Isa ka Kalibutan nga Wala sing mga Kawatan

NATABO ini sing madasig. Gintayaan si Antônio⁠a sing pusil sa ulo sang isa ka desente nga lalaki sa atubangan sang iya balay sa São Paulo, Brazil, ginpangayo ang mga yabi kag ang papeles sang iya salakyan, kag maabtik nga nagpadalagan palayo.

Sa Rio de Janeiro, nadaug sang apat ka armado nga kalalakin-an si Paulo, sa atubangan sang iya dies-anyos nga anak nga babayi. Nian, pagkatapos nga nagmaneho pakadto sa iya balay, ang mga kawatan nagsulod kag pinangawat ang luyag nila, nga nagbuta sang duha ka salakyan ni Paulo. Namahog nga patyon ang asawa ni Paulo, gindala nila sia kag ang isa ka empleyado subong mga bihag pakadto sa balaligyaan sang alahas ni Paulo sa down­town, diin pinanguha nila ang tanan nga malahalon. Apang, sa wala ginapaabot, ang mga kawatan nagtelepono sang ulihi, nagsugid kon diin nila ginbilin ang mga salakyan.

Makapaluya gid nga makawatan sang pinangabudlayan sing lakas nga kuwarta kag pagkabutang! Bisan pa wala nagbalos si Antônio ukon si Paulo, ang iban nagahimo sini. Mahimo nila pabayaron sing daku ang kawatan paagi sa pagpatay ukon pagkumpol sa ila, ukon mahimo nga madula nila mismo ang ila kabuhi. Halimbawa, sang gin-agaw sang isa ka pamatan-on ang relo sang isa ka babayi sa Brazil, akig nga ginkuha sang babayi ang pusil sa iya bag kag gintiro ang kawatan, nga ginkamatay niya. Ang resulta? Ang O Estado de S. Paulo nagbalita: “Ang mga tawo nga nakasaksi sa natabo nagdayaw sa panimuot sang wala makilal-i nga babayi, kag wala sing isa ang luyag magbulig sa pulis nga makilala sia.” Bisan pa ginakahidlawan nila ang isa ka kalibutan nga wala sing mga kawatan, ang mga Cristiano wala nagabalos subong sang ginhimo sang babayi. Sanglit ang pagtimalos iya sang Dios, ginapamatian nila ang pinamulong sang Hulubaton 24:​19, 20: “Dili ka magkaakig bangod sang mga manughimo sang malaut. Dili ka magkahisa sa malauton. Kay wala sing palaabuton para sa malaut nga tawo.”

Apang kon salakayon, ano ang himuon mo? Isa ka insidente sa Rio de Janeiro ang nagapakita kon daw ano ka importante ang magpabilin nga kalma. Isa ka Cristianong, si Heloísa, ang nagsakay sa bus pakadto sa dumalahan niya sing pagtuon sa Biblia. Duha ka lalaki ang nagsugod sa pagpangawat sa mga pasahero. Paglab-ot sa pulunduhan sang bus nga palanaugan niya, ginsugiran sila ni Heloísa nga sia isa ka Saksi ni Jehova kag magadumala sia sing pagtuon sa Biblia. Ginpakita niya ang iya Biblia kag ang bulig sa pagtuon. Gintugutan sia sang mga kawatan nga manaug, nga wala makawati. Apang, ang isa pa ka pasahero wala gintugutan nga manaug. Nagsiling sang ulihi ang tsuper nga wala pa sia sing nakita nga kaangay sini.

Si Regina nagpabilin man nga kalma sang ginmanduan sia sang duha ka armado nga lalaki nga magsakay sa iya salakyan. Pinakita ang iya personal nga kopya sang magasin nga Magmata!, si Regina nagsugod sa pagpanaksi. Sanglit ang mga kawatan ginakulbaan, ginsilingan niya sila nga buksan ang ­glove com­part­ment diin may natago sia nga dulse. Apang sang nakita ang mga cas­sette tape sang Kingdom Melodies, ginpamatian nila yadto nga musika. Bangod ang atmospera nangin mas mainabyanon, ang mga kawatan namat-od nga ibilin sa haywey si Regina nga wala maano, nagpasalig sa iya nga makakita sia sing isa ka mabuot nga tawo nga magabulig sa iya. Pagkatapos sang napulo ka minuto nga paglakat, nakakita sia sing balay, apang ang tagbalay indi makapati sang iya ginsugid, nga nagasiling: “Daw wala ka gin-atake; tuman sa imo ka kalma.”

Bisan pa ang biktima wala mahaliti sa pisikal, inang makakululba nga eksperiensia mahimo nga may serioso nga epekto. ‘Ang biktima mahimo nga mangin dimalig-on, mainulugton sa mga katapo sang pamilya ukon sa mga nagatinguha nga buligan sia, indi makasalig sa iban, mahunahunaon sa paghibalo sang mga detalye, nagabatyag nga ang kalibutan dimakatarunganon,’ report sang O Estado de S. Paulo. Sa kabaliskaran, ang biktima nga nagasalig kay Jehova nga Dios mahimo nga makalampuwas sa eksperiensia nga wala mahaliti sa pisikal kag sa emosyon. Walay sapayan, indi ka bala magaugyon nga mangin pagpakamaayo kon wala na sing krimen ukon bisan ano nga butang nga bangdan sang kahadlok?

