Ginapamatukan Bala Ninyo ang Espiritu sang Kalibutan?

“Nabaton ta, indi ang espiritu sang kalibutan, kundi ang espiritu nga gikan sa Dios.”​—⁠1 CORINTO 2:⁠12.

1, 2. Ano nga trahedya nga nagdalahig sa makahililo nga gas ang natabo sa Bhopal, sa India, apang anong kapin ka makamamatay nga “gas” ang ginahaklo sa bug-os nga kalibutan?

SANG isa ka mabugnaw nga gab-i sang Disiembre sang 1984, isa ka makapakibot nga butang ang natabo sa Bhopal, India. Sa sadto nga siudad, may isa ka planta sang kemikal, kag sadto nga gab-i sang Disiembre, naguba ang isa ka balbula sa isa sang mga tangke sang gas. Sa hinali, mga tonilada sang methyl isocyanate ang ginbubo sa kahanginan. Ining makamamatay nga gas ginpalid sang hangin kag naglibotlibot sa mga balay kag sa nagakatulog nga mga pamilya. Linibo ang napatay, kag madamo pa ang nasamaran. Amo yadto ang pinakagrabe nga aksidente sa industriya tubtob sadtong tion.

² Ginsubuan ang mga tawo sang mabatian nila ang tuhoy sa Bhopal. Apang bisan pa makamamatay yadto matuod, mas diutay lang ang napatay sang gas nga nagsungaw didto sangsa ginapatay sa espirituwal sang isa ka “gas” nga ginahaklo kada adlaw sang mga tawo sa bug-os nga kalibutan. Ginatawag ini sang Biblia nga “espiritu sang kalibutan.” Amo ini ang makamamatay nga atmospera nga ginpatuhay ni apostol Pablo sa espiritu gikan sa Dios sang magsiling sia: “Karon nabaton ta, indi ang espiritu sang kalibutan, kundi ang espiritu nga gikan sa Dios, agod nga mahibaluan naton ang mga butang nga maluluy-on nga ginhatag sa aton sang Dios.”​—⁠1 Corinto 2:⁠12.

3. Ano ang “espiritu sang kalibutan”?

³ Ano gid ang “espiritu sang kalibutan”? Suno sa The New Thayer’s Greek English Lexicon of the New Testament, ang kabilugan nga kahulugan sang tinaga nga “espiritu” (Griego, pneuʹma) amo “ang disposisyon ukon impluwensia nga nagahil-ob kag nagakontrol sa kalag sang bisan sin-o.” Ang isa ka tawo mahimo makatigayon sing maayo ukon malain nga espiritu, ukon disposisyon. (Salmo 51:10; 2 Timoteo 4:22) Ang isa ka grupo sang mga tawo mahimo man makatigayon sing espiritu, ukon nagapangibabaw nga disposisyon. Si apostol Pablo nagsulat sa iya abyan nga si Filemon: “Ang dibagay nga kaluoy ni Ginuong Jesucristo mangin sa espiritu nga inyo ginapakita.” (Filemon 25) Sing kaanggid​—⁠apang sa mas daku nga kasangkaron​—⁠ang kalibutan sa kabilugan may nagapangibabaw nga disposisyon, kag amo ini “ang espiritu sang kalibutan” nga ginapatuhuyan ni Pablo. Suno sa Word Studies in the New Testament ni Vincent, “ang prase nagakahulugan sing prinsipio sang kalautan nga nagapahulag sa malaut nga kalibutan.” Amo ini ang makasasala nga huyog nga nagalatom sa panghunahuna sining kalibutan kag mabaskog nga nagaimpluwensia sa panghulag sang mga tawo.

