Magpabilin sa Kahamuot sang Dios Walay Sapayan sang mga Pagbag-o

NAGAATUBANG ka bala sang mga pagbag-o sa imo kabuhi? Nabudlayan ka bala sa pagbaton sini? Halos tanan kita nakaeksperiensia na sing mga pagbag-o ukon mahimo makaatubang pa sa sini. May mga eksperiensia sa Biblia nga makabulig sa aton nga mahibaluan kon ano nga mga kinaiya ang dapat naton palambuon agod malandas ining mga pagbag-o.

Halimbawa, binagbinaga ang mga pagbag-o nga natabo sa kabuhi ni David. Isa lamang sia ka manugbantay sang karnero sang ginhaplas sia ni Samuel nga mangin hari. Bisan bata pa sia, nagboluntaryo sia nga makig-away sa Filistinhon nga higante nga si Goliat. (1 Sam. 17:26-32, 42) Pamatan-on pa si David sang gin-agda sia nga magpuyo sa palasyo ni Hari Saul, kag gintangdo subong pangulo sang hangaway. Mahimo nga wala gid nagpensar si David nga magaatubang sia sining mga pagbag-o sa iya kabuhi; ukon nagpaabot man sang masunod nga matabo sa iya.

Sang ulihi nagbag-o ang pagtamod ni Saul kay David kag luyag niya sia patyon. (1 Sam. 18:8, 9; 19:9, 10) Bangod sini, nagpanago si David sa sulod sang madamo nga tinuig. Bisan pa sang nagahari na si David sa Israel, nakaeksperiensia gihapon sia sing dalagku nga mga pagbag-o, ilabi na sang nagpanghilahi sia kag nagpatay agod matabunan ang iya sala. Subong resulta, nangin magamo ang iya pamilya. Nagrebelde ang iya anak nga si Absalom. (2 Sam. 12:10-12; 15:1-14) Apang sang ulihi, naghinulsol si David sa iya sala nga pagpanghilahi kag pagpatay. Sa amo, ginpatawad sia ni Jehova kag natigayon niya liwat ang kahamuot sang Dios.

Mahimo makaeksperiensia ka man sing mga pagbag-o. Ang mga problema sa panglawas, pamilya ukon kapigaduhon, lakip na ang aton mga ginahimo, nagaresulta sa mga pagbag-o sa aton kabuhi. Ano nga mga kinaiya ang makabulig sa aton nga mangin handa sa pag-atubang sa sining mga hangkat?

Ang Pagkamapainubuson Makabulig sa Aton

Ang tawo nga mapainubuson may mapinasakupon nga panimuot. Ginabaton niya ang iya mga kaluyahon kag ginakilala ang ikasarang sang iban. Kon mapainubuson kita, wala naton ginapakadiutay ang mga kinaiya kag hinimuan sang iban. Ginapabaloran naton sila kag ang ila ginahimo. Ang pagkamapainubuson makabulig man sa aton nga mahangpan kag malandas ang mga pagbag-o sa aton kabuhi.

Ang isa ka maayo nga halimbawa sang pagkamapainubuson amo si Jonatan nga anak ni Saul. Nagbag-o ang iya kahimtangan bangod sa mga butang nga indi niya makontrol. Sang ginsilingan ni Samuel si Saul nga kuhaon ni Jehova ang ginharian sa iya, wala sia nagsiling nga si Jonatan ang magabulos kay Saul subong hari. (1 Sam. 15:28; 16:1, 12, 13) Ang pagpili sang Dios kay David nga mangin hari sang Israel nagapahangop nga indi na mangin hari si Jonatan. Buot silingon, ang pagkadimatinumanon ni Saul may negatibo nga epekto kay Jonatan. Bisan pa wala sing sala si Jonatan, indi sia ang magabulos sa iya amay. (1 Sam. 20:30, 31) Ano ang reaksion ni Jonatan? Naakig bala sia ukon nahisa kay David bangod nadula niya ang kahigayunan nga mangin hari? Wala. Bisan pa mas magulang sia kag eksperiensiado, ginsuportahan gid ni Jonatan si David. (1 Sam. 23:16-18) Ang pagkamapainubuson nakabulig kay Jonatan nga mahangpan kon sin-o ang ginpili sang Dios kag wala sia “maghunahuna sing labaw tuhoy sa iya kaugalingon sangsa dapat niya hunahunaon.” (Roma 12:3) Nahangpan ni Jonatan kon ano ang ginapaabot ni Jehova sa iya kag ginbaton niya ang desisyon ni Jehova sa sini.

