Paano ang Tawo Mangin sa Larawan sang Dios?

“GINTUGA sang Dios ang tawo sa iya larawan, sa larawan sang Dios gintuga niya sia; lalaki kag babayi gintuga niya sila.” Amo ang siling sang inspirado nga rekord, apang ano ang buot silingon sini? Paano ang unang lalaki kag babayi gintuga sa larawan sang Dios?​—Genesis 1:27.

Kaangay bala sila sang Dios sa pisikal? Indi, imposible ina. Ang tawo tawhanon gid, undanon, nga gindesinyo sa pagkabuhi sa duta. Ang Dios espiritu, nga nagapuyo sa indi mahanduraw nga langitnon nga himaya nga indi mapalapitan sang bisan sin-o nga tawo. (Exodo 33:​18-20; 1 Corinto 15:50) Paano, nian, ginhimo ang tawo sa larawan sang Dios? Sa kahulugan nga ang tawo ginhatagan sing ikasarang sa pagpakita sing talalupangdon nga mga kinaiya sang Dios​—gugma, katarungan, kaalam, kag gahom​—subong man sing iban pa nga mga kinaiya.

Ang mga Kinaiya ni Jehova

Ang mga kinaiya ni Jehova nga Dios ginapabanaag sa tanan niya nga tinuga, apang ginpakita ini sing dramatiko sa iya mga pagpakig-angot sa unang tawhanon nga mag-asawa, si Adan kag si Eva. (Roma 1:20) Ang iya gugma dayag gid bangod gintuga niya ang duta nga nagakaigo puy-an sang tawo. Nagtuga si Jehova sing himpit nga asawa para sa lalaki agod mangin kaupod niya kag iloy sang iya mga anak. Ginbutang niya sila nga duha sa isa ka matahom nga hardin kag bugana nga ginhatagan sila sing tanan nga butang nga kinahanglanon sa padayon nga pagkabuhi kag mangin malipayon. Labing dalayawon sa tanan, ginhatagan sila sang Dios sing kahigayunan nga mabuhi tubtob sa walay katubtuban.​—Genesis 2:​7-9, 15-24.

Ang kaalam sang Dios nakita sang gintilawan niya ang unang tawhanon nga mag-asawa. Kon luyag nila magpabilin nga mga katapo sang bug-os uniberso nga pamilya ni Jehova kag kon luyag nila magkabuhi tubtob sa walay katubtuban subong mga ginikanan sang tawhanon nga kaliwatan, dapat sila mangin mga halimbawa sa pagkatutom kag matuod nga pagsimba. Busa, ginhatagan sila ni Jehova sing kahigayunan sa pagpasundayag sang kahimtangan sang ila tagipusuon sa idalom sang nagakaigo nga pagtilaw​—indi sila dapat magkaon sa kahoy sang pagkilala sa maayo kag malaut. Daw ano ka maalamon sa bahin ni Jehova nga tugutan ang mga tawo sa pagpamatuod sang ila pagkamatinumanon kag gugma sa iya antes sila hatagan sing dalayawon nga mga pribilehiyo nga ginahunahuna niya!

Ang katarungan sang Dios nakita sa iya pagpatuman sa iya mga tinuga sang mataas nga mga talaksan kag sa indi pagkompromiso sadtong mga talaksan. Nakita ini sa iya paghatag kay Adan kag kay Eva sing tanan nga kahigayunan nga himuon ang matarong. Kag sang mapaslawan sila sa paghimo sini, ang iya katarungan nakita sa iya pagpamatbat sa ila nga antuson ang ginpamulong nga silot sa pagrebelde.

Ang gahom ni Jehova nakita sa iya pagtuman sang iya pamatbat. Ginpahangop ni Satanas, ang dakung rebelde, nga si Jehova butigon, kag gintanyagan ni Satanas si Eva sing daku nga mga butang kon lalison niya ang Dios. (Genesis 3:​1-7) Apang wala matuman ni Satanas ang iya panaad. Wala niya mapunggan si Jehova sa pagtabog kay Adan kag kay Eva gikan sa hardin sang Eden, kag wala niya mapunggan ang katumanan sang mga ginpamulong sang Dios kay Adan: “Yab-ok ka kag sa yab-ok magabalik ka.” (Genesis 3:19) Apang, wala sa gilayon gintuman ni Jehova ang ginpamatbat nga kamatayon, kag sa sini dugang pa nga ginpakita niya ang iya gugma. Gintugutan niya si Adan kag si Eva nga manganak kag paagi sa amo matuman sa ulihi ang iya orihinal nga katuyuan para sa katawhan.​—Genesis 1:28.