4. Sin-o ang ginahalinan sang espiritu sang kalibutan, kag ano ang epekto sining espiritu sa mga tawo?

⁴ Makahililo ining espiritu. Ngaa? Bangod nagahalin ini sa “manuggahom sining kalibutan,” si Satanas. Sa pagkamatuod, ginatawag sia nga “manuggahom sang awtoridad sang hangin, ang espiritu nga nagapanghikot karon sa mga anak sang paglalis.” (Juan 12:31; Efeso 2:⁠2) Mabudlay malikawan ining “hangin,” ukon “espiritu nga nagapanghikot karon sa mga anak sang paglalis.” Yari ini bisan diin sa katilingban sang tawo. Kon hakluon naton ini, ginasugdan naton nga batunon ang mga panimuot sini, ang mga tulumuron sini. Ang espiritu sang kalibutan nagapalig-on sing ‘pagkabuhi suno sa unod,’ kon sayuron, suno sa aton makasasala nga pagkadihimpit. Makamamatay ini, “kay kon nagakabuhi kamo suno sa unod pat-od nga mapatay kamo.”​—⁠Roma 8:⁠13.

Paglikaw sa Espiritu Sining Kalibutan

5. Paano ang isa ka Saksi naghikot sing maalamon sa tion sang aksidente sa Bhopal?

⁵ Sa tion sang aksidente sa Bhopal, ang isa ka Saksi ni Jehova ginpukaw sang mga sirena kag sang maalhong nga baho sang makahililo nga gas. Sa gilayon ginpukaw niya ang iya pamilya kag ginpadalagan sila sa dalan. Sa tapos magdulog sa makadali agod pamatyagan ang direksion sang hangin, nagpanagil-ot sia sa nagakinagula nga kadam-an kag gindala ang iya pamilya sa ibabaw sang isa ka pukatod sa guwa sang siudad. Didto napun-an nila ang ila mga baga sing lab-as, matinlo nga hangin nga nagadapya gikan sa malapit nga linaw.

6. Sa diin kita makakadto agod makalikaw sa espiritu sang kalibutan?

⁶ May yara bala mataas nga duog nga madangpan naton gikan sa makahililo nga “hangin” sining kalibutan? Ang Biblia nagasiling nga may yara. Ginapanan-aw ang aton adlaw, si manalagna Isaias nagsulat: “Mahanabo sa hingapusan nga bahin sang mga adlaw nga ang bukid sang balay ni Jehova tukuron sing malig-on sa putukputukan sang kabukiran, kag pat-od nga pakataason sa ibabaw sang kabakuluran; kag sa sini magadugok ang tanan nga pungsod. Kag madamo nga katawhan ang pat-od nga magakadto kag magasiling: ‘Kari kamo, magataklad kita sa bukid ni Jehova, sa balay sang Dios ni Jacob; kag tudluan niya kita nahanungod sa iya mga dalanon, kag magalakat kita sa iya mga banas.’ Kay gikan sa Sion magaguwa ang kasuguan, kag ang pulong ni Jehova gikan sa Jerusalem.” (Isaias 2:​2, 3) Ang mataas nga duog sang putli nga pagsimba, ang ginpakataas nga “bukid sang balay ni Jehova,” amo lamang ang duog sa sining planeta nga hilway sa makapuluot, makahililo nga espiritu sining kalibutan. Didto nagailig sing bugana ang espiritu ni Jehova sa tunga sang matutom nga mga Cristiano.

7. Paano naluwas ang madamo gikan sa espiritu sang kalibutan?

⁷ Madamo sang nagahaklo anay sing espiritu sining kalibutan ang nakatigayon sing paumpaw nga kaanggid sa naeksperiensiahan sadtong Saksi sa Bhopal. Sa tapos maghambal tuhoy sa “mga anak sang paglalis” nga nagahaklo sing hangin, ukon espiritu, sining kalibutan, si apostol Pablo nagsiling: “Sa tunga nila kita tanan anay naggawi suno sa mga kailigbon sang aton unod, nga nagahimo sing mga butang nga ginahandum sang lawas kag sang panghunahuna, kag kita kinaugali nga mga anak sang kasingkal subong sang iban. Apang ang Dios, nga manggaranon sa kaluoy, bangod sang iya dakung gugma nga ginhigugma niya sa aton, nagbuhi sa aton kaupod kay Cristo.” (Efeso 2:​3-5) Ang mga nagahaklo sing makahililo nga hangin sining sistema sang mga butang patay sa espirituwal nga kahulugan. Apang, bangod kay Jehova, minilyon karon ang nagapalagyo padulong sa espirituwal nga mataas nga duog kag nagalikaw sa sinang makamamatay nga kahimtangan.