“Ang Nagpangawat Dili Na Magpangawat”

Bisan pa madamo ang nagapasulabi sang ila makagod nga estilo sang pagkabuhi, ang Pulong sang Dios nagbulig sa mga kawatan nga bayluhan ang ila mga handum kag ang ila personalidad. (Efeso 4:23) Bangod sang matuod, pasad-sa-Biblia nga katuyuan sa kabuhi, ginpamatian nila ang mga pulong: “Maayo pa ang diutay nga naupdan sing pagkamatarong sangsa daku nga mga kinitaan nga naupdan sang dikatarungan.” (Hulubaton 16:⁠8) Si Cláudio nagasaysay: “Halos tanan sa akon pamilya mga Saksi, apang wala gid ako namati sa ginsiling nila nahanungod kay Jehova kag sa iya mga katuyuan. Sa akon pagpauli gikan sa halos 2,000 kilometros nga paglakbay sakay sang kinawat nga pick­up, dapat ako mag-agi sa madamong check­point sang pulis. Sa sining higayon narealisar ko nga dapat ko bag-uhon ang akon kabuhi. Gintilawan ko na ini nga himuon sang una apang sa walay kadalag-an. Sini nga tion nahunahuna ko ang akon mga paryente nga mga Saksi ni Jehova kag kon daw ano gid sila ka tuhay, may kasadya, kalipay, kag paghidait.” Subong resulta, si Cláudio nagtuon sang Pulong sang Dios, nagbiya sa droga kag sa iya anay mga abyan, kag nangin Cristianong ministro.

Ginapamatian man karon sang iban ang mga pinamulong: “Dili magsalig sa pagpigos, dili magpakakubos sa pangawat.” (Salmo 62:⁠10) Pagkatapos sang pagkabilanggo bangod sang tuyo nga pagpatay sa tion sang pagpangawat, si José, isa ka nagiyan kag manugbaligya sang droga, nabuligan sang pagtuon sa Biblia kaupod sang iya bayaw nga lalaki. Gin-untatan niya ang paggamit kag pagbaligya sing droga kag karon sia isa na ka mapisan nga Saksi.

Walay sapayan, ang bag-ong personalidad indi matigayon sing hinali ukon sing milagruso. Si Oscar, nga nadalahig katama sa droga kag sa pagpangawat, nagasaysay: “Nangamuyo gid ako sing hanuot kay Jehova nga ang salog masami nga daw nangin diutay nga linaw bangod sang akon madamo nga luha.” Huo, luwas sa makugi nga pagtuon sang Pulong sang Dios, ang dalayon kag tinagipusuon nga pangamuyo ginakinahanglan. Talupangda ang kaalam sining mapangamuyuon nga pagtamod: “Dili ako paghatagi sing kaimulon ukon kamanggaran. Pakan-a ako sang kalan-on nga kinahanglanon ko, basi nga mabusog ako kag magpanghiwala sa imo kag magsiling: ‘Sin-o bala si Jehova?’ ukon basi mag-imol ako kag magpangawat kag pasipalahan ang ngalan sang akon Dios.”​—⁠Hulubaton 30:​8, 9.

Dapat buslan sang matuod nga gugma ang interes sa kaugalingon: “Ang nagpangawat dili na magpangawat, kundi hinunuo magpangabudlay sia, nga nagabuhat sa iya mga kamot sang butang nga maayo, agod nga may ikahatag sia sa mga nawad-an.” (Efeso 4:28) Subong sa kaso sang pila ka unang-siglo nga mga Cristiano nga anay ‘mga kawatan ukon makagod nga mga tawo,’ si Jehova, paagi sa gawad ni Jesucristo, maluluy-on nga nagapatawad sa mga nagahinulsol. (1 Corinto 6:​9-11) Daw ano ka makalulugpay nga bisan ano man ang aton nagligad, sarang naton mabayluhan ang aton estilo sang kabuhi kag matigayon ang kahamuot sang Dios!​—⁠Juan 3:⁠16.