Sang ulihi, ang katarungan, gugma, gahom kag kaalam ni Jehova nga Dios ginpakita sa iya saad nga mag-aman sing isa ka binhi nga magalaglag sa mga binuhatan ni Satanas kag sang makapasubo nga mga resulta sadtong una nga pagrebelde batok sa pagkasoberano sang Dios. (Genesis 3:15) Daw ano ka dalayawon sang aton Manunuga!

Mga Panikasog sa Pag-ilog sa Dios

Bisan pa indi na himpit, ang mga tawo makapakita gihapon sing mga kinaiya sang Dios. Busa, ginpalig-on ni Pablo ang mga Cristiano sang iya adlaw: “Mangin mga manug-ilog kamo sa Dios, subong hinigugma nga mga anak.” (Efeso 5:1) Apang, sa bug-os nga maragtas nagpakita ang kalabanan sing daku nga pagtamay sa mga kinaiya sang Dios. Sang panahon ni Noe, ang mga tawo nangin tuman kalaut amo kon ngaa namat-od si Jehova nga laglagon ang katawhan luwas kay Noe kag ang iya pamilya. Si Noe isa ka “matarong nga tawo. Ginpamatud-an niya ang iya kaugalingon nga walay sala sa tunga sang iya mga kadungan,” kag ginpakita niya ang iya gugma sa Dios paagi sa pagtuman sa mga sugo sang Dios. “Si Noe naghikot suno sa tanan nga ginsugo sa iya sang Dios. Amo gid ang iya ginhimo.” (Genesis 6:​9, 22) Nagpakita si Noe sing gugma sa iya isigkatawo kag sa katarungan paagi sa ‘pagkamanugbantala sing pagkamatarong.’ (2 Pedro 2:5) Nagpakita sia sing kaalam kag nagakaigo nga gingamit ang iya pisikal nga kusog paagi sa pagsunod sa sugo sang Dios nga magtukod sing isa ka daku nga arka, magtago sing kalan-on sa sini, tipunon ang mga sapat, kag magsulod sa arka sa sugo ni Jehova. Ginpakita man niya ang iya gugma sa pagkamatarong paagi sa indi pagtugot sa iya malaut nga mga kaingod nga latnan sia.

Ginalaragway sang Biblia ang madamo pa nga nagpakita man sing diosnon nga mga kinaiya. Ang nagapanguna amo si Jesucristo, nga himpit nga sa laragway sang Dios kag sa amo nakasiling sia: “Ang nakakita sa akon nakakita sa Amay.” (Juan 14:9) Sa mga kinaiya nga ginpakita ni Jesus, ang talalupangdon amo ang iya gugma. Ang gugma sa iya Amay kag sa katawhan nagpahulag sa iya nga biyaan ang iya langitnon nga puluy-an kag magkabuhi subong tawo sa duta. Ginpahulag sini sia nga himayaon ang iya Amay paagi sa iya matarong nga paggawi kag ibantala sa katawhan ang maayong balita sang kaluwasan. (Mateo 4:23; Juan 13:31) Pagkatapos, ginpahulag si Jesus sang gugma nga ihalad ang iya himpit nga kabuhi para sa kaluwasan sang katawhan, kag kapin ka importante, para sa pagpakabalaan sa ngalan sang Dios. (Juan 13:1) Sa pagtinguha nga ilugon ang Dios, may halimbawa pa bala nga mas maayo sangsa kay Jesucristo?​—1 Pedro 2:21.

Paano Kita Karon Mangin Kaangay Gid sang Dios?

Paano naton, karon, mapakita ang mga kinaiya sang Dios kag sa amo nagahikot suno sa larawan sang Dios? Ti, binagbinaga una anay ang gugma nga kinaiya. Si Jesus nagsiling: “Dapat mo higugmaon si Jehova nga imo Dios sa bug-os mo nga tagipusuon kag bug-os mo nga kalag kag bug-os mo nga hunahuna.” Paano kita nagapakita sing gugma sa Dios? Si apostol Juan nagasabat: “Amo ini ang kahulugan sang gugma sa Dios, nga tumanon ta ang iya mga sugo; kag walay sapayan ang iya mga sugo indi mabug-at.”​—Mateo 22:37; 1 Juan 5:3.