Mga Pagpadayag sang “Espiritu sang Kalibutan”

8, 9. (a) Ano ang nagapakita nga dapat kita magbantay pirme batok sa espiritu sang kalibutan? (b) Paano ang espiritu ni Satanas makapalain sa aton?

⁸ Ang makamamatay nga hangin ni Satanas nagadapya gihapon sa palibot naton. Dapat gid kita magbantay kag indi gid magdalus-os, pabalik sa kalibutan, ayhan agod mapuot sa espirituwal. Kinahanglan ang pirme nga pagbantay. (Lucas 21:36; 1 Corinto 16:13) Binagbinaga, halimbawa, ining katunayan. Ang tanan nga Cristiano nakahibalo sang mga talaksan ni Jehova sa moralidad kag indi gid magaugyon nga ang dimatinlo nga mga buhat subong sang panghilahi, pagpakighilawas, kag homoseksuwalidad kalahamut-an. Apang, kada tuig mga 40,000 ka indibiduwal ang ginadisfellowship gikan sa organisasyon ni Jehova. Ngaa? Sa madamo nga kaso ang kabangdanan amo gid ining dimatinlo nga mga buhat. Paano ina matabo?

⁹ Bangod dihimpit kita tanan. Ang unod maluya, kag dapat kita pirme makig-away batok sa sayop nga mga huyog nga nagahalin sa aton tagipusuon. (Manugwali 7:20; Jeremias 17:⁠9) Apang, inang sayop nga mga huyog ginadabukan sang espiritu sang kalibutan. Madamo sa sining kalibutan ang wala nagapakalain sa imoralidad, kag ang ideya nga ang bisan ano puwede isa ka bahin sang panghunahuna sang sistema sang mga butang ni Satanas. Kon ipadayag naton ang aton kaugalingon sa sina nga panghunahuna, ti, daku gid ang posibilidad nga kita man magasugod sa paghunahuna kaangay sang kalibutan. Indi magadugay, inang dimatinlo nga mga panghunahuna mahimo nga magapatubas sing sayop nga mga kailigbon nga magadul-ong sa mabug-at nga sala. (Santiago 1:​14, 15) Magadulhog kita gikan sa bukid sang matuod nga pagsimba ni Jehova padulong sa mahigko nga kapatagan sang kalibutan ni Satanas. Wala sing bisan sin-o nga magapabilin didto sing kinabubut-on ang makapanubli sing kabuhi nga walay katapusan.​—⁠Efeso 5:​3-5, 7.

10. Ano ang isa ka pagpadayag sang hangin ni Satanas, kag ngaa dapat ini likawan sang mga Cristiano?

¹⁰ Ang espiritu sang kalibutan dayag sa palibot naton. Halimbawa, yara ang indi matinahuron kag mauligyaton nga panimuot sang madamo sa kabuhi. Napaslawan sa malaut ukon disangkol nga mga politiko kag sa imoral, makagod nga relihioso nga mga lider, ginauligyat nila bisan ang serioso nga mga butang. Ginapamatukan sang mga Cristiano ini nga huyog. Bisan pa mahimo nga may mapuslanon kita nga ikasarang sa pagpakadlaw, ginalikawan naton nga pasudlon sa kongregasyon ang isa ka mauligyaton nga espiritu sang indi pagtahod. Ang panghambal sang isa ka Cristiano nagapabanaag sing kahadlok kay Jehova kag kaputli sang tagipusuon. (Santiago 3:​10, 11; ipaanggid ang Hulubaton 6:14.) Bata man kita ukon tigulang, ang aton panghambal dapat “pirme may kaayo, nga natimplahan sing asin, agod mahibaluan kon paano [kita] dapat maghatag sing sabat sa tagsatagsa.”​—⁠Colosas 4:⁠6.

