“Pangitaa Ninyo si Jehova, Kamo Tanan nga Mahagop sang Duta”
“PANGITAA ninyo si Jehova, kamo tanan nga mahagop sang duta, nga nagbantay sang Iya hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”—Sofonias 2:3.
Ginpatuhoy ni manalagna Sofonias yadtong mga tinaga sa mga “mahagop sang duta,” kag ginlaygayan niya sila nga ‘pangitaon ang pagkahagop’ agod maamligan sa “adlaw sang kaakig ni Jehova.” Wala sing duhaduha nga ang pagkahagop kinahanglanon para sa kaluwasan. Apang ngaa?
Ngaa Pangitaon ang Pagkahagop?
Ang pagkahagop amo ang kinaiya sang pagkalum-ok sing pamatasan, hilway gikan sa pagkamatinaastaason ukon pagkabugalon. Naangot ini sing suod sa iban pa nga mga kinaiya, subong sang pagkamapainubuson kag pagkalum-ok. Bangod sina, ang mga mahagop madali tudluan kag handa sa pagbaton sing disiplina gikan sa Dios, bisan pa nga daw masakit ini sa makadali.—Salmo 25:9; Hebreo 12:4-11.
Ang pagkahagop mismo mahimo nga wala sing kahilabtanan sa edukasyon ukon tindog sa kabuhi sang isa. Apang, yadtong mataas sing tinun-an ukon madinalag-on sa kalibutanon nga paagi mahimo magabatyag nga sangkol sila sa paghimo sing mga desisyon para sa ila kaugalingon sa tanan nga butang, bisan sa mga butang tuhoy sa pagsimba. Mahimo ini magapugong sa ila gikan sa pagtugot sa iban nga magtudlo sa ila sing pila ka butang ukon gikan sa pagbaton sing laygay kag paghimo sing kinahanglanon nga mga pagbalhin sa ila kabuhi. Ang iban nga mga manggaranon sa materyal mahimo mahulog sa sayop nga panghunahuna nga ang ila kalig-unan nasandig sa ila materyal nga mga pagkabutang. Gani, nagabatyag sila nga indi nila kinahanglan ang espirituwal nga mga manggad gikan sa Pulong sang Dios, ang Biblia.—Mateo 4:4; 5:3; 1 Timoteo 6:17.
Binagbinaga ang mga escriba, mga Fariseo, kag ang puno nga mga saserdote sang panahon ni Jesus. Isa ka bes sang ang mga tulugyan nga ginpadala sa pagdakop kay Jesus nagbalik nga indi sia dala, ang mga Fariseo nagsiling: “Ginpatalang man bala kamo? May yara bala sang mga manugdumala ukon sang mga Fariseo nga nagtuo sa iya? Apang ining kadam-an nga wala makahibalo sang Kasuguan, pinakamalaut.” (Juan 7:45-49) Sa aton pa, para sa ila, mga ignorante kag mga walay tinun-an lamang ang magatuo kay Jesus.
Walay sapayan, ang iban nga mga Fariseo naganyat sa kamatuoran, kag ginpangapinan pa gani nila si Jesus kag ang mga Cristiano. Ang pila sa ila amo si Nicodemo kag si Gamaliel. (Juan 7:50-52; Binuhatan 5:34-40) Pagkatapos napatay si Jesus, “isa ka daku nga kadam-an sang saserdote ang nagmatinumanon sa pagtuo.” (Binuhatan 6:7) Sa walay duhaduha ang labing talalupangdon nga halimbawa amo si apostol Pablo. Gintudluan sia sa tiilan ni Gamaliel kag nangin sampaton kag talahuron nga sumalakdag sang Judaismo. Apang, sang ulihi mapainubuson sia nga naghulag sa panawagan ni Cristo Jesus kag nangin makugi nga sumulunod niya.—Binuhatan 22:3; 26:4, 5; Galacia 1:14-24; 1 Timoteo 1:12-16.