Sa pagkamatuod, agod matuman ang mga sugo ni Jehova, dapat naton mahibaluan ini. Nagadalahig ina sing pagbasa, pagtuon, kag pagpamalandong sa Pulong sang Dios, ang Biblia, kag sa mga literatura tuhoy sa Biblia. Kaangay sang salmista, dapat makasiling kita: “Daw ano ang paghigugma ko sa imo kasuguan! Sa bug-os nga adlaw ginakabalak-an ko ini.” (Salmo 119:97) Samtang nagadalom ang aton paghangop sa Pulong sang Dios, ginapuno naton ang kaugalingon sing panghunahuna sang Dios. Ginahigugma naton ang pagkamatarong kag ginadumtan ang pagkamalinapason. (Salmo 45:7) Diri nagsayop si Adan. Nahibaluan niya ang kasuguan ni Jehova, apang kulang ang iya gugma nga sundon ini. Kon nagabasa sing Pulong sang Dios, dapat naton pamangkuton pirme ang aton kaugalingon, ‘Paano ini naaplikar sa akon? Ano ang mahimo ko agod ang akon paggawi kapin pa nga maghisanto sa mga kinaiya sang Dios?’

Si Jesus nagsiling man: “Dapat mo higugmaon ang imo isigkatawo subong sang imo kaugalingon.” (Mateo 22:39) Ang bisan sin-o nga indibiduwal nga maligdong sing panghunahuna nagahigugma sa iya kaugalingon kag nagahandum sing labing maayo para sa iya kaugalingon. Indi ina malain. Apang nagapakita man bala kita sing subong sina nga gugma sa aton isigkatawo? Ginasunod bala naton ang sugo sang Biblia: “Dili pagpunggi ang maayo gikan sa ila sa diin naigo ini, kon ini yara sa gahom sang imo kamot sa paghimo sini”?​—Hulubaton 3:27; Galacia 6:10.

Ano naman ang masiling sa kaalam nga kinaiya? Ang aton pagtinguha nga ipakita ini nga kinaiya nagadul-ong sa aton sa pagtuon sa Biblia bangod amo ina ang talaguan sing diosnon nga kaalam. Ang Salmo 119:​98-100 mabasa: “Ang imo mga sugo nagahimo sa akon nga maalam pa sa akon mga kaaway, bangod akon ini tubtob sa tion nga walay latid. May labi pa ako nga paghangop sa tanan ko nga manunudlo, kay ginapamalandungan ko ang imo mga pahanumdom. Nagahangop ako sing labi pa sa mga tigulang, bangod nga ginbantayan ko ang imo mga sugo.” Sa Hulubaton 3:​18, ang kaalam ginalaragway subong “isa ka kahoy sang kabuhi.” Kon makatigayon kita sing kaalam kag gamiton ini, mabaton naton ang kahamuot sang Dios kag ang padya nga kabuhi nga walay katapusan.​—Manugwali 7:12.

Ano naman ang masiling sa katarungan? Sa sining malaut nga kalibutan, ang katarungan isa ka importante nga kinaiya para sa mga maluyag magpahamuot sa Dios. Ginhigugma ni Jesus ang pagkamatarong (katarungan) kag gindumtan ang pagkamalinapason. (Hebreo 1:9) Amo man ang ginahimo sang mga Cristiano karon. Ang katarungan nagapahulag sa ila nga apresyahon ang matarong nga mga kinaiya. Ginalikawan nila ang dimatarong nga mga dalanon sining kalibutan kag ang paghimo sa kabubut-on sang Dios amo ang labing importante nga butang sa ila kabuhi.​—1 Juan 2:​15-17.

