pedro 5:⁠8.

²⁰ Magabutang si Satanas sing lambay sa banas sang mga nagapalapit sa kapawa, bangod luyag niya nga magpabilin sila sa kadudulman. Ayhan ini pag-ipit gikan sa mga paryente ukon mga abyan anay nga nagapamatok sa kamatuoran. Ayhan ini mga pangduhaduha nahanungod sa Biblia bangod ang isa ginabulag sang mga panudlo sang butig nga relihion ukon sang propaganda sang dimatinuuhon nga mga ateista kag mga agnostiko. Ayhan ini amo ang makasasala nga mga huyog sang isa nga nagapabudlay sa iya sa pagsunod sa balaan nga mga kinahanglanon.

21. Ano ang dapat himuon sang tanan nga maluyag magpuyo sa bag-ong kalibutan sang Dios?

²¹ Walay sapayan kon ano man ang mga sablag, luyag bala ninyo makaagom sing kabuhi sa isa ka bag-ong kalibutan nga wala sing kaimulon, krimen, inhustisya, kag inaway? Luyag bala ninyo makaagom sing himpit nga panglawas kag dayon nga kabuhi sa isa ka paraiso nga duta? Kon amo, batuna kag sunda si Jesus subong ang kapawa sang kalibutan kag pamatii ang mensahe sang mga nagapanguyapot sing hugot sa “pulong sang kabuhi” kag ‘nagasiga subong nga mga sulo sa kalibutan.’​—⁠Filipos 2:​15, 16.

Paano Mo Sabton?

◻ Paano ginapakita sang relihiosong mga lider nga sila mahigugmaon sa kadudulman?

◻ Ano ang panimuot ni Jesus sa katawhan?

◻ Paano nagpadayon ang pagtipon sa mga manugdala sing kapawa?

◻ Anong importante nga mga pagbag-o ang mahanabo sa indi madugay?

◻ Ngaa hilingagawon nga sundon ang kapawa sang kalibutan karon?

[Piktyur sa pahina 14, 15]

Ginsubol sang matig-a sing tagipusuon nga mga Fariseo ang tawo nga ang iya mga mata ginpamuklat ni Jesus