11. (a) Ano ang ikaduha nga bahin sang espiritu sang kalibutan? (b) Ngaa tuhay ang mga Cristiano gikan sa mga nagapabanaag sini nga bahin?

¹¹ Ang isa pa ka kinaandan nga huyog nga nagapabanaag sang espiritu sining kalibutan amo ang dumot. Ang kalibutan ginabahinbahin sang dumot kag pag-ilinaway bangod sang magkatuhay nga rasa, kultura, pungsod, kag personalidad pa gani. Daw ano ka mas maayo ang kahimtangan sa duog diin aktibo ang espiritu sang Dios! Si apostol Pablo nagsulat: “Dili magbalos sing malaut para sa malaut kay bisan sin-o. Mag-aman sing maayo nga mga butang sa panulok sang tanan nga tawo. Kon posible, tubtob sa masarangan ninyo, mangin mahidaiton sa tanan nga tawo. Dili pag-itimalos ang inyo kaugalingon, mga hinigugma, kundi hatagi sing duog ang kasingkal; kay nasulat na: ‘Akon ang pagtimalos; ako ang magatumbas, siling ni Jehova.’ Apang, ‘kon ang imo kaaway ginagutom, pakauna sia’ kon ginauhaw sia, paimna sia; kay sa paghimo ninyo sini magatumpok kamo sing nagadabdab nga baga sa iya ulo.’ Dili magpadaug sa malaut, kundi dag-a ang malaut paagi sa maayo.”​—⁠Roma 12:​17-21.

12. Ngaa ginalikawan sang mga Cristiano ang materyalismo?

¹² Ang espiritu sining kalibutan nagapukaw man sing materyalismo. Bangod sang sugyot sang komersial nga kalibutan, madamo ang nagasalimuang sa pinakabag-o nga kasangkapan, pinakabag-o nga uso, pinakabag-o nga modelo sang awto. Ginaulipon sila sang “kailigbon sang mga mata.” (1 Juan 2:16) Ginatakus sang kalabanan ang ila kadalag-an sa kabuhi paagi sa kadakuon sang ila balay ukon sa ila tinago sa banko. Ang mga Cristiano, nga nagahaklo sing matinlo nga esprituwal nga hangin sa mataas nga bukid sang putli nga pagsimba kay Jehova, nagapamatok sa sining huyog. Nahibaluan nila nga ang determinado nga paghingamo sa materyal nga mga butang malaglagon. (1 Timoteo 6:​9, 10) Ginpahanumdom ni Jesus ang iya mga disipulo: “Bisan pa may kabuganaan ang isa ka tawo ang iya kabuhi indi resulta sang mga butang nga ginapanag-iyahan niya.”​—⁠Lucas 12:⁠15.

13. Ano ang iban pa sang dugang nga mga pagpadayag sang espiritu sining kalibutan?

¹³ May iban pa nga mga pagpadayag sang mahigko nga “hangin” sining kalibutan. Ang isa amo ang espiritu sang pagrebelde. (2 Timoteo 3:​1-3) Natalupangdan bala ninyo nga madamo nga tawo ang wala na nagakooperar sa awtoridad? Napanilagan bala ninyo sa inyo sekular nga trabaho ang lapnag nga buhat sang indi pagtrabaho luwas kon may isa nga nagatan-aw? Pila ka tawo ang kilala ninyo nga naglapas sa kasuguan​—⁠ayhan nangdaya sa ila buhis ukon nangawat gikan sa ginaobrahan? Kon nagaeskwela ka pa, ginlas-ayan ka bala sa paghimo sang imo labing masarangan bangod ginatamay sang imo mga masigkabumulutho ang mga maayo sa klase? Ini tanan mga pagpadayag sang espiritu sang kalibutan nga dapat pamatukan sang mga Cristiano.