Kalig-unan sa Bag-ong Kalibutan sang Dios

Handurawa ang isa ka duta nga wala sing mga kawatan. Indi mo na kinahanglan ang mahal nga sistema sang pagpatuman sa kasuguan sang mga huwes, mga abogado, mga pulis, kag mga bilangguan! Mangin isa ini ka mabuganaon nga kalibutan diin ang kada isa magatahod sa iban kag sa ila pagkabutang! Daw indi bala ina mapatihan? Magapasilabot gid bala ang Dios sa mga hilikuton sang tawo kag magadula sang pagkamalinapason? Ginaagda ka namon nga usisaon ang pamatuod nga ang Biblia amo ang Pulong sang Dios kag nga ang mga tagna sini masaligan. Makasapo ka sing malig-on nga sadsaran para sa pagsalig nga ang pagbalhin yara sa unahan. Wala sing isa ang makapugong sa Dios sa pagdala sing paumpaw nga ginsaad sa tanan nga nagahigugma sang pagkamatarong: “Dili ka magkaakig bangod sang mga manughikot sing malaut. Dili magkahisa sa mga nagahimo sing pagkadimatarong. Kay kaangay sang hilamon galabon sila sing madali, kag malaya subong sang gamhon nga hilaw.” (Salmo 37:​1, 2) Yadto nga mga pulong nga ginsulat sang nagligad bug-os nga matuman sa dili madugay.

Tapuson sang Ginharian sang Dios ang kaimulon kag pagkadimatarong, nga ginabangdan sang daku nga pagkawalay paglaum kag pagkawalay kapat-uran. Wala sing isa ang mangin imol, nagabatyag nga ginaipit nga mangawat. Ginapasalig kita sang tagna: “May bugana nga uyas sa duta; sa putukputukan sang kabukiran magahapayhapay ini. Ang iya bunga mangin kaangay sang [dumaan nga] Libano, kag ang mga siudad magalambo kaangay sang hilamon sang duta.” (Salmo 72:16) Sa pagkamatuod, sa ginpasag-uli nga Paraiso, wala sing butang nga makatublag sa kalinong sang mga tawo nga nakakilala kag nagasimba sa matuod nga Dios.​—⁠Isaias 32:⁠18.

Daw ano ina nga padya bangod sang nagpamatok sa mga dalanon sining makagod nga kalibutan! Ang Hulubaton 11:19 nagasiling: “Ang malig-on sa pagkamatarong mabuhi, apang ang nagasunod sang malaut mapatay.” Huo, pagkatapos mautod ang mga malauton, wala sing isa ang may rason nga magkahadlok tungod sa iya kabuhi ukon sa iya pagkabutang. Ang Salmo 37:11 nagahatag sa aton sini nga saad: “Ang malum-ok magapanubli sang duta, kag magakalipay sila sa kabuganaan sang paghidait.”

[Footnote]

[Kahon sa pahina 5]

Pagpangaman Batok sa mga Kawatan

SA PULUY-AN​—⁠Sanglit ang mga kawatan mahimo magsulod yara ka man ukon wala sa imo puluy-an, siraduhi kag kandaduhi pirme ang mga ganhaan. Ginarekomendar sang mga eksperto ang mga alarma ukon mga ido nga nagabantay. Pahibalua ang isa ka masaligan nga kaingod kon magbakasyon ka. Magpabilin nga kalma​—⁠ang mga kawatan nagapanghikot sing madasig, wala ginapaabot, kag hinali nga nagabag-o sang mga plano kon nerbioson sila. Kon ikaw isa ka Saksi ni Jehova, magpakilala ka kag panikasugi nga makapanaksi. Ayhan matigayon mo ang pagpakig-abyan ukon kahanuklog. Indi magbato mientras wala ginasalakay sa pisikal.

SA PUBLIKO​—⁠Mangin alisto sa pagmutik kon may nagasunod sa imo. Maglakat sa tunga sang sidewalk. Likawi ang madulom kag wala sing tawo nga mga dalan. Tagua ang imo kahita ukon mga pagkabutang. Maglakat sing madasig subong nga daw may kaladtuan ka. Likawi ang pagsuksok sing malahalon nga panapton ukon magarbo nga alahas. Kon ginapangayo sang kahimtangan, magpaupod ka kon mamalaklon. Magdala lamang sing kuwarta nga kinahanglan mo, ipamutang sa lainlain nga bulsa ukon lugar.

SA SALAKYAN​—⁠Kon ang “pagkawat sing salakyan” kinaandan na sa inyo lugar, indi magtener sa imo nagapundo nga salakyan. Bulubag-uha ang imo ruta pakadto-pakari sa trabaho. Mag-agi sa mas may kasiguruhan nga dalan, bisan pa daw malayo ini. Antes magdulog, manghulonghulong anay sa palibot kon may butang nga daw suspetsuso. Likawi ang pagbukas sang likod sang salakyan sa lugar nga diutay sing tawo. Indi magbilin sing malahalon nga mga butang nga kitaon sa salakyan. Ang kitaon nga nakandaduhan nga kadena ukon iban pa nga pagkabutang batok sa kawatan mahimo magpaluya sa kaswal nga mga kawatan.

[Kahon sa pahina 6]

“Dili kamo magtipon sa inyo kaugalingon sing mga bahandi sa duta, diin ang sipit kag ang tuktok nagapapas, kag diin ang mga kawatan nagaguhab kag nagapangawat. Sa baylo, magtipon kamo sa inyo kaugalingon sing mga bahandi sa langit, diin walay sipit kag tuktok nga nagapapas kag diin ang mga kawatan indi magguhab kag magpangawat.”​—⁠Mateo 6:​19, 20.