Sa pagkamatuod, madamo nga mga pagbag-o ang mabudlay atubangon. Halimbawa, nabutang si Jonatan sa tungatunga sang duha ka tawo nga pareho nga suod sa iya. Ang isa amo ang iya abyan nga si David nga gintangdo ni Jehova nga mangin hari. Ang isa pa amo ang iya amay nga si Saul nga ginsikway ni Jehova apang nagagahom gihapon subong hari. Mahimo nga mabudlay gid ini nga kahimtangan para kay Jonatan bangod luyag niya mahuptan ang kahamuot ni Jehova. Mahimo nga makaatubang man kita sing mga kahimtangan nga bangdan sang aton tuman nga pagkabalaka. Apang kon tinguhaan naton nga hangpon ang pagtamod ni Jehova, makapadayon kita sa pag-alagad sa iya samtang ginaatubang ining mga pagbag-o.

Ang Importansia sang Kaugdang

Ang maugdang nga tawo nagakilala sang iya mga limitasyon. May kinatuhayan ang kaugdang sa pagkamapainubuson. Ang mapainubuson nga tawo mahimo nga wala nakahibalo sang iya mga limitasyon.

Si David isa ka maugdang nga tawo. Bisan pa ginpili sia ni Jehova nga mangin hari, madamo pa nga tinuig ang iya ginhulat antes sia nakapungko sa trono. Wala kita sing mabasa sa Biblia nga ginpaathagan ni Jehova si David kon ngaa naatrasar ang iya paghari. Bisan pa ining kahimtangan daw makapaluya, wala ini nagtublag kay David. Nakahibalo sia sang iya mga limitasyon, kag nahangpan niya nga ginpahanugutan ni Jehova ang sitwasyon kag Sia ang may kontrol sa sini. Gani, wala ginpatay ni David si Saul bisan pa luyag sia sini patyon, kag ginpunggan pa niya ang iya kaupod nga si Abisai sa pagpatay kay Saul.—1 Sam. 26:6-9.

Kon kaisa mahimo may mag-utwas nga sitwasyon sa aton kongregasyon nga indi naton mahangpan, ukon para sa aton, wala nahimo sa labing maayo ukon organisado nga paagi. Mangin maugdang bala kita kag kilalahon nga si Jesus amo ang Ulo sang kongregasyon kag nagapanghikot sia paagi sa hubon sang mga gulang nga gintangdo nga manguna? Nahibaluan bala naton nga agod kahamut-an kita ni Jehova, dapat kita magpasakop sa iya pagpanguna paagi kay Jesucristo? Mangin maugdang bala kita sa paghulat bisan pa mabudlay ini?—Hulu. 11:2.

Ang Pagkahagop Nagabulig sa Aton nga Mangin Positibo

Ang mahagop nga tawo may malulo nga panimuot. Nagabulig ini sa iya nga maatubang ang kasamaran nga may pagpailob kag wala nagakaakig, wala nagadumot, ukon nagahandum nga magbalos. Ang pagkahagop isa ka kinaiya nga mabudlay palambuon. Gani, indi kita matingala kon ngaa sa Biblia, ang “mga mahagop sang duta” gin-agda nga ‘pangitaon ang pagkahagop.’ (Sof. 2:3, NW) Ang pagkahagop may yara kaangtanan sa pagkamapainubuson kag kaugdang, apang nagalakip ini sang iban pa nga mga kinaiya, subong sang pagkamaayo kag kalulo. Ang isa ka mahagop nga tawo madali mag-uswag sa espirituwal samtang ginapakita niya nga mahapos sia tudluan kag hanason.

Paano ang pagkahagop makabulig sa aton nga atubangon ang mga pagbag-o sa aton kabuhi? Mahimo natalupangdan mo nga negatibo ang pagtamod sang madamo sa mga pagbag-o. Apang ang matuod, ina nga mga pagbag-o mahimo mangin kahigayunan nga mahanas kita sing dugang ni Jehova. Ginapakita ini sang eksperiensia ni Moises.