Kon Paano Pamatukan ang Espiritu Sining Kalibutan

14. Sa anong mga paagi ang Cristiano tuhay sa mga di-Cristiano?

¹⁴ Apang, paano naton mapamatukan ang espiritu sang kalibutan samtang nagapuyo kita sa kalibutan? Dapat naton dumdumon nga bisan diin man kita sa pisikal, sa espirituwal indi kita bahin sang kalibutan. (Juan 17:​15, 16) Ang aton mga tulumuron indi ang mga tulumuron sining kalibutan. Tuhay ang aton pagtamod sa mga butang. Espirituwal kita nga mga tawo, nga nagahambal kag nagapanghunahuna “indi paagi sa mga pulong nga gintudlo sang tawhanon nga kaalam, kundi paagi sa gintudlo sang espiritu, samtang ginatingob naton ang espirituwal nga mga butang sa espirituwal nga mga pulong.”​—⁠1 Corinto 2:⁠13.

15. Paano naton mapamatukan ang espiritu sang kalibutan?

¹⁵ Ano ang mahimo sang isa ka tawo kon nasapwan niya ang iya kaugalingon sa isa ka duog nga may makahililo nga gas? Mahimo sia magsuksok sing gas mask nga naangot sa matinlo nga hangin, ukon mahimo sia maghalin sa sina nga duog. Ang paagi sa paglikaw sa hangin ni Satanas nagatingob sining mga metodo. Tubtob sa masarangan, ginatinguhaan naton nga magpalayo sa bisan ano nga mahimo maapektuhan sang espiritu sang kalibutan ang aton panghunahuna. Sa amo, ginalikawan naton ang ­malain nga pagpakig-upod, kag wala naton ginapadayag ang aton kaugalingon sa bisan ano nga sahi sang kalingawan nga nagasakdag sa kasingki, imoralidad, espiritismo, pagrebelde, ukon sa bisan ano nga iban pa nga buhat sang unod. (Galacia 5:​19-21) Apang, sanglit nagapuyo kita sa kalibutan, indi naton malikawan sing bug-os nga mapadayag sa sining mga butang. Gani nagahikot kita sing maalamon kon indi kita magbuhi sa suplay sang espirituwal nga lab-as nga hangin. Ginapuno naton ang aton espirituwal nga mga baga paagi sa regular nga pagtambong sa mga miting, personal nga pagtuon, Cristianong hilikuton kag pagpakig-upod, kag pangamuyo. Sa sining paagi, kon ang bisan ano sang hangin ni Satanas magsulod sa aton espirituwal nga mga baga, ang espiritu sang Dios nagapalig-on sa aton nga sikwayon ini.​—⁠Salmo 17:​1-3; Hulubaton 9:9; 13:20; 19:20; 22:⁠17.

16. Paano kita nagahatag sing ebidensia nga may espiritu kita sang Dios?

¹⁶ Ang espiritu sang Dios nagapabag-o sa isa ka Cristiano nga mangin isa ka tawo nga talalupangdon gid nga tuhay sa mga tawo nga bahin sining kalibutan. (Roma 12:​1, 2) Si Pablo nagsiling: “Ang bunga sang espiritu amo ang gugma, kalipay, paghidait, pagkamainantuson, pagkalulo, pagkaayo, pagtuo, pagkalum-ok, pagpugong sang kaugalingon. Wala sing kasuguan batok sa sina nga mga butang.” (Galacia 5:​22, 23) Ang espiritu sang Dios nagahatag man sa isa ka Cristiano sing mas madalom nga paghangop sa mga butang. Si Pablo nagsiling: “Wala sing bisan sin-o nga nakahibalo sang mga butang sang Dios, luwas sa espiritu sang Dios.” (1 Corinto 2:11) Sa kabilugan, “ang mga butang sang Dios” nagalakip sa mga kamatuoran subong sang halad nga gawad, Ginharian sang Dios sa idalom ni Jesucristo, paglaum nga walay katapusan nga kabuhi, kag ang nagahilapit nga paglaglag sa sining malaut nga kalibutan. Sa bulig sang espiritu sang Dios, nahibaluan kag ginabaton sang mga Cristiano ining mga butang subong kamatuoran, kag nagahimo ini sang ila pagtamod sa kabuhi nga tuhay sa pagtamod sang katawhan sang kalibutan. Kontento sila sa pagsapo sang ila kalipay sa pag-alagad kay Jehova karon, nagalaum nga alagdon sia tubtob sa walay katapusan nga magaabot.