Ini tanan nagalaragway nga ano man ang tinun-an ukon ano man ang balatyagon karon sang isa nahanungod sa mensahe gikan sa Biblia, ang pinamulong ni Sofonias naaplikar gihapon. Kon luyag sang isa mangin kalahamut-an sa Dios kag matuytuyan sang iya Pulong, ang pagkahagop kinahanglanon gid.
Yadtong ‘Nagapangita sing Pagkahagop’ Karon
Minilyon ka tawo sa bug-os nga kalibutan ang nagapamati sa maayong balita sang Ginharian. Ang mga Saksi ni Jehova nagadumala sing kapin sa apat ka milyon ka pagtuon sa Biblia kada semana sa ila mga puluy-an. Naghalin sila sa madamo kag nanuhaytuhay nga ginhalinan kag lainlain nga mga kahimtangan sa pangabuhi kag katilingban. Apang, ang isa ka butang nga sila palareho amo nga tuman ka mapainubuson sa ila agod batunon ang mensahe sang Biblia nga ginsugid sang isa sa ila sa ila ganhaan ukon sa iban nga lugar. Madamo sa ila ang nagahimo sing maayong pag-uswag bangod handa sila manikasog agod malandas ang mga sablag sa ila dalanon. Huo, yara sila sa tunga sang mga “mahagop sang duta” karon.
Binagbinaga, halimbawa, si Maria sa Mexico. Nagtuon sia sing abogasya sa unibersidad kag malig-on sa pinansial bangod sang iya napanubli. Bangod sini, nangin liberal gid sia sing panghunahuna nga naghimo sa iya, subong sang ginsiling niya, nga mangin isa ka “rebelyuso, dimapatugsilingon, dominante, kag ateistiko” nga tawo. “Naghunahuna ako nga ang tanan mahimo malubad paagi sa kuwarta kag nga ang Dios indi importante. Sa katunayan, naghunahuna pa gani ako nga wala sia nagaluntad,” panaysayon ni Maria. “Para sa akon ang relihion kabuangan kag isa lamang ka sosyal nga kinahanglanon,” dugang niya.
Sang ulihi, natalupangdan ni Maria ang mga pagbag-o sa iya pakaisa sa tapos sia nangin isa sang mga Saksi ni Jehova. “Magarot gid sia anay, apang karon tuman sa iya ka mahidaiton kag matadlong,” paathag ni Maria. “Ang mga kaparyentehan nagsiling nga manugbantala sia kag nagabasa sing Biblia, kag bangod sina wala na sia nagainom ukon nagapanginbabayi. Gani luyag ko nga magkari sia kag basahan ako sing Biblia bangod naghunahuna ako nga sa sining paagi masapwan ko ang paghidait kag kalinong nga naluyagan ko gid.” Ang resulta amo nga nagbaton si Maria sing isa ka pagtuon sa Biblia upod sa Saksi nga mag-asawa.
Madamo sia sing dapat landason, kag nabudlayan gid sa pagbaton sa prinsipio sang Biblia tuhoy sa pagkaulo agod magpasakop sa iya bana. Apang naghimo sia sing daku nga mga pagbalhin sa iya kabuhi kag panimuot. Sia nagtu-ad: “Nahunahuna ko nga sugod sang magkari sa akon puluy-an ang mga kauturan kag gindala nila ang bulig ni Jehova, may kalipay, kalinong, kag pagpakamaayo sang Dios na sa akon puluy-an.” Karon, si Maria isa na ka dedikado kag bawtismado nga Saksi ni Jehova.