Sa edad nga 40 anyos, si Moises may talalupangdon na nga mga kinaiya. Handa sia sa pagbulig sa katawhan sang Dios kag nagpakita sia sing masinakripisyuhon nga espiritu. (Heb. 11:24-26) Apang, antes sia gintangdo ni Jehova nga pangunahan ang Israel pagua sa Egipto, may gin-atubang si Moises nga mga pagbag-o nga nagpauswag sang iya pagkahagop. Kinahanglan sia magpalagyo gikan sa Egipto kag magpuyo sa Midian sa sulod sang 40 ka tuig subong manugbantay sang karnero nga isa ka kubos nga trabaho. Ano ang resulta? Bangod sini nga pagbag-o nangin mas maayo sia nga tawo. (Num. 12:3) Natun-an niya nga unahon sa iya kabuhi ang espirituwal nga mga butang.

Bilang halimbawa sang pagkahagop ni Moises, binagbinagon naton kon ano ang natabo sang nagsiling si Jehova nga luyag niya sikwayon ang di-matinumanon nga pungsod kag himuon ang mga kaliwat ni Moises nga isa ka gamhanan nga pungsod. (Num. 14:11-20) Nagpakitluoy si Moises kay Jehova para sa Israel. Ang iya ginsiling nagapakita nga mas ginakabalak-an niya ang kadungganan sang Dios kag ang kaayuhan sang iya kauturan sangsa iya kaugalingon nga kaayuhan. Ang papel nga gintungdan ni Moises subong lider kag manugpatunga sang pungsod nagakinahanglan gid sang pagkahagop. Sanday Miriam kag Aaron nagkumod batok sa iya, apang ang Biblia nagsiling nga si Moises “amo ang pinakamahagop nga tawo.” (Num. 12:1-3, 9-15, NW) Ginapahangop sini nga ginbatas ni Moises ang ila pagpang-insulto. Ano ayhan ang natabo kon si Moises indi mahagop?

Sang isa pa ka bes, ang espiritu ni Jehova nagpanghikot sa pila ka lalaki, amo nga nakapanagna sila. Ang alagad ni Moises nga si Josue naghunahuna nga indi husto ang ginhimo sining mga Israelinhon. Sa pihak nga bahin, ang pagkahagop ni Moises nagbulig sa iya nga tamdon ang mga butang suno sa pagtamod ni Jehova kag wala sia nabalaka nga basi madula ang iya awtoridad. (Num. 11:26-29) Kon indi mahagop si Moises, batunon niya ayhan ining mga pagbag-o sa kahimusan ni Jehova?

Ang pagkahagop nakabulig kay Moises nga gamiton sing maayo ang daku nga awtoridad kag katungdanan nga ginhatag sang Dios sa iya. Gin-agda sia ni Jehova nga magtaklad sa Bukid Horeb agod magtiglawas para sa katawhan. Ang Dios nagpakigsugilanon kay Moises paagi sa isa ka anghel kag gintangdo sia subong manugpatunga sang katipan. Ang pagkahagop nagbulig kay Moises nga batunon ining daku nga awtoridad kag sa amo man nga tion likawan ang paghimo sang mga butang nga makadula sang kahamuot sang Dios.

Kamusta naman kita? Ang pagkahagop importante gid sa aton pag-uswag subong indibiduwal. Ang tanan nga gintugyanan sing mga pribilehiyo kag awtoridad sa katawhan sang Dios dapat mangin mahagop. Paagi sa sini malikawan naton nga mangin bugalon kon makabaton kita sing mga pribilehiyo kag magabulig man ini sa aton nga atubangon ang mga pagbag-o nga may husto nga panimuot. Ano ang aton reaksion kon makaatubang kita sang mga pagbag-o? Batunon bala naton ini? Tamdon bala naton ini subong isa ka kahigayunan para mag-uswag? Mahimo nga isa ini ka pinasahi nga paagi nga mapalambo naton ang kahagop!

Padayon kita nga makaatubang sing mga pagbag-o sa aton kabuhi. Kon kaisa mabudlay hangpon kon ngaa nagakatabo ini. Mahimo mabudlayan kita nga tamdon ini suno sa pagtamod ni Jehova bangod sang aton mga limitasyon kag emosyonal nga kahimtangan. Apang, ang mga kinaiya subong sang pagkamapainubuson, kaugdang, kag pagkahagop, amo ang magabulig sa aton nga batunon ang mga pagbag-o kag magpabilin sa kahamuot sang Dios.

[Blurb sa pahina 4]

Ang mapainubuson nga tawo nagabaton sang iya kaluyahon

[Blurb sa pahina 5]

Ang pagkahagop importante gid sa aton pag-uswag subong indibiduwal

[Retrato sa pahina 5]

Si Moises nag-atubang sing mga kabudlayan nga nagpauswag sang iya pagkahagop