17. Sin-o ang nagpahamtang sing superlatibo nga sulundan sa pagpamatok sa espiritu sang kalibutan, kag paano?

¹⁷ Si Jesus isa ka superlatibo nga sulundan para sa mga nagapamatok sa espiritu sining kalibutan. Pagkatapos gid sang bawtismo ni Jesus, gintinguhaan ni Satanas nga patalikuron sia gikan sa pag-alagad kay Jehova paagi sa tatlo ka pagsulay. (Mateo 4:​1-11) Ang katapusan nga pagsulay nagdalahig sa posibilidad nga si Jesus makagahom sa bug-os nga kalibutan sa baylo sang isa lamang ka buhat sang pagsimba kay Satanas. Si Jesus mahimo makapangatarungan: ‘Ti, himuon ko ini nga buhat sang pagsimba, kag kon matigayon ko na ang paggahom sa kalibutan, magahinulsol ako kag magbalik sa pagsimba kay Jehova. Subong manuggahom sang kalibutan, mangin yara ako sa mas maayo nga posisyon sa pagbulig sa katawhan sangsa akon kahimtangan karon subong isa ka panday gikan sa Nazaret.’ Wala mangatarungan si Jesus sing subong sina. Nangin handa sia sa paghulat tubtob mahatag sa iya ni Jehova ang paggahom sa kalibutan. (Salmo 2:⁠8) Sadto nga okasyon, kag sa tanan nga iban pa nga okasyon sa iya kabuhi, ginpamatukan niya ang makahililo nga impluwensia sang hangin ni Satanas. Sa amo, gindaug niya ining mahigko sa espirituwal nga kalibutan.​—⁠Juan 16:⁠33.

18. Paano ang aton pagpamatok sa espiritu sang kalibutan nagadala sing kadayawan sa Dios?

¹⁸ Si apostol Pedro nagsiling nga dapat naton sundon sing maayo ang mga tikang ni Jesus. (1 Pedro 2:21) Sin-o pa ang sulundan naton nga makalabaw sa sini? Sa sining katapusan nga mga adlaw, bangod sang impluwensia sang espiritu sang kalibutan, ang katawhan labi kag labi nga nagasalop sa kalautan. Daw ano katahom nga sa tunga sinang kalibutan, ang mataas nga duog sang pagsimba ni Jehova nagatindog nga putli kag matinlo! (Miqueas 4:​1, 2) Sa pagkamatuod, ang gahom sang espiritu sang Dios kitaon gid kay minilyon ang nagadugok sa duog sang pagsimba sang Dios, nga nagapamatok sa lapnag nga espiritu sining kalibutan kag nagadala sing kadungganan kag kadayawan kay Jehova! (1 Pedro 2:​11, 12) Kabay nga ang tanan mangin determinado nga magpabilin sa sinang mataas nga duog tubtob madula sang hinaplas nga Hari ni Jehova ining malaut nga kalibutan kag itagbong sa kadadalman si Satanas nga Yawa kag ang mga demonyo niya. (Bugna 19:19–20:⁠3) Nian, ang espiritu sining kalibutan indi na magaluntad. Mangin makalilipay gid ina nga tion!

Mapaathag Mo Bala?

◻ Ano ang espiritu sang kalibutan?

◻ Ano ang epekto sang espiritu sining kalibutan sa mga indibiduwal?

◻ Ano ang pila sang mga pagpadayag sang espiritu sang kalibutan, kag paano naton malikawan ini?

◻ Paano naton ginapakita nga may espiritu kita sang Dios?

◻ Anong mga pagpakamaayo ang nagaabot sa mga nagapamatok sa espiritu sang kalibutan?

[Piktyur sa pahina 16, 17]

Ang espiritu sang kalibutan nagahalin kay Satanas

Agod malikawan ang espiritu sang kalibutan, magdangop sa mataas nga duog sang pagsimba ni Jehova