Sa pagpangita sa matuod nga pagsimba, may isa pa ka bahin nga ang pagkahagop, ukon ang kakulang sini, may importante nga papel. Sa masami, ang asawa sa isa ka pamilya nagabaton sing kamatuoran kag maluyag sa pag-alagad sa Dios, apang ang bana nagapang-alag-ag. Ayhan mabudlay para sa pila ka bana nga batunon ang ideya nga may isa pa—si Jehova nga Dios—nga dapat karon pasakupan sang iya asawa. (1 Corinto 11:3) Ang isa ka babayi sa Chihuahua, Mexico, nangabay sing pagtuon sa Biblia, kag sang ulihi sia kag ang iya pito ka anak nagsulod sa kamatuoran. Sang primero ang iya bana namatok. Ngaa? Bangod indi niya luyag nga ang iya pamilya magabantala sa pamalaybalay, nga nagatanyag sing literatura sa Biblia. Ayhan ginkabig niya ang iya kaugalingon nga tuman ka importante agod magbantala. Apang, ang iya pamilya nagtindog nga malig-on sa ila desisyon nga alagaron ang Dios. Sang ulihi nakita sang bana ang kabilihanan sang pagbaton sa kahimusan sang Dios. Apang 15 ka tuig ang naglipas antes sia nagdedikar sang iya kaugalingon kay Jehova.
Sa bug-os nga Mexico, may yara gihapon madamong nabaw-ing nga mga komunidad diin ang lokal nga mga pumuluyo may ila tumandok nga Indian nga mga hambal kag mga kinabatasan. Ang mensahe sang Biblia nakalab-ot sa sini nga mga tawo kag nakabulig sa ila nga mapauswag ang nibel sang ila kultura, kay ang iban nakatuon sa pagbasa kag sa pagsulat samtang nagatuon sang kamatuoran. Walay sapayan, ang katunayan nga ang mga tawo diutay sing tinun-an ukon materyal nga manggad wala gid nagakahulugan nga mas mabinatunon sila. Ang bugal sa rasa kag mabakod nga pagpanguyapot sa mga tradisyon sang katigulangan nagapabudlay kon kaisa para sa iban nga batunon ang kamatuoran. Amo ini ang rason kon ngaa sa pila ka Indian nga mga minuro, yadtong nagabaton sang kamatuoran masunson nga ginasamok sang iban nga mga taga-minuro. Gani ang pagkahagop madamo sing dagway.
Maghulag nga May Pagkahagop
Kamusta ka sing personal? Nagahulag ka bala sa kamatuoran sang Pulong sang Dios? Ukon nabudlayan ka bala sa pagbaton sa pila ka kamatuoran sa Biblia? Ayhan luyag mo usisaon ang imo kaugalingon agod tan-awon kon ano ang nagaupang sa imo. Natublag ka bala bangod ang kalabanan nga mga tawo nga naganyat sa kamatuoran mga imol? Mahimo bala ayhan nga ang personal nga bugal nadalahig sa imo panghunahuna? Maayo nga hunahunaon ang pinamulong ni apostol Pablo: “Ginpili sang Dios ang buangbuang sang kalibutan sa pagpakahuya sang maalam; kag ginpili sang Dios ang maluya sa kalibutan sa pagpakahuya sang makusog; kag ginpili sang Dios ang kubos kag talamayon sang kalibutan, bisan ang mga butang nga indi amo, sa pagpakawalay pulos sang mga butang nga amo, agod nga walay tawo nga magpabugal sa atubangan sang Dios.”—1 Corinto 1:27-29.
Isikway mo bala ang bahandi bangod lamang nakita mo ini sa isa ka kubos nga suludlan nga duta? Siempre indi! Apang, amo ina ang paagi nga ginapili sang Dios sa paghatag sang iya nagaluwas-kabuhi nga Pulong sang kamatuoran sa aton, subong sang ginapaathag ni apostol Pablo: “May amon sining bahandi sa mga suludlan nga duta, agod nga ang tama nga pagkadaku sang gahom mangin iya sang Dios kag indi sa amon kaugalingon.” (2 Corinto 4:7) Ang pagkahagop kag pagkamapainubuson magabulig sa aton nga makita ang matuod nga balor sang bahandi kag indi lamang ang “mga suludlan nga duta,” ukon ang tawhanon nga mga ahensia, nga nagapaalinton sini sa aton. Sa amo, ginadugangan man naton ang posibilidad nga “malipdan [kita] sa adlaw sang kaakig ni Jehova” kag mangin sa tunga sang mga mahagop nga “magapanubli sang duta.”—Sofonias 2:3; Mateo 5:5.