Kon tuhoy sa gahom, kita tanan may diutay sini. Kinaugali nga kita may gahom sa lawas kag sa kinaalam, kag samtang nagauswag kita subong mga Cristiano, nagatigayon kita sing gahom sa espirituwal nga kahulugan. Ginapabaskog ni Jehova ang aton gahom paagi sa iya balaan nga espiritu tubtob sa kasangkaron, nga bisan pa daw maluya kita, mahimo naton ang kabubut-on ni Jehova. Si Pablo nagsiling: “May kusog ako para sa tanan nga butang bangod sa iya nga nagahatag sa akon sing gahom.” (Filipos 4:13) Matigayon man naton ini nga kusog kon mangamuyo kita para sa espiritu ni Jehova.

Pagbantala sing Maayong Balita

Ang aton pagpakita sa apat ka daku nga kinaiya sang Dios makita sing maathag sa aton pagtuman sa sugo nga: “Lakat kamo busa kag maghimo sing mga alagad sa mga tawo sang tanan nga pungsod, nga ginabawtismuhan sila sa ngalan sang Amay kag sang Anak kag sang balaan nga espiritu, nga ginatudlo sa ila nga tumanon ang tanan nga butang nga ginasugo ko sa inyo. Kag, yari karon! kaupod ninyo ako sa tanan nga adlaw tubtob sa katapusan sang sistema sang mga butang.” (Mateo 28:​19, 20) Ina nga hilikuton sa pagpanudlo nagadala sing kabuhi sa mga nagabaton. Daw ano kaayo nga pagpakita sing gugma para sa ila nga, sa masami, indi gid naton kilala sang primero!

Dugang pa, ina nga pagpanudlo amo ang dalanon sang kaalam. Nagadala ini sing mga bunga nga nagapadayon. Tuhoy sa ano pa nga hilikuton nga sarang ini masiling: “Paagi sa paghimo sini maluwas mo ang imo kaugalingon kag ang mga nagapamati sa imo”? (1 Timoteo 4:16) Wala sing pierdi sa paghimo sing disipulo nga hilikuton. Ang mga nagapamati kag ang nagapanudlo lunsay magatigayon sing walay katapusan nga mga pagpakamaayo.

Tuhoy sa katarungan, ang mga Cristiano nagatudlo sing matarong nga mga prinsipio sa ila mga estudyante sa Biblia. Ginabuligan naton sila sa pag-alagad kay Jehova, “ang Dios sang katarungan.” (Malaquias 2:17) Ang mga nagadedikar karon sang ila kabuhi sa pag-alagad kay Jehova kag nagapabilin nga matutom ginadeklarar nga matarong, ginpakamatarong, nga nagadul-ong sa ila pagkaluwas sa Armagedon.​—Roma 3:24; Santiago 2:​24-26.

Daw ano nga pagpasundayag sing gahom ang pagbantala kag pagpanudlo sing maayong balita sa bug-os nga kalibutan! (Mateo 24:14) Kinahanglan ang pagbatas sa padayon nga pagbantala sa mga teritoryo diin wala nagapamati ang kalabanan. Apang si Jehova, paagi sa iya espiritu, nagahatag sing kusog nga kinahanglanon sa pagbatas tubtob sa katapusan.​—Isaias 40:​30, 31; Mateo 24:13; Lucas 11:13.

Matuod, subong dihimpit nga mga anak ni Adan, indi naton mapakita sing himpit ining maayong mga kinaiya. Apang, dumduma, ginhimo ang tawo sa larawan sang Dios, kag kon magtinguha kita nga mangin kaangay sang Dios sing kapin kag kapin pa, nian sa bahin ginatuman naton ang rason kon ngaa nagakabuhi kita. (Manugwali 12:13) Kon manikasog kita nga himuon ang aton labing masarangan kag mangayo sing patawad kon makasala kita, nian makalaum kita nga maluwas padulong sa matarong nga bag-ong kalibutan sang Dios, diin sa ulihi mangin himpit kita. Nian, mangin sa paraiso kita nga ginapuy-an sang himpit nga mga tawo, ang tanan nagapakita sing mga kinaiya sang Dios sa kabug-usan. Daw ano nga kalipay! Sa katapusan, sa pinakabug-os nga kahulugan sang pinamulong, ang mga tawo mangin sa larawan sang Dios.

[Piktyur sa pahina 25]

Ginpakita sa aton ni Jesus kon paano palambuon ang diosnon nga mga kinaiya ni Jehova

[Piktyur sa pahina 26]

Sa katapusan, ang mga tawo mangin sa pinakabug-os nga kahulugan sa larawan sang Dios